໔. ວຸຏ຺ຐິສຸຕ຺ຕວຓ຺ຓນາ

໗໔. ຈຕຸຕ຺ເຖ ພີຊນ຺ຕິ ອຸປ຺ປຕນ຺ຕານໍ ສຕ຺ຕວິຘໍ ຘຎ຺ຎພີຊໍ ເສຏ຺ຐໍ. ຕສ຺ມິຎ຺ຫິ ອຸຄ຺ຄເຕ ຊນປໂທ ເຂໂມ ໂຫຕິ ສຸຠິກ຺ໂຂ. ນິປຕຕນ຺ຕິ ນິປຕນ຺ຕານໍ ເມຆວຸຏ຺ຐິ ເສຏ຺ຐາ. ເມຆວຸຏ຺ຐິຍຎ຺ຫິ ສຕິ ວິວິຘານິ ສສ຺ສານິ ອຸປ຺ປຊ຺ຊນ຺ຕິ, ຊນປທາ ຜີຕາ ໂຫນ຺ຕິ ເຂມາ ສຸຠິກ຺ຂາ. ປວຊມານານນ຺ຕິ ຊງ຺ຄມານໍ ປທສາ ຈຣມານານໍ ຄາໂວ ເສຏ຺ຐາ. ຕາ ນິສ຺ສາຍ ຫິ ສຕ຺ຕາ ປຎ຺ຈ ໂຄຣເສ ປຣິຠຸຎ຺ຊມານາ ສຸຂໍ ວິຫຣນ຺ຕິ. ປວທຕນ຺ຕິ ຣາຊກຸລມຊ຺ຌາທີສຸ ວທນ຺ຕານໍ ປຸຕ຺ໂຕ ວໂຣ. ໂສ ຫິ ມາຕາປິຕູນໍ ອນຕ຺ຖາວຫໍ ນ ວທຕິ.

ວິຊ຺ຊາ ອຸປ຺ປຕຕໍ ເສຏ຺ຐາຕິ ປຸຣິມປຎ຺ເຫ ກິຣ ສຸຕ຺ວາ ສມີເປ ຐິຕາ ເອກາ ເທວຕາ ‘‘ເທວເຕ, ກສ຺ມາ ຕ຺ວໍ ເອຕໍ ປຎ຺ຫໍ ທສພລໍ ປຸຈ຺ຉສິ? ອຫໍ ເຕ ກເຖສ຺ສາມີ’’ຕິ ອຕ຺ຕໂນ ຂນ຺ຕິຍາ ລທ຺ຘິຍາ ປຎ຺ຫໍ ກເຖສິ. ອຖ ນໍ ອິຕຣາ ເທວຕາ ອາຫ – ‘‘ຍາວ ປຘໍສີ ວເທສິ ເທວເຕ ຍາວ ປຄພ຺ຠາ ມຸຂຣາ, ອຫໍ ພຸທ຺ຘໍ ຠຄວນ຺ຕໍ ປຸຈ຺ຉາມິ. ຕ຺ວໍ ມຍ຺ຫໍ ກສ຺ມາ ກເຖສີ’’ຕິ? ນິວຕ຺ເຕຕ຺ວາ ຕເທວ ປຎ຺ຫໍ ທສພລໍ ປຸຈ຺ຉິ. ອຖສ຺ສາ ສຕ຺ຖາ ວິສ຺ສຊ຺ເຊນ຺ໂຕ ວິຊ຺ຊາ ອຸປ຺ປຕຕນ຺ຕິອາທິມາຫ. ຕຕ຺ຖ ວິຊ຺ຊາຕິ ຈຕຸມຄ຺ຄວິຊ຺ຊາ. ສາ ຫິ ອຸປ຺ປຕມານາ ສພ຺ພາກຸສລຘມ຺ເມ ສມຸຄ຺ຆາເຕຕິ. ຕສ຺ມາ ‘‘ອຸປ຺ປຕຕໍ ເສຏ຺ຐາ’’ຕິ ວຸຕ຺ຕາ. ອວິຊ຺ຊາຕິ ວຏ຺ຏມູລກມຫາອວິຊ຺ຊາ. ສາ ຫິ ນິປຕນ຺ຕານໍ ໂອສີທນ຺ຕານໍ ວຣາ. ປວຊມານານນ຺ຕິ ປທສາ ຈຣມານານໍ ຊງ຺ຄມານໍ ອໂນມປຸຎ຺ຎກ຺ເຂຕ຺ຕຠູໂຕ ສງ຺ໂຆ ວໂຣ. ຕຎ຺ຫິ ຕຕ຺ຖ ຕຕ຺ຖ ທິສ຺ວາ ປສນ຺ນຈິຕ຺ຕາ ສຕ຺ຕາ ໂສຕ຺ຖິໍ ປາປຸຓນ຺ຕິ. ພຸທ຺ໂຘຕິ ຍາທິໂສ ປຸຕ຺ໂຕ ວາ ໂຫຕຸ ອຎ຺ໂຎ ວາ, ເຍສໍ ເກສຎ຺ຈິ ວທມານານໍ ພຸທ຺ໂຘ ວໂຣ. ຕສ຺ສ ຫິ ຘມ຺ມເທສນໍ ອາຄມ຺ມ ອເນກສຕສຫສ຺ສານໍ ປາຓານໍ ພນ຺ຘນໂມກ຺ໂຂ ໂຫຕີຕິ. ຈຕຸຕ຺ຖໍ.