໖. ຊຣາວຄ຺ໂຄ

໑. ຊຣາສຸຕ຺ຕວຓ຺ຓນາ

໕໑. ຊຣາວຄ຺ຄສ຺ສ ປຐເມ ສາຘູຕິ ລທ຺ຘກໍ ຠທ຺ທກໍ. ສີລໍ ຍາວ ຊຣາຕິ ອິມິນາ ອິທໍ ທສ຺ເສຕິ – ຍຖາ ມຸຕ຺ຕາມຓິຣຕ຺ຕວຕ຺ຖາທີນິ ອາຠຣຓານິ ຕຣຸຓກາເລເຍວ ໂສຠນ຺ຕິ, ຊຣາຊິຓ຺ຓກາເລ ຕານິ ຘາເຣນ຺ໂຕ ‘‘ອຍໍ ອຊ຺ຊາປິ ພາລຠາວໍ ປຕ຺ເຖຕິ, ອຸມ຺ມຕ຺ຕໂກ ມຎ຺ເຎ’’ຕິ ວຕ຺ຕພ຺ພຕໍ ອາປຊ຺ຊຕິ, ນ ເອວໍ ສີລໍ. ສີລຎ຺ຫິ ນິຈ຺ຈກາລໍ ໂສຠຕິ. ພາລກາເລປິ ຫິ ສີລໍ ຣກ຺ຂນ຺ຕໍ ‘‘ກິໍ ອິມສ຺ສ ສີເລນາ’’ຕິ? ວຕ຺ຕາໂຣ ນຕ຺ຖິ. ມຊ຺ຌິມກາເລປິ ມຫລ຺ລກກາເລປີຕິ.

ສທ຺ຘາ ສາຘຸ ປຕິຏ຺ຐິຕາຕິ ຫຕ຺ຖາຬວກຈິຕ຺ຕຄຫປຕິອາທີນໍ ວິຍ ມຄ຺ເຄນ ອາຄຕາ ປຕິຏ຺ຐິຕສທ຺ຘາ ນາມ ສາຘຸ. ປຎ຺ຎາ ນຣານໍ ຣຕນນ຺ຕິ ເອຕ຺ຖ ຈິຕ຺ຕີກຕຏ຺ຐາທີຫິ ຣຕນໍ ເວທິຕພ຺ພໍ. ວຸຕ຺ຕຎ຺ເຫຕໍ –

‘‘ຍທິ ຈິຕ຺ຕີກຕນ຺ຕິ ຣຕນໍ, ນນຸ ຠຄວາ ຈິຕ຺ຕີກໂຕ ປຸຣິສສີໂຫ, ເຍ ຈ ໂລເກ ຈິຕ຺ຕີກຕາ, ເຕສໍ ຈິຕ຺ຕີກໂຕ ຠຄວາ. ຍທິ ຣຕິກຣນ຺ຕິ ຣຕນໍ, ນນຸ ຠຄວາ ຣຕິກໂຣ ປຸຣິສສີໂຫ, ຕສ຺ສ ວຈເນນ ຈຣນ຺ຕາ ຌານຣຕິສຸເຂນ ອຠິຣມນ຺ຕິ. ຍທິ ອຕຸລ຺ຍນ຺ຕິ ຣຕນໍ, ນນຸ ຠຄວາ ອຕຸໂລ ປຸຣິສສີໂຫ. ນ ຫິ ສກ຺ກາ ຕຸເລຕຸໍ ຄຸເຓຫິ ຄຸຓປາຣມິໍ ຄໂຕ. ຍທິ ທຸລ຺ລຠນ຺ຕິ ຣຕນໍ, ນນຸ ຠຄວາ ທຸລ຺ລໂຠ ປຸຣິສສີໂຫ. ຍທິ ອໂນມສຕ຺ຕປຣິໂຠຄນ຺ຕິ ຣຕນໍ, ນນຸ ຠຄວາ ອໂນໂມ ສີເລນ ສມາຘິນາ ປຎ຺ຎາຍ ວິມຸຕ຺ຕິຍາ ວິມຸຕ຺ຕິຎາຓທສ຺ສເນນາ’’ຕິ.

ອິຘ ປນ ທຸລ຺ລຠປາຕຸຠາວຏ຺ເຐນ ປຎ຺ຎາ ‘‘ຣຕນ’’ນ຺ຕິ ວຸຕ຺ຕໍ. ປຸຎ຺ຎນ຺ຕິ ປຸຎ຺ຎເຈຕນາ, ສາ ຫິ ອຣູປຕ຺ຕາ ປຣິຫຣິຕຸໍ ນ ສກ຺ກາຕິ. ປຐມໍ.

໒. ອຊຣສາສຸຕ຺ຕວຓ຺ຓນາ

໕໒. ທຸຕິເຍ ອຊຣສາຕິ ອຊີຣເຓນ, ອວິປຕ຺ຕິຍາຕິ ອຕ຺ໂຖ. ສີລຎ຺ຫິ ອວິປນ຺ນເມວ ສາຘຸ ໂຫຕິ, ວິປນ຺ນສີລໍ ອາຈຣິຍຸປຊ຺ຌາຍາທໂຍປິ ນ ສງ຺ຄຓ຺ຫນ຺ຕິ, ຄຕຄຕຏ຺ຐາເນ ນິທ຺ຘມິຕພ຺ໂພວ ໂຫຕີຕິ. ທຸຕິຍໍ.

໓. ມິຕ຺ຕສຸຕ຺ຕວຓ຺ຓນາ

໕໓. ຕຕິເຍ ສຕ຺ໂຖຕິ ສທ຺ຘິໍຈໂຣ, ຊງ຺ຆສຕ຺ໂຖ ວາ ສກຏສຕ຺ໂຖ ວາ. ມິຕ຺ຕນ຺ຕິ ໂຣເຄ ອຸປ຺ປນ຺ເນ ປາຏງ຺ກິຍາ ວາ ອຎ຺ເຎນ ວາ ຍາເນນ ຫຣິຕ຺ວາ ເຂມນ຺ຕສມ຺ປາປເນນ ມິຕ຺ຕໍ. ສເກ ຆເຣຕິ ອຕ຺ຕໂນ ເຄເຫ. ຕຖາຣູເປ ໂຣເຄ ຊາເຕ ປຸຕ຺ຕຠຣິຍາທໂຍ ຊິຄຸຈ຺ຉນ຺ຕິ, ມາຕາ ປນ ອສຸຈິມ຺ປິ ຈນ຺ທນໍ ວິຍ ມຎ຺ຎຕິ. ຕສ຺ມາ ສາ ສເກ ຆເຣ ມິຕ຺ຕໍ. ສຫາໂຍ ອຕ຺ຖຊາຕສ຺ສາຕິ ອຸປ຺ປນ຺ນກິຈ຺ຈສ຺ສ ໂຍ ຕໍ ກິຈ຺ຈໍ ວຫຕິ ນິຕ຺ຖຣຕິ, ໂສ ກິຈ຺ເຈສຸ ສຫ ອຍນຠາເວນ ສຫາໂຍ ມິຕ຺ຕໍ, ສຸຣາປານາທິສຫາຍາ ປນ ນ ມິຕ຺ຕາ. ສມ຺ປຣາຍິກນ຺ຕິ ສມ຺ປຣາຍຫິຕໍ. ຕຕິຍໍ.

໔. ວຕ຺ຖຸສຸຕ຺ຕວຓ຺ຓນາ

໕໔. ຈຕຸຕ຺ເຖ ປຸຕ຺ຕາ ວຕ຺ຖູຕິ ມຫລ຺ລກກາເລ ປຏິຊຄ຺ຄນຏ຺ເຐນ ປຸຕ຺ຕາ ປຕິຏ຺ຐາ. ປຣໂມຕິ ອຎ຺ເຎສໍ ອກເຖຕພ຺ພສ຺ສປິ ຄຸຍ຺ຫສ຺ສ ກເຖຕພ຺ພຍຸຕ຺ຕຕາຍ ຠຣິຍາ ປຣໂມ ສຂາ ນາມ. ຈຕຸຕ຺ຖໍ.

໕-໗. ປຐມຊນສຸຕ຺ຕາທິວຓ຺ຓນາ

໕໕. ປຎ຺ຈເມ ວິຘາວຕີຕິ ປຣສມຸທ຺ທາທິຄມນວເສນ ອິໂຕ ຈິໂຕ ຈ ວິຘາວຕິ. ປຎ຺ຈມໍ.

໕໖. ຉຏ຺ເຐ ທຸກ຺ຂາຕິ ວຏ຺ຏທຸກ຺ຂໂຕ. ຉຏ຺ຐໍ.

໕໗. ສຕ຺ຕເມ ປຣາຍຓນ຺ຕິ ນິປ຺ຜຕ຺ຕິ ອວສ຺ສໂຍ. ສຕ຺ຕມໍ.

໘. ອຸປ຺ປຖສຸຕ຺ຕວຓ຺ຓນາ

໕໘. ອຏ຺ຐເມ ຣາໂຄ ອຸປ຺ປໂຖຕິ ສຸຄຕິຎ຺ຈ ນິພ຺ພານຎ຺ຈ ຄຈ຺ຉນ຺ຕສ຺ສ ອມຄ຺ໂຄ. ຣຕ຺ຕິນ຺ທິວກ຺ຂໂຍຕິ ຣຕ຺ຕິທິເວຫິ, ຣຕ຺ຕິທິເວສຸ ວາ ຂີຍຕິ. ອິຕ຺ຖີ ມລນ຺ຕິ ເສສໍ ພາຫິຣມລໍ ຠສ຺ມຂາຣາທີຫິ ໂຘວິຕ຺ວາ ສກ຺ກາ ໂສເຘຕຸໍ, ມາຕຸຄາມມເລນ ທຸຏ຺ໂຐ ປນ ນ ສກ຺ກາ ສຸທ຺ໂຘ ນາມ ກາຕຸນ຺ຕິ ອິຕ຺ຖີ ‘‘ມລ’’ນ຺ຕິ ວຸຕ຺ຕາ. ເອຕ຺ຖາຕິ ເອຕ຺ຖ ອິຕ຺ຖິຍໍ ປຊາ ສຊ຺ຊຕິ. ຕໂປຕິ ອິນ຺ທ຺ຣິຍສໍວຣຘຸຕງ຺ຄຄຸຓວີຣິຍທຸກ຺ກຣກາຣິການໍ ນາມໍ, ອິຘ ປນ ຐເປຕ຺ວາ ທຸກ຺ກຣກາຣິກໍ ສພ຺ພາປິ ກິເລສສນ຺ຕາປິກາ ປຏິປທາ ວຏ຺ຏຕິ. ພ຺ຣຫ຺ມຈຣິຍນ຺ຕິ ເມຖຸນວິຣຕິ. ອຏ຺ຐມໍ.

໙. ທຸຕິຍສຸຕ຺ຕວຓ຺ຓນາ

໕໙. ນວເມ ກິສ຺ສ ຈາຠິຣໂຕຕິ ກິສ຺ມິໍ ອຠິຣໂຕ. ທຸຕິຍາຕິ ສຸຄຕິຎ຺ເຈວ ນິພ຺ພານຎ຺ຈ ຄຈ຺ຉນ຺ຕສ຺ສ ທຸຕິຍິກາ. ປຎ຺ຎາ ເຈນໍ ປສາສຕີຕິ ປຎ຺ຎາ ເອຕໍ ປຸຣິສໍ ‘‘ອິທໍ ກໂຣຫິ, ອິທໍ ມາກຣີ’’ຕິ ອນຸສາສຕິ. ນວມໍ.

໑໐. ກວິສຸຕ຺ຕວຓ຺ຓນາ

໖໐. ທສເມ ຉນ຺ໂທ ນິທານນ຺ຕິ ຄາຍຕ຺ຕິອາທິໂກ ຉນ຺ໂທ ຄາຖານໍ ນິທານໍ. ປຸພ຺ພປຏ຺ຐາປນຄາຖາ ອາຣຠນ຺ໂຕ ຫິ ‘‘ກຕຣຈ຺ຉນ຺ເທນ ໂຫຕູ’’ຕິ ອາຣຠຕິ. ວິຍຎ຺ຊນນ຺ຕິ ຊນນໍ. ອກ຺ຂຣໍ ຫິ ປທໍ ຊເນຕິ, ປທໍ ຄາຖໍ ຊເນຕິ, ຄາຖາ ອຕ຺ຖໍ ປກາເສຕີຕິ. ນາມສນ຺ນິສ຺ສິຕາຕິ ສມຸທ຺ທາທິປຓ຺ຓຕ຺ຕິນິສ຺ສິຕາ. ຄາຖາ ອາຣຠນ຺ໂຕ ຫິ ສມຸທ຺ທໍ ວາ ປຖວິໍ ວາ ຍໍ ກິຎ຺ຈິ ນາມໍ ນິສ຺ສຍິຕ຺ວາວ ອາຣຠຕິ. ອາສໂຍຕິ ປຕິຏ຺ຐາ. ກວິໂຕ ຫິ ຄາຖາ ປວຕ຺ຕນ຺ຕິ. ໂສ ຕາສໍ ປຕິຏ຺ຐາ ໂຫຕີຕິ. ທສມໍ.

ຊຣາວຄ຺ໂຄ ຉຏ຺ໂຐ.