໗. ອທ຺ຘວຄ຺ໂຄ

໑. ນາມສຸຕ຺ຕວຓ຺ຓນາ

໖໑. ອທ຺ຘວຄ຺ຄສ຺ສ ປຐເມ ນາມໍ ສພ຺ພໍ ອທ຺ຘຠວີຕິ ນາມໍ ສພ຺ພໍ ອຠິຠວຕິ ອນຸປຕຕິ. ໂອປປາຕິເກນ ວາ ຫິ ກິຕ຺ຕິເມນ ວາ ນາເມນ ມຸຕ຺ໂຕ ສຕ຺ໂຕ ວາ ສງ຺ຂາໂຣ ວາ ນຕ຺ຖິ. ຍສ຺ສປິ ຫິ ຣຸກ຺ຂສ຺ສ ວາ ປາສາຓສ຺ສ ວາ ‘‘ອິທໍ ນາມ ນາມ’’ນ຺ຕິ ນ ຊານນ຺ຕິ, ອນາມໂກຕ຺ເວວ ຕສ຺ສ ນາມໍ ໂຫຕິ. ປຐມໍ.

໒-໓. ຈິຕ຺ຕສຸຕ຺ຕາທິວຓ຺ຓນາ

໖໒. ທຸຕິເຍ ສພ຺ເພວ ວສມນ຺ວຄູຕິ ເຍ ຈິຕ຺ຕສ຺ສ ວສໍ ຄຈ຺ຉນ຺ຕິ, ເຕສໍເຍວ ອນວເສສປຣິຍາທານເມຕໍ. ທຸຕິຍໍ.

໖໓. ຕຕິເຍປິ ເອເສວ ນໂຍ. ຕຕິຍໍ.

໔-໕. ສໍໂຍຊນສຸຕ຺ຕາທິວຓ຺ຓນາ

໖໔. ຈຕຸຕ຺ເຖ ກິໍ ສຸ ສໍໂຍຊໂນຕິ ກິໍ ສໍໂຍຊໂນ ກິໍ ພນ຺ຘໂນ? ວິຈາຣຓນ຺ຕິ ວິຈຣຓາ ປາທານິ. ພຫຸວຈເນ ເອກວຈນໍ ກຕໍ. ວິຕກ຺ກສ຺ສ ວິຈາຣຓນ຺ຕິ ວິຕກ຺ໂກ ຕສ຺ສ ປາທາ. ຈຕຸຕ຺ຖໍ.

໖໕. ປຎ຺ຈເມປິ ເອເສວ ນໂຍ. ປຎ຺ຈມໍ.

໖. ອຕ຺ຕຫຕສຸຕ຺ຕວຓ຺ຓນາ

໖໖. ຉຏ຺ເຐ ເກນສ຺ສຸພ຺ຠາຫໂຕຕິ ເກນ ອພ຺ຠາຫໂຕ. ສຸ-ກາໂຣ ນິປາຕມຕ຺ຕໍ. ອິຈ຺ຉາຘູປາຍິໂຕຕິ ອິຈ຺ຉາຍ ອາທິຕ຺ໂຕ. ຉຏ຺ຐໍ.

໗-໙. ອຸຑ຺ຑິຕສຸຕ຺ຕາທິວຓ຺ຓນາ

໖໗. ສຕ຺ຕເມ ຕຓ຺ຫາຍ ອຸຑ຺ຑິໂຕຕິ ຕຓ຺ຫາຍ ອຸລ຺ລງ຺ຆິໂຕ. ຈກ຺ຂຸຎ຺ຫິ ຕຓ຺ຫາຣຊ຺ຊຸນາ ອາວຸນິຕ຺ວາ ຣູປນາຄທນ຺ເຕ ອຸຑ຺ຑິຕໍ, ໂສຕາທີນິ ສທ຺ທາທີສູຕິ ຕຓ຺ຫາຍ ອຸຑ຺ຑິໂຕ ໂລໂກ. ມຈ຺ຈຸນາ ປິຫິໂຕຕິ ອນນ຺ຕເຣ ອຕ຺ຕຠາເວ ກຕໍ ກມ຺ມໍ ນ ທູຣໍ ເອກຈິຕ຺ຕນ຺ຕຣໍ, ພລວຕິຍາ ປນ ມາຣຓນ຺ຕິກເວທນາຍ ປພ຺ພເຕນ ວິຍ ໂອຕ຺ຖຏຕ຺ຕາ ສຕ຺ຕາ ຕໍ ນ ພຸຊ຺ຌນ຺ຕີຕິ ‘‘ມຈ຺ຈຸນາ ປິຫິໂຕ ໂລໂກ’’ຕິ ວຸຕ຺ຕໍ. ສຕ຺ຕມໍ.

໖໘. ອຏ຺ຐເມ ສ຺ເວວ ປຎ຺ໂຫ ເທວຕາຍ ເຫຏ຺ຐຸປຣິຍາຍວເສນ ປຸຈ຺ຉິໂຕ. ອຏ຺ຐມໍ.

໖໙. ນວເມ ສພ຺ພໍ ອຸຕ຺ຕານເມວ. ນວມໍ.

໑໐. ໂລກສຸຕ຺ຕວຓ຺ຓນາ

໗໐. ທສເມ ກິສ຺ມິໍ ໂລໂກ ສມຸປ຺ປນ຺ໂນຕິ ກິສ຺ມິໍ ອຸປ຺ປນ຺ເນ ໂລໂກ ອຸປ຺ປນ຺ໂນຕິ ປຸຈ຺ຉຕິ. ຉສູຕິ ຉສຸ ອຊ຺ຌຕ຺ຕິເກສຸ ອາຍຕເນສຸ ອຸປ຺ປນ຺ເນສຸ ອຸປ຺ປນ຺ໂນຕິ ວຸຈ຺ຈຕິ. ຉສຸ ກຸພ຺ພຕີຕິ ເຕສຸເຍວ ຉສຸ ສນ຺ຖວໍ ກໂຣຕິ. ອຸປາທາຍາຕິ ຕານິເຍວ ຈ ອຸປາທາຍ ອາຄມ຺ມ ປຏິຈ຺ຈ ປວຕ຺ຕຕິ. ວິຫຎ຺ຎຕີຕິ ເຕສຸເຍວ ຉສຸ ວິຫຎ຺ຎຕິ ປີຬິຍຕິ. ອິຕິ ອຊ຺ຌຕ຺ຕິກາຍຕນວເສນ ອຍໍ ປຎ຺ໂຫ ອາຄໂຕ, ອຊ຺ຌຕ຺ຕິກພາຫິຣານໍ ປນ ວເສນ ອາຫຣິຕຸໍ ວຏ຺ຏຕິ. ຉສຸ ຫິ ອຊ຺ຌຕ຺ຕິກາຍຕເນສຸ ອຸປ຺ປນ຺ເນສຸ ອຍໍ ອຸປ຺ປນ຺ໂນ ນາມ ໂຫຕິ, ຉສຸ ພາຫິເຣສຸ ສນ຺ຖວໍ ກໂຣຕິ, ຉນ຺ນໍ ອຊ຺ຌຕ຺ຕິການໍ ອຸປາທາຍ ຉສຸ ພາຫິເຣສຸ ວິຫຎ຺ຎຕີຕິ. ທສມໍ.

ອທ຺ຘວຄ຺ໂຄ ສຕ຺ຕໂມ.