໙. ມຈ຺ຉຣິສຸຕ຺ຕວຓ຺ຓນາ

໔໙. ນວເມ ມຈ຺ຉຣິໂນຕິ ມຈ຺ເຉເຣນ ສມນ຺ນາຄຕາ. ເອກຈ຺ໂຈ ຫິ ອຕ຺ຕໂນ ວສນຏ຺ຐາເນ ຠິກ຺ຂຸໍ ຫຕ຺ຖໍ ປສາເຣຕ຺ວາປິ ນ ວນ຺ທຕິ, ອຎ຺ຎຕ຺ຖ ຄໂຕ ວິຫາຣໍ ປວິສິຕ຺ວາ ສກ຺ກຈ຺ຈໍ ວນ຺ທິຕ຺ວາ ມຘຸຣປຏິສນ຺ຖາຣໍ ກໂຣຕິ – ‘‘ຠນ຺ເຕ, ອມ຺ຫາກໍ ວສນຏ຺ຐານໍ ນາຄຈ຺ຉຖ, ສມ຺ປນ຺ໂນ ປເທໂສ, ປຏິພລາ ມຍໍ ອຍ຺ຍານໍ ຍາຄຸຠຕ຺ຕາທີຫິ ອຸປຏ຺ຐານໍ ກາຕຸ’’ນ຺ຕິ. ຠິກ຺ຂູ ‘‘ສທ຺ໂຘ ອຍໍ ອຸປາສໂກ’’ຕິ ຍາຄຸຠຕ຺ຕາທີຫິ ສງ຺ຄຓ຺ຫນ຺ຕິ. ອເຖໂກ ເຖໂຣ ຕສ຺ສ ຄາມໍ ຄນ຺ຕ຺ວາ ປິຓ຺ຑາຍ ຈຣຕິ. ໂສ ຕໍ ທິສ຺ວາ ອຎ຺ເຎນ ວາ ຄຈ຺ຉຕິ, ຆຣໍ ວາ ປວິສຕິ. ສເຈປິ ສມ຺ມຸຂີຠາວໍ ອາຄຈ຺ຉຕິ, ຫຕ຺ເຖນ ວນ຺ທິຕ຺ວາ – ‘‘ອຍ຺ຍສ຺ສ ຠິກ຺ຂໍ ເທຖ, ອຫໍ ເອເກນ ກມ຺ເມນ ຄຈ຺ຉາມີ’’ຕິ ປກ຺ກມຕິ. ເຖໂຣ ສກລຄາມໍ ຈຣິຕ຺ວາ ຕຸຈ຺ຉປຕ຺ໂຕວ ນິກ຺ຂມຕິ. ອິທໍ ຕາວ ມຸທຸມຈ຺ຉຣິຍໍ ນາມ, ເຍນ ສມນ຺ນາຄໂຕ ອທາຍໂກປິ ທາຍໂກ ວິຍ ປຎ຺ຎາຍຕິ. ອິຘ ປນ ຖທ຺ຘມຈ຺ຉຣິຍໍ ອຘິປ຺ເປຕໍ, ເຍນ ສມນ຺ນາຄໂຕ ຠິກ຺ຂູສຸ ປິຓ຺ຑາຍ ປວິຏ຺ເຐສຸ, ‘‘ເຖຣາ ຐິຕາ’’ຕິ ວຸຕ຺ເຕ, ‘‘ກິໍ ມຍ຺ຫໍ ປາທາ ຣຸຊ຺ຊນ຺ຕີ’’ຕິອາທີນິ ວຕ຺ວາ ສິລາຖມ຺ໂຠ ວິຍ ຂາຓຸໂກ ວິຍ ຈ ຖທ຺ໂຘ ຫຸຕ຺ວາ ຕິຏ຺ຐຕິ, ສາມີຈິມ຺ປິ ນ ກໂຣຕິ. ກທຣິຍາຕິ ອິທໍ ມຈ຺ຉຣິໂນຕິ ປທສ຺ເສວ ເວວຈນໍ. ມຸທຸກມ຺ປິ ຫິ ມຈ຺ຉຣິຍໍ ‘‘ມຈ຺ຉຣິຍ’’ນ຺ເຕວ ວຸຈ຺ຈຕິ, ຖທ຺ຘໍ ປນ ກທຣິຍໍ ນາມ. ປຣິຠາສກາຕິ ຠິກ຺ຂູ ຆຣທ຺ວາເຣ ຐິເຕ ທິສ຺ວາ, ‘‘ກິໍ ຕຸມ຺ເຫ ກສິຕ຺ວາ ອາຄຕາ, ວປິຕ຺ວາ, ລາຍິຕ຺ວາ? ມຍໍ ອຕ຺ຕໂນປິ ນ ລຠາມ, ກຸໂຕ ຕຸມ຺ຫາກໍ, ສີຆໍ ນິກ຺ຂມຖາ’’ຕິອາທີຫິ ສໍຕຊ຺ຊກາ. ອນ຺ຕຣາຍກຣາຕິ ທາຍກສ຺ສ ສຄ຺ຄນ຺ຕຣາໂຍ, ປຏິຄ຺ຄາຫການໍ ລາຠນ຺ຕຣາໂຍ, ອຕ຺ຕໂນ ອຸປຆາໂຕຕິ ອິເມສໍ ອນ຺ຕຣາຍານໍ ກາຣກາ.

ສມ຺ປຣາໂຍຕິ ປຣໂລໂກ. ຣຕີຕິ ປຎ຺ຈກາມຄຸຓຣຕິ. ຂິຑ຺ຑາຕິ ກາຍິກຂິຑ຺ຑາທິກາ ຕິວິຘາ ຂິຑ຺ຑາ. ທິຏ຺ເຐ ຘມ຺ເມສ ວິປາໂກຕິ ຕສ຺ມິໍ ນິພ຺ພຕ຺ຕຠວເນ ທິຏ຺ເຐ ຘມ຺ເມ ເອສ ວິປາໂກ. ສມ຺ປຣາເຍ ຈ ທຸຄ຺ຄຕີຕິ ‘‘ຍມໂລກໍ ອຸປປຊ຺ຊເຣ’’ຕິ ວຸຕ຺ເຕ ສມ຺ປຣາເຍ ຈ ທຸຄ຺ຄຕິ.

ວທຎ຺ຎູຕິ ຠິກ຺ຂູ ຆຣທ຺ວາເຣ ຐິຕາ ກິຎ຺ຈາປິ ຕຸຓ຺ຫີວ ໂຫນ຺ຕິ, ອຕ຺ຖໂຕ ປນ – ‘‘ຠິກ຺ຂໍ ເທຖາ’’ຕິ ວທນ຺ຕິ ນາມ. ຕຕ຺ຣ ເຍ ‘‘ມຍໍ ປຈາມ, ອິເມ ປນ ນ ປຈນ຺ຕິ, ປຈມາເນ ປຕ຺ວາ ອລຠນ຺ຕາ ກຸຫິໍ ລຠິສ຺ສນ຺ຕີ’’ຕິ? ເທຍ຺ຍຘມ຺ມໍ ສໍວິຠຊນ຺ຕິ, ເຕ ວທຎ຺ຎູ ນາມ. ປກາສນ຺ຕີຕິ ວິມານປ຺ປຠາຍ ໂຊຕນ຺ຕິ. ປຣສມ຺ຠເຕສູຕິ ປເຣຫິ ສມ຺ປິຓ຺ຑິເຕສຸ. ສມ຺ປຣາເຍ ຈ ສຸຄ຺ຄຕີຕິ, ‘‘ເອເຕ ສຄ຺ຄາ’’ຕິ ເອວໍ ວຸຕ຺ຕສມ຺ປຣາເຍ ສຸຄຕິ. ອຸຠິນ຺ນມ຺ປິ ວາ ເອເຕສໍ ຕໂຕ ຈວິຕ຺ວາ ປຸນ ສມ຺ປຣາເຍປິ ທຸຄ຺ຄຕິສຸຄຕິເຍວ ໂຫຕີຕິ. ນວມໍ.