໑໐. ຆຏີກາຣສຸຕ຺ຕວຓ຺ຓນາ

໕໐. ທສເມ ອຸປປນ຺ນາເສຕິ ນິພ຺ພຕ຺ຕິວເສນ ອຸປຄຕາ. ວິມຸຕ຺ຕາຕິ ອວິຫາພ຺ຣຫ຺ມໂລກສ຺ມິໍ ອຸປປຕ຺ຕິສມນນ຺ຕຣເມວ ອຣຫຕ຺ຕຜລວິມຸຕ຺ຕິຍາ ວິມຸຕ຺ຕາ. ມານຸສໍ ເທຫນ຺ຕິ ອິຘ ປຎ຺ໂຈຣມ຺ຠາຄິຍສໍໂຍຊນານິ ເອວ ວຸຕ຺ຕານິ. ທິພ຺ພໂຍຄນ຺ຕິ ປຎ຺ຈ ອຸທ຺ຘມ຺ຠາຄິຍສໍໂຍຊນານິ. ອຸປຈ຺ຈຄຸນ຺ຕິ ອຕິກ຺ກມິໍສຸ. ອຸປໂກຕິອາທີນິ ເຕສໍ ເຖຣານໍ ນາມານິ. ກຸສລີ ຠາສສີ ເຕສນ຺ຕິ, ‘‘ກຸສລ’’ນ຺ຕິ ອິທໍ ວຈນໍ ອິມສ຺ສ ອຕ຺ຖີຕິ ກຸສລີ, ເຕສໍ ເຖຣານໍ ຕ຺ວໍ ກຸສລໍ ອນວຊ຺ຊໍ ຠາສສິ, ໂຖເມສິ ປສໍສສິ, ປຓ຺ຑິໂຕສິ ເທວປຸຕ຺ຕາຕິ ວທຕິ. ຕໍ ເຕ ຘມ຺ມໍ ອິຘຎ຺ຎາຍາຕິ ເຕ ເຖຣາ ຕໍ ຘມ຺ມໍ ອິຘ ຕຸມ຺ຫາກໍ ສາສເນ ຊານິຕ຺ວາ. ຄມ຺ຠີຣນ຺ຕິ ຄມ຺ຠີຣຕ຺ຖໍ. ພ຺ຣຫ຺ມຈາຣີ ນິຣາມິໂສຕິ ນິຣາມິສພ຺ຣຫ຺ມຈາຣີ ນາມ ອນາຄາມີ, ອນາຄາມີ ອໂຫສິນ຺ຕິ ອຕ຺ໂຖ. ອຫຸວາຕິ ອໂຫສິ. ສຄາເມຍ຺ໂຍຕິ ເອກຄາມວາສີ. ປຣິໂຍສານຄາຖາ ສງ຺ຄີຕິກາເຣຫິ ຐປິຕາຕິ. ທສມໍ.

ອາທິຕ຺ຕວຄ຺ໂຄ ປຎ຺ຈໂມ.