໘. ເຊຕວນສຸຕ຺ຕວຓ຺ຓນາ

໔໘. ອຏ຺ຐເມ ອິທໍ ຫິ ຕໍ ເຊຕວນນ຺ຕິ ອນາຖປິຓ຺ຑິໂກ ເທວປຸຕ຺ໂຕ ເຊຕວນສ຺ສ ເຈວ ພຸທ຺ຘາທີນຎ຺ຈ ວຓ຺ຓຠຓນຕ຺ຖໍ ອາຄໂຕ ເອວມາຫ. ອິສິສງ຺ຆນິເສວິຕນ຺ຕິ ຠິກ຺ຂຸສງ຺ຆນິເສວິຕໍ.

ເອວໍ ປຐມຄາຖາຍ ເຊຕວນສ຺ສ ວຓ຺ຓໍ ກເຖຕ຺ວາ ອິທານິ ອຣິຍມຄ຺ຄສ຺ສ ກເຖນ຺ໂຕ ກມ຺ມໍ ວິຊ຺ຊາຕິອາທິມາຫ. ຕຕ຺ຖ ກມ຺ມນ຺ຕິ ມຄ຺ຄເຈຕນາ. ວິຊ຺ຊາຕິ ມຄ຺ຄປຎ຺ຎາ. ຘມ຺ໂມຕິ ສມາຘິປກ຺ຂິກາ ຘມ຺ມາ. ສີລໍ ຊີວິຕມຸຕ຺ຕມນ຺ຕິ ສີເລ ປຕິຏ຺ຐິຕສ຺ສ ຊີວິຕໍ ອຸຕ຺ຕມນ຺ຕິ ທສ຺ເສຕິ. ອຖ ວາ ວິຊ຺ຊາຕິ ທິຏ຺ຐິສງ຺ກປ຺ປາ. ຘມ຺ໂມຕິ ວາຍາມສຕິສມາຘໂຍ. ສີລນ຺ຕິ ວາຈາກມ຺ມນ຺ຕາຊີວາ. ຊີວິຕມຸຕ຺ຕມນ຺ຕິ ເອຕສ຺ມິໍ ສີເລ ຐິຕສ຺ສ ຊີວິຕໍ ນາມ ອຸຕ຺ຕມໍ. ເອເຕນ ມຈ຺ຈາ ສຸຊ຺ຌນ຺ຕີຕິ ເອເຕນ ອຏ຺ຐງ຺ຄິກມຄ຺ເຄນ ສຕ຺ຕາ ວິສຸຊ຺ຌນ຺ຕິ.

ຕສ຺ມາຕິ ຍສ຺ມາ ມຄ຺ເຄນ ສຸຊ຺ຌນ຺ຕິ, ນ ໂຄຕ຺ຕຘເນຫິ, ຕສ຺ມາ. ໂຍນິໂສ ວິຈິເນ ຘມ຺ມນ຺ຕິ ອຸປາເຍນ ສມາຘິປກ຺ຂິຍຘມ຺ມໍ ວິຈິເນຍ຺ຍ. ເອວໍ ຕຕ຺ຖ ວິສຸຊ຺ຌຕີຕິ ເອວໍ ຕສ຺ມິໍ ອຣິຍມຄ຺ເຄ ວິສຸຊ຺ຌຕິ. ອຖ ວາ ໂຍນິໂສ ວິຈິເນ ຘມ຺ມນ຺ຕິ ອຸປາເຍນ ປຎ຺ຈກ຺ຂນ຺ຘຘມ຺ມໍ ວິຈິເນຍ຺ຍ. ເອວໍ ຕຕ຺ຖ ວິສຸຊ຺ຌຕີຕິ ເອວໍ ເຕສຸ ຈຕູສຸ ສຈ຺ເຈສຸ ວິສຸຊ຺ຌຕິ.

ອິທານິ ສາຣິປຸຕ຺ຕຕ຺ເຖຣສ຺ສ ວຓ຺ຓໍ ກເຖນ຺ໂຕ ສາຣິປຸຕ຺ໂຕວາຕິອາທິມາຫ. ຕຕ຺ຖ ສາຣິປຸຕ຺ໂຕວາຕິ ອວຘາຣຓວຈນໍ, ເອເຕຫິ ປຎ຺ຎາທີຫິ ສາຣິປຸຕ຺ໂຕວ ເສຍ຺ໂຍຕິ ວທຕິ. ອຸປສເມນາຕິ ກິເລສອຸປສເມນ. ປາຣໍ ຄໂຕຕິ ນິພ຺ພານໍ ຄໂຕ. ໂຍ ໂກຈິ ນິພ຺ພານໍ ປຕ຺ໂຕ ຠິກ຺ຂຸ, ໂສ ເອຕາວປຣໂມ ສິຍາ, ນ ເຖເຣນ ອຸຕ຺ຕຣິຕໂຣ ນາມ ອຕ຺ຖີຕິ ວທຕິ. ເສສໍ ອຸຕ຺ຕານເມວາຕິ. ອຏ຺ຐມໍ.