໗. ວນໂຣປສຸຕ຺ຕວຓ຺ຓນາ

໔໗. ສຕ຺ຕເມ ຘມ຺ມຏ຺ຐາ ສີລສມ຺ປນ຺ນາຕິ ເກ ຘມ຺ມຏ຺ຐາ, ເກ ສີລສມ຺ປນ຺ນາຕິ ປຸຈ຺ຉຕິ. ຠຄວາ ອິມໍ ປຎ຺ຫໍ ຖາວຣວຕ຺ຖຸນາ ທີເປນ຺ໂຕ ອາຣາມໂຣປາຕິອາທິມາຫ. ຕຕ຺ຖ ອາຣາມໂຣປາຕິ ປຸປ຺ຜາຣາມຜລາຣາມໂຣປກາ. ວນໂຣປາຕິ ສຍໍຊາເຕ ອໂຣປິມວເນ ສີມໍ ປຣິກ຺ຂິປິຕ຺ວາ ເຈຕິຍໂພຘິຈງ຺ກມນມຓ຺ຑປກຸຏິເລຓຣຕ຺ຕິຏ຺ຐານທິວາຏ຺ຐານານໍ ກາຣກາ ຉາຍູປເຄ ຣຸກ຺ເຂ ໂຣເປຕ຺ວາ ທທມານາປິ ວນໂຣປາເຍວ ນາມ. ເສຕຸກາຣກາຕິ ວິສເມ ເສຕຸໍ ກໂຣນ຺ຕິ, ອຸທເກ ນາວໍ ປຏິຍາເທນ຺ຕິ. ປປນ຺ຕິ ປານີຍທານສາລໍ. ອຸທປານນ຺ຕິ ຍໍກິຎ຺ຈິ ໂປກ຺ຂຣຓີຕຬາກາທິໍ. ອຸປສ຺ສຍນ຺ຕິ ວາສາຄາຣໍ. ‘‘ອຸປາສຍ’’ນ຺ຕິປິ ປາໂຐ.

ສທາ ປຸຎ຺ຎໍ ປວຑ຺ຒຕີຕິ ນ ອກຸສລວິຕກ຺ກໍ ວາ ວິຕກ຺ເກນ຺ຕສ຺ສ ນິທ຺ທາຍນ຺ຕສ຺ສ ວາ ປວຑ຺ຒຕິ. ຍທາ ຍທາ ປນ ອນຸສ຺ສຣຕິ, ຕທາ ຕທາ ຕສ຺ສ ວຑ຺ຒຕິ. ອິມມຕ຺ຖໍ ສນ຺ຘາຍ ‘‘ສທາ ປຸຎ຺ຎໍ ປວຑ຺ຒຕີ’’ຕິ ວຸຕ຺ຕໍ. ຘມ຺ມຏ຺ຐາ ສີລສມ຺ປນ຺ນາຕິ ຕສ຺ມິໍ ຘມ຺ເມ ຐິຕຕ຺ຕາ ເຕນປິ ສີເລນ ສມ຺ປນ຺ນຕ຺ຕາ ຘມ຺ມຏ຺ຐາ ສີລສມ຺ປນ຺ນາ. ອຖ ວາ ເອວຣູປານິ ປຸຎ຺ຎານິ ກໂຣນ຺ຕານໍ ທສ ກຸສລາ ຘມ຺ມາ ປູເຣນ຺ຕິ, ເຕສຸ ຐິຕຕ຺ຕາ ຘມ຺ມຏ຺ຐາ. ເຕເນວ ຈ ສີເລນ ສມ຺ປນ຺ນຕ຺ຕາ ສີລສມ຺ປນ຺ນາຕິ. ສຕ຺ຕມໍ.