໖. ອຈ຺ຉຣາສຸຕ຺ຕວຓ຺ຓນາ

໔໖. ຉຏ຺ເຐ ອຈ຺ຉຣາຄຓສງ຺ຆຸຏ຺ຐນ຺ຕິ ອຍໍ ກິຣ ເທວປຸຕ຺ໂຕ ສຕ຺ຖຸສາສເນ ປພ຺ພຊິຕ຺ວາ ວຕ຺ຕປຏິປຕ຺ຕິໍ ປູຣຍມາໂນ ປຎ຺ຈວສ຺ສກາເລ ປວາເຣຕ຺ວາ ທ຺ເວມາຕິກໍ ປຄຸຓໍ ກຕ຺ວາ ກມ຺ມາກມ຺ມໍ ອຸຄ຺ຄເຫຕ຺ວາ ຈິຕ຺ຕຣຸຈິຕໍ ກມ຺ມຏ຺ຐານໍ ອຸຄ຺ຄຓ຺ຫິຕ຺ວາ ສລ຺ລຫຸກວຸຕ຺ຕິໂກ ອຣຎ຺ຎໍ ປວິສິຕ຺ວາ ໂຍ ຠຄວຕາ ມຊ຺ຌິມຍາໂມ ສຍນສ຺ສ ໂກຏ຺ຐາໂສຕິ ອນຸຎ຺ຎາໂຕ. ຕສ຺ມິມ຺ປິ ສມ຺ປຕ຺ເຕ ‘‘ປມາທສ຺ສ ຠາຍາມີ’’ຕິ ມຎ຺ຈກໍ ອຸກ຺ຂິປິຕ຺ວາ ຣຕ຺ຕິຎ຺ຈ ທິວາ ຈ ນິຣາຫາໂຣ ກມ຺ມຏ຺ຐານເມວ ມນສາກາສິ.

ອຖສ຺ສ ອພ຺ຠນ຺ຕເຣ ສຕ຺ຖກວາຕາ ອຸປ຺ປຊ຺ຊິຕ຺ວາ ຊີວິຕໍ ປຣິຍາທິຍິໍສຸ. ໂສ ຘຸຣສ຺ມິໍເຍວ ກາລມກາສິ. ໂຍ ຫິ ໂກຈິ ຠິກ຺ຂຸ ຈງ຺ກເມ ຈງ຺ກມມາໂນ ວາ ອາລມ຺ພນຕ຺ຖມ຺ຠໍ ນິສ຺ສາຍ ຐິໂຕ ວາ ຈງ຺ກມໂກຏິຍໍ ຈີວຣໍ ສີເສ ຐເປຕ຺ວາ ນິສິນ຺ໂນ ວາ ນິປນ຺ໂນ ວາ ປຣິສມຊ຺ເຌ ອລງ຺ກຕຘມ຺ມາສເນ ຘມ຺ມໍ ເທເສນ຺ໂຕ ວາ ກາລໍ ກໂຣຕິ, ສພ຺ໂພ ໂສ ຘຸຣສ຺ມິໍ ກາລໍ ກໂຣຕິ ນາມ. ອິຕິ ອຍໍ ຈງ຺ກມເນ ກາລໍ ກຕ຺ວາ ອຸປນິສ຺ສຍມນ຺ທຕາຍ ອາສວກ຺ຂຍໍ ອປ຺ປຕ຺ໂຕ ຕາວຕິໍສຠວເນ ມຫາວິມານທ຺ວາເຣ ນິທ຺ທາຍິຕ຺ວາ ປພຸຊ຺ຌນ຺ໂຕ ວິຍ ປຏິສນ຺ຘິໍ ອຄ຺ຄເຫສິ. ຕາວເທວສ຺ສ ສຸວຓ຺ຓໂຕຣຓໍ ວິຍ ຕິຄາວຸໂຕ ອຕ຺ຕຠາໂວ ນິພ຺ພຕ຺ຕິ.

ອນ຺ໂຕວິມາເນ ສຫສ຺ສມຕ຺ຕາ ອຈ຺ຉຣາ ຕໍ ທິສ຺ວາ, ‘‘ວິມານສາມິໂກ ເທວປຸຕ຺ໂຕ ອາຄໂຕ, ຣມຍິສ຺ສາມ ນ’’ນ຺ຕິ ຕູຣິຍານິ ຄເຫຕ຺ວາ ປຣິວາຣຍິໍສຸ. ເທວປຸຕ຺ໂຕ ນ ຕາວ ຈຸຕຠາວໍ ຊານາຕິ, ປພ຺ພຊິຕສຎ຺ຎີເຍວ ອຈ຺ຉຣາ ໂອໂລເກຕ຺ວາ ວິຫາຣຈາຣິກໍ ອາຄຕໍ ມາຕຸຄາມໍ ທິສ຺ວາ ລຊ຺ຊີ. ປໍສຸກູລິໂກ ວິຍ ອຸປຣິ ຐິຕໍ ຆນທຸກູລໍ ເອກໍສໍ ກໂຣນ຺ໂຕ ອໍສກູຏໍ ປຏິຈ຺ຉາເທຕ຺ວາ ອິນ຺ທ຺ຣິຍານິ ໂອກ຺ຂິປິຕ຺ວາ ອໂຘມຸໂຂ ອຏ຺ຐາສິ. ຕສ຺ສ ກາຍວິກາເຣເນວ ຕາ ເທວຕາ ‘‘ສມຓເທວປຸຕ຺ໂຕ ອຍ’’ນ຺ຕິ ຎຕ຺ວາ ເອວມາຫໍສຸ – ‘‘ອຍ຺ຍ, ເທວປຸຕ຺ຕ, ເທວໂລໂກ ນາມາຍໍ, ນ ສມຓຘມ຺ມສ຺ສ ກຣໂຓກາໂສ, ສມ຺ປຕ຺ຕິໍ ອນຸຠວໂນກາໂສ’’ຕິ. ໂສ ຕເຖວ ອຏ຺ຐາສິ. ເທວຕາ ‘‘ນ ຕາວາຍໍ ສລ຺ລກ຺ເຂຕີ’’ຕິ ຕູຣິຍານິ ປຄ຺ຄຓ຺ຫິໍສຸ. ໂສ ຕຖາປິ ອໂນໂລເກນ຺ໂຕວ ອຏ຺ຐາສິ.

ອຖສ຺ສ ສພ຺ພກາຍິກໍ ອາທາສໍ ປຸຣໂຕ ຐປຍິໍສຸ. ໂສ ຉາຍໍ ທິສ຺ວາ ຈຸຕຠາວໍ ຎຕ຺ວາ, ‘‘ນ ມຍາ ອິມໍ ຐານໍ ປຕ຺ເຖຕ຺ວາ ສມຓຘມ຺ໂມ ກໂຕ, ອຸຕ຺ຕມຕ຺ຖໍ ອຣຫຕ຺ຕໍ ປຕ຺ເຖຕ຺ວາ ກໂຕ’’ຕິ ສມ຺ປຕ຺ຕິຍາ ວິປ຺ປຏິສາຣີ ອໂຫສິ, ‘‘ສຸວຓ຺ຓປຏໍ ປຏິລຠິສ຺ສາມີ’’ຕິ ຕກ຺ກຍິຕ຺ວາ ຍຸທ຺ຘຏ຺ຐານໍ ໂອຕິຓ຺ຓມລ຺ໂລ ມູລກມຸຏ຺ຐິໍ ລຠິຕ຺ວາ ວິຍ. ໂສ – ‘‘ອຍໍ ສຄ຺ຄສມ຺ປຕ຺ຕິ ນາມ ສຸລຠາ, ພຸທ຺ຘານໍ ປາຕຸຠາໂວ ທຸລ຺ລໂຠ’’ຕິ ຈິນ຺ເຕຕ຺ວາ ວິມານໍ ອປວິສິຕ຺ວາວ ອສມ຺ຠິນ຺ເນເນວ ສີເລນ ອຈ຺ຉຣາສງ຺ຆປຣິວຸໂຕ ທສພລສ຺ສ ສນ຺ຕິກໍ ອາຄມ຺ມ ອຠິວາເທຕ຺ວາ ເອກມນ຺ຕໍ ຐິໂຕ ອິມໍ ຄາຖໍ ອຠາສິ.

ຕຕ຺ຖ ອຈ຺ຉຣາຄຓສງ຺ຆຸຏ຺ຐນ຺ຕິ ອຈ຺ຉຣາຄເຓນ ຄີຕວາທິຕສທ຺ເທຫິ ສງ຺ໂຆສິຕໍ. ປິສາຈຄຓເສວິຕນ຺ຕິ ຕເມວ ອຈ຺ຉຣາຄຓໍ ປິສາຈຄຓໍ ກຕ຺ວາ ວທຕິ. ວນນ຺ຕິ ນນ຺ທນວນໍ ສນ຺ຘາຍ ວທຕິ. ອຍຎ຺ຫິ ນິຍາມຈິຕ຺ຕຕາຍ ອຕ຺ຕໂນ ຄຣຸຠາເວນ ເທວຄຓໍ ‘‘ເທວຄໂຓ’’ຕິ ວຕ຺ຕຸໍ ນ ໂຣເຈຕິ. ‘‘ປິສາຈຄໂຓ’’ຕິ ວທຕິ. ນນ຺ທນວນຎ຺ຈ ‘‘ນນ຺ທນ’’ນ຺ຕິ ອວຕ຺ວາ ‘‘ໂມຫນ’’ນ຺ຕິ ວທຕິ. ກຖໍ ຍາຕ຺ຣາ ຠວິສ຺ສຕີຕິ ກຖໍ ນິຄ຺ຄມນໍ ຠວິສ຺ສຕິ, ກຖໍ ອຕິກ຺ກໂມ ຠວິສ຺ສຕິ, ອຣຫຕ຺ຕສ຺ສ ເມ ປທຏ຺ຐານຠູຕໍ ວິປສ຺ສນໍ ອາຈິກ຺ຂຖ ຠຄວາຕິ ວທຕິ.

ອຖ ຠຄວາ ‘‘ອຕິສລ຺ລິຂເຕວ ອຍໍ ເທວປຸຕ຺ໂຕ, ກິໍ ນຸ ໂຂ ອິທ’’ນ຺ຕິ? ອາວຊ຺ເຊນ຺ໂຕ ອຕ຺ຕໂນ ສາສເນ ປພ຺ພຊິຕຠາວໍ ຎຕ຺ວາ – ‘‘ອຍໍ ອຈ຺ຈາຣທ຺ຘວີຣິຍຕາຍ ກາລໍ ກຕ຺ວາ ເທວໂລເກ ນິພ຺ພຕ຺ໂຕ, ອຊ຺ຊາປິສ຺ສ ຈງ຺ກມນສ຺ມິໍເຍວ ອຕ຺ຕຠາໂວ ອສມ຺ຠິນ຺ເນນ ສີເລນ ອາຄໂຕ’’ຕິ ຈິນ຺ເຕສິ. ພຸທ຺ຘາ ຈ ອກຕາຠິນິເວສສ຺ສ ອາທິກມ຺ມິກສ຺ສ ອກຕປຣິກມ຺ມສ຺ສ ອນ຺ເຕວາສິໂນ ຈິຕ຺ຕກາໂຣ ຠິຕ຺ຕິປຣິກມ຺ມໍ ວິຍ – ‘‘ສີລໍ ຕາວ ໂສເຘຫິ, ສມາຘິໍ ຠາເວຫິ, ກມ຺ມສ຺ສກຕປຎ຺ຎໍ ອຸຊຸໍ ກໂຣຫີ’’ຕິ ປຐມໍ ປຸພ຺ພຠາຄປ຺ປຏິປທໍ ອາຈິກ຺ຂນ຺ຕິ, ກາຣກສ຺ສ ປນ ຍຸຕ຺ຕປຍຸຕ຺ຕສ຺ສ ອຣຫຕ຺ຕມຄ຺ຄປທຏ຺ຐານຠູຕໍ ສຓ຺ຫສຸຂຸມໍ ສຸຎ຺ຎຕາວິປສ຺ສນໍເຍວ ອາຈິກ຺ຂນ຺ຕິ, ອຍຎ຺ຈ ເທວປຸຕ຺ໂຕ ກາຣໂກ ອຠິນ຺ນສີໂລ, ເອໂກ ມຄ຺ໂຄ ອສ຺ສ ອນາຄໂຕຕິ ສຸຎ຺ຎຕາວິປສ຺ສນໍ ອາຈິກ຺ຂນ຺ໂຕ ອຸຊຸໂກ ນາມາຕິອາທິມາຫ.

ຕຕ຺ຖ ອຸຊຸໂກຕິ ກາຍວງ຺ກາທີນໍ ອຠາວໂຕ ອຏ຺ຐງ຺ຄິໂກ ມຄ຺ໂຄ ອຸຊຸໂກ ນາມ. ອຠຍາ ນາມ ສາ ທິສາຕິ ນິພ຺ພານໍ ສນ຺ຘາຍາຫ. ຕສ຺ມິໍ ຫິ ກິຎ຺ຈິ ຠຍໍ ນຕ຺ຖິ, ຕໍ ວາ ປຕ຺ຕສ຺ສ ຠຍໍ ນຕ຺ຖີຕິ ‘‘ອຠຍາ ນາມ ສາ ທິສາ’’ຕິ ວຸຕ຺ຕໍ. ຣໂຖ ອກູຊໂນຕິ ອຏ຺ຐງ຺ຄິໂກ ມຄ຺ໂຄວ ອຘິປ຺ເປໂຕ. ຍຖາ ຫິ ປາກຕິກຣໂຖ ອກ຺ເຂ ວາ ອນພ຺ຠຎ຺ຊິເຕ ອຕິເຣເກສຸ ວາ ມນຸສ຺ເສສຸ ອຠິຣຸຬ຺ເຫສຸ ກູຊຕິ ວິຣວຕິ, ນ ເອວໍ ອຣິຍມຄ຺ໂຄ. ໂສ ຫິ ເອກປ຺ປຫາເຣນ ຈຕຸຣາສີຕິຍາປິ ປາຓສຫສ຺ເສສຸ ອຠິຣຸຫນ຺ເຕສຸ ນ ກູຊຕິ ນ ວິຣວຕິ. ຕສ຺ມາ ‘‘ອກູຊໂນ’’ຕິ ວຸຕ຺ໂຕ. ຘມ຺ມຈກ຺ເກຫິ ສໍຍຸໂຕຕິ ກາຍິກເຈຕສິກວີຣິຍສງ຺ຂາເຕຫິ ຘມ຺ມຈກ຺ເກຫິ ສໍຍຸຕ຺ໂຕ.

ຫິຣີຕິ ເອຕ຺ຖ ຫິຣິຄ຺ຄຫເຓນ ໂອຕ຺ຕປ຺ປມ຺ປິ ຄຫິຕເມວ ໂຫຕິ. ຕສ຺ສ ອປາລມ຺ໂພຕິ ຍຖາ ພາຫິຣກຣຖສ຺ສ ຣເຖ ຐິຕານໍ ໂຍຘານໍ ອປຕນຕ຺ຖາຍ ທາຣຸມຍໍ ອປາລມ຺ພນໍ ໂຫຕິ, ເອວໍ ອິມສ຺ສ ມຄ຺ຄຣຖສ຺ສ ອຊ຺ຌຕ຺ຕພຫິທ຺ຘາສມຸຏ຺ຐານໍ ຫິໂຣຕ຺ຕປ຺ປໍ ອປາລມ຺ພນໍ. ສຕ຺ຍສ຺ສ ປຣິວາຣຓນ຺ຕິ ຣຖສ຺ສ ສີຫຈມ຺ມາທິປຣິວາໂຣ ວິຍ ອິມສ຺ສາປິ ມຄ຺ຄຣຖສ຺ສ ສມ຺ປຍຸຕ຺ຕາ ສຕິ ປຣິວາຣຓໍ. ຘມ຺ມນ຺ຕິ ໂລກຸຕ຺ຕຣມຄ຺ຄໍ. ສມ຺ມາທິຏ຺ຐິປຸເຣຊວນ຺ຕິ ວິປສ຺ສນາສມ຺ມາທິຏ຺ຐິປຸເຣຊວາ ອສ຺ສ ປຸພ຺ພຍາຍິກາຕິ ສມ຺ມາທິຏ຺ຐິປຸເຣຊໂວ, ຕໍ ສມ຺ມາທິຏ຺ຐິປຸເຣຊວໍ. ຍຖາ ຫິ ປຐມຕຣໍ ຣາຊປຸຣິເສຫິ ກາຓກຸຓິອາທີນໍນີຫຣເຓນ ມຄ຺ເຄ ໂສຘິເຕ ປຈ຺ຉາ ຣາຊາ ນິກ຺ຂມຕິ, ເອວເມວໍ ວິປສ຺ສນາ ສມ຺ມາທິຏ຺ຐິຍາ ອນິຈ຺ຈາທິວເສນ ຂນ຺ຘາທີສຸ ໂສຘິເຕສຸ ປຈ຺ຉາ ຠູມິລທ຺ຘວຏ຺ຏໍ ປຣິຊານມານາ ມຄ຺ຄສມ຺ມາທິຏ຺ຐິ ອຸປ຺ປຊ຺ຊຕິ. ເຕນ ວຸຕ຺ຕໍ ‘‘ຘມ຺ມາຫໍ ສາຣຖິໍ ພ຺ຣູມິ, ສມ຺ມາທິຏ຺ຐິປຸເຣຊວ’’ນ຺ຕິ.

ອິຕິ ຠຄວາ ເທສນໍ ນິຏ຺ຐາເປຕ຺ວາ ອວສາເນ ຈຕ຺ຕາຣິ ສຈ຺ຈານິ ທີເປສິ. ເທສນາປຣິໂຍສາເນ ເທວປຸຕ຺ໂຕ ໂສຕາປຕ຺ຕິຜເລ ປຕິຏ຺ຐາສິ. ຍຖາ ຫິ ຣຎ຺ໂຎ ໂຠຊນກາເລ ອຕ຺ຕໂນ ມຸຂປ຺ປມາເຓ ກພເຬ ອຸກ຺ຂິຕ຺ເຕ ອງ຺ເກ ນິສິນ຺ໂນ ປຸຕ຺ໂຕ ອຕ຺ຕໂນ ມຸຂປ຺ປມາເຓເນວ ຕໂຕ ກພຬໍ ກໂຣຕິ, ເອວເມວໍ ຠຄວຕິ ອຣຫຕ຺ຕນິກູເຏນ ເທສນໍ ເທເສນ຺ເຕປິ ສຕ຺ຕາ ອຕ຺ຕໂນ ອຸປນິສ຺ສຍານຸຣູເປນ ໂສຕາປຕ຺ຕິຜລາທີນິ ປາປຸຓນ຺ຕິ. ອຍມ຺ປິ ເທວປຸຕ຺ໂຕ ໂສຕາປຕ຺ຕິຜລໍ ປຕ຺ວາ ຠຄວນ຺ຕໍ ຄນ຺ຘາທີຫິ ປູເຊຕ຺ວາ ປກ຺ກາມີຕິ. ຉຏ຺ຐໍ.