໙. ປຐມປຊ຺ຊຸນ຺ນຘີຕຸສຸຕ຺ຕວຓ຺ຓນາ

໓໙. ນວເມ ປຊ຺ຊຸນ຺ນສ຺ສ ຘີຕາຕິ ປຊ຺ຊຸນ຺ນສ຺ສ ນາມ ວສ຺ສວລາຫກເທວຣຎ຺ໂຎ ຈາຕຸມຫາຣາຊິກສ຺ສ ຘີຕາ. ອຠິວນ຺ເທຕິ ຠຄວາ ຕຸມ຺ຫາກໍ ປາເທ ວນ຺ທາມິ. ຈກ຺ຂຸມຕາຕິ ປຎ຺ຈຫິ ຈກ຺ຂູຫິ ຈກ຺ຂຸມນ຺ເຕນ ຕຖາຄເຕນ. ຘມ຺ໂມ ອນຸພຸທ຺ໂຘຕິ, ‘‘ອິທໍ ມຍາ ປຸພ຺ເພ ປເຣສໍ ສນ຺ຕິເກ ເກວລໍ ສຸຕໍເຍວ ອາສີ’’ຕິ ວທຕິ. ສາຫໍ ທານີຕິ, ສາ ອຫໍ ອິທານິ. ສກ຺ຂິ ຊານາມີຕິ, ປຏິເວຘວເສນ ປຈ຺ຈກ຺ຂເມວ ຊານາມິ. ວິຄຣຫນ຺ຕາຕິ, ‘‘ຫີນກ຺ຂຣປທພ຺ຍຎ຺ຊໂນ’’ຕິ ວາ ‘‘ອນິຍ຺ຍານິໂກ’’ຕິ ວາ ເອວໍ ຄຣຫນ຺ຕາ. ໂຣຣຸວນ຺ຕິ, ທ຺ເວ ໂຣຣຸວາ – ຘູມໂຣຣຸໂວ ຈ ຊາລໂຣຣຸໂວ ຈ. ຕຕ຺ຖ ຘູມໂຣຣຸໂວ ວິສຸໍ ໂຫຕິ, ຊາລໂຣຣຸໂວຕິ ປນ ອວີຈິມຫານິຣຍສ຺ເສເວຕໍ ນາມໍ. ຕຕ຺ຖ ຫິ ສຕ຺ຕາ ອຄ຺ຄິມ຺ຫິ ຊລນ຺ເຕ ຊລນ຺ເຕ ປຸນປ຺ປຸນໍ ຣວໍ ຣວນ຺ຕິ, ຕສ຺ມາ ໂສ ‘‘ໂຣຣຸໂວ’’ຕິ ວຸຈ຺ຈຕິ. ໂຆຣນ຺ຕິ ທາຣຸຓໍ. ຂນ຺ຕິຍາ ອຸປສເມນ ອຸເປຕາຕິ ຣຸຈ຺ຈິຕ຺ວາ ຂມາເປຕ຺ວາ ຄຫຓຂນ຺ຕິຍາ ຈ ຣາຄາທິອຸປສເມນ ຈ ອຸເປຕາຕິ. ນວມໍ.