໓. ນຕ຺ຖິປຸຕ຺ຕສມສຸຕ຺ຕວຓ຺ຓນາ

໑໓. ຕຕິເຍ ນຕ຺ຖິ ປຸຕ຺ຕສມໍ ເປມນ຺ຕິ ວິຣູເປປິ ຫິ ອຕ຺ຕໂນ ປຸຕ຺ຕເກ ສຸວຓ຺ຓພິມ຺ພກໍ ວິຍ ມຎ຺ຎນ຺ຕິ, ມາລາຄຸເຬ ວິຍ ສີສາທີສຸ ກຕ຺ວາ ປຣິຫຣມານາ ເຕຫິ ໂອຫທິຕາປິ ໂອມຸຕ຺ຕິກາປິ ຄນ຺ຘວິເລປນປຕິຕາ ວິຍ ໂສມນສ຺ສໍ ອາປຊ຺ຊນ຺ຕິ. ເຕນາຫ – ‘‘ນຕ຺ຖິ ປຸຕ຺ຕສມໍ ເປມ’’ນ຺ຕິ. ປຸຕ຺ຕເປມສມໍ ເປມໍ ນາມ ນຕ຺ຖີຕິ ວຸຕ຺ຕໍ ໂຫຕິ. ໂຄສມິຕໍ ຘນນ຺ຕິ ໂຄຫິ ສມໍ ໂຄຘນສມໍ ໂຄຘນສທິສໍ ອຎ຺ຎໍ ຘນໍ ນາມ ນຕ຺ຖິ ຠຄວາຕິ ອາຫ. ສູຣິຍສມາ ອາຠາຕິ ສູຣິຍາຠາຍ ສມາ ອຎ຺ຎາ ອາຠາ ນາມ ນຕ຺ຖີຕິ ທສ຺ເສຕິ. ສມຸທ຺ທປຣມາຕິ ເຍ ເກຈິ ອຎ຺ເຎ ສຣາ ນາມ, ສພ຺ເພ ເຕ ສມຸທ຺ທປຣມາ, ສມຸທ຺ໂທ ເຕສໍ ອຸຕ຺ຕໂມ, ສມຸທ຺ທສທິສໍ ອຎ຺ຎໍ ອຸທກນິຘານໍ ນາມ ນຕ຺ຖິ, ຠຄວາຕິ.

ຍສ຺ມາ ປນ ອຕ຺ຕເປເມນ ສມໍ ເປມໍ ນາມ ນຕ຺ຖິ. ມາຕາປິຕາທໂຍ ຫິ ຉຑ຺ເຑຕ຺ວາປິ ປຸຕ຺ຕຘີຕາທໂຍ ຈ ອໂປເສຕ຺ວາປິ ສຕ຺ຕາ ອຕ຺ຕານເມວ ໂປເສນ຺ຕິ. ຘຎ຺ເຎນ ຈ ສມໍ ຘນໍ ນາມ ນຕ຺ຖິ. (ຍທາ ຫິ ສຕ຺ຕາ ທຸພ຺ຠິກ຺ຂາ ໂຫນ຺ຕິ), ຕຖາຣູເປ ຫິ ກາເລ ຫິຣຎ຺ຎສຸວຓ຺ຓາທີນິ ໂຄມຫິໍສາທີນິປິ ຘຎ຺ຎຄ຺ຄຫຓຕ຺ຖໍ ຘຎ຺ຎສາມິການເມວ ສນ຺ຕິກໍ ຄເຫຕ຺ວາ ຄຈ຺ຉນ຺ຕິ. ປຎ຺ຎາຍ ຈ ສມາ ອາຠາ ນາມ ນຕ຺ຖິ. ສູຣິຍາທໂຍ ຫິ ເອກເທສໍເຍວ ໂອຠາສນ຺ຕິ, ປຈ຺ຈຸປ຺ປນ຺ນເມວ ຈ ຕມໍ ວິໂນເທນ຺ຕິ. ປຎ຺ຎາ ປນ ທສສຫສ຺ສິມ຺ປິ ໂລກຘາຕຸໍ ເອກປ຺ປຊ຺ໂຊຕໍ ກາຕຸໍ ສກ຺ໂກຕິ, ອຕີຕໍສາທິປຏິຈ຺ຉາທກຎ຺ຈ ຕມໍ ວິຘມຕິ. ເມຆວຸຏ຺ຐິຍາ ຈ ສໂມ ສໂຣ ນາມ ນຕ຺ຖິ. ນທີວາປິ ໂຫຕຸ ຕລາກາທີນິ ວາ, ວຸຏ຺ຐິສໂມ ສໂຣ ນາມ ນຕ຺ຖິ. ເມຆວຸຏ຺ຐິຍາ ຫິ ປຈ຺ຉິນ຺ນາຍ ມຫາສມຸທ຺ໂທ ອງ຺ຄຸລິປພ຺ພເຕມນມຕ຺ຕມ຺ປິ ອຸທກໍ ນ ໂຫຕິ, ວຸຏ຺ຐິຍາ ປນ ປວຕ຺ຕມານາຍ ຍາວ ອາຠສ຺ສຣຠວນາປິ ເອໂກທກໍ ໂຫຕິ. ຕສ຺ມາ ຠຄວາ ເທວຕາຍ ປຏິຄາຖໍ ວທນ຺ໂຕ ນຕ຺ຖິ ອຕ຺ຕສມໍ ເປມນ຺ຕິອາທິມາຫາຕິ.

ນຕ຺ຖິປຸຕ຺ຕສມສຸຕ຺ຕວຓ຺ຓນາ ນິຏ຺ຐິຕາ.