໔. ໂລມສກງ຺ຄິຍຠທ຺ເທກຣຕ຺ຕສຸຕ຺ຕວຓ຺ຓນາ

໒໘໖. ເອວໍ ເມ ສຸຕນ຺ຕິ ໂລມສກງ຺ຄິຍຠທ຺ເທກຣຕ຺ຕສຸຕ຺ຕໍ. ຕຕ຺ຖ ໂລມສກງ຺ຄິໂຍຕິ ອງ຺ຄເຖໂຣ ກິຣ ນາເມສ, ກາຍສ຺ສ ປນ ອີສກໂລມສາກາຣຕາຍ ໂລມສກງ຺ຄິໂຍຕິ ປາກໂຏ ຊາໂຕ. ຈນ຺ທໂນ ເທວປຸຕ຺ໂຕຕິ ກສ຺ສປສມ຺ມາສມ຺ພຸທ຺ຘກາເລ ກິເຣສ ຈນ຺ທໂນ ນາມ ອຸປາສໂກ ອຑ຺ໂຒ ມຫທ຺ຘໂນ ຕີຓິ ຣຕນານິ ຈຕູຫິ ປຈ຺ຈເຍຫິ ປູເຊຕ຺ວາ ເທວໂລເກ ນິພ຺ພຕ຺ໂຕ, ປຸຣິມນາເມນ ຈນ຺ທໂນ ເທວປຸຕ຺ໂຕຕ຺ເວວ ສງ຺ຂໍ ຄໂຕ. ປຓ຺ຑຸກມ຺ພລສິລາຍນ຺ຕິ ຣຕ຺ຕກມ຺ພລສິລາຍໍ. ຕສ຺ສາ ກິຣ ຣຕ຺ຕກມ຺ພລສ຺ເສວ ຊຍສຸມນປຸປ຺ຜຣາສິ ວິຍ ວຓ຺ໂຓ, ຕສ຺ມາ ‘‘ປຓ຺ຑຸກມ຺ພລສິລາ’’ຕິ ວຸຈ຺ຈຕິ.

ກທາ ປນ ຕຕ຺ຖ ຠຄວາ ວິຫາສີຕິ? ໂພຘິປຕ຺ຕິໂຕ ສຕ຺ຕເມ ສໍວຈ຺ຉເຣ ສາວຕ຺ຖິຍໍ ອາສາຬ຺ຫີມາສປຸຓ຺ຓມາຍ ທ຺ວາທສໂຍຊນາຍ ປຣິສາຍ ມຊ຺ເຌ ຍມກປາຏິຫາຣິຍໍ ກຕ຺ວາ ໂອຣຸຍ຺ຫ ກຓ຺ຑມ຺ພມູເລ ປຎ຺ຎຕ຺ຕວຣພຸທ຺ຘາສເນ ນິສີທິຕ຺ວາ ຘມ຺ມເທສນາຍ ມຫາຊນໍ ມຫາວິທຸຄ຺ຄໂຕ ອຸທ຺ຘຣິຕ຺ວາ ພຸທ຺ຘາ ນາມ ຍສ຺ມາ ປາຏິຫາຣິຍໍ ກຕ຺ວາ ມນຸສ຺ສປເຖ ນ ວສນ຺ຕິ, ຕສ຺ມາ ປສ຺ສມານສ຺ເສວ ຕສ຺ສ ຊນສ຺ສ ປທວີກ຺ກມໍ ກຕ຺ວາ ຕາວຕິໍສຠວເນ ປາຣິຈ຺ຉຕ຺ຕກມູເລ ປຓ຺ຑຸກມ຺ພລສິລາຍໍ ວສ຺ສໍ ອຸປຄໂຕ, ຕສ຺ມິໍ ສມເຍ ວິຫາສິ.

ຕຕ຺ຣ ຠຄວາຕິ ຕຕ຺ຣ ວິຫຣນ຺ໂຕ ຠຄວາ ເຍຠຸຍ຺ເຍນ ທສຫິ ຈກ຺ກວາຬສຫສ຺ເສຫິ ສນ຺ນິປຕິຕາຫິ ເທວຕາຫິ ປຣິວຸໂຕ ມາຕຣໍ ກາຍສກ຺ຂິໍ ກຕ຺ວາ ອຠິຘມ຺ມປິຏກໍ ກເຖນ຺ໂຕ ຄມ຺ຠີຣໍ ນິປຸຓໍ ຕິລກ຺ຂຓາຫຕໍ ຣູປາຣູປປຣິຈ຺ເຉທກຖໍ ປຏິວິຊ຺ຌິຕຸໍ ອສກ຺ໂກນ຺ຕານໍ ເທວານໍ ສໍເວຄຊນນຕ຺ຖໍ ອນ຺ຕຣນ຺ຕຣາ ຠທ຺ເທກຣຕ຺ຕສ຺ສ ອຸທ຺ເທສຎ຺ຈ ວິຠງ຺ຄຎ຺ຈ ອຠາສິ. ຕຕ຺ຣາຍໍ ເທວປຸຕ຺ໂຕ ອຸຄ຺ຄຓ຺ຫນ຺ໂຕ ອິມາ ຄາຖາ ສທ຺ຘິໍ ວິຠງ຺ເຄນ ອຸຄ຺ຄຓ຺ຫິ, ເທວຕ຺ຕສ຺ສ ປນ ປມາທາຘິຏ຺ຐານຕ຺ຕາ ທິພ຺ເພຫິ ອາຣມ຺ມເຓຫິ ນິປ຺ປີຬິຍມາໂນ ອນຸປຸພ຺ເພນ ສຸຕ຺ຕໍ ສມ຺ມຸຏ຺ໂຐ ຄາຖາມຕ຺ຕເມວ ຘາເຣສິ. ເຕນາຫ ‘‘ເອວໍ ໂຂ ອຫໍ ຠິກ຺ຂຸ ຘາເຣມິ ຠທ຺ເທກຣຕ຺ຕິໂຍ ຄາຖາ’’ຕິ.

ອຸຄ຺ຄຓ຺ຫາຫິ ຕ຺ວນ຺ຕິອາທີສຸ ຕຸຓ຺ຫີຠູໂຕ ນິສີທິຕ຺ວາ ສຸຓນ຺ໂຕ ອຸຄ຺ຄຓ຺ຫາຕິ ນາມ, ວາຈາຍ ສຊ຺ຌາຍໍ ກໂຣນ຺ໂຕ ປຣິຍາປຸຓາຕິ ນາມ, ອຎ຺ເຎສໍ ວາເຈນ຺ໂຕ ຘາເຣຕິ ນາມ. ເສສເມຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ໂລມສກງ຺ຄິຍຠທ຺ເທກຣຕ຺ຕສຸຕ຺ຕວຓ຺ຓນາ ນິຏ຺ຐິຕາ.