໓. ມຫາກຈ຺ຈານຠທ຺ເທກຣຕ຺ຕສຸຕ຺ຕວຓ຺ຓນາ

໒໗໙. ເອວໍ ເມ ສຸຕນ຺ຕິ ມຫາກຈ຺ຈານຠທ຺ເທກຣຕ຺ຕສຸຕ຺ຕໍ. ຕຕ຺ຖ ຕໂປທາຣາເມຕິ ຕຕ຺ໂຕທກສ຺ສ ຣຫທສ຺ສ ວເສນ ເອວໍລທ຺ຘນາເມ ອາຣາເມ. ເວຠາຣປພ຺ພຕສ຺ສ ກິຣ ເຫຏ຺ຐາ ຠູມຏ຺ຐກນາຄານໍ ປຎ຺ຈໂຍຊນສຕິກໍ ນາຄຠວນໍ ເທວໂລກສທິສໍ ມຓິມເຍນ ຕເລນ ອາຣາມອຸຍ຺ຍາເນຫິ ຈ ສມນ຺ນາຄຕໍ, ຕຕ຺ຖ ນາຄານໍ ກີຬນຏ຺ຐາເນ ມຫາອຸທກຣຫໂທ, ຕໂຕ ຕໂປທາ ນາມ ນທີ ສນ຺ທຕິ ກຸຖິຕາ ອຸຓ຺ໂຫທກາ. ກສ຺ມາ ປເນສາ ເອທິສາ ຊາຕາ? ຣາຊຄຫໍ ກິຣ ປຣິວາເຣຕ຺ວາ ມຫາ ເປຕໂລໂກ, ຕຕ຺ຖ ທ຺ວິນ຺ນໍ ມຫາໂລຫກຸມ຺ຠິນິຣຍານໍ ອນ຺ຕເຣນ ອຍໍ ຕໂປທາ ອາຄຈ຺ຉຕິ, ຕສ຺ມາ ສາ ກຸຖິຕາ ສນ຺ທຕິ. ວຸຕ຺ຕມ຺ປິ ເຈຕໍ – ‘‘ຍຕາຍໍ, ຠິກ຺ຂເວ, ຕໂປທາ ສນ຺ທຕິ, ໂສ ທໂຫ ອຈ຺ໂຉທໂກ ສີໂຕທໂກ ສາໂຕທໂກ ເສໂຕທໂກ ສຸປ຺ປຕິຕ຺ໂຖ ຣມຓີໂຍ ປຫູຕມຈ຺ຉກຈ຺ຉໂປ, ຈກ຺ກມຕ຺ຕານິ ຈ ປທຸມານິ ປຸປ຺ຜນ຺ຕິ. ອປິຈາຍໍ, ຠິກ຺ຂເວ, ຕໂປທາ ທ຺ວິນ຺ນໍ ມຫານິຣຍານໍ ອນ຺ຕຣິກາຍ ອາຄຈ຺ຉຕິ, ເຕນາຍໍ ຕໂປທາ ກຸຖິຕາ ສນ຺ທຕີ’’ຕິ (ປາຣາ. ໒໓໑). ອິມສ຺ສ ປນ ອາຣາມສ຺ສ ອຠິສມ຺ມຸຂຏ຺ຐາເນ ຕໂຕ ມຫາອຸທກຣຫໂທ ຊາໂຕ, ຕສ຺ສ ນາມວເສນາຍໍ ວິຫາໂຣ ຕໂປທາຣາໂມຕິ ວຸຈ຺ຈຕິ.

໒໘໐. ສມິທ຺ຘີຕິ ຕສ຺ສ ກິຣ ເຖຣສ຺ສ ອຕ຺ຕຠາໂວ ສມິທ຺ໂຘ ອຠິຣູໂປ ປາສາທິໂກ, ຕສ຺ມາ ສມິທ຺ຘິຕ຺ເວວ ສງ຺ຂໍ ຄໂຕ. ອາທິພ຺ຣຫ຺ມຈຣິຍໂກຕິ ມຄ຺ຄພ຺ຣຫ຺ມຈຣິຍສ຺ສ ອາທິ ປຸພ຺ພຠາຄປ຺ປຏິປຕ຺ຕິຠູໂຕ. ອິທໍ ວຕ຺ວານ ສຸຄໂຕ ອຸຏ຺ຐາຍາສນາຕິ ມຘຸປິຓ຺ຑິກສຸຕ຺ເຕ (ມ. ນິ. ໑.໑໙໙ ອາທໂຍ) ວຸຕ຺ຕນເຍເນວ ວິຕ຺ຖາເຣຕພ຺ພໍ.

໒໘໒. ອິຕິ ເມ ຈກ຺ຂຸນ຺ຕິ ອິມສ຺ມິໍ ກິຣ ສຸຕ຺ເຕ ຠຄວາ ທ຺ວາທສາຍຕນວເສເນວ ມາຕິກໍ ຐເປສິ. ເຖໂຣປິ ‘‘ຠຄວຕາ ເຫຏ຺ຐາ ທ຺ວີສຸ, ອຸປຣິ ຈຕຸຕ຺ເຖ ຈາຕິ ອິເມສຸ ຕີສຸ ສຸຕ຺ເຕສຸ ປຎ຺ຈກ຺ຂນ຺ຘວເສນ ມາຕິກາ ຈ ວິຠງ຺ໂຄ ຈ ກໂຕ, ອິຘ ປນ ທ຺ວາທສາຍຕນວເສເນວ ວິຠຊນຕ຺ຖໍ ມາຕິກາ ຐປິຕາ’’ຕິ ນຍໍ ປຏິລຠິຕ຺ວາ ເອວມາຫ. ອິມໍ ປນ ນຍໍ ລຠນ຺ເຕນ ເຖເຣນ ຠາຣິຍໍ ກຕໍ, ອປເທ ປທໍ ທສ຺ສິຕໍ, ອາກາເສ ປທໍ ກຕໍ, ເຕນ ນໍ ຠຄວາ ອິມເມວ ສຸຕ຺ຕໍ ສນ຺ຘາຍ – ‘‘ເອຕທຄ຺ຄໍ, ຠິກ຺ຂເວ, ມມ ສາວການໍ ຠິກ຺ຂູນໍ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ວິຠຊນ຺ຕານໍ ຍທິທໍ ມຫາກຈ຺ຈາໂນ’’ຕິ (ອ. ນິ. ໑.໑໙໗) ເອຕທຄ຺ເຄ ຐເປສິ. ເອຕ຺ຖ ປນ ຈກ຺ຂູຕິ ຈກ຺ຂຸປສາໂທ. ຣູປາຕິ ຈຕຸສມຸຏ຺ຐານິກຣູປາ. ອິມິນາ ນເຍນ ເສສາຍຕນານິປິ ເວທິຕພ຺ພານິ. ວິຎ຺ຎາຓນ຺ຕິ ນິກນ຺ຕິວິຎ຺ຎາຓໍ. ຕທຠິນນ຺ທຕີຕິ ຕໍ ຈກ຺ຂຸຎ຺ເຈວ ຣູປຎ຺ຈ ຕຓ຺ຫາທິຏ຺ຐິວເສນ ອຠິນນ຺ທຕິ. ອນ຺ວາຄເມຕີຕິ ຕຓ຺ຫາທິຏ຺ຐີຫິ ອນຸຄຈ຺ຉຕິ.

ອິຕິ ເມ ມໂນ ອໂຫສິ ອຕີຕມທ຺ຘານໍ ອິຕິ ຘມ຺ມາຕິ ເອຕ຺ຖ ປນ ມໂນຕິ ຠວງ຺ຄຈິຕ຺ຕໍ. ຘມ຺ມາຕິ ເຕຠູມກຘມ຺ມາຣມ຺ມຓໍ.

໒໘໓. ປຓິທຫຕີຕິ ປຕ຺ຖນາວເສນ ຐເປສິ. ປຓິຘານປຈ຺ຈຍາຕິ ປຕ຺ຖນາຏ຺ຐປນກາຣຓາ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ມຫາກຈ຺ຈານຠທ຺ເທກຣຕ຺ຕສຸຕ຺ຕວຓ຺ຓນາ ນິຏ຺ຐິຕາ.