໗. ຄຓກໂມຄ຺ຄລ຺ລານສຸຕ຺ຕວຓ຺ຓນາ

໗໔. ເອວໍ ເມ ສຸຕນ຺ຕິ ຄຓກໂມຄ຺ຄລ຺ລານສຸຕ຺ຕໍ. ຕຕ຺ຖ ຍາວ ປຈ຺ຉິມໂສປານກເຬວຣາຕິ ຍາວ ປຐມໂສປານຜລກາ ເອກທິວເສເນວ ສຕ຺ຕຠູມິໂກ ປາສາໂທ ນ ສກ຺ກາ ກາຕຸໍ, ວຕ຺ຖຸໍ ໂສເຘຕ຺ວາ ຖມ຺ຠຸສ຺ສາປນໂຕ ປຏ຺ຐາຍ ປນ ຍາວ ຈິຕ຺ຕກມ຺ມກຣຓາ ອນຸປຸພ຺ພກິຣິຍາ ເຈຕ຺ຖ ປຎ຺ຎາຍຕີຕິ ທສ຺ເສຕິ. ຍທິທໍ ອຊ຺ເຌເນຕິ ຕໂຍປິ ເວທາ ນ ສກ຺ກາ ເອກທິວເສເນວ ອຘີຍິຕຸໍ, ເອເຕສໍ ອຊ຺ເຌເນປິ ປນ ອນຸປຸພ຺ພກິຣິຍາວ ປຎ຺ຎາຍຕີຕິ ທສ຺ເສຕິ. ອິສ຺ສຕ຺ເຖຕິ ອາວຸຘວິຊ຺ຊາຍປິ ເອກທິວເສເນວ ວາລເວຘິ ນາມ ນ ສກ຺ກາ ກາຕຸໍ, ຐານສມ຺ປາທນມຸຏ຺ຐິກຣຓາທີຫິ ປນ ເອຕ຺ຖາປິ ອນຸປຸພ຺ພກິຣິຍາ ປຎ຺ຎາຍຕີຕິ ທສ຺ເສຕິ. ສງ຺ຂາເນຕິ ຄຓນາຍ. ຕຕ຺ຖ ອນຸປຸພ຺ພກິຣິຍໍ ອຕ຺ຕນາວ ທສ຺ເສນ຺ໂຕ ເອວໍ ຄຓາເປມາຕິອາທິມາຫ.

໗໕. ເສຍ຺ຍຖາປິ ພ຺ຣາຫ຺ມຓາຕິ ອິຘ ຠຄວາ ຍສ຺ມາ ພາຫິຣສມເຍ ຍຖາ ຍຖາ ສິປ຺ປໍ ອຸຄ຺ຄຓ຺ຫນ຺ຕິ, ຕຖາ ຕຖາ ເກຣາຏິກາ ໂຫນ຺ຕິ, ຕສ຺ມາ ອຕ຺ຕໂນ ສາສນໍ ພາຫິຣສມເຍນ ອນຸປເມຕ຺ວາ ຠທ຺ຣອສ຺ສາຊານີເຍນ ອຸປເມນ຺ໂຕ ເສຍ຺ຍຖາປີຕິອາທິມາຫ. ຠທ຺ໂຣ ຫິ ອສ຺ສາຊານີໂຍ ຍສ຺ມິໍ ກາຣເຓ ທມິໂຕ ໂຫຕິ, ຕໍ ຊີວິຕເຫຕຸປິ ນາຕິກ຺ກມຕິ. ເອວເມວ ສາສເນ ສມ຺ມາປຏິປນ຺ໂນ ກຸລປຸຕ຺ໂຕ ສີລເວລໍ ນາຕິກ຺ກມຕິ. ມຸຂາຘາເນຕິ ມຸຂຏ຺ຐປເນ.

໗໖. ສຕິສມ຺ປຊຎ຺ຎາຍ ຈາຕິ ສຕິສມ຺ປຊຎ຺ຎາຫິ ສມງ຺ຄິຠາວຕ຺ຖາຍ. ທ຺ເວ ຫິ ຂີຓາສວາ ສຕຕວິຫາຣີ ຈ ໂນສຕຕວິຫາຣີ ຈ. ຕຕ຺ຖ ສຕຕວິຫາຣີ ຍໍກິຎ຺ຈິ ກມ຺ມໍ ກຕ຺ວາປິ ຜລສມາປຕ຺ຕິໍ ສມາປຊ຺ຊິຕຸໍ ສກ຺ໂກຕິ, ໂນ ສຕຕວິຫາຣີ ປນ ອປ຺ປມຕ຺ຕເກປິ ກິຈ຺ເຈ ກິຈ຺ຈປ຺ປສຸໂຕ ຫຸຕ຺ວາ ຜລສມາປຕ຺ຕິໍ ອປ຺ເປຕຸໍ ນ ສກ຺ໂກຕິ.

ຕຕ຺ຣິທໍ ວຕ຺ຖຸ – ເອໂກ ກິຣ ຂີຓາສວຕ຺ເຖໂຣ ຂີຓາສວສາມເຓຣໍ ຄເຫຕ຺ວາ ອຣຎ຺ຎວາສໍ ຄໂຕ, ຕຕ຺ຖ ມຫາເຖຣສ຺ສ ເສນາສນໍ ປຕ຺ຕໍ, ສາມເຓຣສ຺ສ ນ ປາປຸຓາຕິ, ຕໍ ວິຕກ຺ເກນ຺ໂຕ ເຖໂຣ ເອກທິວສມ຺ປິ ຜລສມາປຕ຺ຕິໍ ອປ຺ເປຕຸໍ ນາສກ຺ຂິ. ສາມເຓໂຣ ປນ ເຕມາສໍ ຜລສມາປຕ຺ຕິຣຕິຍາ ວີຕິນາເມຕ຺ວາ ‘‘ສປ຺ປາໂຍ, ຠນ຺ເຕ, ອຣຎ຺ຎວາໂສ ຊາໂຕ’’ຕິ ເຖຣໍ ປຸຈ຺ຉິ. ເຖໂຣ ‘‘ນ ຊາໂຕ, ອາວຸໂສ’’ຕິ ອາຫ. ອິຕິ ໂຍ ເອວຣູໂປ ຂີຓາສໂວ, ໂສ ອິເມ ຘມ຺ເມ ອາທິໂຕ ປຏ຺ຐາຍ ອາວຊ຺ຊິຕ຺ວາວ ສມາປຊ຺ຊິຕຸໍ ສກ຺ຂິສ຺ສຕີຕິ ທສ຺ເສນ຺ໂຕ ‘‘ສຕິສມ຺ປຊຎ຺ຎາຍ ຈາ’’ຕິ ອາຫ.

໗໘. ເຍເມ, ໂຠ ໂຄຕມາຕິ ຕຖາຄເຕ ກິຣ ກຖຍນ຺ເຕວ ພ຺ຣາຫ຺ມຓສ຺ສ ‘‘ອິເມ ປຸຄ຺ຄລາ ນ ອາຣາເຘນ຺ຕິ, ອິເມ ອາຣາເຘນ຺ຕີ’’ຕິ ນໂຍ ອຸທປາທິ, ຕໍ ທສ຺ເສນ຺ໂຕ ເອວໍ ວຕ຺ຕຸມາຣທ຺ໂຘ.

ປຣມຊ຺ຊຘມ຺ເມສູຕິ ອຊ຺ຊຘມ຺ມາ ນາມ ຉສຕ຺ຖາຣຘມ຺ມາ, ເຕສຸ ໂຄຕມວາໂທວ, ປຣໂມ ອຸຕ຺ຕໂມຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ຄຓກໂມຄ຺ຄລ຺ລານສຸຕ຺ຕວຓ຺ຓນາ ນິຏ຺ຐິຕາ.