໖. ອາເນຎ຺ຊສປ຺ປາຍສຸຕ຺ຕວຓ຺ຓນາ

໖໖. ເອວໍ ເມ ສຸຕນ຺ຕິ ອາເນຎ຺ຊສປ຺ປາຍສຸຕ຺ຕໍ. ຕຕ຺ຖ ອນິຈ຺ຈາຕິ ຫຸຕ຺ວາ ອຠາວຏ຺ເຐນ ອນິຈ຺ຈາ. ກາມາຕິ ວຕ຺ຖຸກາມາປິ ກິເລສກາມາປິ. ຕຸຈ຺ຉາຕິ ນິຈ຺ຈສາຣຘຸວສາຣອຕ຺ຕສາຣວິຣຫິຕຕ຺ຕາ ຣິຕ຺ຕາ, ນ ປນ ນຕ຺ຖີຕິ ຄເຫຕພ຺ພາ. ນ ຫິ ຕຸຈ຺ຉມຸຏ຺ຐີຕິ ວຸຕ຺ເຕ ມຸຏ຺ຐິ ນາມ ນຕ຺ຖີຕິ ວຸຕ຺ຕໍ ໂຫຕິ. ຍສ຺ສ ປນ ອພ຺ຠນ຺ຕເຣ ກິຎ຺ຈິ ນຕ຺ຖິ, ໂສ ວຸຈ຺ຈຕິ ຕຸຈ຺ໂຉ. ມຸສາຕິ ນາສນກາ. ໂມສຘມ຺ມາຕິ ນສ຺ສນສຠາວາ, ເຂຕ຺ຕໍ ວິຍ ວຕ຺ຖຸ ວິຍ ຫິຣຎ຺ຎສຸວຓ຺ຓໍ ວິຍ ຈ ນ ປຎ຺ຎາຍິຕ຺ຖ, ກຕິປາເຫເນວ ສຸປິນເກ ທິຏ຺ຐາ ວິຍ ນສ຺ສນ຺ຕິ ນ ປຎ຺ຎາຍນ຺ຕິ. ເຕນ ວຸຕ຺ຕໍ ‘‘ໂມສຘມ຺ມາ’’ຕິ, ມາຍາກຕເມຕນ຺ຕິ ຍຖາ ມາຍາຍ ອຸທກໍ ມຓີຕິ ກຕ຺ວາ ທສ຺ສິຕໍ, ພທຣິປຓ຺ຓໍ ກຫາປໂຓຕິ ກຕ຺ວາ ທສ຺ສິຕໍ, ອຎ຺ຎໍ ວາ ປນ ເອວຣູປໍ ທສ຺ສນູປຈາເຣ ຐິຕສ຺ເສວ ຕຖາ ປຎ຺ຎາຍຕິ, ອຸປຈາຣາຕິກ຺ກມໂຕ ປຏ຺ຐາຍ ປາກຕິກເມວ ປຎ຺ຎາຍຕິ. ເອວໍ ກາມາປິ ອິຕ຺ຕຣປຈ຺ຈຸປຏ຺ຐານຏ຺ເຐນ ‘‘ມາຍາກຕ’’ນ຺ຕິ ວຸຕ຺ຕາ. ຍຖາ ຈ ມາຍາກາໂຣ ອຸທກາທີນິ ມຓິອາທີນໍ ວເສນ ທສ຺ເສນ຺ໂຕ ວຎ຺ເຈຕິ, ເອວໍ ກາມາປິ ອນິຈ຺ຈາທີນິ ນິຈ຺ຈາທິສຠາວໍ ທສ຺ເສນ຺ຕາ ວຎ຺ເຈນ຺ຕີຕິ ວຎ຺ຈນກຏ຺ເຐນປິ ‘‘ມາຍາກຕ’’ນ຺ຕິ ວຸຕ຺ຕາ. ພາລລາປນນ຺ຕິ ມຍ຺ຫໍ ປຸຕ຺ໂຕ, ມຍ຺ຫໍ ຘີຕາ, ມຍ຺ຫໍ ຫິຣຎ຺ຎໍ ມຍ຺ຫໍ ສຸວຓ຺ຓນ຺ຕິ ເອວໍ ພາລານໍ ລາປນໂຕ ພາລລາປນໍ. ທິຏ຺ຐຘມ຺ມິກາ ກາມາຕິ ມານຸສກາ ປຎ຺ຈ ກາມຄຸຓາ. ສມ຺ປຣາຍິກາຕິ ເຕ ຐເປຕ຺ວາ ອວເສສາ. ທິຏ຺ຐຘມ຺ມິກາ. ກາມສຎ຺ຎາຕິ ມານຸສເກ ກາເມ ອາຣພ຺ຠ ອຸປ຺ປນ຺ນສຎ຺ຎາ. ອຸຠຍເມຕໍ ມາຣເຘຍ຺ຍນ຺ຕິ ເອເຕ ກາມາ ຈ ກາມສຎ຺ຎາ ຈ ອຸຠຍມ຺ປິ ມາຣເຘຍ຺ຍໍ. ເຍຫິ ອຸຠຍເມຕໍ ຄຫິຕໍ, ເຕສຎ຺ຫິ ອຸປຣິ ມາໂຣ ວສໍ ວຕ຺ເຕຕິ. ຕໍ ສນ຺ຘາຍ ‘‘ອຸຠຍເມຕໍ ມາຣເຘຍ຺ຍ’’ນ຺ຕິ ວຸຕ຺ຕໍ.

ມາຣສ຺ເສສ ວິສໂຍຕິອາທີສຸປິ ຍຖາ ໂຈຬສ຺ສ ວິສໂຍ ໂຈຬວິສໂຍ, ປຓ຺ຑສ຺ສ ວິສໂຍ ປຓ຺ຑວິສໂຍ, ສໍວຣານໍ ວິສໂຍ ສໍວຣວິສໂຍຕິ ປວຕ຺ຕນຏ຺ຐານໍ ວິສໂຍຕິ ວຸຈ຺ຈຕິ, ເອວໍ ເຍຫິ ເອເຕ ກາມາ ຄຫິຕາ, ເຕສໍ ອຸປຣິ ມາໂຣ ວສໍ ວຕ຺ເຕຕິ. ຕໍ ສນ຺ຘາຍ ມາຣສ຺ເສສ ວິສໂຍຕິ ວຸຕ຺ຕໍ. ປຎ຺ຈ ປນ ກາມຄຸເຓ ນິວາປພີຊໍ ວິຍ ວິປ຺ປກິຣນ຺ໂຕ ມາໂຣ ຄຈ຺ຉຕິ. ເຍຫິ ປນ ເຕ ຄຫິຕາ, ເຕສໍ ອຸປຣິ ມາໂຣ ວສໍ ວຕ຺ເຕຕິ. ຕໍ ສນ຺ຘາຍ ມາຣສ຺ເສສ ນິວາໂປຕິ ວຸຕ຺ຕໍ. ຍຖາ ຈ ຍຕ຺ຖ ຫຕ຺ຖິອາທໂຍ ວສໍ ວຕ຺ເຕນ຺ຕິ, ໂສ ຫຕ຺ຖິໂຄຈໂຣ ອສ຺ສໂຄຈໂຣ ອຊໂຄຈໂຣຕິ ວຸຈ຺ຈຕິ, ເອວໍ ເຍຫິ ເອເຕ ກາມາ ຄຫິຕາ, ເຕສຸ ມາໂຣ ວສໍ ວຕ຺ເຕຕິ. ຕໍ ສນ຺ຘາຍ ມາຣສ຺ເສສ ໂຄຈໂຣຕິ ວຸຕ຺ຕໍ.

ເອຕ຺ຖາຕິ ເອເຕສຸ ກາເມສຸ. ມານສາຕິ ຈິຕ຺ຕສມ຺ຠູຕາ. ຕຕ຺ຖ ສິຍາ – ທຸວິເຘ ຕາວ ກາເມ ອາຣພ຺ຠ ອຠິຊ຺ຌານລກ຺ຂຓາ ອຠິຊ຺ຌາ, ກຣຓຸຕ຺ຕຣິຍລກ຺ຂໂຓ ສາຣມ຺ໂຠ ຈ ອຸປ຺ປຊ຺ຊຕຸ, ພ຺ຍາປາໂທ ກຖໍ ອຸປ຺ປຊ຺ຊຕີຕິ? ມມາຍິເຕ ວຕ຺ຖຸສ຺ມິໍ ອຈ຺ຉິນ຺ເນປິ ໂສຈນ຺ຕິ, ອຈ຺ຉິຊ຺ຊນ຺ເຕປິ ໂສຈນ຺ຕິ, ອຈ຺ຉິນ຺ນສງ຺ກິໂນປິ ໂສຈນ຺ຕິ, ໂຍ ເອວຣູໂປ ຈິຕ຺ຕສ຺ສ ອາຆາໂຕຕິ ເອວໍ ອຸປ຺ປຊ຺ຊຕິ. ເຕວ ອຣິຍສາວກສ຺ສາຕິ ເຕ ອຣິຍສາວກສ຺ສ. ວກາໂຣ ອາຄມສນ຺ຘິມຕ຺ຕໍ ໂຫຕິ. ອິຘ ມນຸສິກ຺ຂໂຕຕິ ອິມສ຺ມິໍ ສາສເນ ສິກ຺ຂນ຺ຕສ຺ສ ເຕ ຕໂຍປິ ກິເລສາ ອນ຺ຕຣາຍກຣາ ໂຫນ຺ຕິ. ອຠິຠຸຍ຺ຍ ໂລກນ຺ຕິ ກາມໂລກໍ ອຠິຠວິຕ຺ວາ. ອຘິຏ຺ຐາຍ ມນສາຕິ ຌານາຣມ຺ມຓຈິຕ຺ເຕນ ອຘິຏ຺ຐຫິຕ຺ວາ. ອປຣິຕ຺ຕນ຺ຕິ ກາມາວຈຣຈິຕ຺ຕໍ ປຣິຕ຺ຕໍ ນາມ, ຕສ຺ສ ປຏິກ຺ເຂເປນ ມຫຄ຺ຄຕໍ ອປຣິຕ຺ຕໍ ນາມ. ປມາຓນ຺ຕິປິ ກາມາວຈຣເມວ, ຣູປາວຈຣໍ ອຣູປາວຈຣໍ ອປ຺ປມາຓໍ. ສຸຠາວິຕນ຺ຕິ ປນ ເອຕໍ ກາມາວຈຣາທີນໍ ນາມໍ ນ ໂຫຕິ, ໂລກຸຕ຺ຕຣສ຺ເສເວຕໍ ນາມໍ. ຕສ຺ມາ ເອຕສ຺ສ ວເສນ ອປຣິຕ຺ຕໍ ອປ຺ປມາຓໍ ສຸຠາວິຕນ຺ຕິ ສພ຺ພໍ ໂລກຸຕ຺ຕຣເມວ ວຏ຺ຏຕິ.

ຕພ຺ພຫຸລວິຫາຣິໂນຕິ ກາມປຏິພາຫເນນ ຕເມວ ປຏິປທໍ ພຫຸລໍ ກຕ຺ວາ ວິຫຣນ຺ຕສ຺ສ. ອາຍຕເນ ຈິຕ຺ຕໍ ປສີທຕີຕິ ກາຣເຓ ຈິຕ຺ຕໍ ປສີທຕິ. ກິໍ ປເນຕ຺ຖ ກາຣຓໍ? ອຣຫຕ຺ຕໍ ວາ, ອຣຫຕ຺ຕສ຺ສ ວິປສ຺ສນໍ ວາ, ຈຕຸຕ຺ຖຊ຺ຌານໍ ວາ, ຈຕຸຕ຺ຖຊ຺ຌານສ຺ສ ອຸປຈາຣໍ ວາ. ສມ຺ປສາເທ ສຕີຕິ ເອຕ຺ຖ ທຸວິໂຘ ສມ຺ປສາໂທ ອຘິໂມກ຺ຂສມ຺ປສາໂທ ຈ ປຏິລາຠສມ຺ປສາໂທ ຈ. ອຣຫຕ຺ຕສ຺ສ ຫິ ວິປສ຺ສນໍ ປຏ຺ຐເປຕ຺ວາ ວິຫຣໂຕ ມຫາຠູຕາທີສຸ ອຸປຏ຺ຐຫນ຺ເຕສຸ ເຍນິເມ ນີຫາເຣນ ມຫາຠູຕາ ອຸປຏ຺ຐຫນ຺ຕິ, ອຸປາທາຣູປາ ອຸປຏ຺ຐຫນ຺ຕິ ນາມຣູປາ ອຸປຏ຺ຐຫນ຺ຕິ, ປຈ຺ຈຍາ ສພ຺ພຖາ ອຸປຏ຺ຐຫນ຺ຕິ, ລກ຺ຂຓາຣມ຺ມຓາ ວິປສ຺ສນາ ອຸປຏ຺ຐຫຕິ, ອຊ຺ເຊວ ອຣຫຕ຺ຕໍ ຄຓ຺ຫິສ຺ສາມີຕິ ອປ຺ປຏິລທ຺ເຘເຍວ ອາສາ ສນ຺ຕິຏ຺ຐຕິ, ອຘິໂມກ຺ຂໍ ປຏິລຠຕິ. ຕຕິຍຊ຺ຌານໍ ວາ ປາທກໍ ກຕ຺ວາ ຈຕຸຕ຺ຖຊ຺ຌານຕ຺ຖາຍ ກສິຓປຣິກມ຺ມໍ ກໂຣນ຺ຕສ຺ສ ນີວຣຓວິກ຺ຂມ຺ຠນາທີນິ ສມນຸປສ຺ສໂຕ ເຍນິເມ ນີຫາເຣນ ນີວຣຓາ ວິກ຺ຂມ຺ຠນ຺ຕິ, ກິເລສາ ສນ຺ນິສີທນ຺ຕິ, ສຕິ ສນ຺ຕິຏ຺ຐຕິ, ສງ຺ຂາຣຄຕໍ ວາ ວິຠູຕໍ ປາກຏໍ ຫຸຕ຺ວາ ທິພ຺ພຈກ຺ຂຸກສ຺ສ ປຣໂລໂກ ວິຍ ອຸປຏ຺ຐາຕິ, ຈິຕ຺ຕຸປ຺ປາໂທ ເລປປິຓ຺ເຑ ລຄ຺ຄມາໂນ ວິຍ ອຸປຈາເຣນ ສມາຘິຍຕິ, ອຊ຺ເຊວ ຈຕຸຕ຺ຖຊ຺ຌານໍ ນິພ຺ພຕ຺ເຕສ຺ສາມີຕິ ອປຏິລທ຺ເຘເຍວ ອາສາ ສນ຺ຕິຏ຺ຐຕິ, ອຘິໂມກ຺ຂໍ ປຏິລຠຕິ. ອຍໍ ອຘິໂມກ຺ຂສມ຺ປສາໂທ ນາມ. ຕສ຺ມິໍ ສມ຺ປສາເທ ສຕິ. ໂຍ ປນ ອຣຫຕ຺ຕໍ ວາ ປຏິລຠຕິ ຈຕຸຕ຺ຖຊ຺ຌານໍ ວາ, ຕສ຺ສ ຈິຕ຺ຕໍ ວິປ຺ປສນ຺ນໍ ໂຫຕິເຍວ. ອິຘ ປນ ‘‘ອາຍຕເນ ຈິຕ຺ຕໍ ປສີທຕີ’’ຕິ ວຈນໂຕ ອຣຫຕ຺ຕວິປສ຺ສນາຍ ເຈວ ຈຕຸຕ຺ຖຊ຺ຌານູປຈາຣສ຺ສ ຈ ປຏິລາໂຠ ປຏິລາຠສມ຺ປສາໂທຕິ ເວທິຕພ຺ໂພ. ວິປສ຺ສນາ ຫິ ປຎ຺ຎາຍ ອຘິມຸຈ຺ຈນສ຺ສ ກາຣຓໍ, ອຸປຈາຣໍ ອາເນຎ຺ຊສມາປຕ຺ຕິຍາ.

ເອຕຣຫິ ວາ ອາເນຎ຺ຊໍ ສມາປຊ຺ຊຕິ. ປຎ຺ຎາຍ ວາ ອຘິມຸຈ຺ຈຕີຕິ ເອຕ຺ຖ ເອຕຣຫິ ວາ ປຎ຺ຎາຍ ອຘິມຸຈ຺ຈຕິ, ອາເນຎ຺ຊໍ ວາ ສມາປຊ຺ຊຕີຕິ ເອວໍ ປທປຣິວຕ຺ຕນໍ ກຕ຺ວາ ອຕ຺ໂຖ ເວທິຕພ຺ໂພ. ອິທຎ຺ຫິ ວຸຕ຺ຕໍ ໂຫຕິ – ຕສ຺ມິໍ ສມ຺ປສາເທ ສຕິ ເອຕຣຫິ ວາ ປຎ຺ຎາຍ ອຘິມຸຈ຺ຈຕິ, ອຣຫຕ຺ຕໍ ສຈ຺ຉິກໂຣຕີຕິ ອຕ຺ໂຖ. ຕໍ ອນຠິສມ຺ຠຸຓນ຺ໂຕ ອາເນຎ຺ຊໍ ວາ ສມາປຊ຺ຊຕິ, ອຖ ວາ ປຎ຺ຎາຍ ວາ ອຘິມຸຈ຺ຈຕີຕິ ອຣຫຕ຺ຕມຄ຺ຄໍ ຠາເວຕິ, ຕໍ ອນຠິສມ຺ຠຸຓນ຺ໂຕ ອາເນຎ຺ຊໍ ວາ ສມາປຊ຺ຊຕິ. ອຣຫຕ຺ຕມຄ຺ຄໍ ຠາເວຕຸໍ ອສກ຺ໂກນ຺ໂຕ ເອຕຣຫິ ຈຕຸສຈ຺ຈໍ ວາ ສຈ຺ຉິກໂຣຕິ. ຕໍ ອນຠິສມ຺ຠຸຓນ຺ໂຕ ອາເນຎ຺ຊໍ ວາ ສມາປຊ຺ຊຕີຕິ.

ຕຕ຺ຣາຍໍ ນໂຍ – ອິຘ ຠິກ຺ຂຸ ຕຕິຍຊ຺ຌານໍ ປາທກໍ ກຕ຺ວາ ຈຕຸຕ຺ຖຊ຺ຌານສ຺ສ ກສິຓປຣິກມ຺ມໍ ກໂຣຕິ. ຕສ຺ສ ນີວຣຓາ ວິກ຺ຂມ຺ຠນ຺ຕິ, ສຕິ ສນ຺ຕິຏ຺ຐຕິ, ອຸປຈາເຣນ ຈິຕ຺ຕໍ ສມາຘິຍຕິ. ໂສ ຣູປາຣູປໍ ປຣິຄຓ຺ຫາຕິ, ປຈ຺ຈຍໍ ປຣິຄ຺ຄຓ຺ຫາຕິ, ລກ຺ຂຓາຣມ຺ມຓິກໍ ວິປສ຺ສນໍ ວວຕ຺ຖເປຕິ, ຕສ຺ສ ເອວໍ ໂຫຕິ – ‘‘ອຸປຈາເຣນ ເມ ຌານໍ ວິເສສຠາຄິຍໍ ຠເວຍ຺ຍ, ຕິຏ຺ຐຕຸ ວິເສສຠາຄິຍຕາ, ນິພ຺ເພຘຠາຄິຍໍ ນໍ ກຣິສ຺ສາມີ’’ຕິ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ສຈ຺ຉິກໂຣຕິ. ເອຕ຺ຕເກນສ຺ສ ກິຈ຺ຈໍ ກຕໍ ນາມ ໂຫຕິ. ອຣຫຕ຺ຕໍ ສຈ຺ຉິກາຕຸໍ ອສກ຺ໂກນ຺ໂຕ ປນ ຕໂຕ ໂອສກ຺ກິຕມານໂສ ອນ຺ຕຣາ ນ ຕິຏ຺ຐຕິ, ຈຕຸຕ຺ຖຊ຺ຌານໍ ສມາປຊ຺ຊຕິເຍວ. ຍຖາ ກິໍ? ຍຖາ ປຸຣິໂສ ‘‘ວນມຫິໍສໍ ຆາເຕສ຺ສາມີ’’ຕິ ສຕ຺ຕິໍ ຄເຫຕ຺ວາ ອນຸພນ຺ຘນ຺ໂຕ ສເຈ ຕໍ ຆາເຕຕິ, ສກລຄາມວາສິໂນ ໂຕເສສ຺ສຕິ, ອສກ຺ໂກນ຺ໂຕ ປນ ອນ຺ຕຣາມຄ຺ເຄ ສສໂຄຘາທໂຍ ຂຸທ຺ທກມິເຄ ຆາເຕຕ຺ວາ ກາຊໍ ປູເຣຕ຺ວາ ເອຕິເຍວ.

ຕຕ຺ຖ ປຸຣິສສ຺ສ ສຕ຺ຕິໍ ຄເຫຕ຺ວາ ວນມຫິໍສານຸພນ຺ຘນໍ ວິຍ ອິມສ຺ສ ຠິກ຺ຂຸໂນ ຕຕິຍຊ຺ຌານໍ ປາທກໍ ກຕ຺ວາ ຈຕຸຕ຺ຖຊ຺ຌານສ຺ສ ປຣິກມ຺ມກຣຓໍ, ວນມຫິໍສຆາຕນໍ ວິຍ – ‘‘ນີວຣຓວິກ຺ຂມ຺ຠນາທີນິ ສມນຸປສ຺ສໂຕ ວິເສສຠາຄິຍໍ ຠເວຍ຺ຍ, ຕິຏ຺ຐຕຸ ວິເສສຠາຄິຍຕາ, ນິພ຺ເພຘຠາຄິຍໍ ນໍ ກຣິສ຺ສາມີ’’ຕິ ວິປສ຺ສນໍ ວຑ຺ເຒຕ຺ວາ ອຣຫຕ຺ຕສ຺ສ ສຈ຺ຉິກຣຓໍ, ມຫິໍສໍ ຆາເຕຕຸໍ ອສກ຺ໂກນ຺ຕສ຺ສ ອນ຺ຕຣາມຄ຺ເຄ ສສໂຄຘາທໂຍ ຂຸທ຺ທກມິເຄ ຆາເຕຕ຺ວາ ກາຊໍ ປູເຣຕ຺ວາ ຄມນໍ ວິຍ ອຣຫຕ຺ຕໍ ສຈ຺ຉິກາຕຸໍ ອສກ຺ໂກນ຺ຕສ຺ສ, ຕໂຕ ໂອສກ຺ກິຕ຺ວາ ຈຕຸຕ຺ຖຊ຺ຌານສມາປຊ຺ຊນໍ ເວທິຕພ຺ພໍ. ມຄ຺ຄຠາວນາ ຈຕຸສຈ຺ຈສຈ຺ຉິກິຣິຍາໂຍຊນາສຸປິ ເອເສວ ນໂຍ.

ອິທານິ ອຣຫຕ຺ຕໍ ສຈ຺ຉິກາຕຸໍ ອສກ຺ໂກນ຺ຕສ຺ສ ນິພ຺ພຕ຺ຕຏ຺ຐານໍ ທສ຺ເສນ຺ໂຕ ກາຍສ຺ສ ເຠທາຕິອາທິມາຫ. ຕຕ຺ຖ ຍນ຺ຕິ ເຍນ ກາຣເຓນ ຕໍ ສໍວຕ຺ຕນິກໍ ວິຎ຺ຎາຓໍ ອສ຺ສ ອາເນຎ຺ຊູປຄໍ, ຕໍ ກາຣຓໍ ວິຊ຺ຊຕີຕິ ອຕ຺ໂຖ. ເອຕ຺ຖ ຈ ຕໍສໍວຕ຺ຕນິກນ຺ຕິ ຕສ຺ສ ຠິກ຺ຂຸໂນ ສໍວຕ຺ຕນິກໍ. ເຍນ ວິປາກວິຎ຺ຎາເຓນ ໂສ ຠິກ຺ຂຸ ສໍວຕ຺ຕຕິ ນິພ຺ພຕ຺ຕຕິ, ຕໍ ວິຎ຺ຎາຓໍ. ອາເນຎ຺ຊູປຄນ຺ຕິ ກຸສລາເນຎ຺ຊສຠາວູປຄຕໍ ອສ຺ສ, ຕາທິສເມວ ຠເວຍ຺ຍາຕິ ອຕ຺ໂຖ. ເກຈິ ກຸສລວິຎ຺ຎາຓໍ ວທນ຺ຕິ. ຍໍ ຕສ຺ສ ຠິກ຺ຂຸໂນ ສໍວຕ຺ຕນິກໍ ອຸປປຕ຺ຕິເຫຕຸຠູຕໍ ກຸສລວິຎ຺ຎາຓໍ ອາເນຎ຺ຊູປຄຕໍ ອສ຺ສ, ວິປາກກາເລປິ ຕນ຺ນາມກເມວ ອສ຺ສາຕິ ອຕ຺ໂຖ. ໂສ ປນາຍມຕ຺ໂຖ – ‘‘ປຸຎ຺ຎໍ ເຈ ສງ຺ຂາຣໍ ອຠິສງ຺ຂໂຣຕິ, ປຸຎ຺ຎູປຄໍ ໂຫຕິ ວິຎ຺ຎາຓໍ. ອປຸຎ຺ຎໍ ເຈ ສງ຺ຂາຣໍ ອຠິສງ຺ຂາໂຣຕິ, ອປຸຎ຺ຎຸປຄໍ ໂຫຕິ ວິຎ຺ຎາຓໍ. ອາເນຎ຺ຊໍ ເຈ ສງ຺ຂາຣໍ ອຠິສງ຺ຂໂຣຕິ, ອາເນຎ຺ຊູປຄໍ ໂຫຕິ ວິຎ຺ຎາຓ’’ນ຺ຕິ (ສໍ. ນິ. ໒.໕໑) ອິມິນາ ນເຍນ ເວທິຕພ຺ໂພ. ອາເນຎ຺ຊສປ຺ປາຍາຕິ ອາເນຎ຺ຊສ຺ສ ຈຕຸຕ຺ຖຊ຺ຌານສ຺ສ ສປ຺ປາຍາ. ນ ເກວລຎ຺ຈ ສາ ອາເນຎ຺ຊສ຺ເສວ, ອຸປຣິ ອຣຫຕ຺ຕສ຺ສາປິ ສປ຺ປາຍາວ ອຸປກາຣຠູຕາເຍວາຕິ ເວທິຕພ຺ພາ. ອິຕິ ອິມສ຺ມິໍ ປຐມກອາເນຎ຺ເຊ ສມາຘິວເສນ ໂອສກ຺ກນາ ກຖິຕາ.

໖໗. ອິຕິ ປຏິສຎ຺ຈິກ຺ຂຕີຕິ ຈຕຸຕ຺ຖຊ຺ຌານໍ ປຕ຺ວາ ເອວໍ ປຏິສຎ຺ຈິກ຺ຂຕິ. ອຍຎ຺ຫິ ຠິກ຺ຂຸ ເຫຏ຺ຐິເມນ ຠິກ຺ຂຸນາ ປຎ຺ຎວນ຺ຕຕໂຣ ຕສ຺ສ ຈ ຠິກ຺ຂຸໂນ ອຕ຺ຕໂນ ຈາຕິ ທ຺ວິນ຺ນມ຺ປິ ກມ຺ມຏ຺ຐານໍ ເອກໂຕ ກຕ຺ວາ ສມ຺ມສຕິ. ຕພ຺ພຫຸລວິຫາຣິໂນຕິ ຣູປປຏິພາຫເນນ ຕເມວ ປຏິປທໍ ພຫຸລໍ ກຕ຺ວາ ວິຫຣນ຺ຕສ຺ສ. ອາເນຎ຺ຊໍ ສມາປຊ຺ຊຕີຕິ ອາກາສານຎ຺ຈາຍຕານາເນຎ຺ຊໍ ສມາປຊ຺ຊຕິ. ເສສໍ ປຸຣິມສທິສເມວ. ຍຖາ ຈ ອິຘ, ເອວໍ ສພ຺ພຕ຺ຖ ວິເສສມຕ຺ຕເມວ ປນ ວກ຺ຂາມ. ອິຕິ ອິມສ຺ມິໍ ທຸຕິຍອາເນຎ຺ເຊ ວິປສ຺ສນາວເສນ ໂອສກ຺ກນາ ກຖິຕາ, ‘‘ຍໍກິຎ຺ຈິ ຣູປ’’ນ຺ຕິ ເອວໍ ວິປສ຺ສນາມຄ຺ຄໍ ທສ຺ເສນ຺ເຕນ ກຖິຕາຕິ ອຕ຺ໂຖ.

ອິຕິ ປຏິສຎ຺ຈິກ຺ຂຕີຕິ ອາກາສານຎ຺ຈາຍຕນໍ ປຕ຺ວາ ເອວໍ ປຏິສຎ຺ຈິກ຺ຂຕິ. ອຍຎ຺ຫິ ເຫຏ຺ຐາ ທ຺ວີຫິ ຠິກ຺ຂູຫິ ປຎ຺ຎວນ຺ຕຕໂຣ ເຕສຎ຺ຈ ຠິກ຺ຂູນໍ ອຕ຺ຕໂນ ຈາຕິ ຕິຓ຺ຓມ຺ປິ ກມ຺ມຏ຺ຐານໍ ເອກໂຕ ກຕ຺ວາ ສມ຺ມສຕິ. ອຸຠຍເມຕໍ ອນິຈ຺ຈນ຺ຕິ ເອຕ຺ຖ ອຏ຺ຐ ເອເກກໂກຏ຺ຐາສາ ທິຏ຺ຐຘມ຺ມິກສມ຺ປຣາຍິກວເສນ ປນ ສງ຺ຂິປິຕ຺ວາ ອຸຠຍນ຺ຕິ ວຸຕ຺ຕໍ. ນາລໍ ອຠິນນ຺ທິຕຸນ຺ຕິ ຕຓ຺ຫາທິຏ຺ຐິວເສນ ອຠິນນ຺ທິຕຸໍ ນ ຍຸຕ຺ຕໍ. ເສສປທທ຺ວເຍປິ ເອເສວ ນໂຍ. ຕພ຺ພຫຸລວິຫາຣິໂນຕິ ກາມປຏິພາຫເນນ ຈ ຣູປປຏິພາຫເນນ ຈ ຕເມວ ປຏິປທໍ ພຫຸລໍ ກຕ຺ວາ ວິຫຣນ຺ຕສ຺ສ. ອາເນຎ຺ຊໍ ສມາປຊ຺ຊຕີຕິ ວິຎ຺ຎາຓຎ຺ຈາຍຕນາເນຎ຺ຊໍ ສມາປຊ຺ຊຕິ. ອິມສ຺ມິໍ ຕຕິຍອາເນຎ຺ເຊ ວິປສ຺ສນາວເສນ ໂອສກ຺ກນາ ກຖິຕາ.

໖໘. ອິຕິ ປຏິສຎ຺ຈິກ຺ຂຕີຕິ ວິຎ຺ຎາຓຎ຺ຈາຍຕນໍ ປຕ຺ວາ ເອວໍ ປຏິສຎ຺ຈິກ຺ຂຕິ. ອຍຎ຺ຫິ ເຫຏ຺ຐາ ຕີຫິ ຠິກ຺ຂູຫິ ປຎ຺ຎວນ຺ຕຕໂຣ ເຕສຎ຺ຈ ຠິກ຺ຂູນໍ ອຕ຺ຕໂນ ຈາຕິ ຈຕຸນ຺ນມ຺ປິ ກມ຺ມຏ຺ຐານໍ ເອກໂຕ ກຕ຺ວາ ສມ຺ມສຕິ. ຍຕ຺ເຖຕາ ອປຣິເສສາ ນິຣຸຊ຺ຌນ຺ຕີຕິ ຍໍ ອາກິຎ຺ຈຎ຺ຎາຍຕນໍ ປຕ຺ວາ ເອຕາ ເຫຏ຺ຐາ ວຸຕ຺ຕາ ສພ຺ພສຎ຺ຎາ ນິຣຸຊ຺ຌນ຺ຕິ. ເອຕໍ ສນ຺ຕໍ ເອຕໍ ປຓີຕນ຺ຕິ ເອຕໍ ອງ຺ຄສນ຺ຕຕາຍ ອາຣມ຺ມຓສນ຺ຕຕາຍ ຈ ສນ຺ຕໍ, ອຕປ຺ປກຏ຺ເຐນ ປຓີຕໍ. ຕພ຺ພຫຸລວິຫາຣິໂນຕິ ຕາສໍ ສຎ຺ຎານໍ ປຏິພາຫເນນ ຕເມວ ປຏິປທໍ ພຫຸລໍ ກຕ຺ວາ ວິຫຣນ຺ຕສ຺ສ. ອິມສ຺ມິໍ ປຐມາກິຎ຺ຈຎ຺ຎາຍຕເນ ສມາຘິວເສນ ໂອສກ຺ກນາ ກຖິຕາ.

ອິຕິ ປຏິສຎ຺ຈິກ຺ຂຕີຕິ ວິຎ຺ຎາຓຎ຺ຈາຍຕນເມວ ປຕ຺ວາ ເອວໍ ປຏິສຎ຺ຈິກ຺ຂຕິ. ອຍຎ຺ຫິ ເຫຏ຺ຐາ ຈຕູຫິ ຠິກ຺ຂູຫິ ປຎ຺ຎວນ຺ຕຕໂຣ ເຕສຎ຺ຈ ຠິກ຺ຂູນໍ ອຕ຺ຕໂນ ຈາຕິ ປຎ຺ຈນ຺ນມ຺ປິ ກມ຺ມຏ຺ຐານໍ ເອກໂຕ ກຕ຺ວາ ສມ຺ມສຕິ. ອຕ຺ເຕນ ວາ ອຕ຺ຕນິເຍນ ວາຕິ ອຫໍ ມມາຕິ ຄເຫຕພ຺ເພນ ສຸຎ຺ຎໍ ຕຸຈ຺ຉໍ ຣິຕ຺ຕໍ. ເອວເມຕ຺ຖ ທ຺ວິໂກຏິກາ ສຸຎ຺ຎຕາ ທສ຺ສິຕາ. ຕພ຺ພຫຸລວິຫາຣິໂນຕິ ເຫຏ຺ຐາ ວຸຕ຺ຕປຏິປທຎ຺ຈ ອິມຎ຺ຈ ສຸຎ຺ຎຕປຏິປທໍ ພຫຸລໍ ກຕ຺ວາ ວິຫຣນ຺ຕສ຺ສ. ອິມສ຺ມິໍ ທຸຕິຍາກິຎ຺ຈຎ຺ຎາຍຕເນ ວິປສ຺ສນາວເສນ ໂອສກ຺ກນາ ກຖິຕາ.

໗໐. ອິຕິ ປຏິສຎ຺ຈິກ຺ຂຕີຕິ ວິຎ຺ຎາຓຎ຺ຈາຍຕນເມວ ປຕ຺ວາ ເອວໍ ປຏິສຎ຺ຈິກ຺ຂຕິ. ອຍຎ຺ຫິ ເຫຏ຺ຐາ ປຎ຺ຈຫິ ຠິກ຺ຂູຫິ ປຎ຺ຎວນ຺ຕຕໂຣ ເຕສຎ຺ຈ ຠິກ຺ຂູນໍ ອຕ຺ຕໂນ ຈາຕິ ຉນ຺ນມ຺ປິ ກມ຺ມຏ຺ຐານໍ ເອກໂຕ ກຕ຺ວາ ສມ຺ມສຕິ. ນາຫໍ ກ຺ວຈນິ ກສ຺ສຈິ ກິຎ຺ຈນຕສ຺ມິໍ, ນ ຈ ມມ ກ຺ວຈນິ ກິສ຺ມິຎ຺ຈິ ກິຎ຺ຈນໍ ນຕ຺ຖີຕິ ເອຕ຺ຖ ປນ ຈຕຸໂກຏິກາ ສຸຎ຺ຎຕາ ກຖິຕາ. ກຖໍ? ອຍຎ຺ຫິ ນາຫໍ ກ຺ວຈນີຕິ ກ຺ວຈິ ອຕ຺ຕານໍ ນ ປສ຺ສຕິ, ກສ຺ສຈິ ກິຎ຺ຈນຕສ຺ມິນ຺ຕິ ອຕ຺ຕໂນ ອຕ຺ຕານໍ ກສ຺ສຈິ ປຣສ຺ສ ກິຎ຺ຈນຠາເວ ອຸປເນຕພ຺ພໍ ນ ປສ຺ສຕິ, ອຕ຺ຕໂນ ຠາຕິຏ຺ຐາເນ ຠາຕຣໍ ສຫາຍຏ຺ຐາເນ ສຫາຍໍ ປຣິກ຺ຂາຣຏ຺ຐາເນ ວາ ປຣິກ຺ຂາຣໍ ມຎ຺ຎິຕ຺ວາ ອຸປຄນ຺ຕ຺ວາ ອຸປເນຕພ຺ພໍ ນ ປສ຺ສຕີຕິ ອຕ຺ໂຖ. ນ ຈ ມມ ກ຺ວຈນີຕິ ເອຕ຺ຖ ມມ – ສທ຺ທໍ ຕາວ ຐເປຕ຺ວາ ນ ຈ ກ຺ວຈນິ ປຣສ຺ສ ຈ ອຕ຺ຕານໍ ກ຺ວຈິ ນ ປສ຺ສຕີຕິ ອຍມຕ຺ໂຖ. ອິທານິ ມມ – ສທ຺ທໍ ອາຫຣິຕ຺ວາ ມມ ກິສ຺ມິຎ຺ຈິ ກິຎ຺ຈນໍ ນຕ຺ຖີຕິ ໂສ ປຣສ຺ສ ອຕ຺ຕາ ມມ ກິສ຺ມິຎ຺ຈິ ກິຎ຺ຈນຠາເວ ອຕ຺ຖີຕິ ນ ປສ຺ສຕິ. ອຕ຺ຕໂນ ຠາຕິຏ຺ຐາເນ ຠາຕຣໍ ສຫາຍຏ຺ຐາເນ ສຫາຍໍ ປຣິກ຺ຂາຣຏ຺ຐາເນ ວາ ປຣິກ຺ຂາຣນ຺ຕິ ກິສ຺ມິຎ຺ຈິ ຐາເນ ປຣສ຺ສ ອຕ຺ຕານໍ ອິມິນາ ກິຎ຺ຈນຠາເວນ ອຸປເນຕພ຺ພໍ ນ ປສ຺ສຕີຕິ ອຕ຺ໂຖ. ເອວມຍໍ ຍສ຺ມາ ເນວ ກຕ຺ຖຈິ ອຕ຺ຕານໍ ປສ຺ສຕິ, ນ ຕໍ ປຣສ຺ສ ກິຎ຺ຈນຠາເວ ອຸປເນຕພ຺ພໍ ປສ຺ສຕິ, ນ ປຣສ຺ສ ອຕ຺ຕານໍ ປສ຺ສຕິ, ນ ປຣສ຺ສ ອຕ຺ຕານໍ ອຕ຺ຕໂນ ກິຎ຺ຈນຠາເວ ອຸປເນຕພ຺ພໍ ປສ຺ສຕິ, ຕສ຺ມາ ອຍໍ ສຸຎ຺ຎຕາ ຈຕຸໂກຏິກາຕິ ເວທິຕພ຺ພາ. ຕພ຺ພຫຸລວິຫາຣິໂນຕິ ເຫຏ຺ຐາ ວຸຕ຺ຕປ຺ປຏິປທໍ ອິມໍ ຈຕຸໂກຏິສຸຎ຺ຎຕຎ຺ຈ ພຫຸລໍ ກຕ຺ວາ ວິຫຣນ຺ຕສ຺ສ. ອິມສ຺ມິໍ ຕຕິຍາກິຎ຺ຈຎ຺ຎາຍຕເນປິ ວິປສ຺ສນາວເສເນວ ໂອສກ຺ກນາ ກຖິຕາ.

ອິຕິ ປຏິສຎ຺ຈິກ຺ຂຕີຕິ ອາກິຎ຺ຈຎ຺ຎາຍຕນໍ ປຕ຺ວາ ເອວໍ ປຏິສຎ຺ຈິກ຺ຂຕິ. ອຍຎ຺ຫິ ເຫຏ຺ຐາ ຉຫິ ຠິກ຺ຂູຫິ ປຎ຺ຎວນ຺ຕຕໂຣ ເຕສຎ຺ຈ ຠິກ຺ຂູນໍ ອຕ຺ຕໂນ ຈາຕິ ສຕ຺ຕນ຺ນມ຺ປິ ກມ຺ມຏ຺ຐານໍ ເອກໂຕ ກຕ຺ວາ ສມ຺ມສຕິ. ຍຕ຺ເຖຕາ ອປຣິເສສາ ນິຣຸຊ຺ຌນ຺ຕີຕິ ຍໍ ເນວສຎ຺ຎານາສຎ຺ຎາຍຕນໍ ປຕ຺ວາ ເອຕ຺ຖ ເອຕາ ເຫຏ຺ຐາ ວຸຕ຺ຕາ ສພ຺ພສຎ຺ຎາ ນິຣຸຊ຺ຌນ຺ຕິ. ຕພ຺ພຫຸລວິຫາຣິໂນຕິ ຕາສໍ ສຎ຺ຎານໍ ປຏິພາຫເນນ ຕເມວ ປຏິປທໍ ພຫຸລໍ ກຕ຺ວາ ວິຫຣນ຺ຕສ຺ສ. ອິມສ຺ມິໍ ເນວສຎ຺ຎານາສຎ຺ຎາຍຕເນ ສມາຘິວເສນ ໂອສກ຺ກນາ ກຖິຕາ.

໗໑. ໂນ ຈສ຺ສ ໂນ ຈ ເມ ສິຍາຕິ ສເຈ ມຍ຺ຫໍ ປຸພ຺ເພ ປຎ຺ຈວິຘໍ ກມ຺ມວຏ຺ຏໍ ນ ອາຍູຫິຕໍ ອສ຺ສ, ຍໍ ເມ ອິທໍ ເອຕຣຫິ ເອວໍ ປຎ຺ຈວິຘໍ ວິປາກວຏ຺ຏໍ ເອຕໍ ເມ ນ ສິຍາ ນປ຺ປວຕ຺ເຕຍ຺ຍາຕິ ອຕ຺ໂຖ. ນ ຠວິສ຺ສຕີຕິ ສເຈ ເອຕຣຫິ ປຎ຺ຈວິຘໍ ກມ຺ມວຏ຺ຏໍ ອາຍູຫິຕໍ ນ ຠວິສ຺ສຕິ. ນ ເມ ຠວິສ຺ສຕີຕິ ຕສ຺ມິໍ ອສຕິ ອນາຄເຕ ເມ ປຎ຺ຈວິຘໍ ວິປາກວຏ຺ຏໍ ນ ຠວິສ຺ສຕິ. ຍທຕ຺ຖິ ຍໍ ຠູຕໍ ຕໍ ປຊຫາມີຕິ ຍໍ ອຕ຺ຖິ ຍໍ ຠູຕໍ ເອຕຣຫິ ຂນ຺ຘປຎ຺ຈກໍ, ຕໍ ປຊຫາມິ. ເອວໍ ອຸເປກ຺ຂໍ ປຏິລຠຕີຕິ ໂສ ຠິກ຺ຂຸ ເອວໍ ວິປສ຺ສນຸເປກ຺ຂໍ ລຠຕີຕິ ອຕ຺ໂຖ.

ປຣິນິພ຺ພາເຍຍ຺ຍ ນຸ ໂຂ ໂສ, ຠນ຺ເຕ, ຠິກ຺ຂຸ ນ ວາ ປຣິນິພ຺ພາເຍຍ຺ຍາຕິ ກິໍ ປຸຈ຺ຉາມີຕິ ປຸຈ຺ຉຕິ, ຕຕິຍຊ຺ຌານໍ ປາທກໍ ກຕ຺ວາ ຐິຕສ຺ສ ອຣຫຕ຺ຕມ຺ປິ ໂອສກ຺ກນາປິ ປຏິປທາປິ ປຏິສນ຺ຘິປິ ກຖິຕາ, ຕຖາ ຈຕຸຕ຺ຖຊ຺ຌານາທີນິ ປາທການິ ກຕ຺ວາ ຐິຕານໍ, ເນວສຎ຺ຎານາສຎ຺ຎາຍຕນໍ ປາທກໍ ກຕ຺ວາ ຐິຕສ຺ສ ນ ກິຎ຺ຈິ ກຖິຕໍ, ຕໍ ປຸຈ຺ຉາມີຕິ ປຸຈ຺ຉຕິ. ອເປຕ຺ຖາຕິ ອປິ ເອຕ຺ຖ. ໂສ ຕໍ ອຸເປກ຺ຂໍ ອຠິນນ຺ທຕີຕິ ໂສ ຕໍ ວິປສ຺ສນຸເປກ຺ຂໍ ຕຓ຺ຫາທິຏ຺ຐິອຠິນນ຺ທນາຫິ ອຠິນນ຺ທຕິ. ເສສປທທ຺ວເຍປິ ເອເສວ ນໂຍ. ຕນ຺ນິສ຺ສິຕໍ ໂຫຕິ ວິຎ຺ຎາຓນ຺ຕິ ວິຎ຺ຎາຓໍ ວິປສ຺ສນານິສ຺ສິຕໍ ໂຫຕິ. ຕທຸປາທານນ຺ຕິ ຍໍ ນິກນ຺ຕິວິຎ຺ຎາຓໍ, ຕໍ ຕສ຺ສ ອຸປາທານໍ ນາມ ຄຫຓໍ ນາມ ໂຫຕິ. ສອຸປາທາໂນຕິ ສຄຫໂຓ. ນ ປຣິນິພ຺ພາຍຕີຕິ ວິປສ຺ສນາຍ ສາລໂຍ ຠິກ຺ຂຸ ມມ ສາສເນ ນ ປຣິນິພ຺ພາຍຕິ. ໂຍ ປນ ວິຫາຣປຣິເວຓອຸປຏ຺ຐາກາທີສຸ ສາລໂຍ, ຕສ຺ມິໍ ວຕ຺ຕພ຺ພເມວ ນຕ຺ຖີຕິ ທສ຺ເສຕິ. ກຫໍ ປນາຕິ? ກຕ຺ຖ ປນ? ອຸປາທິຍມາໂນ ອຸປາທິຍຕີຕິ ປຏິສນ຺ຘິໍ ຄຓ຺ຫມາໂນ ຄຓ຺ຫາຕິ. ອຸປາທານເສຏ຺ຐໍ ກິຣ ໂສ, ຠນ຺ເຕຕິ, ຠນ຺ເຕ, ໂສ ກິຣ ຠິກ຺ຂຸ ຄເຫຕພ຺ພຏ຺ຐານໍ ເສຏ຺ຐໍ ອຸຕ຺ຕມໍ ຠວໍ ອຸປາທິຍຕິ, ເສຏ຺ຐຠເວ ປຏິສນ຺ຘິໍ ຄຓ຺ຫາຕີຕິ ອຕ຺ໂຖ. ອິມິນາ ຕສ຺ສ ຠິກ຺ຂຸໂນ ປຏິສນ຺ຘິ ກຖິຕາ. ອິທານິສ຺ສ ອຣຫຕ຺ຕໍ ກເຖຕຸໍ ອິຘານນ຺ທາຕິອາທິມາຫ.

໗໓. ນິສ຺ສາຍ ນິສ຺ສາຍາຕິ ຕໍ ຕໍ ສມາປຕ຺ຕິໍ ນິສ຺ສາຍ. ໂອຆສ຺ສ ນິຕ຺ຖຣຓາ ອກ຺ຂາຕາຕິ ໂອຆຕຣຓໍ ກຖິຕໍ, ຕຕິຍຊ຺ຌານໍ ປາທກໍ ກຕ຺ວາ ຐິຕຠິກ຺ຂຸໂນ ໂອຆນິຕ຺ຖຣຓາ ກຖິຕາ…ເປ… ເນວສຎ຺ຎານາສຎ຺ຎາຍຕນໍ ປາທກໍ ກຕ຺ວາ ຐິຕຠິກ຺ຂຸໂນ ໂອຆນິຕ຺ຖຣຓາ ກຖິຕາຕິ ວທຕິ.

ກຕໂມ ປນ, ຠນ຺ເຕ, ອຣິໂຍ ວິໂມກ຺ໂຂຕິ ອິຘ ກິໍ ປຸຈ຺ຉຕິ? ສມາປຕ຺ຕິໍ ຕາວ ປທຏ຺ຐານໍ ກຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ຄຓ຺ຫນ຺ໂຕ ຠິກ຺ຂຸ ນາວໍ ວາ ອຸຬຸມ຺ປາທີນິ ວາ ນິສ຺ສາຍ ມໂຫຆໍ ຕຣິຕ຺ວາ ປາຣໍ ຄຈ຺ຉນ຺ໂຕ ວິຍ ນ ກິລມຕິ. ສຸກ຺ຂວິປສ຺ສໂກ ປນ ປກິຓ຺ຓກສງ຺ຂາເຣ ສມ຺ມສິຕ຺ວາ ອຣຫຕ຺ຕໍ ຄຓ຺ຫນ຺ໂຕ ພາຫຸພເລນ ໂສຕໍ ຉິນ຺ທິຕ຺ວາ ປາຣໍ ຄຈ຺ຉນ຺ໂຕ ວິຍ ກິລມຕິ. ອິຕິ ອິມສ຺ສ ສຸກ຺ຂວິປສ຺ສກສ຺ສ ອຣຫຕ຺ຕໍ ປຸຈ຺ຉາມີຕິ ປຸຈ຺ຉຕິ. ອຣິຍສາວໂກຕິ ສຸກ຺ຂວິປສ຺ສໂກ ອຣິຍສາວໂກ. ອຍຎ຺ຫິ ເຫຏ຺ຐາ ອຏ຺ຐຫິ ຠິກ຺ຂູຫິ ປຎ຺ຎວນ຺ຕຕໂຣ ເຕສຎ຺ຈ ຠິກ຺ຂູນໍ ອຕ຺ຕໂນ ຈາຕິ ນວນ຺ນມ຺ປິ ກມ຺ມຏ຺ຐານໍ ເອກໂຕ ກຕ຺ວາ ສມ຺ມສຕິ. ເອສ ສກ຺ກາໂຍ ຍາວຕາ ສກ຺ກາໂຍຕິ ຍຕ຺ຕໂກ ເຕຠູມກວຏ຺ຏສງ຺ຂາໂຕ ສກ຺ກາໂຍ ນາມ ອຕ຺ຖິ, ສພ຺ໂພປິ ໂສ ເອສ ສກ຺ກາໂຍ, ນ ອິໂຕ ປຣໍ ສກ຺ກາໂຍ ອຕ຺ຖີຕິ ປຏິສຎ຺ຈິກ຺ຂຕິ.

ເອຕໍ ອມຕໍ ຍທິທໍ ອນຸປາທາ ຈິຕ຺ຕສ຺ສ ວິໂມກ຺ໂຂຕິ ໂຍ ປເນສ ຈິຕ຺ຕສ຺ສ ອນຸປາທາວິໂມກ຺ໂຂ ນາມ, ເອຕໍ ອມຕໍ ເອຕໍ ສນ຺ຕໍ ເອຕໍ ປຓີຕນ຺ຕິ ປຏິສຎ຺ຈິກ຺ຂຕິ. ອຎ຺ຎຕ຺ຖ ຈ ‘‘ອນຸປາທາ ຈິຕ຺ຕສ຺ສ ວິໂມກ຺ໂຂ’’ຕິ ນິພ຺ພານໍ ວຸຈ຺ຈຕິ. ອິມສ຺ມິໍ ປນ ສຸຕ຺ເຕ ສຸກ຺ຂວິປສ຺ສກສ຺ສ ອຣຫຕ຺ຕໍ ກຖິຕໍ. ເສສໍ ສພ຺ພຕ຺ຖ ອຸຕ຺ຕານເມວ.

ເກວລໍ ປນ ອິມສ຺ມິໍ ສຸຕ຺ເຕ ສຕ຺ຕສຸ ຐາເນສຸ ໂອສກ຺ກນາ ກຖິຕາ, ອຏ຺ຐສຸ ຐາເນສຸ ປຏິສນ຺ຘິ, ນວສຸ ຐາເນສຸ ອຣຫຕ຺ຕໍ ກຖິຕນ຺ຕິ ເວທິຕພ຺ພໍ. ກຖໍ? ຕຕິຍໍ ຌານໍ ຕາວ ປາທກໍ ກຕ຺ວາ ຐິຕສ຺ສ ຠິກ຺ຂຸໂນ ໂອສກ຺ກນາ ກຖິຕາ, ປຏິສນ຺ຘິ ກຖິຕາ, ອຣຫຕ຺ຕໍ ກຖິຕໍ, ຕຖາ ຈຕຸຕ຺ຖຊ຺ຌານໍ, ຕຖາ ອາກາສານຎ຺ຈາຍຕນໍ. ວິຎ຺ຎາຓຎ຺ຈາຍຕນໍ ປນ ປທຏ຺ຐານໍ ກຕ຺ວາ ຐິຕານໍ ຕິຓ຺ຓໍ ຠິກ຺ຂູນໍ ໂອສກ຺ກນາ ກຖິຕາ, ປຏິສນ຺ຘິ ກຖິຕາ, ອຣຫຕ຺ຕໍ ກຖິຕໍ. ຕຖາ ອາກິຎ຺ຈຎ຺ຎາຍຕນໍ ປາທກໍ ກຕ຺ວາ ຐິຕສ຺ສ ຠິກ຺ຂຸໂນ. ເນວສຎ຺ຎານາສຎ຺ຎາຍຕນໍ ປາທກໍ ກຕ຺ວາ ຐິຕສ຺ສ ປນ ໂອສກ຺ກນາ ນຕ຺ຖິ, ປຏິສນ຺ຘິ ປນ ອຣຫຕ຺ຕຎ຺ຈ ກຖິຕໍ. ສຸກ຺ຂວິປສ຺ສກສ຺ສ ອຣຫຕ຺ຕເມວ ກຖິຕນ຺ຕິ. ເອວໍ ສຕ຺ຕສຸ ຐາເນສຸ ໂອສກ຺ກນາ ກຖິຕາ, ອຏ຺ຐສຸ ຐາເນສຸ ປຏິສນ຺ຘິ, ນວສຸ ຐາເນສຸ ອຣຫຕ຺ຕໍ ກຖິຕນ຺ຕິ ເວທິຕພ຺ພໍ. ອິມຎ຺ຈ ປນ ສຕ຺ຕສຸ ຐາເນສຸ ໂອສກ຺ກນໍ ອຏ຺ຐສຸ ປຏິສນ຺ຘິໍ ນວສຸ ອຣຫຕ຺ຕໍ ສໂມຘາເນຕ຺ວາ ກເຖນ຺ເຕນ ອິມໍ ອາເນຎ຺ຊສປ຺ປາຍສຸຕ຺ຕໍ ສຸກຖິຕໍ ນາມ ໂຫຕີຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ອາເນຎ຺ຊສປ຺ປາຍສຸຕ຺ຕວຓ຺ຓນາ ນິຏ຺ຐິຕາ.