໕. ສຸນກ຺ຂຕ຺ຕສຸຕ຺ຕວຓ຺ຓນາ

໕໕. ເອວໍ ເມ ສຸຕນ຺ຕິ ສຸນກ຺ຂຕ຺ຕສຸຕ຺ຕໍ. ຕຕ຺ຖ ອຎ຺ຎາຕິ ອຣຫຕ຺ຕໍ. ພ຺ຍາກຕາຕິ ຂີຓາ ຊາຕີຕິອາທີຫິ ຈຕູຫິ ປເທຫິ ກຖິຕາ. ອຘິມາເນນາຕິ ອປ຺ປຕ຺ເຕ ປຕ຺ຕສຎ຺ຎິໂນ, ອນຘິຄເຕ ອຘິຄຕສຎ຺ຎິໂນ ຫຸຕ຺ວາ ອຘິຄຕໍ ອມ຺ເຫຫີຕິ ມາເນນ ພ຺ຍາກຣິໍສຸ.

໕໖. ເອວຎ຺ເຈຕ຺ຖ ສຸນກ຺ຂຕ຺ຕ ຕຖາຄຕສ຺ສ ໂຫຕີຕິ ສຸນກ຺ຂຕ຺ຕ ເອຕ຺ຖ ເອເຕສໍ ຠິກ຺ຂູນໍ ປຎ຺ຫພ຺ຍາກຣເຓ – ‘‘ອິທໍ ຐານໍ ເອເຕສໍ ອວິຠູຕໍ ອນ຺ຘກາຣໍ, ເຕນິເມ ອນຘິຄເຕ ອຘິຄຕສຎ຺ຎິໂນ, ຫນ຺ທ ເນສໍ ວິໂສເຘຕ຺ວາ ປາກຏໍ ກຕ຺ວາ ຘມ຺ມໍ ເທເສມີ’’ຕິ, ເອວຎ຺ຈ ຕຖາຄຕສ຺ສ ໂຫຕິ. ອຖ ຈ ປນິເຘກຈ຺ເຈ…ເປ… ຕສ຺ສປິ ໂຫຕິ ອຎ຺ຎຖຕ຺ຕນ຺ຕິ ຠຄວາ ປຏິປນ຺ນການໍ ຘມ຺ມໍ ເທເສຕິ. ຍຕ຺ຖ ປນ ອິຈ຺ຉາຈາເຣ ຐິຕາ ເອກຈ຺ເຈ ໂມຆປຸຣິສາ ໂຫນ຺ຕິ, ຕຕ຺ຣ ຠຄວາ ປສ຺ສຕິ – ‘‘ອິເມ ອິມໍ ປຎ຺ຫໍ ອຸຄ຺ຄເຫຕ຺ວາ ອຊານິຕ຺ວາວ ຊານນ຺ຕາ ວິຍ ອປ຺ປຕ຺ເຕ ປຕ຺ຕສຎ຺ຎິໂນ ຫຸຕ຺ວາ ຄາມນິຄມາທີສຸ ວິເສວມານາ ວິຈຣິສ຺ສນ຺ຕິ, ຕໍ ເນສໍ ຠວິສ຺ສຕິ ທີຆຣຕ຺ຕໍ ອຫິຕາຍ ທຸກ຺ຂາຍາ’’ຕິ ເອວມສ຺ສາຍໍ ອິຈ຺ຉາຈາເຣ ຐິຕານໍ ກາຣຓາ ປຏິປນ຺ນການມ຺ປິ ອຕ຺ຖາຍ ‘‘ຘມ຺ມໍ ເທສິສ຺ສາມີ’’ຕິ ອຸປ຺ປນ຺ນສ຺ສ ຈິຕ຺ຕສ຺ສ ອຎ຺ຎຖາຠາໂວ ໂຫຕິ. ຕໍ ສນ຺ຘາເຍຕໍ ວຸຕ຺ຕໍ.

໕໘. ໂລກາມິສາຘິມຸຕ຺ໂຕຕິ ວຏ຺ຏາມິສ-ກາມາມິສ-ໂລກາມິສຠູເຕສຸ ປຎ຺ຈສຸ ກາມຄຸເຓສຸ ອຘິມຸຕ຺ໂຕ ຕນ຺ນິນ຺ໂນ ຕຄ຺ຄຣຸໂກ ຕປ຺ປພ຺ຠາໂຣ. ຕປ຺ປຕິຣູປີຕິ ກາມຄຸຓສຠາຄາ. ອາເນຎ຺ຊປຏິສໍຍຸຕ຺ຕາຍາຕິ ອາເນຎ຺ຊສມາປຕ຺ຕິປຏິສໍຍຸຕ຺ຕາຍ. ສໍເສຍ຺ຍາຕິ ກເຖຍ຺ຍ. ອາເນຎ຺ຊສໍໂຍຊເນນ ຫິ ໂຂ ວິສໍຍຸຕ຺ໂຕຕິ ອາເນຎ຺ຊສມາປຕ຺ຕິສໍໂຍຊເນນ ວິສໍສຏ຺ໂຐ. ໂລກາມິສາຘິມຸຕ຺ໂຕຕິ ເອວຣູໂປ ຫິ ລູຂຈີວຣຘໂຣ ມຕ຺ຕິກາປຕ຺ຕໍ ອາທາຍ ອຕ຺ຕໂນ ສທິເສຫິ ກຕິປເຍຫິ ສທ຺ຘິໍ ປຈ຺ຈນ຺ຕຊນປທໍ ຄຈ຺ຉຕິ, ຄາມໍ ປິຓ຺ຑາຍ ປວິຏ຺ຐກາເລ ມນຸສ຺ສາ ທິສ຺ວາ ‘‘ມຫາປໍສຸກຸລິກາ ອາຄຕາ’’ຕິ ຍາຄຸຠຕ຺ຕາທີນິ ສມ຺ປາເທຕ຺ວາ ສກ຺ກຈ຺ຈໍ ທານໍ ເທນ຺ຕິ, ຠຕ຺ຕກິຈ຺ເຈ ນິຏ຺ຐິເຕ ອນຸໂມທນໍ ສຸຕ຺ວາ – ‘‘ສ຺ເວປິ, ຠນ຺ເຕ, ອິເຘວ ປິຓ຺ຑາຍ ປວິສຖາ’’ຕິ ວທນ຺ຕິ. ອລໍ ອຸປາສກາ, ອຊ຺ຊາປິ ໂວ ພຫູນໍ ທິນ຺ນນ຺ຕິ. ເຕນ ຫິ, ຠນ຺ເຕ, ອນ຺ໂຕວສ຺ສໍ ອິຘ ວເສຍ຺ຍາຖາຕິ ອຘິວາເສຕ຺ວາ ວິຫາຣມຄ຺ຄໍ ປຸຈ຺ຉິຕ຺ວາ ວິຫາຣໍ ຄຈ຺ຉນ຺ຕິ. ຕຕ຺ຖ ເສນາສນໍ ຄເຫຕ຺ວາ ປຕ຺ຕຈີວຣໍ ປຏິສາເມນ຺ຕິ. ສາຍໍ ເອໂກ ອາວາສິໂກ ເຕ ຠິກ຺ຂູ ປຸຈ຺ຉຕິ ‘‘ກຕ຺ຖ ປິຓ຺ຑາຍ ຈຣິຕ຺ຖາ’’ຕິ? ອສຸກຄາເມຕິ. ຠິກ຺ຂາສມ຺ປນ຺ນາຕິ? ອາມ ເອວຣູປາ ນາມ ມນຸສ຺ສານໍ ສທ຺ຘາ ໂຫຕິ. ‘‘ອຊ຺ເຊວ ນຸ ໂຂ ເອເຕ ເອທິສາ, ນິຈ຺ຈມ຺ປິ ເອທິສາ’’ຕິ? ສທ຺ຘາ ເຕ ມນຸສ຺ສາ ນິຈ຺ຈມ຺ປິ ເອທິສາ, ເຕ ນິສ຺ສາເຍວ ອຍໍ ວິຫາໂຣ ວຑ຺ຒຕີຕິ. ຕໂຕ ເຕ ປໍສຸກຸລິກາ ປຸນປ຺ປຸນໍ ເຕສໍ ວຓ຺ຓໍ ກເຖນ຺ຕິ, ທິວສາວເສສໍ ກເຖຕ຺ວາ ຣຕ຺ຕິມ຺ປິ ກເຖນ຺ຕິ. ເອຕ຺ຕາວຕາ ອິຈ຺ຉາຈາເຣ ຐິຕສ຺ສ ສີສໍ ນິກ຺ຂນ຺ຕໍ ໂຫຕິ ອຸທຣໍ ຜາລິຕໍ. ເອວໍ ໂລກາມິສາຘິມຸຕ຺ໂຕ ເວທິຕພ຺ໂພ.

໕໙. ອິທານິ ອາເນຎ຺ຊສມາປຕ຺ຕິລາຠິໍ ອຘິມານິກໍ ທສ຺ເສນ຺ໂຕ ຐານໍ ໂຂ ປເນຕນ຺ຕິອາທິມາຫ. ອາເນຎ຺ຊາຘິມຸຕ຺ຕສ຺ສາຕິ ກິເລສສິຎ຺ຈນວິຣຫິຕາສຸ ເຫຏ຺ຐິມາສຸ ຉສຸ ສມາປຕ຺ຕີສຸ ອຘິມຸຕ຺ຕສ຺ສ ຕນ຺ນິນ຺ນສ຺ສ ຕຄ຺ຄຣຸໂນ ຕປ຺ປພ຺ຠາຣສ຺ສ. ເສ ປວຸຕ຺ເຕຕິ ຕໍ ປວຸຕ຺ຕໍ. ຉ ສມາປຕ຺ຕິລາຠິໂນ ຫິ ອຘິມານິກສ຺ສ ປຎ຺ຈກາມຄຸຓາມິສພນ຺ຘນາ ປຕິຕປຓ຺ຑຸປລາໂສ ວິຍ ອຸປຏ຺ຐາຕິ. ເຕເນຕໍ ວຸຕ຺ຕໍ.

໖໐. ອິທານິ ອາກິຎ຺ຈຎ຺ຎາຍຕນສມາປຕ຺ຕິ ລາຠິໂນ ອຘິມານິກສ຺ສ ນິຆໍສໍ ທສ຺ເສຕຸໍ ຐານໍ ໂຂ ປນາຕິອາທິມາຫ. ຕຕ຺ຖ ທ຺ເວຘາ ຠິນ຺ນາຕິ ມຊ຺ເຌ ຠິນ຺ນາ. ອປ຺ປຏິສນ຺ຘິກາຕິ ຂຸທ຺ທກາ ມຸຏ຺ຐິປາສາຓມຕ຺ຕາ ຊຕຸນາ ວາ ສິເລເສນ ວາ ອລ຺ລີຍາເປຕ຺ວາ ປຏິສນ຺ຘາຕຸໍ ສກ຺ກາ. ມຫນ຺ຕໍ ປນ ກຸຏາຄາຣປ຺ປມາຓໍ ສນ຺ຘາເຍຕໍ ວຸຕ຺ຕໍ. ເສ ຠິນ຺ເນຕິ ຕໍ ຠິນ຺ນໍ. ອຸປຣິ ສມາປຕ຺ຕິລາຠິໂນ ຫິ ເຫຏ຺ຐາສມາປຕ຺ຕິ ທ຺ເວຘາຠິນ຺ນາ ເສລາ ວິຍ ໂຫຕິ, ຕໍ ສມາປຊ຺ຊິສ຺ສາມີຕິ ຈິຕ຺ຕໍ ນ ອຸປ຺ປຊ຺ຊຕິ. ເຕເນຕໍ ວຸຕ຺ຕໍ.

໖໑. ອິທານິ ເນວສຎ຺ຎານາສຎ຺ຎາຍຕນລາຠິໂນ ອຘິມານິກສ຺ສ ຈ ນິຆໍສໍ ທສ຺ເສນ຺ໂຕ ຐານໍ ໂຂ ປນາຕິອາທິມາຫ. ຕຕ຺ຖ ເສ ວນ຺ເຕຕິ ຕໍ ວນ຺ຕໍ. ອຏ຺ຐສມາປຕ຺ຕິລາຠິໂນ ຫິ ເຫຏ຺ຐາສມາປຕ຺ຕິໂຍ ວນ຺ຕສທິສາ ຫຸຕ຺ວາ ອຸປຏ຺ຐຫນ຺ຕິ, ປຸນ ສມາປຊ຺ຊິສ຺ສາມີຕິ ຈິຕ຺ຕໍ ນ ອຸປ຺ປຊ຺ຊຕິ. ເຕເນຕໍ ວຸຕ຺ຕໍ.

໖໒. ອິທານິ ຂີຓາສວສ຺ສ ນິຆໍສໍ ທສ຺ເສນ຺ໂຕ ຐານໍ ໂຂ ປນາຕິອາທິມາຫ. ຕຕ຺ຖ ເສ ອຸຈ຺ຉິນ຺ນມູເລຕິ ໂສ ອຸຈ຺ຉິນ຺ນມູໂລ. ອຸປຣິ ສມາປຕ຺ຕິລາຠິໂນ ຫິ ເຫຏ຺ຐາສມາປຕ຺ຕິ ມູລຈ຺ຉິນ຺ນຕາໂລ ວິຍ ອຸປຏ຺ຐາຕິ, ຕໍ ສມາປຊ຺ຊິສ຺ສາມີຕິ ຈິຕ຺ຕໍ ນ ອຸປ຺ປຊ຺ຊຕິ. ເຕເນຕໍ ວຸຕ຺ຕໍ.

໖໓. ຐານໍ ໂຂ ປນາຕິ ປາຏິເຍກ຺ໂກ ອນຸສນ຺ຘິ. ເຫຏ຺ຐາ ຫິ ສມາປຕ຺ຕິລາຠິໂນ ອຘິມານິກສ຺ສປິ ຂີຓາສວສ຺ສປິ ນິຆໍໂສ ກຖິໂຕ, ສຸກ຺ຂວິປສ຺ສກສ຺ສ ປນ ອຘິມານິກສ຺ສປິ ຂີຓາສວສ຺ສປິ ນ ກຖິໂຕ. ເຕສໍ ທ຺ວິນ຺ນມ຺ປິ ນິຆໍສໍ ທສ຺ເສຕຸໍ ອິມໍ ເທສນໍ ອາຣຠິ. ຕໍ ປນ ປຏິກ຺ຂິຕ຺ຕໍ. ສມາປຕ຺ຕິລາຠິໂນ ຫິ ອຘິມານິກສ຺ສ ນິຆໍເສ ກຖິເຕ ສຸກ຺ຂວິປສ຺ສກສ຺ສປິ ອຘິມານິກສ຺ສ ກຖິໂຕວ ໂຫຕິ, ສມາປຕ຺ຕິລາຠິໂນ ຈ ຂີຓາສວສ຺ສ ກຖິເຕ ສຸກ຺ຂວິປສ຺ສກຂີຓາສວສ຺ສ ກຖິໂຕວ ໂຫຕິ. ເອເຕສໍ ປນ ທ຺ວິນ຺ນໍ ຠິກ຺ຂູນໍ ສປ຺ປາຍາສປ຺ປາຍໍ ກເຖຕຸໍ ອິມໍ ເທສນໍ ອາຣຠິ.

ຕຕ຺ຖ ສິຍາ – ປຸຖຸຊ຺ຊນສ຺ສ ຕາວ ອາຣມ຺ມຓໍ ອສປ຺ປາຍໍ ໂຫຕຸ, ຂີຓາສວສ຺ສ ກຖໍ ອສປ຺ປາຍນ຺ຕິ. ຍທຄ຺ເຄນ ປຸຖຸຊ຺ຊນສ຺ສ ອສປ຺ປາຍໍ, ຕທຄ຺ເຄນ ຂີຓາສວສ຺ສາປິ ອສປ຺ປາຍເມວ. ວິສໍ ນາມ ຊານິຕ຺ວາ ຂາທິຕມ຺ປິ ອຊານິຕ຺ວາ ຂາທິຕມ຺ປິ ວິສເມວ. ນ ຫິ ຂີຓາສເວນປິ ‘‘ອຫໍ ຂີຓາສໂວ’’ຕິ ອສໍວຸເຕນ ຠວິຕພ຺ພໍ. ຂີຓາສເວນປິ ຍຸຕ຺ຕປຍຸຕ຺ເຕເນວ ຠວິຕຸໍ ວຏ຺ຏຕິ.

໖໔. ຕຕ຺ຖ ສມເຓນາຕິ ພຸທ຺ຘສມເຓນ. ຉນ຺ທຣາຄພ຺ຍາປາເທນາຕິ ໂສ ອວິຊ຺ຊາສງ຺ຂາໂຕ ວິສໂທໂສ ຉນ຺ທຣາເຄນ ຈ ພ຺ຍາປາເທນ ຈ ຣຸປ຺ປຕິ ກຸປ຺ປຕິ. ອສປ຺ປາຍານີຕິ ອວຑ຺ຒິກຣານິ ອາຣມ຺ມຓານິ. ອນຸທ຺ຘໍເສຍ຺ຍາຕິ ໂສເສຍ຺ຍ ມິລາເປຍ຺ຍ. ສອຸປາທິເສສນ຺ຕິ ສຄຫຓເສສໍ, ອຸປາທິຕພ຺ພໍ ຄຓ຺ຫິຕພ຺ພໍ ອິຘ ອຸປາທີຕິ ວຸຕ຺ຕໍ. ອນລຎ຺ຈ ເຕ ອນ຺ຕຣາຍາຍາຕິ ຊີວິຕນ຺ຕຣາຍໍ ເຕ ກາຕຸໍ ອສມຕ຺ຖໍ. ຣໂຊສູກນ຺ຕິ ຣໂຊ ຈ ວີຫິສຸກາທິ ຈ ສູກໍ. ອສຸ ຈ ວິສໂທໂສຕິ ໂສ ຈ ວິສໂທໂສ. ຕທຸຠເຍນາຕິ ຍາ ສາ ອສປ຺ປາຍກິຣິຍາ ຈ ໂຍ ວິສໂທໂສ ຈ, ເຕນ ອຸຠເຍນ. ປຸຖຸຕ຺ຕນ຺ຕິ ມຫນ຺ຕຠາວໍ.

ເອວເມວ ໂຂຕິ ເອຕ຺ຖ ສອຸປາທານສລ຺ລຸທ຺ຘາໂຣ ວິຍ ອປ຺ປຫີໂນ ອວິຊ຺ຊາວິສໂທໂສ ທຏ຺ຐພ຺ໂພ, ອສປ຺ປາຍກິຣິຍາຍ ຐິຕຠາໂວ ວິຍ ຉສຸ ທ຺ວາເຣສຸ ອສໍວຸຕກາໂລ, ຕທຸຠເຍນ ວເຓ ປຸຖຸຕ຺ຕໍ ຄເຕ ມຣຓໍ ວິຍ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕນໍ, ມຣຓມຕ຺ຕໍ ທຸກ຺ຂໍ ວິຍ ອຎ຺ຎຕຣາຍ ຄຣຸກາຍ ສໍກິລິຏ຺ຐາຍ ອາປຕ຺ຕິຍາ ອາປຊ຺ຊນໍ ທຏ຺ຐພ຺ພໍ. ສຸກ຺ກປກ຺ເຂປິ ອິມິນາວ ນເຍນ ໂອປມ຺ມສໍສນ຺ທນໍ ເວທິຕພ຺ພໍ.

໖໕. ສຕິຍາເຍຕໍ ອຘິວຈນນ຺ຕິ ເອຕ຺ຖ ສຕິ ປຎ຺ຎາຄຕິກາ. ໂລກິກາຍ ປຎ຺ຎາຍ ໂລກິກາ ໂຫຕິ, ໂລກຸຕ຺ຕຣາຍ ໂລກຸຕ຺ຕຣາ. ອຣິຍາເຍຕໍ ປຎ຺ຎາຍາຕິ ປຣິສຸທ຺ຘາຍ ວິປສ຺ສນາປຎ຺ຎາຍ.

ອິທານິ ຂີຓາສວສ຺ສ ພລໍ ທສ຺ເສນ຺ໂຕ ໂສ ວຕາຕິອາທິມາຫ. ຕຕ຺ຖ ສໍວຸຕກາຣີຕິ ປິຫິຕກາຣີ. ອິຕິ ວິທິຕ຺ວາ ນິຣຸປຘີຕິ ເອວໍ ຊານິຕ຺ວາ ກິເລສຸປຘິປຫານາ ນິຣຸປຘິ ໂຫຕິ, ນິຣຸປາທາໂນຕິ ອຕ຺ໂຖ. ອຸປຘິສງ຺ຂເຍ ວິມຸຕ຺ໂຕຕິ ອຸປຘີນໍ ສງ຺ຂຍຠູເຕ ນິພ຺ພາເນ ອາຣມ຺ມຓໂຕ ວິມຸຕ຺ໂຕ. ອຸປຘິສ຺ມິນ຺ຕິ ກາມຸປຘິສ຺ມິໍ. ກາຍໍ ອຸປສໍຫຣິສ຺ສຕີຕິ ກາຍໍ ອລ຺ລີຍາເປສ຺ສຕິ. ອິທໍ ວຸຕ຺ຕໍ ໂຫຕິ – ຕຓ຺ຫກ຺ຂເຍ ນິພ຺ພາເນ ອາຣມ຺ມຓໂຕ ວິມຸຕ຺ໂຕ ຂີຓາສໂວ ປຎ຺ຈ ກາມຄຸເຓ ເສວິຕຸໍ, ກາຍໍ ວາ ອຸປສໍຫຣິສ຺ສຕິ ຈິຕ຺ຕໍ ວາ ອຸປ຺ປາເທສ຺ສຕີຕິ ເນຕໍ ຐານໍ ວິຊ຺ຊຕິ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ສຸນກ຺ຂຕ຺ຕສຸຕ຺ຕວຓ຺ຓນາ ນິຏ຺ຐິຕາ.