໙. ສຸຠສຸຕ຺ຕວຓ຺ຓນາ

໔໖໒. ເອວໍ ເມ ສຸຕນ຺ຕິ ສຸຠສຸຕ຺ຕໍ. ຕຕ຺ຖ ໂຕເທຍ຺ຍປຸຕ຺ໂຕຕິ ຕຸທິຄາມວາສິໂນ ໂຕເທຍ຺ຍພ຺ຣາຫ຺ມຓສ຺ສ ປຸຕ຺ໂຕ. ອາຣາຘໂກ ໂຫຕີຕິ ສມ຺ປາທໂກ ໂຫຕິ ປຣິປູຣໂກ. ຎາຍໍ ຘມ຺ມນ຺ຕິ ກາຣຓຘມ຺ມໍ. ກຸສລນ຺ຕິ ອນວຊ຺ຊໍ.

໔໖໓. ມິຈ຺ຉາປຏິປຕ຺ຕິນ຺ຕິ ອນິຍ຺ຍານິກໍ ອກຸສລປຏິປທໍ. ສມ຺ມາປຏິປຕ຺ຕິນ຺ຕິ ນິຍ຺ຍານິກໍ ກຸສລປຏິປທໍ.

ມຫຏ຺ຐນ຺ຕິອາທີສຸ ມຫນ຺ເຕຫິ ເວຍ຺ຍາວຈ຺ຈກເຣຫິ ວາ ອຸປກຣເຓຫິ ວາ ພຫູຫິ ອຕ຺ໂຖ ເອຕ຺ຖາຕິ ມຫຏ຺ຐໍ. ມຫນ຺ຕານິ ນາມຄ຺ຄຫຓມງ຺ຄລາທີນິ ກິຈ຺ຈານິ ເອຕ຺ຖາຕິ ມຫາກິຈ຺ຈໍ. ອິທໍ ອຊ຺ຊ ກຕ຺ຕພ຺ພໍ, ອິທໍ ສ຺ເວຕິ ເອວໍ ມຫນ຺ຕານິ ອຘິກາຣສງ຺ຂາຕານິ ອຘິກຣຓານິ ເອຕ຺ຖາຕິ ມຫາຘິກຣຓໍ. ພຫູນໍ ກມ຺ເມ ຍຸຕ຺ຕປ຺ປຍຸຕ຺ຕຕາວເສນ ປີຬາສງ຺ຂາໂຕ ມຫາສມາຣມ຺ໂຠ ເອຕ຺ຖາຕິ ມຫາສມາຣມ຺ຠໍ. ຆຣາວາສກມ຺ມຏ຺ຐານນ຺ຕິ ຆຣາວາສກມ຺ມໍ. ເອວໍ ສພ຺ພວາເຣສຸ ອຕ຺ໂຖ ເວທິຕພ຺ໂພ. ກສິກມ຺ເມ ເຈຕ຺ຖ ນງ຺ຄລໂກຏິໍ ອາທິໍ ກຕ຺ວາ ອຸປກຣຓານໍ ປຣິເຍສນວເສນ ມຫຏ຺ຐຕາ, ວຓິຊ຺ຊາຍ ຍຖາຐິຕໍເຍວ ຠຓ຺ຑໍ ຄເຫຕ຺ວາ ປຣິວຕ຺ຕນວເສນ ອປ຺ປຏ຺ຐຕາ ເວທິຕພ຺ພາ. ວິປຊ຺ຊມານນ຺ຕິ ອວຸຏ຺ຐິອຕິວຸຏ຺ຐິອາທີຫິ ກສິກມ຺ມໍ, ມຓິສຸວຓ຺ຓາທີສຸ ອຈ຺ເຉກຕາທີຫິ ຈ ວຓິຊ຺ຊກມ຺ມໍ ອປ຺ປຜລໍ ໂຫຕິ, ມູລຈ຺ເຉທມ຺ປິ ປາປຸຓາຕິ. ວິປຣິຍາເຍນ ສມ຺ປຊ຺ຊມານໍ ມຫປ຺ຜລໍ ຈູຬນ຺ເຕວາສິກສ຺ສ ວິຍ.

໔໖໔. ເອວເມວ ໂຂຕິ ຍຖາ ກສິກມ຺ມຏ຺ຐານໍ ວິປຊ຺ຊມານໍ ອປ຺ປຜລໍ ໂຫຕິ, ເອວໍ ຆຣາວາສກມ຺ມຏ຺ຐານມ຺ປິ. ອກຕກລ຺ຍາໂຓ ຫິ ກາລໍ ກຕ຺ວາ ນິຣເຍ ນິພ຺ພຕ຺ຕຕິ. ມຫາທຕ຺ຕເສນາປຕິ ນາມ ກິເຣໂກ ພ຺ຣາຫ຺ມຓຠຕ຺ໂຕ ອໂຫສິ, ຕສ຺ສ ມຣຓສມເຍ ນິຣໂຍ ອຸປຏ຺ຐາສິ. ໂສ ພ຺ຣາຫ຺ມເຓຫິ ‘‘ກິໍ ປສ຺ສສີ’’ຕິ ວຸຕ຺ໂຕ? ໂລຫິຕຆຣນ຺ຕິ ອາຫ. ພ຺ຣຫ຺ມໂລໂກ ໂຠ ເອໂສຕິ. ພ຺ຣຫ຺ມໂລໂກ ນາມ ໂຠ ກຫນ຺ຕິ? ອຸປຣີຕິ. ມຍ຺ຫໍ ເຫຏ຺ຐາ ອຸປຏ຺ຐາຕີຕິ. ກິຎ຺ຈາປິ ເຫຏ຺ຐາ ອຸປຏ຺ຐາຕິ, ຕຖາປິ ອຸປຣີຕິ ກາລໍ ກຕ຺ວາ ນິຣເຍ ນິພ຺ພຕ຺ໂຕ. ‘‘ອິມິນາ ອມ຺ຫາກໍ ຍຎ຺ເຎ ໂທໂສ ທິນ຺ໂນ’’ຕິ ສຫສ຺ສໍ ຄເຫຕ຺ວາ ນີຫຣິຕຸໍ ອທໍສຸ. ສມ຺ປຊ຺ຊມານໍ ປນ ມຫປ຺ຜລໍ ໂຫຕິ. ກຕກລ຺ຍາໂຓ ຫິ ກາລໍ ກຕ຺ວາ ສຄ຺ເຄ ນິພ຺ພຕ຺ຕຕິ. ສກລາຍ ຄຸຕ຺ຕິລວິມານກຖາຍ ທີເປຕພ຺ພໍ. ຍຖາ ປນ ຕໍ ວຓິຊ຺ຊກມ຺ມຏ຺ຐານໍ ວິປຊ຺ຊມານໍ ອປ຺ປຜລໍ ໂຫຕິ, ເອວໍ ສີເລສຸ ອປຣິປູຣກາຣິໂນ ອເນສນາຍ ຍຸຕ຺ຕສ຺ສ ປພ຺ພຊ຺ຊາກມ຺ມຏ຺ຐານມ຺ປິ. ເອວຣູປາ ຫິ ເນວ ຌານາທິສຸຂໍ ນ ສຄ຺ຄໂມກ຺ຂໍ ລຠຕິ. ສມ຺ປຊ຺ຊມານໍ ປນ ມຫປ຺ຜລໍ ໂຫຕິ. ສີລານິ ຫິ ປູເຣຕ຺ວາ ວິປສ຺ສນໍ ວຑ຺ເຒນ຺ໂຕ ອຣຫຕ຺ຕມ຺ປິ ປາປຸຓາຕິ.

ພ຺ຣາຫ຺ມຓາ, ໂຠ ໂຄຕໂມຕິ ອິຘ ກິໍ ປຸຈ຺ຉາມີຕິ ປຸຈ຺ຉຕິ? ພ຺ຣາຫ຺ມຓາ ວທນ຺ຕິ – ‘‘ປພ຺ພຊິໂຕ ອິເມ ປຎ຺ຈ ຘມ຺ເມ ປູເຣຕຸໍ ສມຕ຺ໂຖ ນາມ ນຕ຺ຖິ, ຄຫຏ຺ໂຐວ ປູເຣຕີ’’ຕິ. ສມໂຓ ປນ ໂຄຕໂມ – ‘‘ຄິຫິສ຺ສ ວາ ອຫໍ ມາຓວ ປພ຺ພຊິຕສ຺ສ ວາ’’ຕິ ປຸນປ຺ປຸນໍ ວທຕິ, ເນວ ປພ຺ພຊິຕໍ ມຸຎ຺ຈຕິ, ມຍ຺ຫເມວ ປຸຈ຺ຉໍ ມຎ຺ເຎ ນ ສລ຺ລກ຺ເຂຕີຕິ ຈາຄສີເສນ ປຎ຺ຈ ຘມ຺ເມ ປຸຈ຺ຉາມີຕິ ປຸຈ຺ຉຕິ. ສເຈ ເຕ ອຄຣູຕິ ສເຈ ຕຸຍ຺ຫໍ ຍຖາ ພ຺ຣາຫ຺ມຓາ ປຎ຺ຎເປນ຺ຕິ, ຕຖາ ອິຘ ຠາສິຕຸໍ ຠາຣິຍໍ ນ ໂຫຕິ, ຍທິ ນ ໂກຈິ ອຜາສຸກຠາໂວ ໂຫຕິ, ຠາສສ຺ສູຕິ ອຕ຺ໂຖ. ນ ໂຂ ເມ, ໂຠຕິ ກິໍ ສນ຺ຘາຍາຫ? ປຓ຺ຑິຕປຏິຣູປການຎ຺ຫິ ສນ຺ຕິເກ ກເຖຕຸໍ ທຸກ຺ຂໍ ໂຫຕິ, ເຕ ປເທ ປເທ ອກ຺ຂເຣ ອກ຺ຂເຣ ໂທສເມວ ວທນ຺ຕິ. ເອກນ຺ຕປຓ຺ຑິຕາ ປນ ກຖໍ ສຸຕ຺ວາ ສຸກຖິຕໍ ປສໍສນ຺ຕິ, ທຸກ຺ກຖິເຕ ປາຬິປທອຕ຺ຖພ຺ຍຎ຺ຊເນສຸ ຍໍ ຍໍ ວິຣຸຊ຺ຌຕິ, ຕໍ ຕໍ ອຸຊຸໍ ກຕ຺ວາ ເທນ຺ຕິ. ຠຄວຕາ ຈ ສທິໂສ ເອກນ຺ຕປຓ຺ຑິໂຕ ນາມ ນຕ຺ຖິ, ເຕນາຫ ‘‘ນ ໂຂ ເມ, ໂຠ ໂຄຕມ, ຄຣຸ, ຍຕ຺ຖສ຺ສຸ ຠວນ຺ໂຕ ວາ ນິສິນ຺ໂນ ຠວນ຺ຕຣູໂປ ວາ’’ຕິ. ສຈ຺ຈນ຺ຕິ ວຈີສຈ຺ຈໍ. ຕປນ຺ຕິ ຕປຈຣິຍໍ. ພ຺ຣຫ຺ມຈຣິຍນ຺ຕິ ເມຖຸນວິຣຕິໍ. ອຊ຺ເຌນນ຺ຕິ ມນ຺ຕຄຫຓໍ. ຈາຄນ຺ຕິ ອາມິສປຣິຈ຺ຈາຄໍ.

໔໖໖. ປາປິໂຕ ຠວິສ຺ສຕີຕິ. ອຊານນຠາວໍ ປາປິໂຕ ຠວິສ຺ສຕິ. ເອຕທໂວຈາຕິ ຠຄວຕາ ອນ຺ຘເວຓູປມາຍ ນິຄ຺ຄຫິໂຕ ຕໍ ປຈ຺ຈາຫຣິຕຸໍ ອສກ຺ໂກນ຺ໂຕ ຍຖາ ນາມ ທຸພ຺ພລສຸນໂຂ ມິຄໍ ອຸຏ຺ຐເປຕ຺ວາ ສາມິກສ຺ສ ອຠິມຸຂໍ ກຕ຺ວາ ສຍໍ ອປສກ຺ກຕິ, ເອວເມວໍ ອາຈຣິຍໍ ອປທິສນ຺ໂຕ ເອວໍ ‘‘ພ຺ຣາຫ຺ມໂຓ’’ຕິອາທິວຈນໍ ອໂວຈ. ຕຕ຺ຖ ໂປກ຺ຂຣສາຕີຕິ ອິທໍ ຕສ຺ສ ນາມໍ, ‘‘ໂປກ຺ຂຣສາຍີ’’ຕິປິ ວຸຈ຺ຈຕິ. ຕສ຺ສ ກິຣ ກາໂຍ ເສຕໂປກ຺ຂຣສທິໂສ ເທວນຄເຣ ອຸສ຺ສາປິຕຣຊຕໂຕຣຓໍ ວິຍ ໂສຠຕິ, ສີສໍ ປນສ຺ສ ກາຬວຓ຺ຓອິນ຺ທນີລມຍໍ ວິຍ, ມສ຺ສຸປິ ຈນ຺ທມຓ຺ຑເລ ກາຬເມຆຣາຊິ ວິຍ ຂາຍຕິ, ອກ຺ຂີນິ ນີລຸປ຺ປລສທິສານິ, ນາສາ ຣຊຕປນາຬິກາ ວິຍ ສຸວຏ຺ຏິຕາ ສຸປຣິສຸທ຺ຘາ, ຫຕ຺ຖປາທຕລານິ ເຈວ ມຸຂຎ຺ຈ ກຕລາຂາຣສປຣິກມ຺ມໍ ວິຍ ໂສຠຕິ. ອຕິວິຍ ໂສຠຄ຺ຄປ຺ປຕ຺ໂຕ ພ຺ຣາຫ຺ມຓສ຺ສ ອຕ຺ຕຠາໂວ. ອຣາຊເກ ຐາເນ ຣາຊານໍ ກາຕຸໍ ຍຸຕ຺ຕມິມໍ ພ຺ຣາຫ຺ມຓໍ, ເອວເມສ ສສ຺ສິຣິໂກ, ອິຕິ ນໍ ໂປກ຺ຂຣສທິສຕ຺ຕາ ‘‘ໂປກ຺ຂຣສາຕີ’’ຕິ ສຎ຺ຊານນ຺ຕິ, ໂປກ຺ຂເຣ ປນ ໂສ ນິພ຺ພຕ຺ໂຕ, ນ ມາຕຸກຸຈ຺ຉິຍນ຺ຕິ ອິຕິ ນໍ ໂປກ຺ຂເຣ ສຍິຕຕ຺ຕາ ‘‘ໂປກ຺ຂຣສາຍີ’’ຕິປິ ສຎ຺ຊານນ຺ຕິ. ໂອປມຎ຺ໂຎຕິ ອຸປມຎ຺ຎໂຄຕ຺ໂຕ. ສຸຠຄວນິໂກຕິ ອຸກ຺ກຏ຺ຐາຍ ສຸຠຄວນສ຺ສ ອິສ຺ສໂຣ. ຫສ຺ສກໍເຍວາຕິ ຫສິຕພ຺ພກຎ຺ເຎວ. ນາມກໍເຍວາຕິ ລາມກໍເຍວ. ຕເທວ ຕໍ ອຕ຺ຖາຠາເວນ ຣິຕ຺ຕກໍ. ຣິຕ຺ຕກຕ຺ຕາ ຈ ຕຸຈ຺ຉກໍ. ອິທານິ ນໍ ຠຄວາ ສາຈຣິຍກໍ ນິຄ຺ຄຓ຺ຫິຕຸໍ ກິໍ ປນ ມາຓວາຕິອາທິມາຫ.

໔໖໗. ຕຕ຺ຖ ກຕມາ ເນສໍ ເສຍ຺ໂຍຕິ ກຕມາ ວາຈາ ເຕສໍ ເສຍ຺ໂຍ, ປາສໍສຕໂຣຕິ ອຕ຺ໂຖ. ສມ຺ມຸຈ຺ຈາຕິ ສມ຺ມຸຕິຍາ ໂລກໂວຫາເຣນ. ມນ຺ຕາຕິ ຕຸລຍິຕ຺ວາ ປຣິຄ຺ຄຓ຺ຫິຕ຺ວາ. ປຏິສງ຺ຂາຍາຕິ ຊານິຕ຺ວາ. ອຕ຺ຖສໍຫິຕນ຺ຕິ ກາຣຓນິສ຺ສິຕໍ. ເອວໍ ສນ຺ເຕຕິ ໂລກໂວຫາຣໍ ອມຸຎ຺ຈິຕ຺ວາ ຕຸລຍິຕ຺ວາ ຊານິຕ຺ວາ ກາຣຓນິສ຺ສິຕໍ ກຕ຺ວາ ກຖິຕາຍ ເສຍ຺ຍຠາເວ ສຕິ. ອາວຸໂຕຕິ ອາວຣິໂຕ. ນິວຸໂຕຕິ ນິວາຣິໂຕ. ໂອຜຸໂຏຕິ ໂອນທ຺ໂຘ. ປຣິໂຍນທ຺ໂຘຕິ ປລິເວຐິໂຕ.

໔໖໘. ຄຘິໂຕຕິອາທີນິ ວຸຕ຺ຕຕ຺ຖາເນວ. ສເຈ ຕໍ, ໂຠ ໂຄຕມ, ຐານນ຺ຕິ ສເຈ ເອຕໍ ກາຣຓມຕ຺ຖິ. ສ຺ວາສ຺ສາຕິ ຘູມຉາຣິກາທີນໍ ອຠາເວນ ໂສ ອສ຺ສ ອຄ຺ຄິ ອຈ຺ຈິມາ ຈ ວຓ຺ຓິມາ ຈ ປຠສ຺ສໂຣ ຈາຕິ. ຕຖູປມາຫໍ ມາຓວາຕິ ຕປ຺ປຏິຠາຄໍ ອຫໍ. ອິທໍ ວຸຕ຺ຕໍ ໂຫຕິ – ຍເຖວ ຫິ ຕິຓກຏ຺ຐຸປາທານໍ ປຏິຈ຺ຈ ຊລມາໂນ ອຄ຺ຄິ ຘູມຉາຣິກງ຺ຄາຣານໍ ອຕ຺ຖິຕາຍ ສໂທໂສ ໂຫຕິ, ເອວເມວໍ ປຎ຺ຈ ກາມຄຸເຓ ປຏິຈ຺ຈ ອຸປ຺ປນ຺ນາ ປີຕິ ຊາຕິຊຣາພ຺ຍາຘິມຣຓໂສກາທີນໍ ອຕ຺ຖິຕາຍ ສໂທສາ. ຍຖາ ປນ ປຣິຈ຺ຈຕ຺ຕຕິຓກຏ຺ຐຸປາທາໂນ ຘູມາທີນໍ ອຠາເວນ ປຣິສຸທ຺ໂຘ, ເອວເມວໍ ໂລກຸຕ຺ຕຣຊ຺ຌານທ຺ວຍສມ຺ປຍຸຕ຺ຕາ ປີຕິ ຊາຕິອາທີນໍ ອຠາເວນ ປຣິສຸທ຺ຘາຕິ ອຕ຺ໂຖ.

໔໖໙. ອິທານິ ເຍ ເຕ ພ຺ຣາຫ຺ມເຓຫິ ຈາຄສີເສນ ປຎ຺ຈ ຘມ຺ມາ ປຎ຺ຎຕ຺ຕາ, ເຕປິ ຍສ຺ມາ ປຎ຺ເຈວ ຫຸຕ຺ວາ ນ ນິຈ຺ຈລາ ຕິຏ຺ຐນ຺ຕິ, ອນຸກມ຺ປາຊາຕິເກນ ສທ຺ຘິໍ ຉ ອາປຊ຺ຊນ຺ຕິ. ຕສ຺ມາ ຕໍ ໂທສໍ ທສ຺ເສຕຸໍ ເຍ ເຕ ມາຓວາຕິອາທິມາຫ. ຕຕ຺ຖ ອນຸກມ຺ປາຊາຕິກນ຺ຕິ ອນຸກມ຺ປາສຠາວໍ.

ກຕ຺ຖ ພຫຸລໍ ສມນຸປສ຺ສສີຕິ ອິທໍ ຠຄວາ ຍສ຺ມາ – ‘‘ເອສ ອິເມ ປຎ຺ຈ ຘມ຺ເມ ປພ຺ພຊິໂຕ ປຣິປູເຣຕຸໍ ສມຕ຺ໂຖ ນາມ ນຕ຺ຖິ, ຄຫຏ຺ໂຐ ປຣິປູເຣຕີ’’ຕິ ອາຫ, ຕສ຺ມາ – ‘‘ປພ຺ພຊິໂຕວ ອິເມ ປູເຣຕິ, ຄຫຏ຺ໂຐ ປູເຣຕຸໍ ສມຕ຺ໂຖ ນາມ ນຕ຺ຖີ’’ຕິ ເຕເນວ ມຸເຂນ ຠຓາເປຕຸໍ ປຸຈ຺ຉຕິ.

ນ ສຕຕໍ ສມິຕໍ ສຈ຺ຈວາທີຕິອາທີສຸ ຄຫຏ຺ໂຐ ອຎ຺ຎສ຺ມິໍ ອສຕິ ວຬຎ຺ຊນກມຸສາວາທມ຺ປິ ກໂຣຕິເຍວ, ປພ຺ພຊິຕາ ອສິນາ ສີເສ ຉິຊ຺ຊນ຺ເຕປິ ທ຺ເວ ກຖາ ນ ກເຖນ຺ຕິ. ຄຫຏ຺ໂຐ ຈ ອນ຺ໂຕເຕມາສມຕ຺ຕມ຺ປິ ສິກ຺ຂາປທໍ ຣກ຺ຂິຕຸໍ ນ ສກ຺ໂກຕິ, ປພ຺ພຊິໂຕ ນິຈ຺ຈເມວ ຕປສ຺ສີ ສີລວາ ຕປນິສ຺ສິຕໂກ ໂຫຕິ. ຄຫຏ຺ໂຐ ມາສສ຺ສ ອຏ຺ຐທິວສມຕ຺ຕມ຺ປິ ອຸໂປສຖກມ຺ມໍ ກາຕຸໍ ນ ສກ຺ໂກຕິ, ປພ຺ພຊິຕາ ຍາວຊີວໍ ພ຺ຣຫ຺ມຈາຣິໂນ ໂຫນ຺ຕິ. ຄຫຏ຺ໂຐ ຣຕນສຸຕ຺ຕມງ຺ຄລສຸຕ຺ຕມຕ຺ຕມ຺ປິ ໂປຕ຺ຖເກ ລິຂິຕ຺ວາ ຐເປຕິ, ປພ຺ພຊິຕາ ນິຈ຺ຈໍ ສຊ຺ຌາຍນ຺ຕິ. ຄຫຏ຺ໂຐ ສລາກຠຕ຺ຕມ຺ປິ ອຂຓ຺ຑໍ ກຕ຺ວາ ທາຕຸໍ ນ ສກ຺ໂກຕິ, ປພ຺ພຊິຕາ ອຎ຺ຎສ຺ມິໍ ອສຕິ ກາກສຸນຂາທີນມ຺ປິ ປິຓ຺ຑໍ ເທນ຺ຕິ, ຠຓ຺ຑຄ຺ຄາຫກທຫຣສ຺ສປິ ປຕ຺ເຕ ປກ຺ຂິປນ຺ເຕວາຕິ ເອວມຕ຺ໂຖ ທຏ຺ຐພ຺ໂພ. ຈິຕ຺ຕສ຺ສາຫເມເຕນ຺ຕິ ອຫໍ ເອເຕ ປຎ຺ຈ ຘມ຺ເມ ເມຕ຺ຕຈິຕ຺ຕສ຺ສ ປຣິວາເຣ ວທາມີຕິ ອຕ຺ໂຖ.

໔໗໐. ຊາຕວທ຺ໂຘຕິ ຊາໂຕ ຈ ວຑ຺ຒິໂຕ ຈ. ໂຍ ຫິ ເກວລໍ ຕຕ຺ຖ ຊາໂຕວ ໂຫຕິ, ອຎ຺ຎຕ຺ຖ ວຑ຺ຒິໂຕ, ຕສ຺ສ ສມນ຺ຕາ ຄາມມຄ຺ຄາ ນ ສພ຺ພໂສ ປຈ຺ຈກ຺ຂາ ໂຫນ຺ຕິ, ຕສ຺ມາ ຊາຕວທ຺ໂຘຕິ ອາຫ. ຊາຕວທ຺ໂຘປິ ຫິ ໂຍ ຈິຣໍ ນິກ຺ຂນ຺ໂຕ, ຕສ຺ສ ນ ສພ຺ພໂສ ປຈ຺ຈກ຺ຂາ ໂຫນ຺ຕິ, ຕສ຺ມາ ຕາວເທວ ອວສຏນ຺ຕິ ອາຫ, ຕໍຂຓເມວ ນິກ຺ຂນ຺ຕນ຺ຕິ ອຕ຺ໂຖ. ທນ຺ຘາຍິຕຕ຺ຕນ຺ຕິ ‘‘ອຍໍ ນຸ ໂຂ ມຄ຺ໂຄ ອຍໍ ນ ນຸ ໂຂ’’ຕິ ກງ຺ຂາວເສນ ຈິຣາຍິຕຕ຺ຕໍ. ວິຕ຺ຖາຍິຕຕ຺ຕນ຺ຕິ ຍຖາ ສຸຂຸມໍ ອຕ຺ຖຊາຕໍ ສຫສາ ປຸຈ຺ຉິຕສ຺ສ ກສ຺ສຈິ ສຣີຣໍ ຖທ຺ຘຠາວໍ ຄຓ຺ຫາຕິ, ເອວໍ ຖທ຺ຘຠາວຄຫຓໍ. ນຕ຺ເວວາຕິ ອິມິນາ ສພ຺ພຎ຺ຎຸຕຎ຺ຎາຓສ຺ສ ອປ຺ປຏິຫຕຠາວໍ ທສ຺ເສຕິ. ຕສ຺ສ ຫິ ປຸຣິສສ຺ສ ມາຣາວຏ຺ຏນາທີນໍ ວເສນ ສິຍາ ຎາຓສ຺ສ ປຏິຆາໂຕ, ເຕນ ໂສ ທນ຺ຘາເຍຍ຺ຍ ວາ ວິຕ຺ຖາເຍຍ຺ຍ ວາ, ສພ຺ພຎ຺ຎຸຕຎ຺ຎາຓໍ ປນ ອປ຺ປຏິຫຕໍ, ນ ສກ຺ກາ ຕສ຺ສ ເກນຈິ ອນ຺ຕຣາໂຍ ກາຕຸນ຺ຕິ ທີເປຕິ.

ເສຍ຺ຍຖາປິ ມາຓວ ພລວາ ສງ຺ຂຘໂມຕິ ເອຕ຺ຖ ພລວາຕິ ພລສມ຺ປນ຺ໂນ. ສງ຺ຂຘໂມຕິ ສງ຺ຂຘມໂກ. ອປ຺ປກສິເຣນາຕິ ອກິຈ຺ເຉນ ອທຸກ຺ເຂນ. ທຸພ຺ພໂລ ຫິ ສງ຺ຂຘມໂກ ສງ຺ຂໍ ຘມນ຺ໂຕປິ ນ ສກ຺ໂກຕິ ຈຕສ຺ໂສ ທິສາ ສເຣນ ວິຎ຺ຎາເປຕຸໍ, ນາສ຺ສ ສງ຺ຂສທ຺ໂທ ສພ຺ພໂສ ຜຣິ. ພລວໂຕ ປນ ວິປ຺ຜາຣິໂກ ໂຫຕິ, ຕສ຺ມາ ພລວາຕິ ອາຫ. ເມຕ຺ຕາຍ ເຈໂຕວິມຸຕ຺ຕິຍາຕິ ເອຕ຺ຖ ເມຕ຺ຕາຍາຕິ ວຸຕ຺ເຕ ອຸປຈາໂຣປິ ອປ຺ປນາປິ ວຏ຺ຏຕິ, ເຈໂຕວິມຸຕ຺ຕິຍາຕິ ວຸຕ຺ເຕ ປນ ອປ຺ປນາວ ວຏ຺ຏຕິ. ຍໍ ປມາຓກຕໍ ກມ຺ມນ຺ຕິ ປມາຓກຕໍ ກມ຺ມໍ ນາມ ກາມາວຈຣໍ ວຸຈ຺ຈຕິ, ອປ຺ປມາຓກຕໍ ກມ຺ມໍ ນາມ ຣູປາຣູປາວຈຣໍ. ເຕສຸປິ ອິຘ ພ຺ຣຫ຺ມວິຫາຣກມ຺ມຎ຺ເຎວ ອຘິປ຺ເປຕໍ. ຕຎ຺ຫິ ປມາຓໍ ອຕິກ຺ກມິຕ຺ວາ ໂອຘິສກອໂນຘິສກ ທິສາຜຣຓວເສນ ວຑ຺ເຒຕ຺ວາ ກຕຕ຺ຕາ ອປ຺ປມາຓກຕນ຺ຕິ ວຸຈ຺ຈຕິ. ນ ຕໍ ຕຕ຺ຣາວສິສ຺ສຕິ, ນ ຕໍ ຕຕ຺ຣາວຕິຏ຺ຐຕີຕິ ຕໍ ກາມາວຈຣກມ຺ມໍ ຕສ຺ມິໍ ຣູປາຣູປາວຈຣກມ຺ເມ ນ ໂອຫີຍຕິ ນ ຕິຏ຺ຐຕິ. ກິໍ ວຸຕ຺ຕໍ ໂຫຕິ? ກາມາວຈຣກມ຺ມໍ ຕສ຺ສ ຣູປາຣູປາວຈຣກມ຺ມສ຺ສ ອນ຺ຕຣາ ລຄ຺ຄິຕຸໍ ວາ ຐາຕຸໍ ວາ ຣູປາຣູປາວຈຣກມ຺ມໍ ຜຣິຕ຺ວາ ປຣິຍາທິຍິຕ຺ວາ ອຕ຺ຕໂນ ໂອກາສໍ ຄເຫຕ຺ວາ ປຕິຏ຺ຐາຕຸໍ ວາ ນ ສກ຺ໂກຕິ, ອຖ ໂຂ ຣູປາຣູປາວຈຣກມ຺ມເມວ ກາມາວຈຣໍ ມໂຫໂຆ ວິຍ ປຣິຕ຺ຕອຸທກໍ ຜຣິຕ຺ວາ ປຣິຍາທິຍິຕ຺ວາ ອຕ຺ຕໂນ ໂອກາສໍ ຄເຫຕ຺ວາ ຕິຏ຺ຐຕິ, ຕສ຺ສ ວິປາກໍ ປຏິພາຫິຕ຺ວາ ສຍເມວ ພ຺ຣຫ຺ມສຫພ຺ຍຕໍ ອຸປເນຕີຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ສຸຠສຸຕ຺ຕວຓ຺ຓນາ ນິຏ຺ຐິຕາ.