໗. ຘນຎ຺ຊານິສຸຕ຺ຕວຓ຺ຓນາ

໔໔໕. ເອວໍ ເມ ສຸຕນ຺ຕິ ຘນຎ຺ຊານິສຸຕ຺ຕໍ. ຕຕ຺ຖ ທກ຺ຂິຓາຄິຣິສ຺ມິນ຺ຕິ ຄິຣີຕິ ປພ຺ພໂຕ, ຣາຊຄຫໍ ປຣິກ຺ຂິປິຕ຺ວາ ຐິຕປພ຺ພຕສ຺ສ ທກ຺ຂິຓທິສາຠາເຄ ຊນປທສ຺ເສຕໍ ນາມໍ. ຕຓ຺ຑຸລປາລິທ຺ວາຣາຍາຕິ ຣາຊຄຫສ຺ສ ກິຣ ທ຺ວຕ຺ຕິໍສມຫາທ຺ວາຣານິ ຈຕຸສຏ຺ຐິຂຸທ຺ທກທ຺ວາຣານິ, ເຕສຸ ເອກໍ ຕຓ຺ຑຸລປາລິທ຺ວາຣໍ ນາມ, ຕໍ ສນ຺ຘາເຍວມາຫ. ຣາຊານໍ ນິສ຺ສາຍາຕິ ‘‘ຄຈ຺ຉ ມນຸສ຺ເສ ອປີເຬຕ຺ວາ ສສ຺ສຠາຄໍ ຄຓ຺ຫາຫີ’’ຕິ ຣຎ຺ຎາ ເປສິໂຕ ຄນ຺ຕ຺ວາ ສພ຺ພເມວ ສສ຺ສໍ ຄຓ຺ຫາຕິ, ‘‘ມາ ໂນ, ຠນ຺ເຕ, ນາເສຫີ’’ຕິ ຈ ວຸຕ຺ເຕ – ‘‘ຣາຊກຸເລ ວຸຕ຺ຕໍ ມນ຺ທໍ, ອຫໍ ຣຎ຺ຎາ ອາຄມນກາເລເຍວ ເອວໍ ອາຓຕ຺ໂຕ, ມາ ກນ຺ທິຕ຺ຖາ’’ຕິ ເອວໍ ຣາຊານໍ ນິສ຺ສາຍ ພ຺ຣາຫ຺ມຓຄຫປຕິເກ ວິລຸມ຺ປຕິ. ຘຎ຺ຎໍ ເຍຠຸຍ຺ເຍນ ອຕ຺ຕໂນ ຆຣໍ ປເວເສຕ຺ວາ ອປ຺ປກໍ ຣາຊກຸເລ ປເວເສຕິ. ກິໍ ພ຺ຣາຫ຺ມຓຄຫປຕິການໍ ນ ປີຬໍ ອກາສີຕິ ຈ ວຸຕ຺ໂຕ – ‘‘ອາມ, ມຫາຣາຊ, ອິມສ຺ມິໍ ວາເຣ ເຂຕ຺ຕານິ ມນ຺ທສສ຺ສານິ ອເຫສຸໍ, ຕສ຺ມາ ອປີເຬນ຺ຕສ຺ສ ເມ ຄຓ຺ຫໂຕ ນ ພຫຸໍ ຊາຕ’’ນ຺ຕິ ເອວໍ ພ຺ຣາຫ຺ມຓຄຫປຕິເກ ນິສ຺ສາຍ ຣາຊານໍ ວິລຸມ຺ປຕິ.

໔໔໖. ປໂຍ ປີຍຕນ຺ຕິ ຕຣຸຓຂີຣໍ ປິວຕຸ. ຕາວ ຠຕ຺ຕສ຺ສາຕິ ຍາວ ຂີຣໍ ປິວິຕ຺ວາ ນິສີທິສ຺ສຖ, ຕາວເທວ ຠຕ຺ຕສ຺ສ ກາໂລ ຠວິສ຺ສຕິ. ອິເຘວ ຫິ ໂນ ປາຕຣາສຠຕ຺ຕໍ ອາຫຣິສ຺ສນ຺ຕີຕິ ທສ຺ເສຕິ. ມາຕາປິຕໂຣຕິອາທີສຸ ມຫລ຺ລກາ ມາຕາປິຕໂຣ ມຸທຸການິ ອຕ຺ຖຣຓປາວຸຣຓານິ ສຸຂຸມານິ ວຕ຺ຖານິ ມຘຸຣໂຠຊນໍ ສຸຄນ຺ຘຄນ຺ຘມາລາທີນິ ຈ ປຣິເຍສິຕ຺ວາ ໂປເສຕພ຺ພາ. ປຸຕ຺ຕຘີຕານໍ ນາມກຣຓມງ຺ຄລາທີນິ ສພ຺ພກິຈ຺ຈານິ ກໂຣນ຺ເຕນ ປຸຕ຺ຕທາໂຣ ໂປເສຕພ຺ໂພ. ເອວຎ຺ຫິ ອກຣິຍມາເນ ຄຣຫາ ອຸປ຺ປຊ຺ຊຕີຕິ ອິມິນາ ນເຍນ ອຕ຺ໂຖ ເວທິຕພ຺ໂພ.

໔໔໗. ອຘມ຺ມຈາຣີຕິ ປຎ຺ຈ ທຸສ຺ສີລ຺ຍກມ຺ມານິ ວາ ທສ ທຸສ຺ສີລ຺ຍກມ຺ມານິ ວາ ອິຘ ອຘມ຺ໂມ ນາມ. ອຸປກຑ຺ເຒຍ຺ຍຸນ຺ຕິ ປຎ຺ຈວິຘພນ຺ຘນາທິກມ຺ມກຣຓຕ຺ຖໍ ຕໍ ຕໍ ນິຣຍໍ ກຑ຺ເຒຍ຺ຍຸໍ.

໔໔໘. ຘມ຺ມຈາຣີຕິ ຘມ຺ມິກສິວວິຊ຺ຊາທິກມ຺ມກາຣີ. ປຏິກ຺ກມນ຺ຕີຕິ ໂອສຣນ຺ຕິ ປຣິຫາຍນ຺ຕິ. ອຠິກ຺ກມນ຺ຕີຕິ ອຠິສຣນ຺ຕິ ວຑ຺ຒນ຺ຕິ. ເສຍ຺ໂຍຕິ ວຣຕຣໍ. ຫີເນຕິ ນິຫີເນ ລາມເກ. ກາລງ຺ກໂຕ ຈ ສາຣິປຸຕ຺ຕາຕິ ອິທໍ ຠຄວາ ‘‘ຕຕ຺ຣສ຺ສ ຄນ຺ຕ຺ວາ ເທເສຫີ’’ຕິ ອຘິປ຺ປາເຍນ ເຖຣມາຫ. ເຖໂຣປິ ຕໍຂຓໍເຍວ ຄນ຺ຕ຺ວາ ມຫາພ຺ຣຫ຺ມຸໂນ ຘມ຺ມໍ ເທເສສິ, ຕໂຕ ປຏ຺ຐາຍ ຈາຕຸປ຺ປທິກໍ ຄາຖໍ ກເຖນ຺ໂຕປິ ຈຕຸສຈ຺ຈວິມຸຕ຺ຕໍ ນາມ ນ ກເຖສີຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ຘນຎ຺ຊານິສຸຕ຺ຕວຓ຺ຓນາ ນິຏ຺ຐິຕາ.