໖. ເອສຸກາຣີສຸຕ຺ຕວຓ຺ຓນາ

໔໓໗. ເອວໍ ເມ ສຸຕນ຺ຕິ ເອສຸກາຣີສຸຕ຺ຕໍ. ຕຕ຺ຖ ພິລໍ ໂອລຄ຺ເຄຍ຺ຍຸນ຺ຕິ ໂກຏ຺ຐາສໍ ລຄ຺ຄາເປຍ຺ຍຸໍ, ອິມິນາ ສຕ຺ຖຘມ຺ມໍ ນາມ ທສ຺ເສຕິ. ສຕ຺ຖວາໂຫ ກິຣ ມຫາກນ຺ຕາຣປຏິປນ຺ໂນ ອນ຺ຕຣາມຄ຺ເຄ ໂຄເຓ ມເຕ ມໍສໍ ຄເຫຕ຺ວາ ສພ຺ເພສໍ ສຕ຺ຖິການໍ ‘‘ອິທໍ ຂາທິຕ຺ວາ ເອຕ຺ຕກໍ ມູລໍ ທາຕພ຺ພ’’ນ຺ຕິ ໂກຏ຺ຐາສໍ ໂອລຄ຺ເຄຕິ, ໂຄຓມໍສໍ ນາມ ຂາທນ຺ຕາປິ ອຕ຺ຖິ ອຂາທນ຺ຕາປິ, ມູລໍ ທາຕຸໍ ສກ຺ໂກນ຺ຕາປິ ອສກ຺ໂກນ຺ຕາປິ. ສຕ຺ຖວາໂຫ ເຍນ ມູເລນ ໂຄໂຓ ຄຫິໂຕ, ຕສ຺ສ ນິກ຺ຂມນຕ຺ຖໍ ສພ຺ເພສໍ ພລກ຺ກາເຣນ ໂກຏ຺ຐາສໍ ທຕ຺ວາ ມູລໍ ຄຓ຺ຫາຕິ, ອຍໍ ສຕ຺ຖຘມ຺ໂມ. ເອວເມວໍ ພ຺ຣາຫ຺ມຓາປິ ໂລກສ຺ສ ປຏິຎ຺ຎໍ ອຄ຺ຄເຫຕ຺ວາ ອຕ຺ຕໂນວ ຘມ຺ມຕາຍ ຈຕສ຺ໂສ ປາຣິຈຣິຍາ ປຎ຺ຎເປນ຺ຕີຕິ ທສ຺ເສຕຸໍ ເອວເມວ ໂຂຕິອາທິມາຫ. ປາປິໂຍ ອສ຺ສາຕິ ປາປໍ ອສ຺ສ. ເສຍ຺ໂຍ ອສ຺ສາຕິ ຫິຕໍ ອສ຺ສ. ອຖ ວາ ປາປິໂຍຕິ ປາປໂກ ລາມໂກ ອຕ຺ຕຠາໂວ ອສ຺ສ. ເສຍ຺ໂຍຕິ ເສຏ຺ໂຐ ອຸຕ຺ຕໂມ. ເສຍ຺ຍໍໂສຕິ ເສຍ຺ໂຍ. ອຸຈ຺ຈາກຸລີນຕາຕິ ອຸຈ຺ຈາກຸລີນຕ຺ເຕນ ເສຍ຺ໂຍ. ປາປິຍໍໂສຕິ ປາປິໂຍ. ອຸຈ຺ຈາກຸລີນຕາ ຈ ທ຺ວີສຸ ກຸເລສຸ ວຑ຺ເຒຕິ ຂຕ຺ຕິຍກຸເລ ພ຺ຣາຫ຺ມຓກຸເລ ຈ, ອຸຬາຣວຓ຺ຓຕາ ຕີສຸ. ເວສ຺ໂສປິ ຫິ ອຸຬາຣວຓ຺ໂຓ ໂຫຕິ. ອຸຬາຣໂຠຄຕາ ຈຕູສຸປິ. ສຸທ຺ໂທປິ ຫິ ອນ຺ຕມໂສ ຈຓ຺ຑາໂລປິ ອຸຬາຣໂຠໂຄ ໂຫຕິເຍວ.

໔໔໐. ຠິກ຺ຂາຈຣິຍນ຺ຕິ ໂກຏິຘເນນປິ ຫິ ພ຺ຣາຫ຺ມເຓນ ຠິກ຺ຂາ ຈຣິຕພ຺ພາວ, ໂປຣາຓກພ຺ຣາຫ຺ມຓາ ອສີຕິໂກຏິຘນາປິ ເອກເວລໍ ຠິກ຺ຂໍ ຈຣນ຺ຕິ. ກສ຺ມາ? ທຸຄ຺ຄຕກາເລ ຈຣນ຺ຕານໍ ອິທານິ ຠິກ຺ຂໍ ຈຣິຕຸໍ ອາຣທ຺ຘາຕິ ຄຣຫາ ນ ຠວິສ຺ສຕີຕິ. ອຕິມຎ຺ຎມາໂນຕິ ໂຍ ຠິກ຺ຂາຈຣິຍວໍສໍ ຫຣິຕ຺ວາ ສຕ຺ຕຊີວກສິກມ຺ມວຓິຊ຺ຊາທີຫິ ຊີວິກໍ ກປ຺ເປຕິ, ອຍໍ ອຕິມຎ຺ຎຕິ ນາມ. ໂຄໂປ ວາຕິ ຍຖາ ໂຄປໂກ ອຕ຺ຕນາ ຣກ຺ຂິຕພ຺ພໍ ຠຓ຺ຑໍ ເຖເນນ຺ໂຕ ອກິຈ຺ຈກາຣີ ໂຫຕິ, ເອວນ຺ຕິ ອຕ຺ໂຖ. ອິມິນາ ນເຍນ ສພ຺ພວາເຣສຸ ອຕ຺ໂຖ ເວທິຕພ຺ໂພ. ອສິຕພ຺ຍາຠງ຺ຄິນ຺ຕິ ຕິຓລາຍນອສິຕຎ຺ເຈວ ກາຊຎ຺ຈ. ອນຸສ຺ສຣໂຕຕິ ຍຕ຺ຖ ຊາໂຕ, ຕສ຺ມິໍ ໂປຣາເຓ ມາຕາເປຕ຺ຕິເກ ກຸລວໍເສ ອນຸສ຺ສຣິຍມາເນຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ເອສຸກາຣີສຸຕ຺ຕວຓ຺ຓນາ ນິຏ຺ຐິຕາ.