໘. ພາຫິຕິກສຸຕ຺ຕວຓ຺ຓນາ

໓໕໘. ເອວໍ ເມ ສຸຕນ຺ຕິ ພາຫິຕິກສຸຕ຺ຕໍ. ຕຕ຺ຖ ເອກປຸຓ຺ຑຣີກໍ ນາຄນ຺ຕິ ເອວໍນາມກໍ ຫຕ຺ຖິໍ. ຕສ຺ສ ກິຣ ຜາສຸການໍ ອຸປຣິ ຕາລຜລມຕ຺ຕໍ ປຓ຺ຑຣຏ຺ຐານໍ ອຕ຺ຖິ, ເຕນສ຺ສ ເອກປຸຓ຺ຑຣີໂກຕິ ນາມໍ ອກໍສຸ. ສິຣິວຑ຺ຒໍ ມຫາມຕ຺ຕນ຺ຕິ ປຈ຺ເຈກຫຕ຺ຖິໍ ອຠິຣຸຫິຕ຺ວາ ກຖາຜາສຸກຕ຺ຖໍ ສທ຺ຘິໍ ຄຈ຺ຉນ຺ຕໍ ເອວໍນາມກໍ ມຫາມຕ຺ຕໍ. ອາຍສ຺ມາໂນຕິ ເອຕ຺ຖ ໂນຕິ ປຸຈ຺ຉາຍ ນິປາໂຕ. ມຫາມຕ຺ໂຕ ເຖຣສ຺ສ ສງ຺ຆາຏິປຕ຺ຕຘາຣຓາກາຣໍ ສລ຺ລກ຺ເຂຕ຺ວາ ‘‘ເອວໍ, ມຫາຣາຊາ’’ຕິ ອາຫ.

໓໕໙. ໂອປາຣມ຺ໂຠຕິ ອຸປາຣມ຺ຠໍ ໂທສໍ ອາໂຣປນາຣໂຫ. ກິໍ ປຸຈ຺ຉາມີຕິ ຣາຊາ ປຸຈ຺ຉຕິ. ສຸນ຺ທຣິວຕ຺ຖຸສ຺ມິໍ ອຸປ຺ປນ຺ນມິທໍ ສຸຕ຺ຕໍ, ຕໍ ປຸຈ຺ຉາມີຕິ ປຸຈ຺ຉຕິ. ຍຎ຺ຫິ ມຍໍ, ຠນ຺ເຕຕິ, ຠນ຺ເຕ, ຍໍ ມຍໍ ວິຎ຺ຎູຫີຕິ ອິທໍ ປທໍ ຄເຫຕ຺ວາ ປຎ຺ເຫນ ປຣິປູເຣຕຸໍ ນາສກ຺ຂິມ຺ຫາ, ຕໍ ກາຣຓໍ ອາຍສ຺ມຕາ ເອວໍ ວທນ຺ເຕນ ປຣິປູຣິຕໍ.

໓໖໐. ອກຸສໂລຕິ ອໂກສລ຺ລສມ຺ຠູໂຕ. ສາວຊ຺ໂຊຕິ ສໂທໂສ. ສພ຺ຍາພຊ຺ໂຌຕິ ສທຸກ຺ໂຂ. ທຸກ຺ຂວິປາໂກຕິ ອິຘ ນິສ຺ສນ຺ທວິປາໂກ ກຖິໂຕ. ຕສ຺ສາຕິ ຕສ຺ສ ເອວໍ ອຕ຺ຕພ຺ຍາພາຘາທີນໍ ອຕ຺ຖາຍ ປວຕ຺ຕກາຍສມາຈາຣສ຺ສ.

ສພ຺ພາກຸສລຘມ຺ມປຫີໂນ ໂຂ, ມຫາຣາຊ, ຕຖາຄໂຕ ກຸສລຘມ຺ມສມນ຺ນາຄໂຕຕິ ເອຕ຺ຖ ສພ຺ເພສໍເຍວ ອກຸສລານໍ ຘມ຺ມານໍ ປຫານໍ ວຓ຺ເຓຕີຕິ. ອາມ ວຓ຺ເຓຕີຕິ ວຸຕ຺ເຕ ຍຖາ ປຸຈ຺ຉາ, ຕຖາ ອຕ຺ໂຖ ວຸຕ຺ໂຕ ຠເວຍ຺ຍ. ເອວໍ ພ຺ຍາກຣຓໍ ປນ ນ ຠາຣິຍໍ. ອປ຺ປຫີນອກຸສໂລປິ ຫິ ປຫານໍ ວຓ຺ເຓຍ຺ຍ, ຠຄວາ ປນ ປຫີນາກຸສລຕາຍ ຍຖາກາຣີ ຕຖາວາທີຕິ ທສ຺ເສຕຸໍ ເອວໍ ພ຺ຍາກາສິ. ສຸກ຺ກປກ຺ເຂປິ ເອເສວ ນໂຍ.

໓໖໒. ພາຫິຕິກາຕິ ພາຫິຕິຣຏ຺ເຐ ອຸຏ຺ຐິຕວຕ຺ຖສ຺ເສຕໍ ນາມໍ. ໂສຬສສມາ ອາຍາເມນາຕິ ອາຍາເມນ ສມໂສຬສຫຕ຺ຖາ. ອຏ຺ຐສມາ ວິຕ຺ຖາເຣນາຕິ ວິຕ຺ຖາເຣນ ສມອຏ຺ຐຫຕ຺ຖາ.

໓໖໓. ຠຄວໂຕ ປາທາສີຕິ ຠຄວໂຕ ນິຍ຺ຍາເຕສິ. ທຕ຺ວາ ຈ ປນ ຄນ຺ຘກຸຏິຍໍ ວິຕານໍ ກຕ຺ວາ ພນ຺ຘິ. ຕໂຕ ປຏ຺ຐາຍ ຄນ຺ຘກຸຏິ ຠິຍ຺ໂຍໂສມຕ຺ຕາຍ ໂສຠິ. ເສສໍ ສພ຺ພຕ຺ຖ ອຸຕ຺ຕານເມວ. ເນຍ຺ຍປຸຄ຺ຄລສ຺ສ ປນ ວເສນ ອຍໍ ເທສນາ ນິຏ຺ຐິຕາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ພາຫິຕິກສຸຕ຺ຕວຓ຺ຓນາ ນິຏ຺ຐິຕາ.