໗. ປິຍຊາຕິກສຸຕ຺ຕວຓ຺ຓນາ

໓໕໓. ເອວໍ ເມ ສຸຕນ຺ຕິ ປິຍຊາຕິກສຸຕ຺ຕໍ. ຕຕ຺ຖ ເນວ ກມ຺ມນ຺ຕາ ປຏິຠນ຺ຕີຕິ ນ ສພ຺ເພນ ສພ຺ພໍ ປຏິຠນ຺ຕິ, ປກຕິນິຍາເມນ ປນ ນ ປຏິຠນ຺ຕິ. ທຸຕິຍປເທປິ ເອເສວ ນໂຍ. ເອຕ຺ຖ ຈ ນ ປຏິຠາຕີຕິ ນ ຣຸຈ຺ຈຕິ. ອາຬາຫນນ຺ຕິ ສຸສານໍ. ອຎ຺ຎຖຕ຺ຕນ຺ຕິ ວິວຓ຺ຓຕາຍ ອຎ຺ຎຖາຠາໂວ. ອິນ຺ທ຺ຣິຍານິ ນາມ ມໂນວິຎ຺ເຎຍ຺ຍາ ຘມ຺ມາ, ປຕິຏ຺ຐິໂຕກາສໍ ປນ ສນ຺ຘາຍ ອິທໍ ວຸຕ຺ຕໍ. ປິຍຊາຕິກາຕິ ປິຍໂຕ ຊາຍນ຺ຕິ. ປິຍປ຺ປຠາວິກາຕິ ປິຍໂຕ ປຠວນ຺ຕິ.

໓໕໕. ສເຈ ຕໍ, ມຫາຣາຊາຕິ ຕສ຺ສ ອຕ຺ຖໍ ອສລ຺ລກ຺ຂຍມານາປິ ສຕ຺ຖຣິ ສທ຺ຘາຍ ເອວໍ ວທຕິ. ຈຣ ປິເຣຕິ ອເປຫິ ອມ຺ຫາກໍ ປເຣ, ອນຊ຺ຌຕ຺ຕິກຠູເຕຕິ ອຕ຺ໂຖ. ອຖ ວາ ຈຣ ປິເຣຕິ ປຣໂຕ ຄຈ຺ຉ, ມາ ອິຘ ຕິຏ຺ຐາຕິປິ ອຕ຺ໂຖ.

໓໕໖. ທ຺ວິຘາ ເຉຕ຺ວາຕິ ອສິນາ ທ຺ເວ ໂກຏ຺ຐາເສ ກໂຣນ຺ໂຕ ຉິນ຺ທິຕ຺ວາ. ອຕ຺ຕານໍ ອຸປ຺ຜາເລສີຕິ ເຕເນວ ອສິນາ ອຕ຺ຕໂນ ອຸທຣໍ ຜາເລສິ. ຍທິ ຫິ ຕສ຺ສ ສາ ອປ຺ປິຍາ ຠເວຍ຺ຍ, ອິທານິ ອຎ຺ຎໍ ມາຕຸຄາມໍ ຄຓ຺ຫິສ຺ສາມີຕິ ອຕ຺ຕານໍ ນ ຆາເຕຍ຺ຍ. ຍສ຺ມາ ປນສ຺ສ ສາ ປິຍາ ອໂຫສິ, ຕສ຺ມາ ປຣໂລເກປິ ຕາຍ ສທ຺ຘິໍ ສມງ຺ຄິຠາວໍ ປຕ຺ຖຍມາໂນ ເອວມກາສິ.

໓໕໗. ປິຍາ ເຕ ວຊິຣີຕິ ເອວໍ ກິຣສ຺ສາ ອໂຫສິ – ‘‘ສຈາຫໍ, ‘ຠູຕປຸພ຺ພໍ, ມຫາຣາຊ, ອິມິສ຺ສາເຍວ ສາວຕ຺ຖິຍໍ ອຎ຺ຎຕຣິສ຺ສາ ອິຕ຺ຖິຍາ’ຕິອາທິກຖໍ ກເຖຍ຺ຍໍ, ‘ໂກ ເຕ ເອວໍ ອກາສິ, ອເປຫິ ນຕ຺ຖິ ເອຕ’ນ຺ຕິ ມໍ ປຏິເສເຘຍ຺ຍ, ວຕ຺ຕມາເນເນວ ນໍ ສຎ຺ຎາເປສ຺ສາມີ’’ຕິ ຈິນ຺ເຕຕ຺ວາ ເອວມາຫ. ວິປຣິຓາມຎ຺ຎຖາຠາວາຕິ ເອຕ຺ຖ ມຣຓວເສນ ວິປຣິຓາໂມ, ເກນຈິ ສທ຺ຘິໍ ປລາຍິຕ຺ວາ ຄມນວເສນ ອຎ຺ຎຖາຠາໂວ ເວທິຕພ຺ໂພ.

ວາສຠາຍາຕິ ວາສຠາ ນາມ ຣຎ຺ໂຎ ເອກາ ເທວີ, ຕໍ ສນ຺ຘາຍາຫ.

ປິຍາ ເຕ ອຫນ຺ຕິ ກສ຺ມາ ສພ຺ພປຈ຺ຉາ ອາຫ? ເອວໍ ກິຣສ຺ສາ ອໂຫສິ – ‘‘ອຍໍ ຣາຊາ ມຍ຺ຫໍ ກຸປິໂຕ, ສຈາຫໍ ສພ຺ພປຐມໍ ‘ປິຍາ ເຕ ອຫ’ນ຺ຕິ ປຸຈ຺ເຉຍ຺ຍໍ, ‘ນ ເມ ຕ຺ວໍ ປິຍາ, ຈຣ ປິເຣ’ຕິ ວເທຍ຺ຍ, ເອວໍ ສນ຺ເຕ ກຖາ ປຕິຏ຺ຐານໍ ນ ລຠິສ຺ສຕີ’’ຕິ ກຖາຍ ປຕິຏ຺ຐານຕ຺ຖໍ ສພ຺ພປຈ຺ຉາ ປຸຈ຺ຉິ. ກາສິໂກສເລສຸ ຉຑ຺ຑິຕຠາເວນ ວິປຣິຓາໂມ, ປຏິຣາຊູນໍ ຫຕ຺ຖຄມນວເສນ ອຎ຺ຎຖາຠາໂວ ເວທິຕພ຺ໂພ.

ອາຈເມຫີຕິ ອາຈມໂນທກໍ ເທຫິ. ອາຈມິຕ຺ວາ ຫຕ຺ຖປາເທ ໂຘວິຕ຺ວາ ມຸຂໍ ວິກ຺ຂາເລຕ຺ວາ ສຕ຺ຖາຣໍ ນມສ຺ສິຕຸກາໂມ ເອວມາຫ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ປິຍຊາຕິກສຸຕ຺ຕວຓ຺ຓນາ ນິຏ຺ຐິຕາ.