໔. ມຘຸຣສຸຕ຺ຕວຓ຺ຓນາ

໓໑໗. ເອວໍ ເມ ສຸຕນ຺ຕິ ມຘຸຣສຸຕ຺ຕໍ. ຕຕ຺ຖ ມຫາກຈ຺ຈາໂນຕິ ຄິຫິກາເລ ອຸຊ຺ເຊນິກຣຎ຺ໂຎ ປຸໂຣຫິຕປຸຕ຺ໂຕ ອຠິຣູໂປ ທສ຺ສນີໂຍ ປາສາທິໂກ ສຸວຓ຺ຓວຓ຺ໂຓ ຈ. ມຘຸຣາຍນ຺ຕິ ເອວໍນາມເກ ນຄເຣ. ຄຸນ຺ທາວເນຕິ ກຓ຺ຫກຄຸນ຺ທາວເນ. ອວນ຺ຕິປຸຕ຺ໂຕຕິ ອວນ຺ຕິຣຏ຺ເຐ ຣຎ຺ໂຎ ຘີຕາຍ ປຸຕ຺ໂຕ. ວຸທ຺ໂຘ ເຈວ ອຣຫາ ຈາຕິ ທຫຣໍ ອຣຫນ຺ຕມ຺ປິ ນ ຕຖາ ສມ຺ຠາເວນ຺ຕິ ຍຖາ ມຫລ຺ລກໍ, ເຖໂຣ ປນ ວຸທ຺ໂຘ ເຈວ ອໂຫສິ ອຣຫາ ຈ. ພ຺ຣາຫ຺ມຓາ, ໂຠ ກຈ຺ຈານາຕິ ໂສ ກິຣ ຣາຊາ ພ຺ຣາຫ຺ມຓລທ຺ຘິໂກ, ຕສ຺ມາ ເອວມາຫ. ພ຺ຣາຫ຺ມໂຓວ ເສຏ຺ໂຐ ວຓ຺ໂຓຕິອາທີສຸ ຊາຕິໂຄຕ຺ຕາທີນໍ ປຎ຺ຎາປນຏ຺ຐາເນ ພ຺ຣາຫ຺ມຓາວ ເສຏ຺ຐາຕິ ທສ຺ເສຕິ. ຫີໂນ ອຎ຺ໂຎ ວຓ຺ໂຓຕິ ອິຕເຣ ຕໂຍ ວຓ຺ຓາ ຫີນາ ລາມກາຕິ ວທຕິ. ສຸກ຺ໂກຕິ ປຓ຺ຑໂຣ. ກຓ຺ໂຫຕິ ກາຬໂກ. ສຸຊ຺ຌນ຺ຕີຕິ ຊາຕິໂຄຕ຺ຕາທິປຎ຺ຎາປນຏ຺ຐາເນສຸ ສຸຊ຺ຌນ຺ຕິ. ພ຺ຣຫ຺ມຸໂນ ປຸຕ຺ຕາຕິ ມຫາພ຺ຣຫ຺ມຸໂນ ປຸຕ຺ຕາ. ໂອຣສາ ມຸຂໂຕ ຊາຕາຕິ ອຸເຣ ວສິຕ຺ວາ ມຸຂໂຕ ນິກ຺ຂນ຺ຕາ, ອຸເຣ ກຕ຺ວາ ສໍວທ຺ຘິຕາຕິ ວາ ໂອຣສາ. ພ຺ຣຫ຺ມຊາຕິ ພ຺ຣຫ຺ມໂຕ ນິພ຺ພຕ຺ຕາ. ພ຺ຣຫ຺ມນິມ຺ມິຕາຕິ ພ຺ຣຫ຺ມຸນາ ນິມ຺ມິຕາ. ພ຺ຣຫ຺ມທາຍາທາຕິ ພ຺ຣຫ຺ມຸໂນ ທາຍາທາ. ໂຆໂສເຍວ ໂຂ ເອໂສຕິ ໂວຫາຣມຕ຺ຕເມເວຕໍ.

໓໑໘. ອິຊ຺ເຌຍ຺ຍາຕິ ສມິຊ຺ເຌຍ຺ຍ, ຍຕ຺ຕການິ ຘນາທີນິ ປຕ຺ເຖຍ຺ຍ, ຕຕ຺ຕເກຫິສ຺ສ ມໂນຣໂຖ ປູເຣຍ຺ຍາຕິ ອຕ຺ໂຖ. ຂຕ຺ຕິໂຍປິສ຺ສາສ຺ສາຕິ ຂຕ຺ຕິໂຍປິ ອສ຺ສ ອິສ຺ສຣິຍສມ຺ປຕ຺ຕສ຺ສ ປຸພ຺ພຸຏ຺ຐາຍີ ອສ຺ສ. ເນສໍ ເອຕ຺ຖ ກິຎ຺ຈີຕິ ນ ເອເຕສໍ ເອຕ຺ຖ ກິຎ຺ຈິ.

໓໒໒. ອາສເນນ ວາ ນິມນ຺ເຕຍ຺ຍາມາຕິ ນິສິນ຺ນາສນໍ ປປ຺ໂຜເຏຕ຺ວາ ອິຘ ນິສີທາຕິ ວເທຍ຺ຍາມ. ອຠິນິມນ຺ເຕຍ຺ຍາມປິ ນນ຺ຕິ ອຠິຫຣິຕ຺ວາ ຕໍ ນິມນ຺ເຕຍ຺ຍາມ. ຕຕ຺ຖ ທຸວິໂຘ ອຠິຫາໂຣ ວາຈາຍ ເຈວ ກາເຍນ ຈ. ‘‘ຕຸມ຺ຫາກໍ ອິຈ຺ຉິຕິຈ຺ຉິຕກ຺ຂເຓ ມມໍ ຈີວຣາທີຫິ ວເທຍ຺ຍາຖ ເຍນຕ຺ໂຖ’’ຕິ ວທນ຺ໂຕ ຫິ ວາຈາຍ ອຠິຫຣິຕ຺ວາ ນິມນ຺ເຕຕິ ນາມ. ຈີວຣາທິເວກລ຺ລໍ ສລ຺ລກ຺ເຂຕ຺ວາ ‘‘ອິທໍ ຄຓ຺ຫຖາ’’ຕິ ຕານິ ເທນ຺ໂຕ ປນ ກາເຍນ ອຠິຫຣິຕ຺ວາ ນິມນ຺ເຕຕິ ນາມ. ຕທຸຠຍມ຺ປິ ສນ຺ຘາຍ ‘‘ອຠິນິມນ຺ເຕຍ຺ຍາມປິ ນ’’ນ຺ຕິ ອາຫ. ຣກ຺ຂາວຣຓຄຸຕ຺ຕິນ຺ຕິ ຣກ຺ຂາສງ຺ຂາຕຎ຺ເຈວ ອາວຣຓສງ຺ຂາຕຎ຺ຈ ຄຸຕ຺ຕິໍ. ຍາ ປເນສາ ອາວຸຘຫຕ຺ເຖ ປຸຣິເສ ຐເປນ຺ເຕນ ຣກ຺ຂາ, ສາ ຘມ຺ມິກາ ນາມ ສໍວິຫິຕາ ນ ໂຫຕິ. ຍຖາ ປນ ອເວລາຍ ກຏ຺ຐຫາຣິກາປຓ຺ຓຫາຣິກາທໂຍ ວິຫາຣໍ ນ ປວິສນ຺ຕິ, ມິຄລຸທ຺ທກາທໂຍ ວິຫາຣສີມາຍ ມິເຄ ວາ ມຈ຺ເຉ ວາ ນ ຄຓ຺ຫນ຺ຕິ, ເອວໍ ສໍວິທຫນ຺ເຕນ ຘມ຺ມິກາ ນາມ ສໍວິຫິຕາ ໂຫຕິ. ຕໍ ສນ຺ຘາຍາຫ ‘‘ຘມ຺ມິກ’’ນ຺ຕິ.

ເອວໍ ສນ຺ເຕຕິ ເອວໍ ຈຕຸນ຺ນມ຺ປິ ວຓ຺ຓານໍ ປພ຺ພຊິຕານໍ ປພ຺ພຊິຕສກ຺ກາເຣນ ສເມ ສມາເນ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ມຘຸຣສຸຕ຺ຕວຓ຺ຓນາ ນິຏ຺ຐິຕາ.