໙. ໂຄລິຍານິສຸຕ຺ຕວຓ຺ຓນາ

໑໗໓. ເອວໍ ເມ ສຸຕນ຺ຕິ ໂຄລິຍານິສຸຕ຺ຕໍ. ຕຕ຺ຖ ປທສມາຈາໂຣຕິ ທຸພ຺ພລສມາຈາໂຣ ໂອຬາຣິກາຈາໂຣ, ປຈ຺ຈເຍສຸ ສາເປກ຺ໂຂ ມຫາຣກ຺ຂິຕຕ຺ເຖໂຣ ວິຍ. ຕໍ ກິຣ ອຸປຏ຺ຐາກກຸເລ ນິສິນ຺ນໍ ອຸປຏ຺ຐາໂກ ອາຫ ‘‘ອສຸກຕ຺ເຖຣສ຺ສ ເມ, ຠນ຺ເຕ, ຈີວຣໍ ທິນ຺ນ’’ນ຺ຕິ. ສາຘຸ ເຕ ກຕໍ ຕໍເຍວ ຕກ຺ເກຕ຺ວາ ວິຫຣນ຺ຕສ຺ສ ຈີວຣໍ ເທນ຺ເຕນາຕິ. ຕຸມ຺ຫາກມ຺ປິ, ຠນ຺ເຕ, ທສ຺ສາມີຕິ. ສາຘຸ ກຣິສ຺ສສິ ຕໍເຍວ ຕກ຺ເກນ຺ຕສ຺ສາຕິ ອາຫ. ອຍມ຺ປິ ເອວຣູໂປ ໂອຬາຣິກາຈາໂຣ ອໂຫສິ. ສປ຺ປຕິສ຺ເສນາຕິ ສເຊຏ຺ຐເກນ, ນ ອຕ຺ຕານໍ ເຊຏ຺ຐກໍ ກຕ຺ວາ ວິຫຣິຕພ຺ພໍ. ເສຣິວິຫາເຣນາຕິ ສຈ຺ຉນ຺ທວິຫາເຣນ ນິຣງ຺ກຸສວິຫາເຣນ.

ນານູປຂຊ຺ຊາຕິ ນ ອນຸປຂຊ຺ຊ ນ ອນຸປວິສິຕ຺ວາ. ຕຕ຺ຖ ໂຍ ທ຺ວີສຸ ມຫາເຖເຣສຸ ອຸຠໂຕ ນິສິນ຺ເນສຸ ເຕ ອນາປຸຈ຺ຉິຕ຺ວາວ ຈີວເຣນ ວາ ຊາຓຸນາ ວາ ຆຏ຺ເຏນ຺ໂຕ ນິສີທຕິ, ອຍໍ ອນຸປຂຊ຺ຊ ນິສີທຕິ ນາມ. ເອວໍ ອກຕ຺ວາ ປນ ອຕ຺ຕໂນ ປຕ຺ຕອາສນສນ຺ຕິເກ ຐຕ຺ວາ ນິສີທາວຸໂສຕິ ວຸຕ຺ເຕ ນິສີທິຕພ຺ພໍ. ສເຈ ນ ວທນ຺ຕິ, ນິສີທາມິ, ຠນ຺ເຕຕິ ອາປຸຈ຺ຉິຕ຺ວາ ນິສີທິຕພ຺ພໍ ອາປຸຈ຺ຉິຕກາລໂຕ ປຏ຺ຐາຍ ນິສີທາຕິ ວຸຕ຺ເຕປິ ອວຸຕ຺ເຕປິ ນິສີທິຕຸໍ ວຏ຺ຏຕິເຍວ. ນ ປຏິພາຫິສ຺ສາມີຕິ ເອຕ຺ຖ ໂຍ ອຕ຺ຕໂນ ປຕ຺ຕາສນໍ ອຕິກ຺ກມິຕ຺ວາ ນວການໍ ປາປຸຓນຏ຺ຐາເນ ນິສີທຕິ, ອຍໍ ນເວ ຠິກ຺ຂູ ອາສເນນ ປຏິພາຫຕິ ນາມ. ຕສ຺ມິຎ຺ຫິ ຕຖາ ນິສິນ຺ເນ ນວາ ຠິກ຺ຂູ ‘‘ອມ຺ຫາກໍ ນິສີທິຕຸໍ ນ ເທຕີ’’ຕິ ອຸຊ຺ຌາຍນ຺ຕາ ຕິຏ຺ຐນ຺ຕິ ວາ ອາສນໍ ວາ ປຣິເຍສນ຺ຕາ ອາຫິຓ຺ຑນ຺ຕິ. ຕສ຺ມາ ອຕ຺ຕໂນ ປຕ຺ຕາສເນເຍວ ນິສີທິຕພ຺ພໍ. ເອວໍ ນ ປຏິພາຫຕິ ນາມ.

ອາຠິສມາຈາຣິກມ຺ປິ ຘມ຺ມນ຺ຕິ ອຠິສມາຈາຣິກໍ ວຕ຺ຕປຏິປຕ຺ຕິມຕ຺ຕມ຺ປິ. ນາຕິກາເລນາຕິ ນ ອຕິປາໂຕ ປວິສິຕພ຺ພໍ, ນ ອຕິທິວາ ປຏິກ຺ກມິຕພ຺ພໍ, ຠິກ຺ຂຸສງ຺ເຆນ ສທ຺ຘິໍເຍວ ປວິສິຕພ຺ພຎ຺ຈ ນິກ຺ຂມິຕພ຺ພຎ຺ຈ. ອຕິປາໂຕ ປວິສິຕ຺ວາ ອຕິທິວາ ນິກ຺ຂມນ຺ຕສ຺ສ ຫິ ເຈຕິຍງ຺ຄຓໂພຘິຍງ຺ຄຓວຕ຺ຕາທີນິ ປຣິຫາຍນ຺ຕິ. ກາລສ຺ເສວ ມຸຂໍ ໂຘວິຕ຺ວາ ມກ຺ກຏກສຸຕ຺ຕານິ ຉິນ຺ທນ຺ເຕນ ອຸສ຺ສາວພິນ຺ທູ ນິປາເຕນ຺ເຕນ ຄາມໍ ປວິສິຕ຺ວາ ຍາຄຸໍ ປຣິເຍສິຕ຺ວາ ຍາວ ຠິກ຺ຂາກາລາ ອນ຺ໂຕຄາເມເຍວ ນານປ຺ປກາຣໍ ຕິຣຈ຺ຉານກຖໍ ກເຖນ຺ເຕນ ນິສີທິຕ຺ວາ ຠຕ຺ຕກິຈ຺ຈໍ ກຕ຺ວາ ທິວາ ນິກ຺ຂມ຺ມ ຠິກ຺ຂູນໍ ປາທໂຘວນເວລາຍ ວິຫາຣໍ ປຈ຺ຈາຄນ຺ຕພ຺ພໍ ໂຫຕິ. ນ ປຸເຣຠຕ຺ຕໍ ປຈ຺ຉາຠຕ຺ຕໍ ກຸເລສຸ ຈາຣິຕ຺ຕໍ ອາປຊ຺ຊິຕພ຺ພນ຺ຕິ ‘‘ໂຍ ປນ ຠິກ຺ຂຸ ນິມນ຺ຕິໂຕ ສຠຕ຺ໂຕ ສມາໂນ ສນ຺ຕໍ ຠິກ຺ຂຸໍ ອນາປຸຈ຺ຉາ ປຸເຣຠຕ຺ຕໍ ວາ ປຈ຺ຉາຠຕ຺ຕໍ ວາ ກຸເລສຸ ຈາຣິຕ຺ຕໍ ອາປຊ຺ເຊຍ຺ຍ, ອຎ຺ຎຕ຺ຣ ສມຍາ ປາຈິຕ຺ຕິຍ’’ນ຺ຕິ (ປາຈິ. ໒໙໙) ອິມໍ ສິກ຺ຂາປທໍ ຣກ຺ຂນ຺ເຕນ ຕສ຺ສ ວິຠງ຺ເຄ ວຸຕ຺ຕໍ ປຸເຣຠຕ຺ຕຎ຺ຈ ປຈ຺ຉາຠຕ຺ຕຎ຺ຈ ຈາຣິຕ຺ຕໍ ນ ອາປຊ຺ຊິຕພ຺ພໍ. ອຸທ຺ຘໂຕ ໂຫຕິ ຈປໂລຕິ ອຸທ຺ຘຈ຺ຈປກຕິໂກ ເຈວ ໂຫຕິ ຈີວຣມຓ຺ຑນ-ປຕ຺ຕມຓ຺ຑນ-ເສນາສນມຓ຺ຑນາ ອິມສ຺ສ ວາ ປູຕິກາຍສ຺ສ ເກລາຍນາ ມຓ຺ຑນາຕິ ເອວໍ ວຸຕ຺ເຕນ ຈ ຕຣຸຓທາຣກາວຈາປລ຺ເຍນ ສມນ຺ນາຄໂຕ.

ປຎ຺ຎວຕາ ຠວິຕພ຺ພນ຺ຕິ ຈີວຣກມ຺ມາທີສຸ ອິຕິກຕ຺ຕພ຺ເພສຸ ອຸປາຍປຎ຺ຎາຍ ສມນ຺ນາຄເຕນ ຠວິຕພ຺ພໍ. ອຠິຘມ຺ເມ ອຠິວິນເຍຕິ ອຠິຘມ຺ມປິຏເກ ເຈວ ວິນຍປິຏເກ ຈ ປາຬິວເສນ ເຈວ ອຏ຺ຐກຖາວເສນ ຈ ໂຍໂຄ ກຣຓີໂຍ. ສພ຺ພນ຺ຕິເມນ ຫິ ປຣິຈ຺ເຉເທນ ອຠິຘມ຺ເມ ທຸກຕິກມາຕິກາຫິ ສທ຺ຘິໍ ຘມ຺ມຫທຍວິຠງ຺ຄໍ ວິນາ ນ ວຏ຺ຏຕິ. ວິນເຍ ປນ ກມ຺ມາກມ຺ມວິນິຈ຺ຉເຍນ ສທ຺ຘິໍ ສຸວິນິຈ຺ຉິຕານິ ທ຺ເວ ປາຕິໂມກ຺ຂານິ ວິນາ ນ ວຏ຺ຏຕິ.

ອາຣຸປ຺ປາຕິ ເອຕ຺ຕາວຕາ ອຏ຺ຐປິ ສມາປຕ຺ຕິໂຍ ວຸຕ຺ຕາ ໂຫນ຺ຕິ. ຕາ ປນ ສພ຺ເພນ ສພ຺ພໍ ອສກ຺ໂກນ຺ເຕນ ສຕ຺ຕສຸປິ ໂຍໂຄ ກຣຓີໂຍ, ຉສຸປິ…ເປ… ປຎ຺ຈສຸປິ. ສພ຺ພນ຺ຕິເມນ ປຣິຈ຺ເຉເທນ ເອກໍ ກສິເຓ ປຣິກມ຺ມກມ຺ມຏ຺ຐານໍ ປຄຸຓໍ ກຕ຺ວາ ອາທາຍ ວິຈຣິຕພ຺ພໍ, ເອຕ຺ຕກໍ ວິນາ ນ ວຏ຺ຏຕິ. ອຸຕ຺ຕຣິມນຸສ຺ສຘມ຺ເມຕິ ອິມິນາ ສພ຺ເພປິ ໂລກຸຕ຺ຕຣຘມ຺ເມ ທສ຺ເສຕິ. ຕສ຺ມາ ອຣຫນ຺ເຕນ ຫຸຕ຺ວາ ວິຫາຕພ຺ພໍ, ອຣຫຕ຺ຕໍ ອນຠິສມ຺ຠຸຓນ຺ເຕນ ອນາຄາມິຜເລ ສກທາຄາມິຜເລ ໂສຕາປຕ຺ຕິຜເລ ວາ ປຕິຏ຺ຐາຕພ຺ພໍ. ສພ຺ພນ຺ຕິເມນ ປຣິຍາເຍນ ເອກໍ ວິປສ຺ສນາມຸຂໍ ຍາວ ອຣຫຕ຺ຕາ ປຄຸຓໍ ກຕ຺ວາ ອາທາຍ ວິຈຣິຕພ຺ພໍ. ເສສໍ ສພ຺ພຕ຺ຖ ອຸຕ຺ຕານເມວ. ອິມໍ ປນ ເທສນໍ ອາຍສ຺ມາ ສາຣິປຸຕ຺ໂຕ ເນຍ຺ຍປຸຄ຺ຄລສ຺ສ ວເສນ ອາຠິສມາຈາຣິກວຕ຺ຕໂຕ ປຏ຺ຐາຍ ອນຸປຸພ຺ເພນ ອຣຫຕ຺ຕໍ ປາເປຕ຺ວາ ນິຏ຺ຐາເປສີຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ໂຄລິຍານິສຸຕ຺ຕວຓ຺ຓນາ ນິຏ຺ຐິຕາ.