໗. ຈາຕຸມສຸຕ຺ຕວຓ຺ຓນາ

໑໕໗. ເອວໍ ເມ ສຸຕນ຺ຕິ ຈາຕຸມສຸຕ຺ຕໍ. ຕຕ຺ຖ ຈາຕຸມາຍນ຺ຕິ ເອວໍນາມເກ ຄາເມ. ປຎ຺ຈມຕ຺ຕານິ ຠິກ຺ຂຸສຕານີຕິ ອຘຸນາ ປພ຺ພຊິຕານໍ ຠິກ຺ຂູນໍ ປຎ຺ຈ ສຕານິ. ເຖຣາ ກິຣ ຈິນ຺ເຕສຸໍ – ‘‘ອິເມ ກຸລປຸຕ຺ຕາ ທສພລໍ ອທິສ຺ວາວ ປພ຺ພຊິຕາ, ເອເຕສໍ ຠຄວນ຺ຕໍ ທສ຺ເສສ຺ສາມ, ຠຄວໂຕ ສນ຺ຕິເກ ຘມ຺ມໍ ສຸຕ຺ວາ ອຕ຺ຕໂນ ອຕ຺ຕໂນ ຍຖາອຸປນິສ຺ສເຍນ ປຕິຏ຺ຐຫິສ຺ສນ຺ຕີ’’ຕິ. ຕສ຺ມາ ເຕ ຠິກ຺ຂູ ຄເຫຕ຺ວາ ອາຄຕາ. ປຏິສມ຺ໂມທມານາຕິ ‘‘ກຈ຺ຈາວຸໂສ, ຂມນີຍ’’ນ຺ຕິອາທິໍ ປຏິສນ຺ຖາຣກຖໍ ກຸຣຸມານາ. ເສນາສນານິ ປຎ຺ຎາປຍມານາຕິ ອຕ຺ຕໂນ ອຕ຺ຕໂນ ອາຈຣິຍຸປຊ຺ຌາຍານໍ ວສນຏ຺ຐານານິ ປຸຈ຺ຉິຕ຺ວາ ທ຺ວາຣວາຕປານານິ ວິວຣິຕ຺ວາ ມຎ຺ຈປີຐກຏສາຣກາທີນິ ນີຫຣິຕ຺ວາ ປປ຺ໂຜເຏຕ຺ວາ ຍຖາຏ຺ຐາເນ ສຓ຺ຐາປຍມານາ. ປຕ຺ຕຈີວຣານິ ປຏິສາມຍມານາຕິ, ຠນ຺ເຕ, ອິທໍ ເມ ປຕ຺ຕໍ ຐເປຖ, ອິທໍ ຈີວຣໍ, ອິທໍ ຖາລກໍ, ອິທໍ ອຸທກຕຸມ຺ພໍ, ອິມໍ ກຕ຺ຕຣຍຏ຺ຐິນ຺ຕິ ເອວໍ ສມຓປຣິກ຺ຂາເຣ ສງ຺ໂຄປຍມານາ.

ອຸຈ຺ຈາສທ຺ທາ ມຫາສທ຺ທາຕິ ອຸທ຺ຘໍ ອຸຄ຺ຄຕຕ຺ຕາ ອຸຈ຺ຈໍ, ປຕ຺ຖຏຕ຺ຕາ ມຫນ຺ຕໍ ອວິນິພ຺ໂຠຄສທ຺ທໍ ກໂຣນ຺ຕາ. ເກວຏ຺ຏາ ມຎ຺ເຎ ມຈ຺ຉວິໂລເປຕິ ເກວຏ຺ຏານໍ ມຈ຺ຉປຈ຺ຉິຐປິຕຏ຺ຐາເນ ມຫາຊໂນ ສນ຺ນິປຕິຕ຺ວາ – ‘‘ອິຘ ອຎ຺ຎໍ ເອກໍ ມຈ຺ຉໍ ເທຫິ, ເອກໍ ມຈ຺ຉຜາລໍ ເທຫິ, ເອຕສ຺ສ ເຕ ມຫາ ທິນ຺ໂນ, ມຍ຺ຫໍ ຂຸທ຺ທໂກ’’ຕິ ເອວໍ ອຸຈ຺ຈາສທ຺ທໍ ມຫາສທ຺ທໍ ກໂຣນ຺ຕິ. ຕໍ ສນ຺ຘາເຍຕໍ ວຸຕ຺ຕໍ. ມຈ຺ຉຄຫຓຕ຺ຖໍ ຊາເລ ປກ຺ຂິຕ຺ເຕປິ ຕສ຺ມິໍ ຐາເນ ເກວຏ຺ຏາ ເຈວ ອຎ຺ເຎ ຈ ‘‘ປວິຏ຺ໂຐ ນ ປວິຏ຺ໂຐ, ຄຫິໂຕ ນ ຄຫິໂຕ’’ຕິ ມຫາສທ຺ທໍ ກໂຣນ຺ຕິ. ຕມ຺ປິ ສນ຺ຘາເຍຕໍ ວຸຕ຺ຕໍ. ປຓາເມມີຕິ ນີຫຣາມິ. ນ ໂວ ມມ ສນ຺ຕິເກ ວຕ຺ຖພ຺ພນ຺ຕິ ຕຸມ຺ເຫ ມາທິສສ຺ສ ພຸທ຺ຘສ຺ສ ວສນຏ຺ຐານໍ ອາຄນ຺ຕ຺ວາ ເອວໍ ມຫາສທ຺ທໍ ກໂຣຖ, ອຕ຺ຕໂນ ຘມ຺ມຕາຍ ວສນ຺ຕາ ກິໍ ນາມ ສາຣຸປ຺ປໍ ກຣິສ຺ສຖ, ຕຸມ຺ຫາທິສານໍ ມມ ສນ຺ຕິເກ ວສນກິຈ຺ຈໍ ນຕ຺ຖີຕິ ທີເປຕິ. ເຕສຸ ເອກຠິກ຺ຂຸປິ ‘‘ຠຄວາ ຕຸມ຺ເຫ ມຫາສທ຺ທມຕ຺ຕເກນ ອມ຺ເຫ ປຓາເມຖາ’’ຕິ ວາ ອຎ຺ຎໍ ວາ ກິຎ຺ຈິ ວຕ຺ຕຸໍ ນາສກ຺ຂິ, ສພ຺ເພ ຠຄວໂຕ ວຈນໍ ສມ຺ປຏິຈ຺ຉນ຺ຕາ ‘‘ເອວໍ, ຠນ຺ເຕ,’’ຕິ ວຕ຺ວາ ນິກ຺ຂມິໍສຸ. ເອວໍ ປນ ເຕສໍ ອໂຫສິ ‘‘ມຍໍ ສຕ຺ຖາຣໍ ປສ຺ສິສ຺ສາມ, ຘມ຺ມກຖໍ ໂສສ຺ສາມ, ສຕ຺ຖຸ ສນ຺ຕິເກ ວສິສ຺ສາມາຕິ ອາຄຕາ. ເອວຣູປສ຺ສ ປນ ຄຣຸໂນ ສຕ຺ຖຸ ສນ຺ຕິກໍ ອາຄນ຺ຕ຺ວາ ມຫາສທ຺ທໍ ກຣິມ຺ຫາ, ອມ຺ຫາກເມວ ໂທໂສຍໍ, ປຓາມິຕມ຺ຫາ, ນ ໂນ ລທ຺ຘໍ ຠຄວໂຕ ສນ຺ຕິເກ ວຕ຺ຖຸໍ, ນ ສຸວຓ຺ຓວຓ຺ຓສຣີຣໍ ໂອໂລເກຕຸໍ, ນ ມຘຸຣສ຺ສເຣນ ຘມ຺ມໍ ໂສຕຸ’’ນ຺ຕິ. ເຕ ພລວໂທມນສ຺ສຊາຕາ ຫຸຕ຺ວາ ປກ຺ກມິໍສຸ.

໑໕໘. ເຕນຸປສງ຺ກມິໍສູຕິ ເຕ ກິຣ ສກ຺ຍາ ອາຄມນສມເຍປິ ເຕ ຠິກ຺ຂູ ຕຕ຺ເຖວ ນິສິນ຺ນາ ປສ຺ສິໍສຸ. ອຖ ເນສໍ ເອຕທໂຫສິ – ‘‘ກິໍ ນຸ ໂຂ ເອເຕ ຠິກ຺ຂູ ປວິສິຕ຺ວາວ ປຏິນິວຕ຺ຕາ, ຊານິສ຺ສາມ ຕໍ ກາຣຓ’’ນ຺ຕິ ຈິນ຺ເຕຕ຺ວາ ເຍນ ເຕ ຠິກ຺ຂູ ເຕນຸປສງ຺ກມິໍສຸ. ຫນ຺ທາຕິ ວວສ຺ສຄ຺ຄຕ຺ເຖ ນິປາໂຕ. ກຫໍ ປນ ຕຸມ຺ເຫຕິ ຕຸມ຺ເຫ ອິທາເນວ ອາຄນ຺ຕ຺ວາ ກຫໍ ຄຈ຺ຉຖ, ກິໍ ຕຸມ຺ຫາກໍ ໂກຈິ ອຸປທ຺ທໂວ, ອຸທາຫຸ ທສພລສ຺ສາຕິ? ເຕສໍ ປນ ຠິກ຺ຂູນໍ, – ‘‘ອາວຸໂສ, ມຍໍ ຠຄວນ຺ຕໍ ທສ຺ສນາຍ ອາຄຕາ, ທິຏ຺ໂຐ ໂນ ຠຄວາ, ອິທານິ ອຕ຺ຕໂນ ວສນຏ຺ຐານໍ ຄຈ຺ຉາມາ’’ຕິ ກິຎ຺ຈາປິ ເອວໍ ວຈນປຣິຫາໂຣ ອຕ຺ຖິ, ເອວຣູປໍ ປນ ເລສກປ຺ປໍ ອກຕ຺ວາ ຍຖາຠູຕເມວ ອາໂຣເຈຕ຺ວາ ຠຄວຕາ ໂຂ, ອາວຸໂສ, ຠິກ຺ຂຸສງ຺ໂຆ ປຓາມິໂຕຕິ ອາຫໍສຸ. ເຕ ປນ ຣາຊາໂນ ສາສເນ ຘຸຣວຫາ, ຕສ຺ມາ ຈິນ຺ເຕສຸໍ – ‘‘ທ຺ວີຫິ ອຄ຺ຄສາວເກຫິ ສທ຺ຘິໍ ປຎ຺ຈສຸ ຠິກ຺ຂຸສເຕສຸ ຄຈ຺ຉນ຺ເຕສຸ ຠຄວໂຕ ປາທມູລໍ ວິຄຈ຺ຉິສ຺ສຕິ, ອິເມສໍ ນິວຕ຺ຕນາກາຣໍ ກຣິສ຺ສາມາ’’ຕິ. ເອວໍ ຈິນ຺ເຕຕ຺ວາ ເຕນ ຫາຍສ຺ມນ຺ໂຕຕິອາທິມາຫໍສຸ. ເຕສຸປິ ຠິກ຺ຂູສຸ ‘‘ມຍໍ ມຫາສທ຺ທມຕ຺ຕເກນ ປຓາມິຕາ, ນ ມຍໍ ຊີວິຕຸໍ ອສກ຺ໂກນ຺ຕາ ປພ຺ພຊິຕາ’’ຕິ ເອກຠິກ຺ຂຸປິ ປຏິປ຺ຜຣິໂຕ ນາມ ນາໂຫສິ, ສພ຺ເພ ປນ ສມກໍເຍວ, ‘‘ເອວມາວຸໂສ,’’ຕິ ສມ຺ປຏິຈ຺ຉິໍສຸ.

໑໕໙. ອຠິນນ຺ທຕູຕິ ຠິກ຺ຂຸສງ຺ຆສ຺ສ ອາຄມນໍ ອິຈ຺ຉນ຺ໂຕ ອຠິນນ຺ທຕຸ. ອຠິວທຕູຕິ ເອຕຸ ຠິກ຺ຂຸສງ຺ໂຆຕິ ເອວໍ ຈິຕ຺ຕໍ ອຸປ຺ປາເທນ຺ໂຕ ອຠິວທຕຸ. ອນຸຄ຺ຄຫິໂຕຕິ ອາມິສານຸຄ຺ຄເຫນ ຈ ຘມ຺ມານຸຄ຺ຄເຫນ ຈ ອນຸຄ຺ຄຫິໂຕ. ອຎ຺ຎຖຕ຺ຕນ຺ຕິ ທສພລສ຺ສ ທສ຺ສນໍ ນ ລຠາມາຕິ ປສາທຎ຺ຎຖຕ຺ຕໍ ຠເວຍ຺ຍ. ວິປຣິຓາໂມຕິ ປສາທຎ຺ຎຖຕ຺ເຕນ ວິພ຺ຠມນ຺ຕານໍ ວິປຣິຓາມຎ຺ຎຖຕ຺ຕໍ ຠເວຍ຺ຍ. ພີຊານໍ ຕຣຸຓານນ຺ຕິ ຕຣຸຓສສ຺ສານໍ. ສິຍາ ອຎ຺ຎຖຕ຺ຕນ຺ຕິ ອຸທກວາຣກາເລ ອຸທກໍ ອລຠນ຺ຕານໍ ມິລາຕຠາເວນ ອຎ຺ຎຖຕ຺ຕໍ ຠເວຍ຺ຍ, ສຸສ຺ສິຕ຺ວາ ມິລາຕຠາວໍ ອາປຊ຺ຊເນນ ວິປຣິຓາໂມ ຠເວຍ຺ຍ. ວຈ຺ຉກສ຺ສ ປນ ຂີຣປິປາສາຍ ສຸສ຺ສນໍ ອຎ຺ຎຖຕ຺ຕໍ ນາມ, ສຸສ຺ສິຕ຺ວາ ກາລກິຣິຍາ ວິປຣິຓາໂມ ນາມ.

໑໖໐. ປສາທິໂຕ ຠຄວາຕິ ເຖໂຣ ກິຣ ຕຕ຺ຖ ນິສິນ຺ໂນວ ທິພ຺ພຈກ຺ຂຸນາ ພ຺ຣຫ຺ມານໍ ອາຄຕໍ ອທ຺ທສ, ທິພ຺ພາຍ ໂສຕຘາຕຸຍາ ຈ ອາຍາຈນສທ຺ທໍ ສຸຓິ, ເຈໂຕປຣິຍຎາເຓນ ຠຄວໂຕ ປສນ຺ນຠາວໍ ອຎ຺ຎາສິ. ຕສ຺ມາ – ‘‘ກຎ຺ຈິ ຠິກ຺ຂຸໍ ເປເສຕ຺ວາ ປກ຺ໂກສິຍມານານໍ ຄມນໍ ນາມ ນ ຜາສຸກໍ, ຍາວ ສຕ຺ຖາ ນ ເປເສຕິ, ຕາວເທວ ຄມິສ຺ສາມາ’’ຕິ ມຎ຺ຎມາໂນ ເອວມາຫ. ອປ຺ໂປສ຺ສຸກ຺ໂກຕິ ອຎ຺ເຎສຸ ກິຈ຺ເຈສຸ ອນຸສ຺ສຸກ຺ໂກ ຫຸຕ຺ວາ. ທິຏ຺ຐຘມ຺ມສຸຂວິຫາຣນ຺ຕິ ຜລສມາປຕ຺ຕິວິຫາຣໍ ອນຸຍຸຕ຺ໂຕ ມຎ຺ເຎ ຠຄວາ ວິຫຣິຕຸກາໂມ, ໂສ ອິທານິ ຍຖາຣຸຈິຍາ ວິຫຣິສ຺ສຕີຕິ ເອວໍ ເມ ອໂຫສີຕິ ວທຕິ. ມຍມ຺ປິ ທານີຕິ ມຍໍ ປຣໍ ໂອວທມານາ ວິຫາຣໂຕ ນິກ຺ກຑ຺ຒິຕາ, ກິໍ ອມ຺ຫາກໍ ປໂຣວາເທນ. ອິທານິ ມຍມ຺ປິ ທິຏ຺ຐຘມ຺ມສຸຂວິຫາເຣເນວ ວິຫຣິສ຺ສາມາຕິ ທີເປຕິ. ເຖໂຣ ອິມສ຺ມິໍ ຐາເນ ວິຣທ຺ໂຘ ອຕ຺ຕໂນ ຠາຣຠາວໍ ນ ອຎ຺ຎາສິ. ອຍຎ຺ຫິ ຠິກ຺ຂຸສງ຺ໂຆ ທ຺ວິນ຺ນມ຺ປິ ມຫາເຖຣານໍ ຠາໂຣ, ເຕນ ນໍ ປຏິເສເຘນ຺ໂຕ ຠຄວາ ອາຄເມຫີຕິອາທິມາຫ. ມຫາໂມຄ຺ຄລ຺ລານຕ຺ເຖໂຣ ປນ ອຕ຺ຕໂນ ຠາຣຠາວໍ ອຎ຺ຎາສິ. ເຕນສ຺ສ ຠຄວາ ສາຘຸກາຣໍ ອທາສິ.

໑໖໑. ຈຕ຺ຕາຣິມານິ, ຠິກ຺ຂເວຕິ ກສ຺ມາ ອາຣຠິ? ອິມສ຺ມິໍ ສາສເນ ຈຕ຺ຕາຣິ ຠຍານິ. ໂຍ ຕານິ ອຠີໂຕ ໂຫຕິ, ໂສ ອິມສ຺ມິໍ ສາສເນ ປຕິຏ຺ຐາຕຸໍ ສກ຺ໂກຕິ. ອິຕໂຣ ປນ ນ ສກ຺ໂກຕີຕິ ທສ຺ເສຕຸໍ ອິມໍ ເທສນໍ ອາຣຠິ. ຕຕ຺ຖ ອຸທໂກໂຣຫນ຺ເຕຕິ ອຸທກໍ ໂອໂຣຫນ຺ເຕ ປຸຄ຺ຄເລ. ກຸມ຺ຠີລຠຍນ຺ຕິ ສຸໍສຸມາຣຠຍໍ. ສຸສຸກາຠຍນ຺ຕິ ຈຓ຺ຑມຈ຺ຉຠຍໍ.

໑໖໒. ໂກຘຸປາຍາສສ຺ເສຕໍ ອຘິວຈນນ຺ຕິ ຍຖາ ຫິ ພາຫິຣໍ ອຸທກໍ ໂອຕິຓ຺ໂຓ ອູມີສຸ ໂອສີທິຕ຺ວາ ມຣຕິ, ເອວໍ ອິມສ຺ມິໍ ສາສເນ ໂກຘຸປາຍາເສ ໂອສີທິຕ຺ວາ ວິພ຺ຠມຕິ. ຕສ຺ມາ ໂກຘຸປາຍາໂສ ‘‘ອູມິຠຍ’’ນ຺ຕິ ວຸຕ຺ໂຕ.

໑໖໓. ໂອທຣິກຕ຺ຕສ຺ເສຕໍ ອຘິວຈນນ຺ຕິ ຍຖາ ຫິ ພາຫິຣໍ ອຸທກໍ ໂອຕິຓ຺ໂຓ ກຸມ຺ຠີເລນ ຂາທິໂຕ ມຣຕິ, ເອວໍ ອິມສ຺ມິໍ ສາສເນ ໂອທຣິກຕ຺ເຕນ ຂາທິໂຕ ວິພ຺ຠມຕິ. ຕສ຺ມາ ໂອທຣິກຕ຺ຕໍ ‘‘ກຸມ຺ຠີລຠຍ’’ນ຺ຕິ ວຸຕ຺ຕໍ.

໑໖໔. ອຣກ຺ຂິເຕເນວ ກາເຍນາຕິ ສີສປ຺ປຈາລກາທິກຣເຓນ ອຣກ຺ຂິຕກາໂຍ ຫຸຕ຺ວາ. ອຣກ຺ຂິຕາຍ ວາຈາຍາຕິ ທຸຏ຺ຐຸລ຺ລຠາສນາທິວເສນ ອຣກ຺ຂິຕວາໂຈ ຫຸຕ຺ວາ. ອນຸປຏ຺ຐິຕາຍ ສຕິຍາຕິ ກາຍຄຕາສຕິໍ ອນຸປຏ຺ຐາເປຕ຺ວາ. ອສໍວຸເຕຫີຕິ ອປິຫິເຕຫິ. ປຎ຺ຈນ຺ເນຕໍກາມຄຸຓານໍ ອຘິວຈນນ຺ຕິ ຍຖາ ຫິ ພາຫິຣໍ ອຸທກໍ ໂອຕິຓ຺ໂຓ ອາວຏ຺ເຏ ນິມຸຊ຺ຊິຕ຺ວາ ມຣຕິ, ເອວໍ ອິມສ຺ມິໍ ສາສເນ ປພ຺ພຊິໂຕ ປຎ຺ຈກາມຄຸຓາວຏ຺ເຏ ນິມຸຊ຺ຊິຕ຺ວາ ວິພ຺ຠມຕິ. ຕສ຺ມາ ປຎ຺ຈ ກາມຄຸຓາ ‘‘ອາວຏ຺ຏຠຍ’’ນ຺ຕິ ວຸຕ຺ຕາ.

໑໖໕. ອນຸທ຺ຘໍເສຕີຕິ ກິລເມຕິ ມິລາເປຕິ. ຣາຄານຸທ຺ຘໍເສນາຕິ ຣາຄານຸທ຺ຘໍສິເຕນ. ມາຕຸຄາມສ຺ເສຕໍ ອຘິວຈນນ຺ຕິ ຍຖາ ຫິ ພາຫິຣໍ ອຸທກໍ ໂອຕິຓ຺ໂຓ ຈຓ຺ຑມຈ຺ຉໍ ອາຄມ຺ມ ລທ຺ຘປ຺ປຫາໂຣ ມຣຕິ, ເອວໍ ອິມສ຺ມິໍ ສາສເນ ມາຕຸຄາມໍ ອາຄມ຺ມ ອຸປ຺ປນ຺ນກາມຣາໂຄ ວິພ຺ຠມຕິ. ຕສ຺ມາ ມາຕຸຄາໂມ ‘‘ສຸສຸກາຠຍ’’ນ຺ຕິ ວຸຕ຺ໂຕ.

ອິມານິ ປນ ຈຕ຺ຕາຣິ ຠຍານິ ຠາຍິຕ຺ວາ ຍຖາ ອຸທກໍ ອໂນໂຣຫນ຺ຕສ຺ສ ອຸທກໍ ນິສ຺ສາຍ ອານິສໍໂສ ນຕ຺ຖິ, ອຸທກປິປາສາຍ ປິປາສິໂຕ ຈ ໂຫຕິ ຣໂຊຊລ຺ເລນ ກິລິຏ຺ຐສຣີໂຣ ຈ, ເອວເມວໍ ອິມານິ ຈຕ຺ຕາຣິ ຠຍານິ ຠາຍິຕ຺ວາ ສາສເນ ອປພ຺ພຊນ຺ຕສ຺ສາປິ ອິມໍ ສາສນໍ ນິສ຺ສາຍ ອານິສໍໂສ ນຕ຺ຖິ, ຕຓ຺ຫາປິປາສາຍ ປິປາສິໂຕ ຈ ໂຫຕິ ກິເລສຣເຊນ ສໍກິລິຏ຺ຐຈິຕ຺ໂຕ ຈ. ຍຖາ ປນ ອິມານິ ຈຕ຺ຕາຣິ ຠຍານິ ອຠາຍິຕ຺ວາ ອຸທກໍ ໂອໂຣຫນ຺ຕສ຺ສ ວຸຕ຺ຕປ຺ປກາໂຣ ອານິສໍໂສ ໂຫຕິ, ເອວໍ ອິມານິ ອຠາຍິຕ຺ວາ ສາສເນ ປພ຺ພຊິຕສ຺ສາປິ ວຸຕ຺ຕປ຺ປກາໂຣ ອານິສໍໂສ ໂຫຕິ. ເຖໂຣ ປນາຫ – ‘‘ຈຕ຺ຕາຣິ ຠຍານິ ຠາຍິຕ຺ວາ ອຸທກໍ ອໂນຕຣນ຺ໂຕ ໂສຕໍ ຉິນ຺ທິຕ຺ວາ ປຣຕີຣໍ ປາປຸຓິຕຸໍ ນ ສກ຺ໂກຕິ, ອຠາຍິຕ຺ວາ ໂອຕຣນ຺ໂຕ ສກ຺ໂກຕິ, ເອວເມວໍ ຠາຍິຕ຺ວາ ສາສເນ ອປພ຺ພຊນ຺ໂຕປິ ຕຓ຺ຫາໂສຕໍ ຉິນ຺ທິຕ຺ວາ ນິພ຺ພານປາຣໍ ທຏ຺ຐຸໍ ນ ສກ຺ໂກຕິ, ອຠາຍິຕ຺ວາ ປພ຺ພຊນ຺ໂຕ ປນ ສກ຺ໂກຕີ’’ຕິ. ເສສໍ ສພ຺ພຕ຺ຖ ອຸຕ຺ຕານເມວ. ອຍໍ ປນ ເທສນາ ເນຍ຺ຍປຸຄ຺ຄລສ຺ສ ວເສນ ນິຏ຺ຐາປິຕາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ຈາຕຸມສຸຕ຺ຕວຓ຺ຓນາ ນິຏ຺ຐິຕາ.