໔. ມຫາມາລຸກ຺ຍສຸຕ຺ຕວຓ຺ຓນາ

໑໒໙. ເອວໍ ເມ ສຸຕນ຺ຕິ ມຫາມາລຸກ຺ຍສຸຕ຺ຕໍ. ຕຕ຺ຖ ໂອຣມ຺ຠາຄິຍານີຕິ ເຫຏ຺ຐາ ໂກຏ຺ຐາສິການິ ກາມຠເວ ນິພ຺ພຕ຺ຕິສໍວຕ຺ຕນິການິ. ສໍໂຍຊນານີຕິ ພນ຺ຘນານິ. ກສ຺ສ ໂຂ ນາມາຕິ ກສ຺ສ ເທວສ຺ສ ວາ ມນຸສ຺ສສ຺ສ ວາ ເທສິຕານິ ຘາເຣສິ, ກິໍ ຕ຺ວເມເວໂກ ອສ຺ໂສສິ, ນ ອຎ຺ໂຎ ໂກຈີຕິ? ອນຸເສຕີຕິ ອປ຺ປຫີນຕາຍ ອນຸເສຕິ. ອນຸສຍມາໂນ ສໍໂຍຊນໍ ນາມ ໂຫຕິ.

ເອຕ຺ຖ ຈ ຠຄວຕາ ສໍໂຍຊນໍ ປຸຈ຺ຉິຕໍ, ເຖເຣນປິ ສໍໂຍຊນເມວ ພ຺ຍາກຕໍ. ເອວໍ ສນ຺ເຕປິ ຕສ຺ສ ວາເທ ຠຄວຕາ ໂທໂສ ອາໂຣປິໂຕ. ໂສ ກສ຺ມາຕິ ເຈ? ເຖຣສ຺ສ ຕຖາລທ຺ຘິກຕ຺ຕາ. ອຍຎ຺ຫິ ຕສ຺ສ ລທ຺ຘິ ‘‘ສມຸທາຈາຣກ຺ຂເຓເຍວ ກິເລເສຫິ ສໍຍຸຕ຺ໂຕ ນາມ ໂຫຕິ, ອິຕຣສ຺ມິໍ ຂເຓ ອສໍຍຸຕ຺ໂຕ’’ຕິ. ເຕນສ຺ສ ຠຄວຕາ ໂທໂສ ອາໂຣປິໂຕ. ອຖາຍສ຺ມາ ອານນ຺ໂທ ຈິນ຺ເຕສິ – ‘‘ຠຄວຕາ ຠິກ຺ຂຸສງ຺ຆສ຺ສ ຘມ຺ມໍ ເທເສສ຺ສາມີຕິ ອຕ຺ຕໂນ ຘມ຺ມຕາເຍວ ອຍໍ ຘມ຺ມເທສນາ ອາຣທ຺ຘາ, ສາ ອິມິນາ ອປຓ຺ຑິເຕນ ຠິກ຺ຂຸນາ ວິສໍວາທິຕາ. ຫນ຺ທາຫໍ ຠຄວນ຺ຕໍ ຍາຈິຕ຺ວາ ຠິກ຺ຂູນໍ ຘມ຺ມໍ ເທເສສ຺ສາມີ’’ຕິ. ໂສ ເອວມກາສິ. ຕໍ ທສ຺ເສຕຸໍ ‘‘ເອວໍ ວຸຕ຺ເຕ ອາຍສ຺ມາ ອານນ຺ໂທ’’ຕິອາທິ ວຸຕ຺ຕໍ.

ຕຕ຺ຖ ສກ຺ກາຍທິຏ຺ຐິປຣິຍຸຏ຺ຐິເຕນາຕິ ສກ຺ກາຍທິຏ຺ຐິຍາ ຄຫິເຕນ ອຠິຠູເຕນ. ສກ຺ກາຍທິຏ຺ຐິປເຣເຕນາຕິ ສກ຺ກາຍທິຏ຺ຐິຍາ ອນຸຄເຕນ. ນິສ຺ສຣຓນ຺ຕິ ທິຏ຺ຐິນິສ຺ສຣຓໍ ນາມ ນິພ຺ພານໍ, ຕໍ ຍຖາຠູຕໍ ນປ຺ປຊານາຕິ. ອປ຺ປຏິວິນີຕາຕິ ອວິໂນທິຕາ ອນີຫຏາ. ໂອຣມ຺ຠາຄິຍໍ ສໍໂຍຊນນ຺ຕິ ເຫຏ຺ຐາຠາຄິຍສໍໂຍຊນໍ ນາມ ໂຫຕິ. ເສສປເທສຸປິ ເອເສວ ນໂຍ. ສຸກ຺ກປກ຺ໂຂ ອຸຕ຺ຕານຕ຺ໂຖເຍວ. ‘‘ສານຸສຍາ ປຫີຍຕີ’’ຕິ ວຈນໂຕ ປເນຕ຺ຖ ເອກຈ຺ເຈ ‘‘ອຎ຺ຎໍ ສໍໂຍຊນໍ ອຎ຺ໂຎ ອນຸສໂຍ’’ຕິ ວທນ຺ຕິ. ‘‘ຍຖາ ຫິ ສພ຺ຍຎ຺ຊນໍ ຠຕ຺ຕ’’ນ຺ຕິ ວຸຕ຺ເຕ ຠຕ຺ຕໂຕ ອຎ຺ຎໍ ພ຺ຍຎ຺ຊນໍ ໂຫຕິ, ເອວໍ ‘‘ສານຸສຍາ’’ຕິ ວຈນໂຕ ປຣິຍຸຏ຺ຐານສກ຺ກາຍທິຏ຺ຐິໂຕ ອຎ຺ເຎນ ອນຸສເຍນ ຠວິຕພ຺ພນ຺ຕິ ເຕສໍ ລທ຺ຘິ. ເຕ ‘‘ສສີສໍ ປາຣຸປິຕ຺ວາ’’ຕິອາທີຫິ ປຏິກ຺ຂິປິຕພ຺ພາ. ນ ຫິ ສີສໂຕ ອຎ຺ໂຎ ປຸຣິໂສ ອຕ຺ຖິ. ອຖາປິ ສິຍາ – ‘‘ຍທິ ຕເທວ ສໍໂຍຊນໍ ໂສ ອນຸສໂຍ, ເອວໍ ສນ຺ເຕ ຠຄວຕາ ເຖຣສ຺ສ ຕຣຸຓູປໂມ ອຸປາຣມ຺ໂຠ ທຸອາໂຣປິໂຕ ໂຫຕີ’’ຕິ. ນ ທຸອາໂຣປິໂຕ, ກສ຺ມາ? ເອວໍລທ຺ຘິກຕ຺ຕາຕິ ວິຕ຺ຖາຣິຕເມຕໍ. ຕສ຺ມາ ໂສເຍວ ກິເລໂສ ພນ຺ຘນຏ຺ເຐນ ສໍໂຍຊນໍ, ອປ຺ປຫີນຏ຺ເຐນ ອນຸສໂຍຕິ ອິມມຕ຺ຖໍ ສນ຺ຘາຍ ຠຄວຕາ ‘‘ສານຸສຍາ ປຫີຍຕີ’’ຕິ ເອວໍ ວຸຕ຺ຕນ຺ຕິ ເວທິຕພ຺ພໍ.

໑໓໒. ຕຈໍ ເຉຕ຺ວາຕິອາທີສຸ ອິທໍ ໂອປມ຺ມສໍສນ຺ທນໍ – ຕຈຈ຺ເຉໂທ ວິຍ ຫິ ສມາປຕ຺ຕິ ທຏ຺ຐພ຺ພາ, ເຜຄ຺ຄຸຈ຺ເຉໂທ ວິຍ ວິປສ຺ສນາ, ສາຣຈ຺ເຉໂທ ວິຍ ມຄ຺ໂຄ. ປຏິປທາ ປນ ໂລກິຍໂລກຸຕ຺ຕຣມິສ຺ສກາວ ວຏ຺ຏຕິ. ເອວເມເຕ ທຏ຺ຐພ຺ພາຕິ ເອວຣູປາ ປຸຄ຺ຄລາ ເອວໍ ທຏ຺ຐພ຺ພາ.

໑໓໓. ອຸປຘິວິເວກາຕິ ອຸປຘິວິເວເກນ. ອິມິນາ ປຎ຺ຈກາມຄຸຓວິເວໂກ ກຖິໂຕ. ອກຸສລານໍ ຘມ຺ມານໍ ປຫານາຕິ ອິມິນາ ນີວຣຓປ຺ປຫານໍ ກຖິຕໍ. ກາຍທຸຏ຺ຐຸລ຺ລານໍ ປຏິປ຺ປສ຺ສທ຺ຘິຍາຕິ ອິມິນາ ກາຍາລສິຍປຏິປ຺ປສ຺ສທ຺ຘິ ກຖິຕາ. ວິວິຈ຺ເຈວ ກາເມຫີຕິ ອຸປຘິວິເວເກນ ກາເມຫິ ວິນາ ຫຸຕ຺ວາ. ວິວິຈ຺ຈ ອກຸສເລຫີຕິ ອກຸສລານໍ ຘມ຺ມານໍ ປຫາເນນ ກາຍທຸຏ຺ຐຸລ຺ລານໍ ປຏິປ຺ປສ຺ສທ຺ຘິຍາ ຈ ອກຸສເລຫິ ວິນາ ຫຸຕ຺ວາ. ຍເທວ ຕຕ຺ຖ ໂຫຕີຕິ ຍໍ ຕຕ຺ຖ ອນ຺ໂຕສມາປຕ຺ຕິກ຺ຂເຓເຍວ ສມາປຕ຺ຕິສມຸຏ຺ຐິຕຎ຺ຈ ຣູປາທິຘມ຺ມຊາຕໍ ໂຫຕິ. ເຕ ຘມ຺ເມຕິ ເຕ ຣູປຄຕນ຺ຕິອາທິນາ ນເຍນ ວຸຕ຺ເຕ ຣູປາທໂຍ ຘມ຺ເມ. ອນິຈ຺ຈໂຕຕິ ນ ນິຈ຺ຈໂຕ. ທຸກ຺ຂໂຕຕິ ນ ສຸຂໂຕ. ໂຣຄໂຕຕິອາທີສຸ ອາພາຘຏ຺ເຐນ ໂຣຄໂຕ, ອນ຺ໂຕໂທສຏ຺ເຐນ ຄຓ຺ຑໂຕ, ອນຸປວິທ຺ຘຏ຺ເຐນ ທຸກ຺ຂຊນນຏ຺ເຐນ ຈ ສລ຺ລໂຕ, ທຸກ຺ຂຏ຺ເຐນ ອຆໂຕ, ໂຣຄຏ຺ເຐນ ອາພາຘໂຕ, ອສກຏ຺ເຐນ ປຣໂຕ, ປລຸຊ຺ຊນຏ຺ເຐນ ປໂລກໂຕ, ນິສ຺ສຕ຺ຕຏ຺ເຐນ ສຸຎ຺ຎໂຕ, ນ ອຕ຺ຕຏ຺ເຐນ ອນຕ຺ຕໂຕ. ຕຕ຺ຖ ອນິຈ຺ຈໂຕ, ປໂລກໂຕຕິ ທ຺ວີຫິ ປເທຫິ ອນິຈ຺ຈລກ຺ຂຓໍ ກຖິຕໍ, ທຸກ຺ຂໂຕຕິອາທີຫິ ຉຫິ ທຸກ຺ຂລກ຺ຂຓໍ, ປຣໂຕ ສຸຎ຺ຎໂຕ ອນຕ຺ຕໂຕຕິ ຕີຫິ ອນຕ຺ຕລກ຺ຂຓໍ.

ໂສ ເຕຫິ ຘມ຺ເມຫີຕິ ໂສ ເຕຫິ ເອວໍ ຕິລກ຺ຂຓໍ ອາໂຣເປຕ຺ວາ ທິຏ຺ເຐຫິ ອນ຺ໂຕສມາປຕ຺ຕິຍໍ ປຎ຺ຈກ຺ຂນ຺ຘຘມ຺ເມຫິ. ຈິຕ຺ຕໍ ປຏິວາເປຕີຕິ ຈິຕ຺ຕໍ ປຏິສໍຫຣຕິ ໂມເຈຕິ ອປເນຕິ. ອຸປສໍຫຣຕີຕິ ວິປສ຺ສນາຈິຕ຺ຕໍ ຕາວ ສວນວເສນ ຖຸຕິວເສນ ປຣິຍຕ຺ຕິວເສນ ປຎ຺ຎຕ຺ຕິວເສນ ຈ ເອຕໍ ສນ຺ຕໍ ນິພ຺ພານນ຺ຕິ ເອວໍ ອສງ຺ຂຕາຍ ອມຕາຍ ຘາຕຸຍາ ອຸປສໍຫຣຕິ. ມຄ຺ຄຈິຕ຺ຕໍ ນິພ຺ພານໍ ອາຣມ຺ມຓກຣຓວເສເນວ ເອຕໍ ສນ຺ຕເມຕໍ ປຓີຕນ຺ຕິ ນ ເອວໍ ວທຕິ, ອິມິນາ ປນ ອາກາເຣນ ຕໍ ປຏິວິຊ຺ຌນ຺ໂຕ ຕຕ຺ຖ ຈິຕ຺ຕໍ ອຸປສໍຫຣຕີຕິ ອຕ຺ໂຖ. ໂສ ຕຕ຺ຖ ຐິໂຕຕິ ຕາຍ ຕິລກ຺ຂຓາຣມ຺ມຓາຍ ວິປສ຺ສນາຍ ຐິໂຕ. ອາສວານໍ ຂຍໍ ປາປຸຓາຕີຕິ ອນຸກ຺ກເມນ ຈຕ຺ຕາໂຣ ມຄ຺ເຄ ຠາເວຕ຺ວາ ປາປຸຓາຕິ. ເຕເນວ ຘມ຺ມຣາເຄນາຕິ ສມຖວິປສ຺ສນາຘມ຺ເມ ຉນ຺ທຣາເຄນ. ສມຖວິປສ຺ສນາສຸ ຫິ ສພ຺ພໂສ ຉນ຺ທຣາຄໍ ປຣິຍາທາຕຸໍ ສກ຺ໂກນ຺ໂຕ ອຣຫຕ຺ຕໍ ປາປຸຓາຕິ, ອສກ຺ໂກນ຺ໂຕ ອນາຄາມີ ໂຫຕິ.

ຍເທວ ຕຕ຺ຖ ໂຫຕິ ເວທນາຄຕນ຺ຕິ ອິຘ ປນ ຣູປໍ ນ ຄຫິຕໍ. ກສ຺ມາ? ສມຕິກ຺ກນ຺ຕຕ຺ຕາ. ອຍຎ຺ຫິ ເຫຏ຺ຐາ ຣູປາວຈຣຊ຺ຌານໍ ສມາປຊ຺ຊິຕ຺ວາ ຣູປໍ ອຕິກ຺ກມິຕ຺ວາ ອຣູປາວຈຣສມາປຕ຺ຕິໍ ສມາປນ຺ໂນຕິ ສມຖວເສນປິເນນ ຣູປໍ ອຕິກ຺ກນ຺ຕໍ, ເຫຏ຺ຐາ ຣູປໍ ສມ຺ມເທວ ສມ຺ມສິຕ຺ວາ ຕໍ ອຕິກ຺ກມ຺ມ ອິທານິ ອຣູປໍ ສມ຺ມສຕີຕິ ວິປສ຺ສນາວເສນປິເນນ ຣູປໍ ອຕິກ຺ກນ຺ຕໍ. ອຣູເປ ປນ ສພ຺ພໂສປິ ຣູປໍ ນຕ຺ຖີຕິ ຕໍ ສນ຺ຘາຍປິ ອິຘ ຣູປໍ ນ ຄຫິຕໍ.

ອຖ ກິຎ຺ຈຣຫີຕິ ກິໍ ປຸຈ຺ຉາມີຕິ ປຸຈ຺ຉຕິ? ສມຖວເສນ ຄຈ຺ຉໂຕ ຈິຕ຺ເຕກຄ຺ຄຕາ ຘຸຣໍ ໂຫຕິ, ໂສ ເຈໂຕວິມຸຕ຺ໂຕ ນາມ. ວິປສ຺ສນາວເສນ ຄຈ຺ຉໂຕ ປຎ຺ຎາ ຘຸຣໍ ໂຫຕິ, ໂສ ປຎ຺ຎາວິມຸຕ຺ໂຕ ນາມາຕິ ເອຕ຺ຖ ເຖຣສ຺ສ ກງ຺ຂາ ນຕ຺ຖິ. ອຍໍ ສຠາວຘມ຺ໂມເຍວ, ສມຖວເສເນວ ປນ ຄຈ຺ຉນ຺ເຕສຸ ເອໂກ ເຈໂຕວິມຸຕ຺ໂຕ ນາມ ໂຫຕິ, ເອໂກ ປຎ຺ຎາວິມຸຕ຺ໂຕ. ວິປສ຺ສນາວເສນ ຄຈ຺ຉນ຺ເຕສຸປິ ເອໂກ ປຎ຺ຎາວິມຸຕ຺ໂຕ ນາມ ໂຫຕິ, ເອໂກ ເຈໂຕວິມຸຕ຺ໂຕຕິ ເອຕ຺ຖ ກິໍ ກາຣຓນ຺ຕິ ປຸຈ຺ຉຕິ.

ອິນ຺ທ຺ຣິຍເວມຕ຺ຕຕໍ ວທາມີຕິ ອິນ຺ທ຺ຣິຍນານຕ຺ຕຕໍ ວທາມິ. ອິທໍ ວຸຕ຺ຕໍ ໂຫຕິ, ນ ຕ຺ວໍ, ອານນ຺ທ, ທສ ປາຣມິໂຍ ປູເຣຕ຺ວາ ສພ຺ພຎ຺ຎຸຕໍ ປຏິວິຊ຺ຌິ, ເຕນ ເຕ ເອຕໍ ອປາກຏໍ. ອຫໍ ປນ ປຏິວິຊ຺ຌິໍ, ເຕນ ເມ ເອຕໍ ປາກຏໍ. ເອຕ຺ຖ ຫິ ອິນ຺ທ຺ຣິຍນານຕ຺ຕຕາ ກາຣຓໍ. ສມຖວເສເນວ ຫິ ຄຈ຺ຉນ຺ເຕສຸ ເອກສ຺ສ ຠິກ຺ຂຸໂນ ຈິຕ຺ເຕກຄ຺ຄຕາ ຘຸຣໍ ໂຫຕິ, ໂສ ເຈໂຕວິມຸຕ຺ໂຕ ນາມ ໂຫຕິ. ເອກສ຺ສ ປຎ຺ຎາ ຘຸຣໍ ໂຫຕິ, ໂສ ປຎ຺ຎາວິມຸຕ຺ໂຕ ນາມ ໂຫຕິ. ວິປສ຺ສນາວເສເນວ ຈ ຄຈ຺ຉນ຺ເຕສຸ ເອກສ຺ສ ປຎ຺ຎາ ຘຸຣໍ ໂຫຕິ, ໂສ ປຎ຺ຎາວິມຸຕ຺ໂຕ ນາມ ໂຫຕິ. ເອກສ຺ສ ຈິຕ຺ເຕກຄ຺ຄຕາ ຘຸຣໍ ໂຫຕິ, ໂສ ເຈໂຕວິມຸຕ຺ໂຕ ນາມ ໂຫຕິ. ທ຺ເວ ອຄ຺ຄສາວກາ ສມຖວິປສ຺ສນາຘຸເຣນ ອຣຫຕ຺ຕໍ ປຕ຺ຕາ. ເຕສຸ ຘມ຺ມເສນາປຕິ ປຎ຺ຎາວິມຸຕ຺ໂຕ ຊາໂຕ, ມຫາໂມຄ຺ຄລ຺ລານຕ຺ເຖໂຣ ເຈໂຕວິມຸຕ຺ໂຕ. ອິຕິ ອິນ຺ທ຺ຣິຍເວມຕ຺ຕເມຕ຺ຖ ກາຣຓນ຺ຕິ ເວທິຕພ຺ພໍ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ມຫາມາລຸກ຺ຍສຸຕ຺ຕວຓ຺ຓນາ ນິຏ຺ຐິຕາ.