໓. ຈູຬມາລຸກ຺ຍສຸຕ຺ຕວຓ຺ຓນາ

໑໒໒. ເອວໍ ເມ ສຸຕນ຺ຕິ ມາລຸກ຺ຍສຸຕ຺ຕໍ. ຕຕ຺ຖ ມາລຸກ຺ຍປຸຕ຺ຕສ຺ສາຕິ ເອວໍນາມກສ຺ສ ເຖຣສ຺ສ. ຐປິຕານິ ປຏິກ຺ຂິຕ຺ຕານີຕິ ທິຏ຺ຐິຄຕານິ ນາມ ນ ພ຺ຍາກາຕພ຺ພານີຕິ ເອວໍ ຐປິຕານິ ເຈວ ປຏິກ຺ຂິຕ຺ຕານິ ຈ. ຕຖາຄໂຕຕິ ສຕ຺ໂຕ. ຕໍ ເມ ນ ຣຸຈ຺ຈຕີຕິ ຕໍ ອພ຺ຍາກຣຓໍ ມຍ຺ຫໍ ນ ຣຸຈ຺ຈຕິ. ສິກ຺ຂໍ ປຈ຺ຈກ຺ຂາຍາຕິ ສິກ຺ຂໍ ປຏິກ຺ຂິປິຕ຺ວາ.

໑໒໕. ໂກ ສນ຺ໂຕ ກໍ ປຈ຺ຈາຈິກ຺ຂສີຕິ ຍາຈໂກ ວາ ຫິ ຍາຈິຕກໍ ປຈ຺ຈາຈິກ຺ເຂຍ຺ຍ, ຍາຈິຕໂກ ວາ ຍາຈກໍ. ຕ຺ວໍ ເນວ ຍາຈໂກ ນ ຍາຈິຕໂກ, ໂສ ທານິ ຕ຺ວໍ ໂກ ສນ຺ໂຕ ກໍ ປຈ຺ຈາຈິກ຺ຂສີຕິ ອຕ຺ໂຖ.

໑໒໖. ວິທ຺ໂຘ ອສ຺ສາຕິ ປຣເສນາຍ ຐິເຕນ ວິທ຺ໂຘ ຠເວຍ຺ຍ. ຄາຬ຺ຫປເລປເນນາຕິ ພຫລເລປເນນ. ຠິສກ຺ກນ຺ຕິ ເວຊ຺ຊໍ. ສລ຺ລກຕ຺ຕນ຺ຕິ ສລ຺ລກນ຺ຕນໍ ສລ຺ລກນ຺ຕິຍສຸຕ຺ຕວາຈກໍ. ອກ຺ກສ຺ສາຕິ ອກ຺ກວາເກ ຄເຫຕ຺ວາ ຊິຍໍ ກໂຣນ຺ຕິ. ເຕນ ວຸຕ຺ຕໍ ‘‘ອກ຺ກສ຺ສາ’’ຕິ. ສຓ຺ຫສ຺ສາຕິ ເວຓຸວິລີວສ຺ສ. ມຣຸວາຂີຣປຓ຺ຓີນມ຺ປິ ວາເກຫິເຍວ ກໂຣນ຺ຕິ. ເຕນ ວຸຕ຺ຕໍ ຍທິ ວາ ມຣຸວາຍ ຍທິ ວາ ຂີຣປຓ຺ຓິໂນຕິ. ຄຈ຺ຉນ຺ຕິ ປພ຺ພຕຄຈ຺ຉນທີຄຈ຺ຉາທີສຸ ຊາຕໍ. ໂຣປິມນ຺ຕິ ໂຣເປຕ຺ວາ ວຑ຺ຒິຕໍ ສຣວນໂຕ ສຣໍ ຄເຫຕ຺ວາ ກຕໍ. ສິຖິລຫນຸໂນຕິ ເອວໍນາມກສ຺ສ ປກ຺ຂິໂນ. ເຠຣວສ຺ສາຕິ ກາຬສີຫສ຺ສ. ເສມ຺ຫາຣສ຺ສາຕິ ມກ຺ກຏສ຺ສ. ເອວໍ ໂນຕິ ເອຕາຍ ທິຏ຺ຐິຍາ ສຕິ ນ ໂຫຕີຕິ ອຕ຺ໂຖ.

໑໒໗. ອຕ຺ເຖວ ຊາຕີຕິ ເອຕາຍ ທິຏ຺ຐິຍາ ສຕິ ພ຺ຣຫ຺ມຈຣິຍວາໂສວ ນຕ຺ຖິ, ຊາຕິ ປນ ອຕ຺ຖິເຍວ. ຕຖາ ຊຣາມຣຓາທີນີຕິ ທສ຺ເສຕິ. ເຍສາຫນ຺ຕິ ເຍສໍ ອຫໍ. ນິຆາຕນ຺ຕິ ອຸປຆາຕໍ ວິນາສໍ. ມມ ສາວກາ ຫິ ເອເຕສຸ ນິພ຺ພິນ຺ນາ ອິເຘວ ນິພ຺ພານໍ ປາປຸຓນ຺ຕີຕິ ອຘິປ຺ປາໂຍ.

໑໒໘. ຕສ຺ມາຕິຫາຕິ ຍສ຺ມາ ອພ຺ຍາກຕເມຕໍ, ຈຕຸສຈ຺ຈເມວ ມຍາ ພ຺ຍາກຕໍ, ຕສ຺ມາຕິ ອຕ຺ໂຖ. ນ ເຫຕໍ ມາລຸກ຺ຍປຸຕ຺ຕ ອຕ຺ຖສໍຫິຕນ຺ຕິ ເອຕໍ ທິຏ຺ຐິຄຕໍ ວາ ເອຕໍ ພ຺ຍາກຣຓໍ ວາ ກາຣຓນິສ຺ສິຕໍ ນ ໂຫຕິ. ນ ອາທິພ຺ຣຫ຺ມຈຣິຍກນ຺ຕິ ພ຺ຣຫ຺ມຈຣິຍສ຺ສ ອາທິມຕ຺ຕມ຺ປິ ປຸພ຺ພຠາຄສີລມຕ຺ຕມ຺ປິ ນ ໂຫຕິ. ນ ນິພ຺ພິທາຍາຕິອາທີສຸ ວຏ຺ເຏ ນິພ຺ພິນ຺ທນຕ຺ຖາຍ ວາ ວິຣຊ຺ຌນຕ຺ຖາຍ ວາ ວຏ຺ຏນິໂຣຘາຍ ວາ ຣາຄາທິວູປສມນຕ຺ຖາຍ ວາ ອຠິຎ຺ເຎຍ຺ເຍ ຘມ຺ເມ ອຠິຊານນຕ຺ຖາຍ ວາ ຈຕຸມຄ຺ຄສງ຺ຂາຕສມ຺ໂພຘຕ຺ຖາຍ ວາ ອສງ຺ຂຕນິພ຺ພານສຈ຺ຉິກິຣິຍຕ຺ຖາຍ ວາ ນ ໂຫຕິ. ເອຕໍ ຫີຕິ ເອຕໍ ຈຕຸສຈ຺ຈພ຺ຍາກຣຓໍ. ອາທິພ຺ຣຫ຺ມຈຣິຍກນ຺ຕິ ພ຺ຣຫ຺ມຈຣິຍສ຺ສ ອາທິຠູຕໍ ປຸພ຺ພປທຏ຺ຐານໍ. ເສສໍ ວຸຕ຺ຕປຏິວິປກ຺ຂນເຍນ ເວທິຕພ຺ພໍ. ອິມມ຺ປິ ເທສນໍ ຠຄວາ ເນຍ຺ຍປຸຄ຺ຄລວເສນ ນິຏ຺ຐາເປສີຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ຈູຬມາລຸກ຺ຍສຸຕ຺ຕວຓ຺ຓນາ ນິຏ຺ຐິຕາ.