໖. ມຫາຘມ຺ມສມາທານສຸຕ຺ຕວຓ຺ຓນາ

໔໗໓. ເອວໍ ເມ ສຸຕ຺ຕນ຺ຕິ ມຫາຘມ຺ມສມາທານສຸຕ຺ຕໍ. ຕຕ຺ຖ ເອວໍກາມາຕິ ເອວໍອິຈ຺ຉາ. ເອວໍຉນ຺ທາຕິ ເອວໍອຊ຺ຌາສຍາ. ເອວໍອຘິປ຺ປາຍາຕິ ເອວໍລທ຺ຘິກາ. ຕຕ຺ຣາຕິ ຕສ຺ມິໍ ອນິຏ຺ຐວຑ຺ຒເນ ເຈວ ອິຏ຺ຐປຣິຫາເນ ຈ. ຠຄວໍມູລກາຕິ ຠຄວາ ມູລໍ ເອເຕສນ຺ຕິ ຠຄວໍມູລກາ. ອິທໍ ວຸຕ຺ຕໍ ໂຫຕິ – ອິເມ, ຠນ຺ເຕ, ອມ຺ຫາກໍ ຘມ຺ມາ ປຸພ຺ເພ ກສ຺ສປສມ຺ມາສມ຺ພຸທ຺ເຘນ ອຸປ຺ປາທິຕາ, ຕສ຺ມິໍ ປຣິນິພ຺ພຸເຕ ເອກໍ ພຸທ຺ຘນ຺ຕຣໍ ອຎ຺ໂຎ ສມໂຓ ວາ ພ຺ຣາຫ຺ມໂຓ ວາ ອິເມ ຘມ຺ເມ ອຸປ຺ປາເທຕຸໍ ສມຕ຺ໂຖ ນາມ ນາໂຫສິ, ຠຄວຕາ ປນ ໂນ ອິເມ ຘມ຺ມາ ອຸປ຺ປາທິຕາ. ຠຄວນ຺ຕຎ຺ຫິ ນິສ຺ສາຍ ມຍໍ ອິເມ ຘມ຺ເມ ອາຊານາມ ປຏິວິຊ຺ຌາມາຕິ ເອວໍ ຠຄວໍມູລກາ ໂນ, ຠນ຺ເຕ, ຘມ຺ມາຕິ. ຠຄວໍເນຕ຺ຕິກາຕິ ຠຄວາ ຫິ ຘມ຺ມານໍ ເນຕາ ວິເນຕາ ອນຸເນຕາຕິ. ຍຖາສຠາວໂຕ ປາຏິເຍກ຺ກໍ ປາຏິເຍກ຺ກໍ ນາມໍ ຄເຫຕ຺ວາ ທສ຺ສິຕາ ຘມ຺ມາ ຠຄວໍເນຕ຺ຕິກາ ນາມ ໂຫນ຺ຕິ. ຠຄວໍປຏິສຣຓາຕິ ຈຕຸຠູມກາ ຘມ຺ມາ ສພ຺ພຎ຺ຎຸຕຎ຺ຎາຓສ຺ສ ອາປາຖໍ ອາຄຈ຺ຉມານາ ຠຄວຕິ ປຏິສຣນ຺ຕິ ນາມາຕິ ຠຄວໍປຏິສຣຓາ. ປຏິສຣນ຺ຕີຕິ ໂອສຣນ຺ຕິ ສໂມສຣນ຺ຕິ. ອປິຈ ມຫາໂພຘິມຓ຺ເຑ ນິສິນ຺ນສ຺ສ ຠຄວໂຕ ປຏິເວຘວເສນ ຜສ຺ໂສ ອາຄຈ຺ຉຕິ, ອຫໍ ຠຄວາ ກິນ຺ນາໂມຕິ? ຕ຺ວໍ ຜຸສນຏ຺ເຐນ ຜສ຺ໂສ ນາມ. ເວທນາ, ສຎ຺ຎາ, ສງ຺ຂາຣາ, ວິຎ຺ຎາຓໍ ອາຄຈ຺ຉຕິ. ອຫໍ ຠຄວາ ກິນ຺ນາມນ຺ຕິ? ຕ຺ວໍ ວິຊານນຏ຺ເຐນ ວິຎ຺ຎາຓໍ ນາມາຕິ ເອວໍ ຈຕຸຠູມກຘມ຺ມານໍ ຍຖາສຠາວໂຕ ປາຏິເຍກ຺ກໍ ປາຏິເຍກ຺ກໍ ນາມໍ ຄຓ຺ຫນ຺ໂຕ ຠຄວາ ຘມ຺ເມ ປຏິສຣຕີຕິປິ ຠຄວໍປຏິສຣຓາ. ຠຄວນ຺ຕຎ຺ເຎວ ປຏິຠາຕູຕິ ຠຄວໂຕເຍວ ເອຕສ຺ສ ຠາສິຕສ຺ສ ອຕ຺ໂຖ ອຸປຏ຺ຐາຕຸ, ຕຸມ຺ເຫເຍວ ໂນ ກເຖຕ຺ວາ ເທຖາຕິ ອຕ຺ໂຖ.

໔໗໔. ເສວິຕພ຺ເພຕິ ນິສ຺ສຍິຕພ຺ເພ. ຠຊິຕພ຺ເພຕິ ອຸປຄນ຺ຕພ຺ເພ. ຍຖາ ຕໍ ອວິທ຺ທສຸໂນຕິ ຍຖາ ອວິທຸໂນ ພາລສ຺ສ ອນ຺ຘປຸຖຸຊ຺ຊນສ຺ສ. ຍຖາ ຕໍ ວິທ຺ທສຸໂນຕິ ຍຖາ ວິທຸໂນ ເມຘາວິໂນ ປຓ຺ຑິຕສ຺ສ.

໔໗໕. ອຕ຺ຖິ, ຠິກ຺ຂເວ, ຘມ຺ມສມາທານນ຺ຕິ ປຸຣິມສຸຕ຺ເຕ ອຸປ຺ປຏິປາຏິອາກາເຣນ ມາຕິກາ ຐປິຕາ, ອິຘ ປນ ຍຖາຘມ຺ມຣເສເນວ ສຕ຺ຖາ ມາຕິກໍ ຐເປສິ. ຕຕ຺ຖ ຘມ຺ມສມາທານນ຺ຕິ ປາຓາຕິປາຕາທີນໍ ຘມ຺ມານໍ ຄຫຓໍ.

໔໗໖. ອວິຊ຺ຊາຄໂຕຕິ ອວິຊ຺ຊາຍ ສມນ຺ນາຄໂຕ.

໔໗໗. ວິຊ຺ຊາຄໂຕຕິ ວິຊ຺ຊາຍ ສມນ຺ນາຄໂຕ ປຎ຺ຎວາ.

໔໗໘. ສຫາປິ ທຸກ຺ເຂນາຕິ ເອຕ຺ຖ ມິຈ຺ຉາຈາໂຣ ອຠິຊ຺ຌາ ມິຈ຺ຉາທິຏ຺ຐີຕິ ອິເມ ຕາວ ຕໂຍ ປຸພ຺ພເຈຕນາຍ ຈ ອປຣເຈຕນາຍ ຈາຕິ ທ຺ວິນ຺ນໍ ເຈຕນານໍ ວເສນ ທຸກ຺ຂເວທນາ ໂຫນ຺ຕິ. ສນ຺ນິຏ຺ຐາປກເຈຕນາ ປນ ສຸຂສມ຺ປຍຸຕ຺ຕາ ວາ ອຸເປກ຺ຂາສມ຺ປຍຸຕ຺ຕາ ວາ ໂຫຕິ. ເສສາ ປາຓາຕິປາຕາທໂຍ ສຕ຺ຕ ຕິສ຺ສນ຺ນມ຺ປິ ເຈຕນານໍ ວເສນ ທຸກ຺ຂເວທນາ ໂຫນ຺ຕິ. ອິທໍ ສນ຺ຘາຍ ວຸຕ຺ຕໍ – ‘‘ສຫາປິ ທຸກ຺ເຂນ ສຫາປິ ໂທມນສ຺ເສນາ’’ຕິ. ໂທມນສ຺ສເມວ ເຈຕ຺ຖ ທຸກ຺ຂນ຺ຕິ ເວທິຕພ຺ພໍ. ປຣິເຍຏ຺ຐິໍ ວາ ອາປຊ຺ຊນ຺ຕສ຺ສ ປຸພ຺ພຠາຄປຣຠາເຄສຸ ກາຍິກໍ ທຸກ຺ຂມ຺ປິ ວຏ຺ຏຕິເຍວ.

໔໗໙. ສຫາປິ ສຸເຂນາຕິ ເອຕ຺ຖ ປາຓາຕິປາໂຕ ຜຣຸສວາຈາ ພ຺ຍາປາໂທຕິ ອິເມ ຕາວ ຕໂຍ ປຸພ຺ພເຈຕນາຍ ຈ ອປຣເຈຕນາຍ ຈາຕິ ທ຺ວິນ຺ນໍ ເຈຕນານໍ ວເສນ ສຸຂເວທນາ ໂຫນ຺ຕິ. ສນ຺ນິຏ຺ຐາປກເຈຕນາ ປນ ທຸກ຺ຂສມ຺ປຍຸຕ຺ຕາວ ໂຫຕິ. ເສສາ ສຕ຺ຕ ຕິສ຺ສນ຺ນມ຺ປິ ເຈຕນານໍ ວເສນ ສຸຂເວທນາ ໂຫນ຺ຕິເຍວ. ສຫາປິ ໂສມນສ຺ເສນາຕິ ໂສມນສ຺ສເມວ ເຈຕ຺ຖ ສຸຂນ຺ຕິ ເວທິຕພ຺ພໍ. ອິຏ຺ຐໂຜຏ຺ຐພ຺ພສມງ຺ຄິໂນ ວາ ປຸພ຺ພຠາຄປຣຠາເຄສຸ ກາຍິກໍ ສຸຂມ຺ປິ ວຏ຺ຏຕິເຍວ.

໔໘໐. ຕຕິຍຘມ຺ມສມາທາເນ ອິເຘກຈ຺ໂຈ ມຈ຺ຉພນ຺ໂຘ ວາ ໂຫຕິ, ມາຄວິໂກ ວາ, ປາຓຸປຆາຕໍເຍວ ນິສ຺ສາຍ ຊີວິກໍ ກປ຺ເປຕິ. ຕສ຺ສ ຄຣຸຏ຺ຐານິໂຍ ຠິກ຺ຂຸ ອກາມກສ຺ເສວ ປາຓາຕິປາເຕ ອາທີນວໍ, ປາຓາຕິປາຕວິຣຕິຍາ ຈ ອານິສໍສໍ ກເຖຕ຺ວາ ສິກ຺ຂາປທໍ ເທຕິ. ໂສ ຄຓ຺ຫນ຺ໂຕປິ ທຸກ຺ຂິໂຕ ໂທມນສ຺ສິໂຕວ ຫຸຕ຺ວາ ຄຓ຺ຫາຕິ. ອປຣຠາເຄ ກຕິປາຫໍ ວີຕິນາເມຕ຺ວາ ຣກ຺ຂິຕຸໍ ອສກ຺ໂກນ຺ໂຕປິ ທຸກ຺ຂິໂຕວ ໂຫຕິ, ຕສ຺ສ ປຸພ຺ພາປຣເຈຕນາ ທຸກ຺ຂສຫຄຕາວ ໂຫນ຺ຕິ. ສນ຺ນິຏ຺ຐາປກເຈຕນາ ປນ ສຸຂສຫຄຕາ ວາ ອຸເປກ຺ຂາສຫຄຕາ ວາຕິ ເອວໍ ສພ຺ພຕ຺ຖ ອຕ຺ໂຖ ເວທິຕພ຺ໂພ. ອິຕິ ປຸພ຺ພຠາຄປຣຠາຄເຈຕນາວ ສນ຺ຘາຍ ອິທໍ ວຸຕ຺ຕໍ – ‘‘ສຫາປິ ທຸກ຺ເຂນ ສຫາປິ ໂທມນສ຺ເສນາ’’ຕິ. ໂທມນສ຺ສເມວ ເຈຕ຺ຖ ທຸກ຺ຂນ຺ຕິ ເວທິຕພ຺ພໍ.

໔໘໑. ຈຕຸຕ຺ຖຘມ຺ມສມາທາເນ ທສສຸປິ ປເທສຸ ຕິສ຺ໂສປິ ປຸພ຺ພຠາຄາປຣຠາຄສນ຺ນິຏ຺ຐາປກເຈຕນາ ສຸຂສມ຺ປຍຸຕ຺ຕາ ໂຫນ຺ຕິເຍວ, ຕໍ ສນ຺ຘາຍ ອິທໍ ວຸຕ຺ຕໍ – ‘‘ສຫາປິ ສຸເຂນ ສຫາປິ ໂສມນສ຺ເສນາ’’ຕິ. ໂສມນສ຺ສເມວ ເຈຕ຺ຖ ສຸຂນ຺ຕິ ເວທິຕພ຺ພໍ.

໔໘໒. ຕິຕ຺ຕກາລາພູຕິ ຕິຕ຺ຕກຣສອລາພຸ. ວິເສນ ສໍສຏ຺ໂຐຕິ ຫລາຫລວິເສນ ສມ຺ປຍຸຕ຺ໂຕ ມິສ຺ສິໂຕ ລຸຬິໂຕ. ນຈ຺ຉາເທສ຺ສຕີຕິ ນ ຣຸຈ຺ຈິສ຺ສຕິ ນ ຕຸຏ຺ຐິໍ ກຣິສ຺ສຕິ. ນິຄຈ຺ຉສີຕິ ຄມິສ຺ສສິ. ອປ຺ປຏິສງ຺ຂາຍ ປິເວຍ຺ຍາຕິ ຕໍ ອປ຺ປຈ຺ຈເວກ຺ຂິຕ຺ວາ ປິເວຍ຺ຍ.

໔໘໓. ອາປານີຍກໍໂສຕິ ອາປານີຍສ຺ສ ມຘຸຣປານກສ຺ສ ຠຣິຕກໍໂສ. ວຓ຺ຓສມ຺ປນ຺ໂນຕິ ປານກວຓ຺ຓາທີຫິ ສມ຺ປນ຺ນວຓ຺ໂຓ, ກໍເສ ປກ຺ຂິຕ຺ຕປານກວເສນ ປານກກໍໂສປິ ເອວໍ ວຸຕ຺ໂຕ. ຉາເທສ຺ສຕີຕິ ຕຎ຺ຫິ ຫລາຫລວິສໍ ຍຕ຺ຖ ຍຕ຺ຖ ປກ຺ຂິຕ຺ຕໍ ໂຫຕິ, ຕສ຺ສ ຕສ຺ເສວ ຣສໍ ເທຕິ. ເຕນ ວຸຕ຺ຕໍ ‘‘ຉາເທສ຺ສຕີ’’ຕິ.

໔໘໔. ປູຕິມຸຕ຺ຕນ຺ຕິ ມຸຕ຺ຕເມວ. ຍຖາ ຫິ ມນຸສ຺ສຠາໂວ ສຸວຓ຺ຓວຓ຺ໂຓ ປູຕິກາໂຍຕ຺ເວວ, ຕທຫຸຊາຕາປິ ຄໂລຈິລຕາ ປູຕິລຕາຕ຺ເວວ ວຸຈ຺ຈຕິ. ເອວໍ ຕງ຺ຂຓໍ ຄຫິຕໍ ຕຣຸຓມ຺ປິ ມຸຕ຺ຕໍ ປູຕິມຸຕ຺ຕເມວ. ນານາເຠສຊ຺ເຊຫີຕິ ຫຣີຕກາມລກາທີຫິ ນາໂນສເຘຫິ. ສຸຂີ ອສ຺ສາຕິ ອໂຣໂຄ ສຸວຓ຺ຓວຓ຺ໂຓ ສຸຂີ ຠເວຍ຺ຍ.

໔໘໕. ທຘິ ຈ ມຘຸ ຈາຕິ ສຸປຣິສຸທ຺ຘໍ ທຘິ ຈ ສຸມຘຸຣໍ ມຘຸ ຈ. ເອກຊ຺ຌໍ ສໍສຏ຺ຐນ຺ຕິ ເອກໂຕ ກຕ຺ວາ ມິສ຺ສິຕໍ ອາລຸຬິຕໍ. ຕສ຺ສ ຕນ຺ຕິ ຕສ຺ສ ຕໍ ຈຕຸມຘຸຣເຠສຊ຺ຊໍ ປິວໂຕ ຣຸຈ຺ເຈຍ຺ຍ. ອິທຎ຺ຈ ຍໍ ຠຄນ຺ທຣສໍສຏ຺ຐໍ ໂລຫິຕໍ ປກ຺ຂນ຺ທຕິ, ນ ຕສ຺ສ ເຠສຊ຺ຊໍ, ອາຫາຣໍ ຖມ຺ເຠຕ຺ວາ ມຄ຺ຄໍ ອວລຎ຺ຊໍ ກໂຣຕິ. ຍໍ ປນ ປິຕ຺ຕສໍສຏ຺ຐໍ ໂລຫິຕໍ, ຕສ຺ເສຕໍ ເຠສຊ຺ຊໍ ສີຕລກິຣິຍາຍ ປຣິຍຕ຺ຕຠູຕໍ.

໔໘໖. ວິທ຺ເຘຕິ ອຸພ຺ພິທ຺ເຘ. ເມຆວິຄເມນ ທູຣີຠູເຕຕິ ອຕ຺ໂຖ. ວິຄຕວລາຫເກຕິ ອປຄຕເມເຆ, ເທເວຕິ ອາກາເສ. ອາກາສຄຕໍ ຕມຄຕນ຺ຕິ ອາກາສຄຕໍ ຕມໍ. ປຸຖຸສມຓພ຺ຣາຫ຺ມຓປຣປ຺ປວາເທຕິ ປຸຖູນໍ ສມຓພ຺ຣາຫ຺ມຓສງ຺ຂາຕານໍ ປເຣສໍ ວາເທ. ອຠິວິຫຈ຺ຈາຕິ ອຠິຫນ຺ຕ຺ວາ. ຠາສເຕ ຈ ຕປເຕ ຈ ວິໂຣຈເຕ ຈາຕິ ສຣທກາເລ ມຊ຺ຌນ຺ຫິກສມເຍ ອາທິຈ຺ໂຈວ ໂອຠາສໍ ມຸຎ຺ຈຕິ ຕປຕິ ວິຊ຺ໂຊຕຕີຕິ.

ອິທໍ ປນ ສຸຕ຺ຕໍ ເທວຕານໍ ອຕິວິຍ ປິຍໍ ມນາປໍ. ຕຕ຺ຣິທໍ ວຕ຺ຖຸ – ທກ຺ຂິຓທິສາຍໍ ກິຣ ຫຕ຺ຖິໂຠຄຊນປເທ ສງ຺ຄຣວິຫາໂຣ ນາມ ອຕ຺ຖິ. ຕສ຺ສ ໂຠຊນສາລທ຺ວາເຣ ສງ຺ຄຣຣຸກ຺ເຂ ອຘິວຕ຺ຖາ ເທວຕາ ຣຕ຺ຕິຠາເຄ ເອກສ຺ສ ທຫຣສ຺ສ ສຣຠຎ຺ຎວເສນ ອິທໍ ສຸຕ຺ຕໍ ໂອສາເຣນ຺ຕສ຺ສ ສຸຕ຺ວາ ສາຘຸກາຣໍ ອທາສິ. ທຫໂຣ ກິໍ ເອໂສຕິ ອາຫ. ອຫໍ, ຠນ຺ເຕ, ອິມສ຺ມິໍ ຣຸກ຺ເຂ ອຘິວຕ຺ຖາ ເທວຕາຕິ. ກສ຺ມິໍ ເທວເຕ ປສນ຺ນາສິ, ກິໍ ສທ຺ເທ, ອຸທາຫຸ ສຸຕ຺ເຕຕິ? ສທ຺ໂທ ນາມ, ຠນ຺ເຕ, ຍສ຺ສ ກສ຺ສຈິ ໂຫຕິເຍວ, ສຸຕ຺ເຕ ປສນ຺ນາມ຺ຫິ. ສຕ຺ຖາຣາ ເຊຕວເນ ນິສີທິຕ຺ວາ ກຖິຕທິວເສ ຈ ອຊ຺ຊ ຈ ເອກພ຺ຍຎ຺ຊເນປິ ນານໍ ນຕ຺ຖີຕິ. ອສ຺ໂສສິ ຕ຺ວໍ ເທວເຕ ສຕ຺ຖາຣາ ກຖິຕທິວເສຕິ? ອາມ, ຠນ຺ເຕ. ກຕ຺ຖ ຐິຕາ ອສ຺ໂສສີຕິ? ເຊຕວນໍ, ຠນ຺ເຕ, ຄຕາມ຺ຫິ, ມເຫສກ຺ຂາສຸ ປນ ເທວຕາສຸ ອາຄຈ຺ຉນ຺ຕີສຸ ຕຕ຺ຖ ໂອກາສໍ ອລຠິຕ຺ວາ ອິເຘວ ຐຕ຺ວາ ອສ຺ໂສສິນ຺ຕິ. ເອຕ຺ຖ ຐິຕາຍ ສກ຺ກາ ສຸຕ຺ຖຸ ສທ຺ໂທ ໂສຕຸນ຺ຕິ? ຕ຺ວໍ ປນ, ຠນ຺ເຕ, ມຍ຺ຫໍ ສທ຺ທໍ ສຸຓສີຕິ? ອາມ ເທວເຕຕິ. ທກ຺ຂິຓກຓ຺ຓປສ຺ເສ ນິສີທິຕ຺ວາ ກຖນກາໂລ ວິຍ, ຠນ຺ເຕ, ໂຫຕີຕິ. ກິໍ ປນ ເທວເຕ ສຕ຺ຖຸ ຣູປໍ ປສ຺ສສີຕິ? ສຕ຺ຖາ ມເມວ ໂອໂລເກຕີຕິ ມຎ຺ຎມານາ ສຓ຺ຐາຕຸໍ ນ ສກ຺ໂກມິ, ຠນ຺ເຕຕິ. ວິເສສໍ ປນ ນິພ຺ພຕ຺ເຕຕຸໍ ອສກ຺ຂິຕ຺ຖ ເທວເຕຕິ. ເທວຕາ ຕຕ຺ເຖວ ອນ຺ຕຣຘາຍິ. ຕໍ ທິວສໍ ກິເຣສ ເທວປຸຕ຺ໂຕ ໂສຕາປຕ຺ຕິຜເລ ປຕິຏ຺ຐິໂຕ. ເອວມິທໍ ສຸຕ຺ຕໍ ເທວຕານໍ ປິຍໍ ມນາປໍ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ມຫາຘມ຺ມສມາທານສຸຕ຺ຕວຓ຺ຓນາ ນິຏ຺ຐິຕາ.