໔. ຈູຬໂຄປາລກສຸຕ຺ຕວຓ຺ຓນາ

໓໕໐. ເອວໍ ເມ ສຸຕນ຺ຕິ ຈູຬໂຄປາລກສຸຕ຺ຕໍ. ຕຕ຺ຖ ອຸກ຺ກເຈລາຍນ຺ຕິ ເອວໍນາມເກ ນຄເຣ. ຕສ຺ມິໍ ກິຣ ມາປິຍມາເນ ຣຕ຺ຕິໍ ຄງ຺ຄາໂສຕໂຕ ມຈ຺ໂຉ ຖລໍ ປຕ຺ໂຕ. ມນຸສ຺ສາ ເຈລານິ ເຕລປາຕິຍໍ ເຕເມຕ຺ວາ ອຸກ຺ກາ ກຕ຺ວາ ມຈ຺ຉໍ ຄຓ຺ຫິໍສຸ. ນຄເຣ ນິຏ຺ຐິເຕ ຕສ຺ສ ນາມໍ ກໂຣນ຺ເຕ ອມ຺ເຫຫິ ນຄຣຏ຺ຐານສ຺ສ ຄຫິຕທິວເສ ເຈລຸກ຺ກາຫິ ມຈ຺ໂຉ ຄຫິໂຕຕິ ອຸກ຺ກເຈລາ-ຕ຺ເວວສ຺ສ ນາມໍ ອກໍສຸ. ຠິກ຺ຂູ ອາມນ຺ເຕສີຕິ ຍສ຺ມິໍ ຐາເນ ນິສິນ຺ນສ຺ສ ສພ຺ພາ ຄງ຺ຄາ ປາກຏາ ຫຸຕ຺ວາ ປຎ຺ຎາຍຕິ, ຕາທິເສ ວາລິກຸສ຺ສເທ ຄງ຺ຄາຕິຕ຺ເຖ ສາຍນ຺ຫສມເຍ ມຫາຠິກ຺ຂຸສງ຺ຆປຣິວຸໂຕ ນິສີທິຕ຺ວາ ມຫາຄງ຺ຄໍ ປຣິປຸຓ຺ຓໍ ສນ຺ທມານໍ ໂອໂລເກນ຺ໂຕ, – ‘‘ອຕ຺ຖິ ນຸ ໂຂ ອິມໍ ຄງ຺ຄໍ ນິສ຺ສາຍ ໂກຈິ ປຸພ຺ເພ ວຑ຺ຒິປຣິຫານິໍ ປຕ຺ໂຕ’’ຕິ ອາວຊ຺ຊິຕ຺ວາ, ປຸພ຺ເພ ເອກໍ ພາລໂຄປາລກໍ ນິສ຺ສາຍ ອເນກສຕສຫສ຺ສາ ໂຄຄຓາ ອິມິສ຺ສາ ຄງ຺ຄາຍ ອາວຏ຺ເຏ ປຕິຕ຺ວາ ສມຸທ຺ທເມວ ປວິຏ຺ຐາ, ອປຣໍ ປນ ປຓ຺ຑິຕໂຄປາລກໍ ນິສ຺ສາຍ ອເນກສຕສຫສ຺ສໂຄຄຓສ຺ສ ໂສຕ຺ຖິ ຊາຕາ ວຑ຺ຒິ ຊາຕາ ອາໂຣຄ຺ຍໍ ຊາຕນ຺ຕິ ອທ຺ທສ. ທິສ຺ວາ ອິມໍ ກາຣຓໍ ນິສ຺ສາຍ ຠິກ຺ຂູນໍ ຘມ຺ມໍ ເທເສສ຺ສາມີຕິ ຈິນ຺ເຕຕ຺ວາ ຠິກ຺ຂູ ອາມນ຺ເຕສິ.

ມາຄຘໂກຕິ ມຄຘຣຏ຺ຐວາສີ. ທຸປ຺ປຎ຺ຎຊາຕິໂກຕິ ນິປ຺ປຎ຺ຎສຠາໂວ ທນ຺ໂຘ ມຫາຊໂຬ. ອສມເວກ຺ຂິຕ຺ວາຕິ ອສລ຺ລກ຺ເຂຕ຺ວາ ອນຸປຘາເຣຕ຺ວາ. ປຕາເຣສີຕິ ຕາເຣຕຸໍ ອາຣຠິ. ອຸຕ຺ຕຣໍ ຕີຣໍ ສຸວິເທຫານນ຺ຕິ ຄງ຺ຄາຍ ໂອຣິເມ ຕີເຣ ມຄຘຣຏ຺ຐໍ, ປາຣິເມ ຕີເຣ ວິເທຫຣຏ຺ຐໍ, ຄາໂວ ມຄຘຣຏ຺ຐໂຕ ວິເທຫຣຏ຺ຐໍ ເນຕ຺ວາ ຣກ຺ຂິສ຺ສາມີຕິ ອຸຕ຺ຕຣໍ ຕີຣໍ ປຕາເຣສິ. ຕໍ ສນ຺ຘາຍ ວຸຕ຺ຕໍ – ‘‘ອຸຕ຺ຕຣໍ ຕີຣໍ ສຸວິເທຫານ’’ນ຺ຕິ. ອາມຓ຺ຑລິກໍ ກຣິຕ຺ວາຕິ ມຓ຺ຑລິກໍ ກຕ຺ວາ. ອນຍພ຺ຍສນໍ ອາປຊ຺ຊິໍສູຕິ ອວຑ຺ຒິໍ ວິນາສໍ ປາປຸຓິໍສຸ, ມຫາສມຸທ຺ທເມວ ປວິສິໍສຸ. ເຕນ ຫິ ໂຄປາລເກນ ຄາໂວ ໂອຕາເຣນ຺ເຕນ ຄງ຺ຄາຍ ໂອຣິມຕີເຣ ສມຕິຕ຺ຖຎ຺ຈ ວິສມຕິຕ຺ຖຎ຺ຈ ໂອໂລເກຕພ຺ພໍ ອສ຺ສ, ມຊ຺ເຌ ຄງ຺ຄາຍ ຄຸນ຺ນໍ ວິສ຺ສມຏ຺ຐານຕ຺ຖໍ ທ຺ເວ ຕີຓິ ວາລິກຕ຺ຖລານິ ສລ຺ລກ຺ເຂຕພ຺ພານິ ອສ຺ສຸ. ຕຖາ ປາຣິມຕີເຣ ຕີຓິ ຈຕ຺ຕາຣິ ຕິຕ຺ຖານິ, ອິມສ຺ມາ ຕິຕ຺ຖາ ຠຏ຺ຐາ ອິມໍ ຕິຕ຺ຖໍ ຄຓ຺ຫິສ຺ສນ຺ຕິ, ອິມສ຺ມາ ຠຏ຺ຐາ ອິມນ຺ຕິ. ອຍໍ ປນ ພາລໂຄປາລໂກ ໂອຣິມຕີເຣ ຄຸນ຺ນໍ ໂອຕຣຓຕິຕ຺ຖໍ ສມໍ ວາ ວິສມໍ ວາ ອໂນໂລເກຕ຺ວາວ ມຊ຺ເຌ ຄງ຺ຄາຍ ຄຸນ຺ນໍ ວິສ຺ສມຏ຺ຐານຕ຺ຖໍ ທ຺ເວ ຕີຓິ ວາລິກຕ຺ຖລານິປິ ອສລ຺ລກ຺ເຂຕ຺ວາວ ປຣຕີເຣ ຈຕ຺ຕາຣິ ປຎ຺ຈ ອຸຕ຺ຕຣຓຕິຕ຺ຖານິ ອສມເວກ຺ຂິຕ຺ວາວ ອຕິຕ຺ເຖເນວ ຄາໂວ ໂອຕາເຣສິ. ອຖສ຺ສ ມຫາອຸສໂຠ ຊວນສມ຺ປນ຺ນຕາຍ ເຈວ ຖາມສມ຺ປນ຺ນຕາຍ ຈ ຕິຣິຍໍ ຄງ຺ຄາຍ ໂສຕໍ ເຉຕ຺ວາ ປາຣິມໍ ຕີຣໍ ປຕ຺ວາ ຉິນ຺ນຕຏຎ຺ເຈວ ກຓ຺ຏກຄຸມ຺ພຄຫນຎ຺ຈ ທິສ຺ວາ, ‘‘ທຸພ຺ພິນິວິຏ຺ຐເມຕ’’ນ຺ຕິ ຎຕ຺ວາ ຘຸຣຄ຺ຄ-ປຕິຏ຺ຐາໂນກາສມ຺ປິ ອລຠິຕ຺ວາ ປຏິນິວຕ຺ຕິ. ຄາໂວ ມຫາອຸສໂຠ ນິວຕ຺ໂຕ ມຍມ຺ປິ ນິວຕ຺ຕິສ຺ສາມາຕິ ນິວຕ຺ຕາ. ມຫໂຕ ໂຄຄຓສ຺ສ ນິວຕ຺ຕຏ຺ຐາເນ ອຸທກໍ ຉິຊ຺ຊິຕ຺ວາ ມຊ຺ເຌ ຄງ຺ຄາຍ ອາວຏ຺ຏໍ ອຸຏ຺ຐເປສິ. ໂຄຄໂຓ ອາວຏ຺ຏໍ ປວິສິຕ຺ວາ ສມຸທ຺ທເມວ ປຕ຺ໂຕ. ເອໂກປິ ໂຄໂຓ ອໂຣໂຄ ນາມ ນາໂຫສິ. ເຕນາຫ – ‘‘ຕຕ຺ເຖວ ອນຍພ຺ຍສນໍ ອາປຊ຺ຊິໍສູ’’ຕິ.

ອກຸສລາ ອິມສ຺ສ ໂລກສ຺ສາຕິ ອິຘ ໂລເກ ຂນ຺ຘຘາຕາຍຕເນສຸ ອກຸສລາ ອເຉກາ, ປຣໂລເກປິ ເອເສວ ນໂຍ. ມາຣເຘຍ຺ຍໍ ວຸຈ຺ຈຕິ ເຕຠູມກຘມ຺ມາ. ອມາຣເຘຍ຺ຍໍ ນວ ໂລກຸຕ຺ຕຣຘມ຺ມາ. ມຈ຺ຈຸເຘຍ຺ຍມ຺ປິ ເຕຠູມກຘມ຺ມາວ. ອມຈ຺ຈຸເຘຍ຺ຍໍ ນວ ໂລກຸຕ຺ຕຣຘມ຺ມາ. ຕຕ຺ຖ ອກຸສລາ ອເຉກາ. ວຈນຕ຺ຖໂຕ ປນ ມາຣສ຺ສ ເຘຍ຺ຍໍ ມາຣເຘຍ຺ຍໍ. ເຘຍ຺ຍນ຺ຕິ ຐານໍ ວຕ຺ຖຸ ນິວາໂສ ໂຄຈໂຣ. ມຈ຺ຈຸເຘຍ຺ເຍປິ ເອເສວ ນໂຍ. ເຕສນ຺ຕິ ເຕສໍ ເອວຣູປານໍ ສມຓພ຺ຣາຫ຺ມຓານໍ, ອິມິນາ ຉ ສຕ຺ຖາໂຣ ທສ຺ສິຕາຕິ ເວທິຕພ຺ພາ.

໓໕໑. ເອວໍ ກຓ຺ຫປກ຺ຂໍ ນິຏ຺ຐເປຕ຺ວາ ສຸກ຺ກປກ຺ຂໍ ທສ຺ເສນ຺ໂຕ ຠູຕປຸພ຺ພໍ, ຠິກ຺ຂເວຕິອາທິມາຫ. ຕຕ຺ຖ ພລວຄາໂວຕິ ທນ຺ຕໂຄເຓ ເຈວ ເຘນຸໂຍ ຈ. ທມ຺ມຄາໂວຕິ ທເມຕພ຺ພໂຄເຓ ເຈວ ອວິຊາຕຄາໂວ ຈ. ວຈ຺ຉຕເຣຕິ ວຈ຺ຉຠາວໍ ຕຣິຕ຺ວາ ຐິເຕ ພລວວຈ຺ເຉ. ວຈ຺ຉເກຕິ ເຘນຸປເກ ຕຣຸຓວຈ຺ຉເກ. ກິສາພລເກຕິ ອປ຺ປມໍສໂລຫິເຕ ມນ຺ທຖາເມ. ຕາວເທວ ຊາຕໂກຕິ ຕໍທິວເສ ຊາຕໂກ. ມາຕຸໂຄຣວເກນ ວຸຍ຺ຫມາໂນຕິ ມາຕາ ປຸຣໂຕ ປຸຣໂຕ ຫຸໍຫຸນ຺ຕິ ໂຄຣວໍ ກຕ຺ວາ ສຎ຺ຎໍ ທທມານາ ອຸເຣນ ອຸທກໍ ຉິນ຺ທມານາ ຄຈ຺ຉຕິ, ວຈ຺ຉໂກ ຕາຍ ໂຄຣວສຎ຺ຎາຍ ເຘນຸຍາ ວາ ອຸເຣນ ຉິນ຺ໂນທເກນ ຄຈ຺ຉມາໂນ ‘‘ມາຕຸໂຄຣວເກນ ວຸຍ຺ຫມາໂນ’’ຕິ ວຸຈ຺ຈຕິ.

໓໕໒. ມາຣສ຺ສ ໂສຕໍ ເຉຕ຺ວາຕິ ອຣຫຕ຺ຕມຄ຺ເຄນ ມາຣສ຺ສ ຕຓ຺ຫາໂສຕໍ ເຉຕ຺ວາ. ປາຣໍ ຄຕາຕິ ມຫາອຸສຠາ ນທີປາຣໍ ວິຍ ສໍສາຣປາຣໍ ນິພ຺ພານໍ ຄຕາ. ປາຣໍ ອຄມໍສູຕິ ມຫາອຸສຠານໍ ປາຣງ຺ຄຕກ຺ຂເຓ ຄງ຺ຄາຍ ໂສຕສ຺ສ ຕໂຍ ໂກຏ຺ຐາເສ ອຕິກ຺ກມ຺ມ ຐິຕາ ມຫາອຸສເຠ ປາຣໍ ປຕ຺ເຕ ທິສ຺ວາ ເຕສໍ ຄຕມຄ຺ຄໍ ປຏິປຊ຺ຊິຕ຺ວາ ປາຣໍ ອຄມໍສຸ. ປາຣໍ ຄມິສ຺ສນ຺ຕີຕິ ຈຕຸມຄ຺ຄວຊ຺ຌານໍ ກິເລສານໍ ຕໂຍ ໂກຏ຺ຐາເສ ເຂເປຕ຺ວາ ຐິຕາ ອິທານິ ອຣຫຕ຺ຕມຄ຺ເຄນ ອວເສສໍ ຕຓ຺ຫາໂສຕໍ ເຉຕ຺ວາ ພລວຄາໂວ ວິຍ ນທີປາຣໍ ສໍສາຣປາຣໍ ນິພ຺ພານໍ ຄມິສ຺ສນ຺ຕີຕິ. ອິມິນາ ນເຍນ ສພ຺ພວາເຣສຸ ອຕ຺ໂຖ ເວທິຕພ຺ໂພ. ຘມ຺ມານຸສາຣິໂນ, ສທ຺ຘານຸສາຣິໂນຕິ ອິເມ ທ຺ເວ ປຐມມຄ຺ຄສມງ຺ຄິໂນ.

ຊານຕາຕິ ສພ຺ພຘມ຺ເມ ຊານນ຺ເຕນ ພຸທ຺ເຘນ. ສຸປ຺ປກາສິໂຕຕິ ສຸກຖິໂຕ. ວິວຏນ຺ຕິ ວິວຣິຕໍ. ອມຕທ຺ວາຣນ຺ຕິ ອຣິຍມຄ຺ໂຄ. ນິພ຺ພານປຕ຺ຕິຍາຕິ ຕທຕ຺ຖາຍ ວິວຏໍ. ວິນຬີກຕນ຺ຕິ ວິຄຕມານນຬໍ ກຕໍ. ເຂມໍ ປຕ຺ເຖຖາຕິ ກຕ຺ຕຸກມ຺ຍຕາຉນ຺ເທນ ອຣຫຕ຺ຕໍ ປຕ຺ເຖຖ, ກຕ຺ຕຸກາມາ ນິພ຺ພຕ຺ເຕຕຸກາມາ ໂຫຖາຕິ ອຕ຺ໂຖ. ‘‘ປຕ຺ຕ’ຕ຺ຖາ’’ຕິປິ ປາໂຐ. ເອວຣູປໍ ສຕ຺ຖາຣໍ ລຠິຕ຺ວາ ຕຸມ຺ເຫ ປຕ຺ຕາເຍວ ນາມາຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວ. ຠຄວາ ປນ ຍຖານຸສນ຺ຘິນາວ ເທສນໍ ນິຏ຺ຐເປສີຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ຈູຬໂຄປາລກສຸຕ຺ຕວຓ຺ຓນາ ນິຏ຺ຐິຕາ.