໑໐. ຈູຬອສ຺ສປຸຣສຸຕ຺ຕວຓ຺ຓນາ

໔໓໕. ເອວໍ ເມ ສຸຕນ຺ຕິ ຈູຬອສ຺ສປຸຣສຸຕ຺ຕໍ. ຕສ຺ສ ເທສນາກາຣຓໍ ປຸຣິມສທິສເມວ. ສມຓສາມີຈິປ຺ປຏິປທາຕິ ສມຓານໍ ອນຸຈ຺ຉວິກາ ສມຓານໍ ອນຸໂລມປ຺ປຏິປທາ.

໔໓໖. ສມຓມລານນ຺ຕິອາທີສຸ ເອເຕ ຘມ຺ມາ ອຸປ຺ປຊ຺ຊມານາ ສມເຓ ມລິເນ ກໂຣນ຺ຕິ ມລຄ຺ຄຫິເຕ, ຕສ຺ມາ ‘‘ສມຓມລາ’’ຕິ ວຸຈ຺ຈນ຺ຕິ. ເອເຕຫິ ສມຓາ ທຸສ຺ສນ຺ຕິ, ປທຸສ຺ສນ຺ຕິ, ຕສ຺ມາ ສມຓໂທສາຕິ ວຸຈ຺ຈນ຺ຕິ. ເອເຕ ອຸປ຺ປຊ຺ຊິຕ຺ວາ ສມເຓ ກສເຏ ນິໂຣເຊ ກໂຣນ຺ຕິ ມິລາເປນ຺ຕິ, ຕສ຺ມາ ສມຓກສຏາຕິ ວຸຈ຺ຈນ຺ຕິ. ອາປາຍິການໍ ຐານານນ຺ຕິ ອປາເຍ ນິພ຺ພຕ຺ຕາປການໍ ກາຣຓານໍ. ທຸຄ຺ຄຕິເວທນິຍານນ຺ຕິ ທຸຄ຺ຄຕິຍໍ ວິປາກເວທນາຍ ປຈ຺ຈຍານໍ. ມຕຊໍ ນາມາຕິ ມນຸສ຺ສາ ຕິຂິຓໍ ອຍໍ ອເຍນ ສຸຆໍສິຕ຺ວາ ຕໍ ອຍຈຸຓ຺ຓໍ ມໍເສນ ສທ຺ຘິໍ ມທ຺ທິຕ຺ວາ ໂກຎ຺ຈສກຸເຓ ຂາທາເປນ຺ຕິ. ເຕ ອຸຈ຺ຈາຣໍ ກາຕຸໍ ອສກ຺ໂກນ຺ຕາ ມຣນ຺ຕິ. ໂນ ເຈ ມຣນ຺ຕິ, ປຫຣິຕ຺ວາ ມາເຣນ຺ຕິ. ອຖ ເຕສໍ ກຸຈ຺ຉິໍ ຜາເລຕ຺ວາ ນໍ ອຸທເກນ ໂຘວິຕ຺ວາ ຈຸຓ຺ຓໍ ຄເຫຕ຺ວາ ມໍເສນ ສທ຺ຘິໍ ມທ຺ທິຕ຺ວາ ປຸນ ຂາທາເປນ຺ຕີຕິ ເອວໍ ສຕ຺ຕ ວາເຣ ຂາທາເປຕ຺ວາ ຄຫິເຕນ ອຍຈຸຓ຺ເຓນ ອາວຸຘໍ ກໂຣນ຺ຕິ. ສຸສິກ຺ຂິຕາ ຈ ນໍ ອຍກາຣາ ພຫຸຫຕ຺ຖກມ຺ມມູລໍ ລຠິຕ຺ວາ ກໂຣນ຺ຕິ. ຕໍ ມຕສກຸຓໂຕ ຊາຕຕ຺ຕາ ‘‘ມຕຊ’’ນ຺ຕິ ວຸຈ຺ຈຕິ, ອຕິຕິຂິຓໍ ໂຫຕິ. ປີຕນິສິຕນ຺ຕິ ອຸທກປີຕຎ຺ເຈວ ສິລາຍ ຈ ສຸນິຆໍສິຕໍ. ສງ຺ຆາຏິຍາຕິ ໂກສິຍາ. ສມ຺ປາຣຸຕນ຺ຕິ ປຣິໂຍນທ຺ຘໍ. ສມ຺ປລິເວຐິຕນ຺ຕິ ສມນ຺ຕໂຕ ເວຐິຕໍ.

໔໓໗. ຣໂຊຊລ຺ລິກສ຺ສາຕິ ຣໂຊຊລ຺ລຘາຣິໂນ. ອຸທໂກໂຣຫກສ຺ສາຕິ ທິວສສ຺ສ ຕິກ຺ຂຕ຺ຕຸໍ ອຸທກໍ ໂອໂຣຫນ຺ຕສ຺ສ. ຣຸກ຺ຂມູລິກສ຺ສາຕິ ຣຸກ຺ຂມູລວາສິໂນ. ອພ຺ໂຠກາສິກສ຺ສາຕິ ອພ຺ໂຠກາສວາສິໂນ. ອຸພ຺ຠຏ຺ຐກສ຺ສາຕິ ອຸທ຺ຘໍ ຐິຕກສ຺ສ. ປຣິຍາຍຠຕ຺ຕິກສ຺ສາຕິ ມາສວາເຣນ ວາ ອຑ຺ຒມາສວາເຣນ ວາ ຠຸຎ຺ຊນ຺ຕສ຺ສ. ສພ຺ພເມຕໍ ພາຫິຣສມເຍເນວ ກຖິຕໍ. ອິມສ຺ມິຎ຺ຫິ ສາສເນ ຈີວຣຘໂຣ ຠິກ຺ຂຸ ສງ຺ຆາຏິໂກຕິ ນ ວຸຈ຺ຈຕິ. ຣໂຊຊລ຺ລຘາຣຓາທິວຕານິ ອິມສ຺ມິໍ ສາສເນ ນຕ຺ຖິເຍວ. ພຸທ຺ຘວຈນສ຺ສ ພຸທ຺ຘວຈນເມວ ນາມໍ, ນ ມນ຺ຕາຕິ. ຣຸກ຺ຂມູລິໂກ, ອພ຺ໂຠກາສິໂກຕິ ເອຕ຺ຕກໍເຍວ ປນ ລພ຺ຠຕິ. ຕມ຺ປິ ພາຫິຣສມເຍເນວ ກຖິຕໍ. ຊາຕເມວ ນນ຺ຕິ ຕໍທິວເສ ຊາຕມຕ຺ຕໍເຍວ ນໍ. ສງ຺ຆາຏິກໍ ກເຣຍ຺ຍຸນ຺ຕິ ສງ຺ຆາຏິກໍ ວຕ຺ຖໍ ນິວາເສຕ຺ວາ ຈ ປາຣຸປິຕ຺ວາ ຈ ສງ຺ຆາຏິກໍ ກເຣຍ຺ຍຸໍ. ເອສ ນໂຍ ສພ຺ພຕ຺ຖ.

໔໓໘. ວິສຸທ຺ຘມຕ຺ຕານໍ ສມນຸປສ຺ສຕີຕິ ອຕ຺ຕານໍ ວິສຸຊ຺ຌນ຺ຕໍ ປສ຺ສຕິ. ວິສຸທ຺ໂຘຕິ ປນ ນ ຕາວ ວຕ຺ຕພ຺ໂພ. ປາໂມຊ຺ຊໍ ຊາຍຕີຕິ ຕຸຏ຺ຐາກາໂຣ ຊາຍຕິ. ປມຸທິຕສ຺ສ ປີຕີຕິ ຕຸຏ຺ຐສ຺ສ ສກລສຣີຣໍ ໂຂຠຍມານາ ປີຕິ ຊາຍຕິ. ປີຕິມນສ຺ສ ກາໂຍຕິ ປີຕິສມ຺ປຍຸຕ຺ຕສ຺ສ ປຸຄ຺ຄລສ຺ສ ນາມກາໂຍ. ປສ຺ສມ຺ຠຕີຕິ ວິຄຕທຣໂຖ ໂຫຕິ. ສຸຂໍ ເວເທຕີຕິ ກາຍິກມ຺ປິ ເຈຕສິກມ຺ປິ ສຸຂໍ ເວທິຍຕິ. ຈິຕ຺ຕໍ ສມາຘິຍຕີຕິ ອິມິນາ ເນກ຺ຂມ຺ມສຸເຂນ ສຸຂິຕສ຺ສ ຈິຕ຺ຕໍ ສມາຘິຍຕິ, ອປ຺ປນາປຕ຺ຕໍ ວິຍ ໂຫຕິ. ໂສ ເມຕ຺ຕາສຫຄເຕນ ເຈຕສາຕິ ເຫຏ຺ຐາ ກິເລສວເສນ ອາຣທ຺ຘາ ເທສນາ ປພ຺ພເຕ ວຸຏ຺ຐວຸຏ຺ຐິ ວິຍ ນທິໍ ຍຖານຸສນ຺ຘິນາ ພ຺ຣຫ຺ມວິຫາຣຠາວນໍ ໂອຕິຓ຺ຓາ. ຕຕ຺ຖ ຍໍ ວຕ຺ຕພ຺ພໍ ສິຍາ, ຕໍ ສພ຺ພໍ ວິສຸທ຺ຘິມຄ຺ເຄ ວຸຕ຺ຕເມວ. ເສຍ຺ຍຖາປິ, ຠິກ຺ຂເວ, ໂປກ຺ຂຣຓີຕິ ມຫາສີຫນາທສຸຕ຺ເຕ ມຄ຺ໂຄ ໂປກ຺ຂຣຓິຍາ ອຸປມິໂຕ, ອິຘ ສາສນໍ ອຸປມິຕນ຺ຕິ ເວທິຕພ຺ພໍ. ອາສວານໍ ຂຍາ ສມໂຓ ໂຫຕີຕິ ສພ຺ພກິເລສານໍ ສມິຕຕ຺ຕາ ປຣມຕ຺ຖສມໂຓ ໂຫຕີຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ຈູຬອສ຺ສປຸຣສຸຕ຺ຕວຓ຺ຓນາ ນິຏ຺ຐິຕາ.

ຈຕຸຕ຺ຖວຄ຺ຄວຓ຺ຓນາ ນິຏ຺ຐິຕາ.