໙. ມຫາສາໂຣປມສຸຕ຺ຕວຓ຺ຓນາ

໓໐໗. ເອວໍ ເມ ສຸຕນ຺ຕິ ມຫາສາໂຣປມສຸຕ຺ຕໍ. ຕຕ຺ຖ ອຈິຣປກ຺ກນ຺ເຕຕິ ສງ຺ຆໍ ຠິນ຺ທິຕ຺ວາ ຣຸຫິຣຸປ຺ປາທກມ຺ມໍ ກຕ຺ວາ ນຈິຣປກ຺ກນ຺ເຕ ສລິງ຺ເຄເນວ ປາຏິເຍກ຺ເກ ຊາເຕ.

ອິຘ, ຠິກ຺ຂເວ, ເອກຈ຺ໂຈ ກຸລປຸຕ຺ໂຕຕິ ກິຎ຺ຈາປິ ອສຸກກຸລປຸຕ຺ໂຕຕິ ນ ນິຍາມິໂຕ, ເທວທຕ຺ຕໍເຍວ ປນ ສນ຺ຘາຍ ອິທໍ ວຸຕ຺ຕນ຺ຕິ ເວທິຕພ຺ພໍ. ໂສ ຫິ ອສມ຺ຠິນ຺ນາຍ ມຫາສມ຺ມຕປເວຓິຍາ ໂອກ຺ກາກວໍເສ ຊາຕຕ຺ຕາ ຊາຕິກຸລປຸຕ຺ໂຕ. ໂອຕິຓ຺ໂຓຕິ ຍສ຺ສ ຊາຕິ ອນ຺ໂຕ ອນຸປວິຏ຺ຐາ, ໂສ ຊາຕິຍາ ໂອຕິຓ຺ໂຓ ນາມ. ຊຣາທີສຸປິ ເອເສວ ນໂຍ. ລາຠສກ຺ກາຣາທີສຸປິ ລາໂຠຕິ ຈຕ຺ຕາໂຣ ປຈ຺ຈຍາ. ສກ຺ກາໂຣຕິ ເຕສໍເຍວ ສຸກຕຠາໂວ. ສິໂລໂກຕິ ວຓ຺ຓຠຓນໍ. ອຠິນິພ຺ພຕ຺ເຕຕີຕິ ອຸປ຺ປາເທຕິ. ອປຎ຺ຎາຕາຕິ ທ຺ວິນ຺ນໍ ຊນານໍ ຐິຕຏ຺ຐາເນ ນ ປຎ຺ຎາຍນ຺ຕິ, ຆາສຈ຺ຉາທນມຕ຺ຕມ຺ປິ ນ ລຠນ຺ຕິ. ອປ຺ເປສກ຺ຂາຕິ ອປ຺ປປຣິວາຣາ, ປຸຣໂຕ ວາ ປຈ຺ຉໂຕ ວາ ຄຈ຺ຉນ຺ຕໍ ນ ລຠນ຺ຕິ.

ສາເຣນ ສາຣກຣຓີຍນ຺ຕິ ຣຸກ຺ຂສາເຣນ ກຕ຺ຕພ຺ພໍ ອກ຺ຂຈກ຺ກຍຸຄນງ຺ຄລາທິກໍ ຍໍກິຎ຺ຈິ. ສາຂາປລາສໍ ອຄ຺ຄເຫສິ ພ຺ຣຫ຺ມຈຣິຍສ຺ສາຕິ ມຄ຺ຄຜລສາຣສ຺ສ ສາສນພ຺ຣຫ຺ມຈຣິຍສ຺ສ ຈຕ຺ຕາໂຣ ປຈ຺ຈຍາ ສາຂາປລາສໍ ນາມ, ຕໍ ອຄ຺ຄເຫສິ. ເຕນ ຈ ໂວສານໍ ອາປາທີຕິ ເຕເນວ ຈ ອລເມຕ຺ຕາວຕາ ສາໂຣ ເມ ປຕ຺ໂຕຕິ ໂວສານໍ ອາປນ຺ໂນ.

໓໑໐. ຎາຓທສ຺ສນໍ ອາຣາເຘຕີຕິ ເທວທຕ຺ໂຕ ປຎ຺ຈາຠິຎ຺ໂຎ, ທິພ຺ພຈກ຺ຂຸ ຈ ປຎ຺ຈນ຺ນໍ ອຠິຎ຺ຎານໍ ມຕ຺ຖເກ ຐິຕໍ, ຕໍ ອິມສ຺ມິໍ ສຸຕ຺ເຕ ‘‘ຎາຓທສ຺ສນ’’ນ຺ຕິ ວຸຕ຺ຕໍ. ອຊານໍ ອປສ຺ສໍ ວິຫຣນ຺ຕີຕິ ກິຎ຺ຈິ ສຸຂຸມໍ ຣູປໍ ອຊານນ຺ຕາ ອນ຺ຕມໂສ ປໍສຸປິສາຈກມ຺ປິ ອປສ຺ສນ຺ຕາ ວິຫຣນ຺ຕິ.

໓໑໑. ອສມຍວິໂມກ຺ຂໍ ອາຣາເຘຕີຕິ, ‘‘ກຕໂມ ອສມຍວິໂມກ຺ໂຂ? ຈຕ຺ຕາໂຣ ຈ ອຣິຍມຄ຺ຄາ ຈຕ຺ຕາຣິ ຈ ສາມຎ຺ຎຜລານິ, ນິພ຺ພານຎ຺ຈ, ອຍໍ ອສມຍວິໂມກ຺ໂຂ’’ຕິ (ປຏິ. ມ. ໑.໒໑໓) ເອວໍ ວຸຕ຺ເຕ ນວໂລກຸຕ຺ຕຣຘມ຺ເມ ອາຣາເຘຕິ ສມ຺ປາເທຕິ ປຏິລຠຕິ. ໂລກິຍສມາປຕ຺ຕິໂຍ ຫິ ອປ຺ປິຕປ຺ປິຕກ຺ຂເຓເຍວ ປຈ຺ຈນີກຘມ຺ເມຫິ ວິມຸຈ຺ຈນ຺ຕິ, ຕສ຺ມາ, ‘‘ກຕໂມ ສມຍວິໂມກ຺ໂຂ? ຈຕ຺ຕາຣິ ຈ ຌານານິ ຈຕສ຺ໂສ ຈ ອຣູປາວຈຣສມາປຕ຺ຕິໂຍ, ອຍໍ ສມຍວິໂມກ຺ໂຂ’’ຕິ ເອວໍ ສມຍວິໂມກ຺ໂຂຕິ ວຸຕ຺ຕາ. ໂລກຸຕ຺ຕຣຘມ຺ມາ ປນ ກາເລນ ກາລໍ ວິມຸຈ຺ຈນ຺ຕິ, ສກິໍ ວິມຸຕ຺ຕານິ ຫິ ມຄ຺ຄຜລານິ ວິມຸຕ຺ຕາເນວ ໂຫນ຺ຕິ. ນິພ຺ພານໍ ສພ຺ພກິເລເສຫິ ອຈ຺ຈນ຺ຕໍ ວິມຸຕ຺ຕເມວາຕິ ອິເມ ນວ ຘມ຺ມາ ອສມຍວິໂມກ຺ໂຂຕິ ວຸຕ຺ຕາ.

ອກຸປ຺ປາ ເຈໂຕວິມຸຕ຺ຕີຕິ ອຣຫຕ຺ຕຜລວິມຸຕ຺ຕິ. ອຍມຕ຺ໂຖ ເອຕສ຺ສາຕິ ເອຕທຕ຺ຖໍ, ອຣຫຕ຺ຕຜລຕ຺ຖມິທໍ ພ຺ຣຫ຺ມຈຣິຍໍ. ອຍໍ ເອຕສ຺ສ ອຕ຺ໂຖຕິ ວຸຕ຺ຕໍ ໂຫຕິ. ເອຕໍ ສາຣນ຺ຕິ ເອຕໍ ອຣຫຕ຺ຕຜລໍ ພ຺ຣຫ຺ມຈຣິຍສ຺ສ ສາຣໍ. ເອຕໍ ປຣິໂຍສານນ຺ຕິ ເອຕໍ ອຣຫຕ຺ຕຜລໍ ພ຺ຣຫ຺ມຈຣິຍສ຺ສ ປຣິໂຍສານໍ, ເອສາ ໂກຏິ, ນ ອິໂຕ ປຣໍ ປຕ຺ຕພ຺ພໍ ອຕ຺ຖີຕິ ຍຖານຸສນ຺ຘິນາວ ເທສນໍ ນິຏ຺ຐເປສີຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ມຫາສາໂຣປມສຸຕ຺ຕວຓ຺ຓນາ ນິຏ຺ຐິຕາ.