໑໐. ຈູຬສາໂຣປມສຸຕ຺ຕວຓ຺ຓນາ

໓໑໒. ເອວໍ ເມ ສຸຕນ຺ຕິ ຈູຬສາໂຣປມສຸຕ຺ຕໍ. ຕຕ຺ຖ ປິງ຺ຄລໂກຈ຺ໂຉຕິ ໂສ ພ຺ຣາຫ຺ມໂຓ ປິງ຺ຄລຘາຕຸໂກ. ໂກຈ຺ໂຉຕິ ປນສ຺ສ ນາມໍ, ຕສ຺ມາ ‘‘ປິງ຺ຄລໂກຈ຺ໂຉ’’ຕິ ວຸຈ຺ຈຕິ. ສງ຺ຆິໂນຕິອາທີສຸ ປພ຺ພຊິຕສມູຫສງ຺ຂາໂຕ ສງ຺ໂຆ ເອເຕສໍ ອຕ຺ຖີຕິ ສງ຺ຆິໂນ. ສ຺ເວວ ຄໂຓ ເອເຕສໍ ອຕ຺ຖີຕິ ຄຓິໂນ. ອາຈາຣສິກ຺ຂາປນວເສນ ຕສ຺ສ ຄຓສ຺ສ ອາຈຣິຍາຕິ ຄຓາຈຣິຍາ. ຎາຕາຕິ ປຎ຺ຎາຕາ ປາກຏາ. ‘‘ອປ຺ປິຈ຺ຉາ ສນ຺ຕຸຏ຺ຐາ, ອປ຺ປິຈ຺ຉຕາຍ ວຕ຺ຖມ຺ປິ ນ ນິວາເສນ຺ຕີ’’ຕິອາທິນາ ນເຍນ ສມຸຄ຺ຄໂຕ ຍໂສ ເອເຕສໍ ອຕ຺ຖີຕິ ຍສສ຺ສິໂນ. ຕິຕ຺ຖກຣາຕິ ລທ຺ຘິກຣາ. ສາຘຸສມ຺ມຕາຕິ ອິເມ ສາຘຸ ສຸນ຺ທຣາ ສປ຺ປຸຣິສາຕິ ເອວໍ ສມ຺ມຕາ. ພຫຸຊນສ຺ສາຕິ ອສ຺ສຸຕວໂຕ ອນ຺ຘພາລປຸຖຸຊ຺ຊນສ຺ສ. ອິທານິ ເຕ ທສ຺ເສນ຺ໂຕ ເສຍ຺ຍຖິທໍ ປູຣໂຓຕິອາທິມາຫ. ຕຕ຺ຖ ປູຣໂຓຕິ ຕສ຺ສ ສຕ຺ຖຸປຏິຎ຺ຎສ຺ສ ນາມໍ. ກສ຺ສໂປຕິ ໂຄຕ຺ຕໍ. ໂສ ກິຣ ອຎ຺ຎຕຣສ຺ສ ກຸລສ຺ສ ເອກູນທາສສຕໍ ປູຣຍມາໂນ ຊາໂຕ, ເຕນສ຺ສ ‘‘ປູຣໂຓ’’ຕິ ນາມໍ ອກໍສຸ. ມງ຺ຄລທາສຕ຺ຕາ ຈສ຺ສ ‘‘ທຸກ຺ກຏ’’ນ຺ຕິ ວຕ຺ຕາ ນຕ຺ຖິ, ອກຕໍ ວາ ນ ກຕນ຺ຕິ. ‘‘ໂສ ກິມຫເມຕ຺ຖ ວສາມີ’’ຕິ ປລາຍິ. ອຖສ຺ສ ໂຈຣາ ວຕ຺ຖານິ ອຈ຺ຉິນ຺ທິໍສຸ. ໂສ ປຓ຺ເຓນ ວາ ຕິເຓນ ວາ ປຏິຈ຺ຉາເທຕຸມ຺ປິ ອຊານນ຺ໂຕ ຊາຕຣູເປເນວ ເອກໍ ຄາມໍ ປາວິສິ. ມນຸສ຺ສາ ຕໍ ທິສ຺ວາ, ‘‘ອຍໍ ສມໂຓ ອຣຫາ ອປ຺ປິຈ຺ໂຉ, ນຕ຺ຖິ ອິມິນາ ສທິໂສ’’ຕິ ປູວຠຕ຺ຕາທີນິ ຄເຫຕ຺ວາ ອຸປສງ຺ກມນ຺ຕິ. ໂສ ‘‘ມຍ຺ຫໍ ສາຏກໍ ອນິວຕ຺ຖຠາເວນ ອິທໍ ອຸປ຺ປນ຺ນ’’ນ຺ຕິ ຕໂຕ ປຏ຺ຐາຍ ສາຏກໍ ລຠິຕ຺ວາປິ ນ ນິວາເສສິ, ຕເທວ ປພ຺ພຊ຺ຊໍ ອຄ຺ຄເຫສິ. ຕສ຺ສ ສນ຺ຕິເກ ອຎ຺ເຎປິ ປຎ຺ຈສຕາ ມນຸສ຺ສາ ປພ຺ພຊິໍສຸ, ຕໍ ສນ຺ຘາຍາຫ ‘‘ປູຣໂຓ ກສ຺ສໂປ’’ຕິ.

ມກ຺ຂລີຕິ ຕສ຺ສ ນາມໍ. ໂຄສາລາຍ ຊາຕຕ຺ຕາ ໂຄສາໂລຕິ ທຸຕິຍໍ ນາມໍ. ຕໍ ກິຣ ສກທ຺ທມາຍ ຠູມິຍາ ເຕລຆຏໍ ຄເຫຕ຺ວາ ຄຈ຺ຉນ຺ຕໍ, ‘‘ຕາຕ, ມາ ຂລີ’’ຕິ ສາມິໂກ ອາຫ. ໂສ ປມາເທນ ຂລິຕ຺ວາ ປຕິຕ຺ວາ ສາມິກສ຺ສ ຠເຍນ ປລາຍິຕຸໍ ອາຣທ຺ໂຘ. ສາມິໂກ ອຸປຘາວິຕ຺ວາ ສາຏກກຓ຺ເຓ ອຄ຺ຄເຫສິ. ໂສປິ ສາຏກໍ ຉຑ຺ເຑຕ຺ວາ ອເຈລໂກ ຫຸຕ຺ວາ ປລາຍິ, ເສສໍ ປູຣຓສທິສເມວ.

ອຊິໂຕຕິ ຕສ຺ສ ນາມໍ. ເກສກມ຺ພລໍ ຘາເຣຕີຕິ ເກສກມ຺ພໂລ. ອິຕິ ນາມທ຺ວຍໍ ສໍສນ຺ທິຕ຺ວາ ‘‘ອຊິໂຕ ເກສກມ຺ພໂລ’’ຕິ ວຸຈ຺ຈຕິ. ຕຕ຺ຖ ເກສກມ຺ພໂລ ນາມ ມນຸສ຺ສເກເສຫິ ກຕກມ຺ພໂລ, ຕໂຕ ປຏິກິຏ຺ຐຕຣໍ ວຕ຺ຖໍ ນາມ ນຕ຺ຖິ. ຍຖາຫ – ‘‘ເສຍ຺ຍຖາປິ, ຠິກ຺ຂເວ, ຍານິ ການິຈິ ຕນ຺ຕາວຸຕານໍ ວຕ຺ຖານໍ, ເກສກມ຺ພໂລ ເຕສໍ ປຏິກິຏ຺ໂຐ ອກ຺ຂາຍຕິ, ເກສກມ຺ພໂລ, ຠິກ຺ຂເວ, ສີເຕ ສີໂຕ ອຸຓ຺ເຫ ອຸຓ຺ໂຫ ທຸພ຺ພຓ຺ໂຓ ທຸຄ຺ຄນ຺ໂຘ ທຸກ຺ຂສມ຺ຜສ຺ໂສ’’ຕິ (ອ. ນິ. ໓.໑໓໘).

ປກຸໂຘຕິ ຕສ຺ສ ນາມໍ. ກຈ຺ຈາຍໂນຕິ ໂຄຕ຺ຕໍ. ອິຕິ ນາມໂຄຕ຺ຕໍ ສໍສນ຺ທິຕ຺ວາ, ‘‘ປກຸໂຘ ກຈ຺ຈາຍໂນ’’ຕິ ວຸຈ຺ຈຕິ. ສີຕຸທກປຏິກ຺ຂິຕ຺ຕໂກ ເອສ, ວຈ຺ຈໍ ກຕ຺ວາປິ ອຸທກກິຈ຺ຈໍ ນ ກໂຣຕິ, ອຸຓ຺ໂຫທກໍ ວາ ກຎ຺ຊິຍໍ ວາ ລຠິຕ຺ວາ ກໂຣຕິ, ນທິໍ ວາ ມຄ຺ໂຄທກໍ ວາ ອຕິກ຺ກມ຺ມ, ‘‘ສີລໍ ເມ ຠິນ຺ນ’’ນ຺ຕິ ວາລິກຖູປໍ ກຕ຺ວາ ສີລໍ ອຘິຏ຺ຐາຍ ຄຈ຺ຉຕິ, ເອວຣູໂປ ນິສ຺ສິຣິກລທ຺ຘິໂກ ເອສ.

ສຎ຺ຊໂຍຕິ ຕສ຺ສ ນາມໍ. ເພລຏ຺ຐສ຺ສ ປຸຕ຺ໂຕຕິ ເພລຏ຺ຐປຸຕ຺ໂຕ. ອມ຺ຫາກໍ ຄຓ຺ຐນກິເລໂສ ປລິພຸຊ຺ຌນກິເລໂສ ນຕ຺ຖິ, ກິເລສຄຓ຺ຐຣຫິຕາ ມຍນ຺ຕິ ເອວໍ ວາທິຕາຍ ລທ຺ຘນາມວເສນ ນິຄຓ຺ໂຐ. ນາຏສ຺ສ ປຸຕ຺ໂຕຕິ ນາຏປຸຕ຺ໂຕ. ອພ຺ຠຎ຺ຎໍສູຕິ ຍຖາ ເຕສໍ ປຏິຎ຺ຎາ, ຕເຖວ ຊານິໍສຸ. ອິທໍ ວຸຕ຺ຕໍ ໂຫຕິ – ສເຈ ເນສໍ ສາ ປຏິຎ຺ຎາ ນິຍ຺ຍານິກາ ສພ຺ເພ ອພ຺ຠຎ຺ຎໍສຸ. ໂນ ເຈ, ນ ອພ຺ຠຎ຺ຎໍສຸ. ຕສ຺ມາ ກິໍ ເຕສໍ ປຏິຎ຺ຎາ ນິຍ຺ຍານິກາ ນ ນິຍ຺ຍານິກາຕິ, ອຍເມຕສ຺ສ ປຎ຺ຫສ຺ສ ອຕ຺ໂຖ. ອຖ ຠຄວາ ເນສໍ ອນິຍ຺ຍານິກຠາວກຖເນນ ອຕ຺ຖາຠາວໂຕ ອລນ຺ຕິ ປຏິກ຺ຂິປິຕ຺ວາ ອຸປມາຍ ອຕ຺ຖໍ ປເວເທນ຺ໂຕ ຘມ຺ມເມວ ເທເສຕຸໍ, ຘມ຺ມໍ, ເຕ ພ຺ຣາຫ຺ມຓ, ເທເສສ຺ສາມີຕິ ອາຫ.

໓໒໐. ຕຕ຺ຖ ສຈ຺ຉິກິຣິຍາຍາຕິ ສຈ຺ຉິກຣຓຕ຺ຖໍ. ນ ຉນ຺ທໍ ຊເນຕີຕິ ກຕ຺ຕຸກມ຺ຍຕາຉນ຺ທໍ ນ ຊນຍຕິ. ນ ວາຍມຕີຕິ ວາຍາມໍ ປຣກ຺ກມໍ ນ ກໂຣຕິ. ໂອລີນວຸຕ຺ຕິໂກ ຈ ໂຫຕີຕິ ລີນຊ຺ຌາສໂຍ ໂຫຕິ. ສາຖລິໂກຕິ ສິຖິລຄ຺ຄາຫີ, ສາສນໍ ສິຖິລໍ ກຕ຺ວາ ຄຓ຺ຫາຕິ, ທຬ຺ຫໍ ນ ຄຓ຺ຫາຕິ.

໓໒໓. ອິຘ, ພ຺ຣາຫ຺ມຓ ຠິກ຺ຂຸ, ວິວິຈ຺ເຈວ ກາເມຫີຕິ ກຖໍ ອິເມ ປຐມຊ຺ຌານາທິຘມ຺ມາ ຎາຓທສ຺ສເນນ ອຸຕ຺ຕຣິຕຣາ ຊາຕາຕິ? ນິໂຣຘປາທກຕ຺ຕາ. ເຫຏ຺ຐາ ປຐມຊ຺ຌານາທິຘມ຺ມາ ຫິ ວິປສ຺ສນາປາທກາ, ອິຘ ນິໂຣຘປາທກາ, ຕສ຺ມາ ອຸຕ຺ຕຣິຕຣາ ຊາຕາຕິ ເວທິຕພ຺ພາ. ອິຕິ ຠຄວາ ອິທມ຺ປິ ສຸຕ຺ຕໍ ຍຖານຸສນ຺ຘິນາວ ນິຏ຺ຐເປສິ. ເທສນາວສາເນ ພ຺ຣາຫ຺ມໂຓ ສຣເຓສຸ ປຕິຏ຺ຐິໂຕຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ຈູຬສາໂຣປມສຸຕ຺ຕວຓ຺ຓນາ ນິຏ຺ຐິຕາ.

ຕຕິຍວຄ຺ຄວຓ຺ຓນາ ນິຏ຺ຐິຕາ.