໕. ນິວາປສຸຕ຺ຕວຓ຺ຓນາ

໒໖໑. ເອວໍ ເມ ສຸຕນ຺ຕິ ນິວາປສຸຕ຺ຕໍ. ຕຕ຺ຖ ເນວາປິໂກຕິ ໂຍ ມິຄານໍ ຄຫຓຕ຺ຖາຍ ອຣຎ຺ເຎ ຕິຓພີຊານິ ວປຕິ ‘‘ອິທໍ ຕິຓໍ ຂາທິຕຸໍ ອາຄເຕ ມິເຄ ສຸຂໍ ຄຓ຺ຫິສ຺ສາມີ’’ຕິ. ນິວາປນ຺ຕິ ວປ຺ປໍ. ນິວຸຕ຺ຕນ຺ຕິ ວປິຕໍ. ມິຄຊາຕາຕິ ມິຄຆຏາ. ອນຸປຂຊ຺ຊາຕິ ອນຸປວິສິຕ຺ວາ. ມຸຈ຺ຉິຕາຕິ ຕຓ຺ຫາມຸຈ຺ຉນາຍ ມຸຈ຺ຉິຕາ, ຕຓ຺ຫາຍ ຫທຍໍ ປວິສິຕ຺ວາ ມຸຈ຺ຉນາກາຣໍ ປາປິຕາຕິ ອຕ຺ໂຖ. ມທໍ ອາປຊ຺ຊິສ຺ສນ຺ຕີຕິ ມານມທໍ ອາປຊ຺ຊິສ຺ສນ຺ຕິ. ປມາທນ຺ຕິ ວິສ຺ສຏ຺ຐສຕິຠາວໍ. ຍຖາກາມກຣຓີຍາ ຠວິສ຺ສນ຺ຕີຕິ ຍຖາ ອິຈ຺ຉິສ຺ສາມ, ຕຖາ ກາຕພ຺ພາ ຠວິສ຺ສນ຺ຕິ. ອິມສ຺ມິໍ ນິວາເປຕິ ອິມສ຺ມິໍ ນິວາປຏ຺ຐາເນ. ເອກໍ ກິຣ ນິວາປຕິຓໍ ນາມ ອຕ຺ຖິ ນິທາຆຠທ຺ທກໍ, ຕໍ ຍຖາ ຍຖາ ນິທາໂຆ ໂຫຕິ, ຕຖາ ຕຖາ ນີວາຣວນໍ ວິຍ ເມຆມາລາ ວິຍ ຈ ເອກຄ຺ຆນໍ ໂຫຕິ, ຕໍ ລຸທ຺ທກາ ເອກສ຺ມິໍ ອຸທກຜາສຸກຏ຺ຐາເນ ກສິຕ຺ວາ ວປິຕ຺ວາ ວຕິໍ ກຕ຺ວາ ທ຺ວາຣໍ ໂຍເຊຕ຺ວາ ຣກ຺ຂນ຺ຕິ. ອຖ ຍທາ ມຫານິທາເຆ ສພ຺ພຕິຓານິ ສຸກ຺ຂານິ ໂຫນ຺ຕິ, ຊິວ຺ຫາເຕມນມຕ຺ຕມ຺ປິ ອຸທກໍ ທຸລ຺ລຠໍ ໂຫຕິ, ຕທາ ມິຄຊາຕາ ສຸກ຺ຂຕິຓານິ ເຈວ ປຸຣາຓປຓ຺ຓານິ ຈ ຂາທນ຺ຕາ ກມ຺ປມານາ ວິຍ ວິຈຣນ຺ຕາ ນິວາປຕິຓສ຺ສ ຄນ຺ຘໍ ຆາຍິຕ຺ວາ ວຘພນ຺ຘນາທີນິ ອຄຓຍິຕ຺ວາ ວຕິໍ ອຊ຺ໂຌຕ຺ຖຣນ຺ຕາ ປວິສນ຺ຕິ. ເຕສຎ຺ຫິ ນິວາປຕິຓໍ ອຕິວິຍ ປິຍໍ ໂຫຕິ ມນາປໍ. ເນວາປິໂກ ເຕ ທິສ຺ວາ ທ຺ເວ ຕີຓິ ທິວສານິ ປມຕ຺ໂຕ ວິຍ ໂຫຕິ, ທ຺ວາຣໍ ວິວຣິຕ຺ວາ ຕິຏ຺ຐຕິ. ອນ຺ໂຕນິວາປຏ຺ຐາເນ ຕຫິໍ ຕຫິໍ ອຸທກອາວາຏກາປິ ໂຫນ຺ຕິ, ມິຄາ ວິວຏທ຺ວາເຣນ ປວິສິຕ຺ວາ ຂາທິຕມຕ຺ຕກໍ ປິວິຕມຕ຺ຕກເມວ ກຕ຺ວາ ປກ຺ກມນ຺ຕິ, ປຸນທິວເສ ກິຎ຺ຈິ ນ ກໂຣນ຺ຕີຕິ ກຓ຺ເຓ ຈາລຍມານາ ຂາທິຕ຺ວາ ປິວິຕ຺ວາ ອຕຣມານາ ຄຈ຺ຉນ຺ຕິ, ປຸນທິວເສ ໂກຈິ ກິຎ຺ຈິ ກຕ຺ຕາ ນຕ຺ຖີຕິ ຍາວທຕ຺ຖໍ ຂາທິຕ຺ວາ ປິວິຕ຺ວາ ມຓ຺ຑລຄຸມ຺ພໍ ປວິສິຕ຺ວາ ນິປຊ຺ຊນ຺ຕິ. ລຸທ຺ທກາ ເຕສໍ ປມຕ຺ຕຠາວໍ ຊານິຕ຺ວາ ທ຺ວາຣໍ ປິຘາຍ ສມ຺ປຣິວາເຣຕ຺ວາ ໂກຏິໂຕ ປຏ຺ຐາຍ ໂກຏ຺ເຏຕ຺ວາ ຄຈ຺ຉນ຺ຕິ, ເອວໍ ເຕ ຕສ຺ມິໍ ນິວາເປ ເນວາປິກສ຺ສ ຍຖາກາມກຣຓີຍາ ຠວນ຺ຕິ.

໒໖໒. ຕຕ຺ຣ, ຠິກ຺ຂເວຕິ, ຠິກ຺ຂເວ, ເຕສຸ ມິຄຊາເຕສຸ. ປຐມາ ມິຄຊາຕາຕິ, ມິຄຊາຕາ ປຐມທຸຕິຍາ ນາມ ນຕ຺ຖິ. ຠຄວາ ປນ ອາຄຕປຏິປາຏິວເສນ ກປ຺ເປຕ຺ວາ ປຐມາ, ທຸຕິຍາ, ຕຕິຍາ, ຈຕຸຕ຺ຖາຕິ ນາມໍ ອາໂຣເປຕ຺ວາ ທສ຺ເສສິ. ອິທ຺ຘານຸຠາວາຕິ ຍຖາກາມໍ ກຕ຺ຕພ຺ພຠາວໂຕ; ວສີຠາໂວເຍວ ຫິ ເອຕ຺ຖ ອິທ຺ຘີຕິ ຈ ອານຸຠາໂວຕິ ຈ ອຘິປ຺ເປໂຕ.

໒໖໓. ຠຍໂຠຄາຕິ ຠເຍນ ໂຠຄໂຕ. ພລວີຣິຍນ຺ຕິ ອປຣາປຣໍ ສຎ຺ຈຣຓວາໂຍຘາຕຸ, ສາ ປຣິຫາຍີຕິ ອຕ຺ໂຖ.

໒໖໔. ອຸປນິສ຺ສາຍ ອາສຍໍ ກປ຺ເປຍ຺ຍາມາຕິ ອນ຺ໂຕ ນິປຊ຺ຊິຕ຺ວາ ຂາທນ຺ຕານມ຺ປິ ຠຍເມວ, ພາຫິຣໂຕ ອາຄນ຺ຕ຺ວາ ຂາທນ຺ຕານມ຺ປິ ຠຍເມວ, ມຍໍ ປນ ອມຸໍ ນິວາປຏ຺ຐານໍ ນິສ຺ສາຍ ເອກມນ຺ເຕ ອາສຍໍ ກປ຺ເປຍ຺ຍາມາຕິ ຈິນ຺ຕຍິໍສຸ. ອຸປນິສ຺ສາຍ ອາສຍໍ ກປ຺ປຍິໍສູຕິ ລຸທ຺ທກາ ນາມ ນ ສພ຺ພກາລໍ ອປ຺ປມຕ຺ຕາ ໂຫນ຺ຕິ. ມຍໍ ຕຕ຺ຖ ຕຕ຺ຖ ມຓ຺ຑລຄຸມ຺ເພສຸ ເຈວ ວຕິປາເທສຸ ຈ ນິປຊ຺ຊິຕ຺ວາ ເອເຕສຸ ມຸຂໂຘວນຕ຺ຖໍ ວາ ອາຫາຣກິຈ຺ຈກຣຓຕ຺ຖໍ ວາ ປກ຺ກນ຺ເຕສຸ ນິວາປວຕ຺ຖຸໍ ປວິສິຕ຺ວາ ຂາທິຕມຕ຺ຕໍ ກຕ຺ວາ ອມ຺ຫາກໍ ວສນຏ຺ຐານໍ ປວິສິສ຺ສາມາຕິ ນິວາປວຕ຺ຖຸໍ ອຸປນິສ຺ສາຍ ຄຫເນສຸ ຄຸມ຺ພວຕິປາທາທີສຸ ອາສຍໍ ກປ຺ປຍິໍສຸ. ຠຸຎ຺ຊິໍສູຕິ ວຸຕ຺ຕນເຍນ ລຸທ຺ທການໍ ປມາທກາລໍ ຎຕ຺ວາ ສີຆໍ ສີຆໍ ປວິສິຕ຺ວາ ຠຸຎ຺ຊິໍສຸ. ເກຕພິໂນຕິ ສິກ຺ຂິຕເກຣາຏິກາ. ອິທ຺ຘິມນ຺ຕາຕິ ອິທ຺ຘິມນ຺ໂຕ ວິຍ. ປຣຊນາຕິ ຍກ຺ຂາ. ອິເມ ນ ມິຄຊາຕາຕິ. ອາຄຕິໍ ວາ ຄຕິໍ ວາຕິ ອິມິນາ ນາມ ຐາເນນ ອາຄຈ຺ຉນ຺ຕິ, ອມຸຕ຺ຣ ຄຈ຺ຉນ຺ຕີຕິ ອິທໍ ເນສໍ ນ ຊານາມ. ທຓ຺ຑວາກຣາຫີຕິ ທຓ຺ຑວາກຣຊາເລຫິ. ສມນ຺ຕາ ສປ຺ປເທສໍ ອນຸປຣິວາເຣສຸນ຺ຕິ ອຕິມາຍາວິໂນ ເອເຕ, ນ ທູຣໍ ຄມິສ຺ສນ຺ຕິ, ສນ຺ຕິເກເຍວ ນິປນ຺ນາ ຠວິສ຺ສນ຺ຕີຕິ ນິວາປກ຺ເຂຕ຺ຕສ຺ສ ສມນ຺ຕາ ສປ຺ປເທສໍ ມຫນ຺ຕໍ ໂອກາສໍ ອນຸປຣິວາເຣສຸໍ. ອທ຺ທສໍສູຕິ ເອວໍ ປຣິວາເຣຕ຺ວາ ວາກຣຊາລໍ ສມນ຺ຕໂຕ ຈາເລຕ຺ວາ ໂອໂລເກນ຺ຕາ ອທ຺ທສໍສຸ. ຍຕ຺ຖ ເຕຕິ ຍສ຺ມິໍ ຐາເນ ເຕ ຄາຫໍ ອຄມໍສຸ, ຕໍ ຐານໍ ອທ຺ທສໍສູຕິ ອຕ຺ໂຖ.

໒໖໕. ຍໍນູນ ມຍໍ ຍຕ຺ຖ ອຄຕີຕິ ເຕ ກິຣ ເອວໍ ຈິນ຺ຕຍິໍສຸ – ‘‘ອນ຺ໂຕ ນິປຊ຺ຊິຕ຺ວາ ອນ຺ໂຕ ຂາທນ຺ຕານມ຺ປິ ຠຍເມວ, ພາຫິຣໂຕ ອາຄນ຺ຕ຺ວາ ຂາທນ຺ຕານມ຺ປິ ສນ຺ຕິເກ ວສິຕ຺ວາ ຂາທນ຺ຕານມ຺ປິ ຠຍເມວ, ເຕປິ ຫິ ວາກຣຊາເລນ ປຣິກ຺ຂິປິຕ຺ວາ ຄຫິຕາເຍວາ’’ຕິ, ເຕນ ເຕສໍ ເອຕທໂຫສິ – ‘‘ຍໍນູນ ມຍໍ ຍຕ຺ຖ ເນວາປິກສ຺ສ ຈ ເນວາປິກປຣິສາຍ ຈ ອຄຕິ ອວິສໂຍ, ຕຕ຺ຖ ຕຕ຺ຖ ເສຍ຺ຍໍ ກປ຺ເປຍ຺ຍາມາ’’ຕິ. ອຎ຺ເຎ ຆຏ຺ເຏສ຺ສນ຺ຕີຕິ ຕໂຕ ຕໂຕ ທູຣຕຣວາສິໂນ ອຎ຺ເຎ ຆຏ຺ເຏສ຺ສນ຺ຕິ. ເຕ ຆຏ຺ຏິຕາ ອຎ຺ເຎຕິ ເຕປິ ຆຏ຺ຏິຕາ ອຎ຺ເຎ ຕໂຕ ທູຣຕຣວາສິໂນ ຆຏ຺ເຏສ຺ສນ຺ຕິ. ເອວໍ ອິມໍ ນິວາປໍ ນິວຸຕ຺ຕໍ ສພ຺ພໂສ ມິຄຊາຕາ ປຣິມຸຈ຺ຈິສ຺ສນ຺ຕີຕິ ເອວໍ ອິມໍ ອມ຺ເຫຫິ ນິວຸຕ຺ຕໍ ນິວາປໍ ສພ຺ເພ ມິຄຆຏາ ມິຄສງ຺ຆາ ວິສ຺ສຊ຺ເຊສ຺ສນ຺ຕິ ປຣິຈ຺ຈຊິສ຺ສນ຺ຕິ. ອຊ຺ຌຸເປກ຺ເຂຍ຺ຍາມາຕິ ເຕສໍ ຄຫເຓ ອພ຺ຍາວຏາ ຠເວຍ຺ຍາມາຕິ; ຍຖາ ຕຖາ ອາຄຈ຺ຉນ຺ເຕສຸ ຫິ ຕຣຸຓໂປຕໂກ ວາ ມຫລ຺ລໂກ ວາ ທຸພ຺ພໂລ ວາ ຍູຖປຣິຫີໂນ ວາ ສກ຺ກາ ໂຫນ຺ຕິ ລທ຺ຘຸໍ, ອນາຄຈ຺ຉນ຺ເຕສຸ ກິຎ຺ຈິ ນຕ຺ຖິ. ອຊ຺ຌຸເປກ຺ຂິໍສຸ ໂຂ, ຠິກ຺ຂເວຕິ ເອວໍ ຈິນ຺ເຕຕ຺ວາ ອພ຺ຍາວຏາວ ອເຫສຸໍ.

໒໖໗. ອມຸໍ ນິວາປໍ ນິວຸຕ຺ຕໍ ມາຣສ຺ສ ອມູນິ ຈ ໂລກາມິສານີຕິ ເອຕ຺ຖ ນິວາໂປຕິ ວາ ໂລກາມິສານີຕິ ວາ ວຏ຺ຏາມິສຠູຕານໍ ປຎ຺ຈນ຺ນໍ ກາມຄຸຓານເມຕໍ ອຘິວຈນໍ. ມາໂຣ ນ ຈ ພີຊານິ ວິຍ ກາມຄຸເຓ ວເປນ຺ໂຕ ອາຫິຓ຺ຑຕິ, ກາມຄຸຓຄິທ຺ຘານໍ ປນ ອຸປຣິ ວສໍ ວຕ຺ເຕຕິ, ຕສ຺ມາ ກາມຄຸຓາ ມາຣສ຺ສ ນິວາປາ ນາມ ໂຫນ຺ຕິ. ເຕນ ວຸຕ຺ຕໍ – ‘‘ອມຸໍ ນິວາປໍ ນິວຸຕ຺ຕໍ ມາຣສ຺ສາ’’ຕິ. ນ ປຣິມຸຈ຺ຈິໍສຸ ມາຣສ຺ສ ອິທ຺ຘານຸຠາວາຕິ ມາຣສ຺ສ ວສໍ ຄຕາ ອເຫສຸໍ, ຍຖາກາມກຣຓີຍາ. ອຍໍ ສປຸຕ຺ຕຠຣິຍປພ຺ພຊ຺ຊາຍ ອາຄຕອຸປມາ.

໒໖໘. ເຈໂຕວິມຸຕ຺ຕິ ປຣິຫາຍີຕິ ເອຕ຺ຖ ເຈໂຕວິມຸຕ຺ຕິ ນາມ ອຣຎ຺ເຎ ວສິສ຺ສາມາຕິ ອຸປ຺ປນ຺ນອຊ຺ຌາສໂຍ; ໂສ ປຣິຫາຍີຕິ ອຕ຺ໂຖ. ຕຖູປເມ ອຫໍ ອິເມ ທຸຕິເຍຕິ ອຍໍ ພ຺ຣາຫ຺ມຓຘມ຺ມິກປພ຺ພຊ຺ຊາຍ ອຸປມາ. ພ຺ຣາຫ຺ມຓາ ຫິ ອຏ຺ຐຈຕ຺ຕາລີສວສ຺ສານິ ໂກມາຣພ຺ຣຫ຺ມຈຣິຍໍ ຈຣິຕ຺ວາ ວຏ຺ຏຸປຈ຺ເຉທຠເຍນ ປເວຓິໍ ຆຏຍິສ຺ສາມາຕິ ຘນໍ ປຣິເຍສິຕ຺ວາ ຠຣິຍໍ ຄເຫຕ຺ວາ ອຄາຣມຊ຺ເຌ ວສນ຺ຕາ ເອກສ຺ມິໍ ປຸຕ຺ເຕ ຊາເຕ ‘‘ອມ຺ຫາກໍ ປຸຕ຺ໂຕ ຊາໂຕ ວຏ຺ຏໍ ນ ອຸຈ຺ຉິນ຺ນໍ ປເວຓິ ຆຏິຕາ’’ຕິ ປຸນ ນິກ຺ຂມິຕ຺ວາ ປພ຺ພຊນ຺ຕິ ວາ ຕເມວ ວາ ສ’ກລຕ຺ຕວາສໍ ວສນ຺ຕິ.

໒໖໙. ເອວຎ຺ຫິ ເຕ, ຠິກ຺ຂເວ, ຕຕິຍາປິ ສມຓພ຺ຣາຫ຺ມຓາ ນ ປຣິມຸຈ຺ຈິໍສູຕິ ປຸຣິມາ ວິຍ ເຕປິ ມາຣສ຺ສ ອິທ຺ຘານຸຠາວາ ນ ມຸຈ຺ຈິໍສຸ; ຍຖາກາມກຣຓີຍາວ ອເຫສຸໍ. ກິໍ ປນ ເຕ ອກໍສູຕິ? ຄາມນິຄມຣາຊຘານິໂຍ ໂອສຣິຕ຺ວາ ເຕສຸ ເຕສຸ ອາຣາມອຸຍ຺ຍານຏ຺ຐາເນສຸ ອສ຺ສມໍ ມາເປຕ຺ວາ ນິວສນ຺ຕາ ກຸລທາຣເກ ຫຕ຺ຖິອສ຺ສຣຖສິປ຺ປາທີນິ ນານປ຺ປກາຣານິ ສິປ຺ປານິ ສິກ຺ຂາເປສຸໍ. ອິຕິ ເຕ ວາກຣຊາເລນ ຕຕິຍາ ມິຄຊາຕາ ວິຍ ມາຣສ຺ສ ປາປິມໂຕ ທິຏ຺ຐິຊາເລນ ປຣິກ຺ຂິປິຕ຺ວາ ຍຖາກາມກຣຓີຍາ ອເຫສຸໍ.

໒໗໐. ຕຖູປເມ ອຫໍ ອິເມ ຈຕຸຕ຺ເຖຕິ ອຍໍ ອິມສ຺ສ ສາສນສ຺ສ ອຸປມາ ອາຫຏາ.

໒໗໑. ອນ຺ຘມກາສິ ມາຣນ຺ຕິ ນ ມາຣສ຺ສ ອກ຺ຂີນິ ຠິນ຺ທິ. ວິປສ຺ສນາປາທກຊ຺ຌານໍ ສມາປນ຺ນສ຺ສ ປນ ຠິກ຺ຂຸໂນ ອິມໍ ນາມ ອາຣມ຺ມຓໍ ນິສ຺ສາຍ ຈິຕ຺ຕໍ ວຕ຺ຕຕີຕິ ມາໂຣ ປສ຺ສິຕຸໍ ນ ສກ຺ໂກຕິ. ເຕນ ວຸຕ຺ຕໍ – ‘‘ອນ຺ຘມກາສິ ມາຣ’’ນ຺ຕິ. ອປທໍ ວຘິຕ຺ວາ ມາຣຈກ຺ຂຸນ຺ຕິ ເຕເນວ ປຣິຍາເຍນ ຍຖາ ມາຣສ຺ສ ຈກ຺ຂຸ ອປທໍ ໂຫຕິ ນິປ຺ປທໍ, ອປ຺ປຕິຏ຺ຐໍ, ນິຣາຣມ຺ມຓໍ, ເອວໍ ວຘິຕ຺ວາຕິ ອຕ຺ໂຖ. ອທສ຺ສນໍ ຄໂຕ ປາປິມໂຕຕິ ເຕເນວ ປຣິຍາເຍນ ມາຣສ຺ສ ປາປິມໂຕ ອທສ຺ສນໍ ຄໂຕ. ນ ຫິ ໂສ ອຕ຺ຕໂນ ມໍສຈກ຺ຂຸນາ ຕສ຺ສ ວິປສ຺ສນາປາທກຊ຺ຌານໍ ສມາປນ຺ນສ຺ສ ຠິກ຺ຂຸໂນ ຎາຓສຣີຣໍ ທຏ຺ຐຸໍ ສກ຺ໂກຕິ. ປຎ຺ຎາຍ ຈສ຺ສ ທິສ຺ວາ ອາສວາ ປຣິກ຺ຂີຓາ ໂຫນ຺ຕີຕິ ມຄ຺ຄປຎ຺ຎາຍ ຈຕ຺ຕາຣິ ອຣິຍສຈ຺ຈານິ ທິສ຺ວາ ຈຕ຺ຕາໂຣ ອາສວາ ປຣິກ຺ຂີຓາ ໂຫນ຺ຕິ. ຕິຓ຺ໂຓ ໂລເກ ວິສຕ຺ຕິກນ຺ຕິ ໂລເກ ສຕ຺ຕວິສຕ຺ຕຠາເວນ ວິສຕ຺ຕິກາຕິ ເອວໍ ສງ຺ຂໍ ຄຕໍ. ອຖ ວາ ‘‘ວິສຕ຺ຕິກາຕິ ເກນຏ຺ເຐນ ວິສຕ຺ຕິກາ? ວິສຕາຕິ ວິສຕ຺ຕິກາ ວິສຏາຕິ ວິສຕ຺ຕິກາ, ວິປຸລາຕິ ວິສຕ຺ຕິກາ, ວິສາລາຕິ ວິສຕ຺ຕິກາ, ວິສມາຕິ ວິສຕ຺ຕິກາ, ວິສກ຺ກຕີຕິ ວິສຕ຺ຕິກາ, ວິສໍ ຫຣຕີຕິ ວິສຕ຺ຕິກາ, ວິສໍວາທິກາຕິ ວິສຕ຺ຕິກາ, ວິສມູລາຕິ ວິສຕ຺ຕິກາ, ວິສຜລາຕິ ວິສຕ຺ຕິກາ, ວິສປຣິໂຠຄາຕິ ວິສຕ຺ຕິກາ, ວິສາລາ ວາ ປນ ສາ ຕຓ຺ຫາ ຣູເປ ສທ຺ເທ ຄນ຺ເຘ ຣເສ ໂຜຏ຺ຐພ຺ເພ’’ຕິ (ມຫານິ. ໓; ຈູຬນິ. ເມຕ຺ຕຄູມາຓວປຸຈ຺ຉານິທ຺ເທສ ໒໒, ຂຄ຺ຄວິສາຓສຸຕ຺ຕນິທ຺ເທສ ໑໒໔) ວິສຕ຺ຕິກາ. ເອວໍ ວິສຕ຺ຕິກາຕິ ສງ຺ຂໍ ຄຕໍ ຕຓ຺ຫໍ ຕິຓ຺ໂຓ ນິຕ຺ຕິຓ຺ໂຓ ອຸຕ຺ຕິຓ຺ໂຓ. ເຕນ ວຸຈ຺ຈຕິ – ‘‘ຕິຓ຺ໂຓ ໂລເກ ວິສຕ຺ຕິກ’’ນ຺ຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ນິວາປສຸຕ຺ຕວຓ຺ຓນາ ນິຏ຺ຐິຕາ.