ຕຓ຺ຫາວາຣວຓ຺ຓນາ

໙໖. ຕຓ຺ຫາວາເຣ ຣູປຕຓ຺ຫາ…ເປ… ຘມ຺ມຕຓ຺ຫາຕິ ເອວໍ ຈກ຺ຂຸທ຺ວາຣາທີສຸ ຊວນວີຖິຍໍ ປວຕ຺ຕາຍ ຕຓ຺ຫາຍ ‘‘ເສຏ຺ຐິປຸຕ຺ໂຕ ພ຺ຣາຫ຺ມຓປຸຕ຺ໂຕ’’ຕິ ເອວມາທີສຸ ປິຕິໂຕ ນາມໍ ວິຍ ປິຕິສທິສາຣມ຺ມຓໂຕ ນາມໍ. ເອຕ຺ຖ ຈ ຣູປາຣມ຺ມຓາ ຕຓ຺ຫາ, ຣູເປ ຕຓ຺ຫາຕິ ຣູປຕຓ຺ຫາ. ສາ ກາມຣາຄຠາເວນ ຣູປໍ ອສ຺ສາເທນ຺ຕີ ປວຕ຺ຕມານາ ກາມຕຓ຺ຫາ. ສສ຺ສຕທິຏ຺ຐິສຫຄຕຣາຄຠາເວນ ຣູປໍ ນິຈ຺ຈໍ ຘຸວໍ ສສ຺ສຕນ຺ຕິ ເອວໍ ອສ຺ສາເທນ຺ຕີ ປວຕ຺ຕມານາ ຠວຕຓ຺ຫາ. ອຸຈ຺ເຉທທິຏ຺ຐິສຫຄຕຣາຄຠາເວນ ຣູປໍ ອຸຈ຺ຉິຊ຺ຊຕິ ວິນສ຺ສຕິ ເປຈ຺ຈ ນ ຠວິສ຺ສຕີຕິ ເອວໍ ອສ຺ສາເທນ຺ຕີ ປວຕ຺ຕມານາ ວິຠວຕຓ຺ຫາຕິ ເອວໍ ຕິວິຘາ ໂຫຕິ. ຍຖາ ຈ ຣູປຕຓ຺ຫາ, ຕຖາ ສທ຺ທຕຓ຺ຫາທໂຍປີຕິ ເອຕານິ ອຏ຺ຐາຣສ ຕຓ຺ຫາວິຈຣິຕານິ ໂຫນ຺ຕິ. ຕານິ ອຊ຺ຌຕ຺ຕຣູປາທີສຸ ອຏ຺ຐາຣສ, ພຫິທ຺ຘາຣູປາທີສຸ ອຏ຺ຐາຣສາຕິ ຉຕ຺ຕິໍສ. ອິຕິ ອຕີຕານິ ຉຕ຺ຕິໍສ, ອນາຄຕານິ ຉຕ຺ຕິໍສ, ປຈ຺ຈຸປ຺ປນ຺ນານິ ຉຕ຺ຕິໍສາຕິ ອຏ຺ຐສຕໍ. ‘‘ອຊ຺ຌຕ຺ຕິກສ຺ສຸປາທາຍ ‘ອສ຺ມີ’ຕິ ໂຫຕິ, ‘ອິຕ຺ຖສ຺ມີ’ຕິ ໂຫຕີ’’ຕິ (ວິຠ. ໙໗໓-໙໗໔) ວາ ເອວມາທີນາ ອຊ຺ຌຕ຺ຕິກຣູປາທິນິສ຺ສິຕານິ ອຏ຺ຐາຣສ, ‘‘ພາຫິຣສ຺ສຸປາທາຍ ‘ອິມິນາ ອສ຺ມີ’ຕິ ໂຫຕິ, ‘ອິມິນາ ອິຕ຺ຖສ຺ມີ’ຕິ ໂຫຕີ’’ຕິ ວາ (ວິຠ. ໙໗໕) ເອວມາທິນາ ພາຫິຣຣູປາທິນິສ຺ສິຕານິ ອຏ຺ຐາຣສາຕິ ຉຕ຺ຕິໍສ. ອິຕິ ອຕີຕານິ ຉຕ຺ຕິໍສ, ອນາຄຕານິ ຉຕ຺ຕິໍສ, ປຈ຺ຈຸປ຺ປນ຺ນານິ ຉຕ຺ຕິໍສາຕິ ເອວມ຺ປິ ອຏ຺ຐສຕຕຓ຺ຫາວິຈຣິຕານິ ໂຫນ຺ຕິ. ປຸນ ສງ຺ຄເຫ ກຣີຍມາເນ ຣູປາທີສຸ ອາຣມ຺ມເຓສຸ ຉເຬວ ຕຓ຺ຫາກາຍາ ຕິສ຺ໂສເຍວ ກາມຕຓ຺ຫາທໂຍ ໂຫນ຺ຕີຕິ ເອວໍ –

ນິທ຺ເທສຕ຺ເຖນ ນິທ຺ເທສ-ວິຕ຺ຖາຣາ ວິຕ຺ຖາຣສ຺ສ ຈ;

ປຸນ ສງ຺ຄຫໂຕ ຕຓ຺ຫາ, ວິຎ຺ຎາຕພ຺ພາ ວິຠາວິນາຕິ.

ເວທນາສມຸທຍາຕິ ເອຕ຺ຖ ປນ ເວທນາຕິ ວິປາກເວທນາ ອຘິປ຺ເປຕາ. ສາ ກຖໍ ຉສຸ ທ຺ວາເຣສຸ ຕຓ຺ຫາຍ ປຈ຺ຈໂຍ ໂຫຕີຕິ ເຈ? ອສ຺ສາທນີຍໂຕ. ສຸຂາຍ ຫິ ເວທນາຍ ອສ຺ສາທເນນ ສຕ຺ຕາ ເວທນໍ ມມາຍນ຺ຕາ ເວທນາຍ ຕຓ຺ຫໍ ອຸປ຺ປາເທຕ຺ວາ ເວທນາຣາຄຣຕ຺ຕາ ຫຸຕ຺ວາ ຈກ຺ຂຸທ຺ວາເຣ ອິຏ຺ຐເມວ ຣູປໍ ປຕ຺ເຖນ຺ຕິ, ລທ຺ຘາ ຈ ນໍ ອສ຺ສາເທນ຺ຕິ, ອາຣມ຺ມຓທາຍການຎ຺ຈ ຈິຕ຺ຕກາຣາທີນໍ ສກ຺ກາຣໍ ກໂຣນ຺ຕິ. ຕຖາ ໂສຕທ຺ວາຣາທີສຸ ອິຏ຺ເຐ ຈ ສທ຺ທາທໂຍ ປຕ຺ເຖນ຺ຕິ, ລທ຺ຘາ ຈ ເນ ອສ຺ສາເທນ຺ຕິ, ອາຣມ຺ມຓທາຍການຎ຺ຈ ວີຓາວາທກ-ຄນ຺ຘິກສູທ-ຕນ຺ຕວາຍ-ນານາວິຘສິປ຺ປສນ຺ທສ຺ສກາທີນໍ ສກ຺ກາຣໍ ກໂຣນ຺ຕິ. ຍຖາ ກິໍ? ຍຖາ ປຸຕ຺ຕສິເນເຫນ ປຸຕ຺ຕໍ ມມາຍນ຺ຕາ ຘາຕິຍາ ສກ຺ກາຣໍ ກໂຣນ຺ຕິ, ສປ຺ປາຍສປ຺ປິຂີຣາທີນິເຍວ ນໍ ປາເຍນ຺ຕິ ເຈວ ໂຠເຊນ຺ຕິ ຈ. ເສສໍ ວຸຕ຺ຕນຍເມວ.

ຕຓ຺ຫາວາຣວຓ຺ຓນາ ນິຏ຺ຐິຕາ.