ນາມຣູປວາຣວຓ຺ຓນາ

໑໐໐. ນາມຣູປວາເຣ ນມນລກ຺ຂຓໍ ນາມໍ. ຣຸປ຺ປນລກ຺ຂຓໍ ຣູປໍ. ວິຕ຺ຖາຣວາເຣ ປນສ຺ສ ເວທນາຕິ ເວທນາກ຺ຂນ຺ໂຘ. ສຎ຺ຎາຕິ ສຎ຺ຎາກ຺ຂນ຺ໂຘ. ເຈຕນາ ຜສ຺ໂສ ມນສິກາໂຣຕິ ສງ຺ຂາຣກ຺ຂນ຺ໂຘ ເວທິຕພ຺ໂພ. ກາມຎ຺ຈ ອຎ຺ເຎປິ ສງ຺ຂາຣກ຺ຂນ຺ຘສງ຺ຄຫິຕາ ຘມ຺ມາ ສນ຺ຕິ, ອິເມ ປນ ຕໂຍ ສພ຺ພທຸພ຺ພເລສຸປິ ຈິຕ຺ເຕສຸ ສນ຺ຕິ. ຕສ຺ມາ ເອເຕສໍເຍວ ວເສເນຕ຺ຖ ສງ຺ຂາຣກ຺ຂນ຺ໂຘປິ ທສ຺ສິໂຕ. ຈຕ຺ຕາຣິ ຈ ມຫາຠູຕານີຕິ ເອຕ຺ຖ ຈຕ຺ຕາຣີຕິ ຄຓນປຣິຈ຺ເຉໂທ. ມຫາຠູຕານີຕິ ປຖວີອາປເຕຊວາຍານເມຕໍ ອຘິວຈນໍ. ເຍນ ປນ ກາຣເຓນ ຕານິ ມຫາຠູຕານີຕິ ວຸຈ຺ຈນ຺ຕິ, ໂຍ ເຈຕ຺ຖ ອຎ຺ໂຎ ວິນິຈ຺ຉຍນໂຍ, ໂສ ສພ຺ໂພ ວິສຸທ຺ຘິມຄ຺ເຄ ຣູປກ຺ຂນ຺ຘນິທ຺ເທເສ ວຸຕ຺ໂຕ.

ຈຕຸນ຺ນຎ຺ຈ ມຫາຠູຕານໍ ອຸປາທາຍາຕິ ເອຕ຺ຖ ປນ ຈຕຸນ຺ນນ຺ຕິ ອຸປໂຍຄຕ຺ເຖ ສາມິວຈນໍ, ຈຕ຺ຕາຣິ ຈ ມຫາຠູຕານີຕິ ວຸຕ຺ຕໍ ໂຫຕິ. ອຸປາທາຍາຕິ ອຸປາທິຍິຕ຺ວາ, ຄເຫຕ຺ວາຕິ ອຕ຺ໂຖ. ນິສ຺ສາຍາຕິປິ ເອເກ. ວຕ຺ຕມານນ຺ຕິ ອຍຎ຺ເຈຕ຺ຖ ປາຐເສໂສ. ສມູຫຕ຺ເຖ ວາ ເອຕໍ ສາມິວຈນໍ. ເຕນ ຈຕຸນ຺ນຎ຺ຈ ມຫາຠູຕານໍ ສມູຫໍ ອຸປາທາຍ ປວຕ຺ຕມານໍ ຣູປນ຺ຕິ ອຍມຕ຺ໂຖ ເວທິຕພ຺ໂພ. ເອວໍ ສພ຺ພຕ຺ຖາປິ ຍານິ ຈຕ຺ຕາຣິ ປຖວີອາທີນິ ມຫາຠູຕານິ, ຍຎ຺ຈ ຈຕຸນ຺ນໍ ມຫາຠູຕານໍ ອຸປາທາຍ ວຕ຺ຕມານໍ ຈກ຺ຂາຍຕນາທິເຠເທນ ອຠິຘມ຺ມປາຬິຍເມວ ວຸຕ຺ຕໍ ເຕວີສຕິວິຘໍ ຣູປໍ, ຕໍ ສພ຺ພມ຺ປິ ‘‘ຣູປ’’ນ຺ຕິ ເວທິຕພ຺ພໍ. ວິຎ຺ຎາຓສມຸທຍາຕິ ເອຕ຺ຖ ປນ ຍໍ ວິຎ຺ຎາຓໍ ຍສ຺ສ ນາມສ຺ສ ຍສ຺ສ ຈ ຣູປສ຺ສ ຍສ຺ສ ຈ ນາມຣູປສ຺ສ ປຈ຺ຈໂຍ ໂຫຕິ, ຕສ຺ສ ວເສນ ວິສຸທ຺ຘິມຄ຺ເຄ ປຏິຈ຺ຈສມຸປ຺ປາທນິທ຺ເທເສ ວຸຕ຺ຕນເຍເນວ ວິຎ຺ຎາຓສມຸທຍາ ນາມຣູປສມຸທໂຍ ເວທິຕພ຺ໂພ. ເສສໍ ວຸຕ຺ຕນຍເມວາຕິ.

ນາມຣູປວາຣວຓ຺ຓນາ ນິຏ຺ຐິຕາ.