໕. ທ຺ວາຣປາລກວິມານວຓ຺ຓນາ

ອຸຈ຺ຈມິທໍ ມຓິຖູຓນ຺ຕິ ທ຺ວາຣປາລກວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ຈ ສມເຍນ ຣາຊຄເຫ ອຎ຺ຎຕໂຣ ອຸປາສໂກ ຈຕ຺ຕາຣິ ນິຈ຺ຈຠຕ຺ຕານິ ສງ຺ຆສ຺ສ ເທຕິ. ຕສ຺ສ ປນ ເຄຫໍ ປຣິຍນ຺ເຕ ຐິຕໍ ໂຈຣຠເຍນ ເຍຠຸຍ຺ເຍນ ປິຫິຕທ຺ວາຣເມວ ໂຫຕິ. ຠິກ຺ຂູ ຄນ຺ຕ຺ວາ ກທາຈິ ທ຺ວາຣສ຺ສ ປິຫິຕຕ຺ຕາ ຠຕ຺ຕໍ ອລທ຺ຘາວ ປຏິຄຈ຺ຉນ຺ຕິ. ອຸປາສໂກ ຠຣິຍໍ ອາຫ ‘‘ກິໍ, ຠທ຺ເທ, ອຍ຺ຍານໍ ສກ຺ກຈ຺ຈໍ ຠິກ຺ຂາ ທີຍຕີ’’ຕິ? ສາ ອາຫ ‘‘ເອເກສຸ ທິວເສສຸ ອຍ຺ຍາ ນາຄມິໍສູ’’ຕິ. ‘‘ກິໍ ກາຣຓ’’ນ຺ຕິ? ‘‘ທ຺ວາຣສ຺ສ ປິຫິຕຕ຺ຕາ ມຎ຺ເຎ’’ຕິ. ຕໍ ສຸຕ຺ວາ ອຸປາສໂກ ສໍເວຄປ຺ປຕ຺ໂຕ ຫຸຕ຺ວາ ເອກໍ ປຸຣິສໍ ທ຺ວາຣປາລໍ ກຕ຺ວາ ຐເປສິ ‘‘ຕ຺ວໍ ອຊ຺ຊໂຕ ປຏ຺ຐາຍ ທ຺ວາຣໍ ຣກ຺ຂນ຺ໂຕ ນິສີທ, ຍທາ ຈ ອຍ຺ຍາ ອາຄມິສ຺ສນ຺ຕິ, ຕທາ ເຕ ປເວເສຕ຺ວາ ປວິຏ຺ຐານໍ ເນສໍ ປຕ຺ຕປຏິຄ຺ຄຫຓອາສນປຎ຺ຎາປນາທິ ສພ຺ພໍ ຍຸຕ຺ຕປຍຸຕ຺ຕໍ ຊານາຫີ’’ຕິ. ໂສ ‘‘ສາຘູ’’ຕິ ຕຖາ ກໂຣນ຺ໂຕ ຠິກ຺ຂູນໍ ສນ຺ຕິເກ ຘມ຺ມໍ ສຸຕ຺ວາ ອຸປ຺ປນ຺ນສທ຺ໂຘ ກມ຺ມຜລໍ ສທ຺ທຫິຕ຺ວາ ສຣເຓສຸ ຈ ສີເລສຸ ຈ ປຕິຏ຺ຐຫິ, ສກ຺ກຈ຺ຈໍ ຠິກ຺ຂູ ອຸປຏ຺ຐຫິ.

ອປຣຠາເຄ ນິຈ຺ຈຠຕ຺ຕທາຍໂກ ອຸປາສໂກ ກາລໍ ກຕ຺ວາ ຍາເມສຸ ນິພ຺ພຕ຺ຕິ. ທ຺ວາຣປາໂລ ປນ ສກ຺ກຈ຺ຈໍ ຠິກ຺ຂູນໍ ອຸປຏ຺ຐຫິຕ຺ວາ ປຣສ຺ສ ປຣິຈ຺ຈາເຄ ເວຍ຺ຍາວຈ຺ຈກຣເຓນ ອນຸໂມທເນນ ຈ ຕາວຕິໍເສສຸ ອຸປ຺ປຊ຺ຊິ. ຕສ຺ສ ທ຺ວາທສໂຍຊນິກໍ ກນກວິມານນ຺ຕິອາທິ ສພ຺ພໍ ກກ຺ກຏກວິມາເນ ວຸຕ຺ຕນເຍເນວ ເວທິຕພ຺ພໍ. ປຸຈ຺ຉາວິສ຺ສຊ຺ຊນຄາຖາ ເອວມາຄຕາ –

໙໑໘. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໙໑໙. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ທິພ຺ພາ ຣສາ ກາມຄຸເຓຕ຺ຖ ປຎ຺ຈ, ນາຣິໂຍ ຈ ນຈ຺ຈນ຺ຕິ ສຸວຓ຺ຓຉນ຺ນາ.

໙໒໐. ‘‘ເກນ ເຕຕາທິໂສ ວຓ຺ໂຓ…ເປ… ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໙໒໒. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໙໒໓. ‘‘ທິພ຺ພໍ ມມໍ ວສ຺ສສຫສ຺ສມາຍຸ, ວາຈາຠິຄີຕໍ ມນສາ ປວຕ຺ຕິຕໍ;

ເອຕ຺ຕາວຕາ ຐສ຺ສຕິ ປຸຎ຺ຎກມ຺ໂມ, ທິພ຺ເພຫິ ກາເມຫິ ສມງ຺ຄິຠູໂຕ.

໙໒໔. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໙໒໓. ຕຕ຺ຖ ທິພ຺ພໍ ມມໍ ວສ຺ສສຫສ຺ສມາຍູຕິ ຍສ຺ມິໍ ເທວນິກາເຍ ສຍໍ ອຸປ຺ປນ຺ໂນ, ເຕສໍ ຕາວຕິໍສເທວານໍ ອາຍຸປ຺ປມາຓເມວ ວທຕິ. ເຕສຎ຺ຫິ ມນຸສ຺ສານໍ ຄຓນາຍ ວສ຺ສສຕໍ ເອໂກ ຣຕ຺ຕິທິໂວ, ຕາຍ ຣຕ຺ຕິຍາ ຕິໍສຣຕ຺ຕິໂກ ມາໂສ, ເຕນ ມາເສນ ທ຺ວາທສມາສິໂກ ສໍວຈ຺ຉໂຣ, ເຕນ ສໍວຈ຺ຉເຣນ ສຫສ຺ສສໍວຈ຺ຉຣານິ ອາຍຸ, ຕໍ ມນຸສ຺ສານໍ ຄຓນາຍ ຕິສ຺ໂສ ວສ຺ສໂກຏິໂຍ ສຏ຺ຐິ ຈ ວສ຺ສສຕສຫສ຺ສານິ ໂຫນ຺ຕິ. ວາຈາຠິຄີຕນ຺ຕິ ວາຈາຍ ອຠິຄີຕໍ, ‘‘ອາຄຈ຺ຉນ຺ຕຸ ອຍ຺ຍາ, ອິທໍ ອາສນໍ ປຎ຺ຎຕ຺ຕໍ, ອິຘ ນິສີທຖາ’’ຕິອາທິນາ, ‘‘ກິໍ ອຍ຺ຍານໍ ສຣີຣສ຺ສ ອາໂຣຄ຺ຍໍ, ກິໍ ວສນຏ຺ຐານໍ ຜາສຸກ’’ນ຺ຕິອາທິນາ ປຏິສນ຺ຖາຣວເສນ ຈ ວາຈາຍ ກຖິຕມຕ຺ຕໍ. ມນສາ ປວຕ຺ຕິຕນ຺ຕິ ‘‘ອິເມ ອຍ຺ຍາ ເປສລາ ພ຺ຣຫ຺ມຈາຣິໂນ ຘມ຺ມຈາຣິໂນ’’ຕິອາທິນາ ຈິຕ຺ເຕນ ປວຕ຺ຕິຕໍ ປສາທມຕ຺ຕໍ, ນ ປນ ມມ ສນ຺ຕກໍ ກິຎ຺ຈິ ປຣິຈ຺ຈຕ຺ຕໍ ອຕ຺ຖີຕິ ທສ຺ເສຕິ. ເອຕ຺ຕາວຕາຕິ ເອຕ຺ຕເກນ ເອວໍ ກຖນມຕ຺ເຕນ ປສາທມຕ຺ເຕນປິ. ຐສ຺ສຕິ ປຸຎ຺ຎກມ຺ໂມຕິ ກຕປຸຎ຺ໂຎ ນາມ ຫຸຕ຺ວາ ເທວໂລເກ ຐສ຺ສຕິ ຈິຣໍ ປວຕ຺ຕິສ຺ສຕິ, ຕິຏ຺ຐນ຺ໂຕ ຈ ທິພ຺ເພຫິ ກາເມຫິ ສມງ຺ຄີຠູໂຕ ຕສ຺ມິໍ ເທວນິກາເຍ ເທວານໍ ວລຎ຺ຊນິຍາເມເນວ ທິພ຺ເພຫິ ປຎ຺ຈຫິ ກາມຄຸເຓຫິ ສມງ຺ຄີຠູໂຕ ສມນ຺ນາຄໂຕ ຫຸຕ຺ວາ ອິນ຺ທ຺ຣິຍານິ ປຣິຈາເຣນ຺ໂຕ ວິຫຣຕີຕິ ອຕ຺ໂຖ. ເສສໍ ວຸຕ຺ຕນຍເມວ.

ທ຺ວາຣປາລກວິມານວຓ຺ຓນາ ນິຏ຺ຐິຕາ.