໖. ປຐມກຣຓີຍວິມານວຓ຺ຓນາ

ອຸຈ຺ຈມິທໍ ມຓິຖູຓນ຺ຕິ ກຣຓີຍວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ສມເຍນ ສາວຕ຺ຖິວາສີ ເອໂກ ອຸປາສໂກ ນ຺ຫາໂນປກຣຓານິ ຄເຫຕ຺ວາ ອຈິຣວຕິໍ ຄນ຺ຕ຺ວາ ນ຺ຫຕ຺ວາ ອາຄຈ຺ຉນ຺ໂຕ ຠຄວນ຺ຕໍ ສາວຕ຺ຖິໍ ປິຓ຺ຑາຍ ປວິສນ຺ຕໍ ທິສ຺ວາ ອຸປສງ຺ກມິຕ຺ວາ ວນ຺ທິຕ຺ວາ ເອວມາຫ ‘‘ຠນ຺ເຕ ເກນ ນິມນ຺ຕິຕາ’’ຕິ. ຠຄວາ ຕຸຓ຺ຫີ ອໂຫສິ. ໂສ ເກນຈິ ອນິມນ຺ຕິຕຠາວໍ ຎຕ຺ວາ ອາຫ ‘‘ອຘິວາເສຕຸ ເມ, ຠນ຺ເຕ, ຠຄວາ ຠຕ຺ຕໍ ອນຸກມ຺ປໍ ອຸປາທາຍາ’’ຕິ. ອຘິວາເສສິ ຠຄວາ ຕຸຓ຺ຫີຠາເວນ. ໂສ ຠຄວນ຺ຕໍ ອຕ຺ຕໂນ ເຄຫໍ ເນຕ຺ວາ ພຸທ຺ຘາຣຫໍ ອາສນໍ ປຎ຺ຎາເປຕ຺ວາ ຕຕ຺ຖ ຠຄວນ຺ຕໍ ນິສີທາເປຕ຺ວາ ປຓີເຕນ ອນ຺ນປາເນນ ສນ຺ຕປ຺ເປສິ. ຠຄວາ ກຕຠຕ຺ຕກິຈ຺ໂຈ ຕສ຺ສ ອນຸໂມທນໍ ກຕ຺ວາ ປກ຺ກາມິ. ເສສໍ ອນນ຺ຕຣວິມານສທິສໍ. ເຕນ ວຸຕ຺ຕໍ –

໙໒໖. ‘‘ອຸຈ຺ຈມິທໍ ມຓິຖູຓໍ ວິມານໍ…ເປ… ນາຣິໂຍ ຈ ນຈ຺ຈນ຺ຕິ ສຸວຓ຺ຓຉນ຺ນາ.

໙໒໘. ‘‘ເກນ ເຕຕາທິໂສ ວຓ຺ໂຓ…ເປ… ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໙໓໐. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໙໓໑. ‘‘ກຣຓີຍານິ ປຸຎ຺ຎານິ, ປຓ຺ຑິເຕນ ວິຊານຕາ;

ສມ຺ມຄ຺ຄເຕສຸ ພຸທ຺ເຘສຸ, ຍຕ຺ຖ ທິນ຺ນໍ ມຫປ຺ຜລໍ.

໙໓໑. ‘‘ອຕ຺ຖາຍ ວຕ ເມ ພຸທ຺ໂຘ, ອຣຎ຺ຎາ ຄາມມາຄໂຕ;

ກຕ຺ຖ ຈິຕ຺ຕໍ ປສາເທຕ຺ວາ, ຕາວຕິໍສູປໂຄ ອຫໍ.

໙໓໓. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໙໓໑. ຕຕ຺ຖ ປຓ຺ຑິເຕນາຕິ ສປ຺ປຎ຺ເຎນ. ວິຊານຕາຕິ ອຕ຺ຕໂນ ຫິຕາຫິຕໍ ຊານນ຺ເຕນ. ສມ຺ມຄ຺ຄເຕສູຕິ ສມ຺ມາປຏິປນ຺ເນສຸ, ພຸທ຺ເຘສູຕິ ສມ຺ມາສມ຺ພຸທ຺ເຘສຸ.

໙໓໒. ອຕ຺ຖາຍາຕິ ຫິຕາຍ, ວຸຑ຺ຒິຍາ ວາ. ອຣຎ຺ຎາຕິ ວິຫາຣໂຕ, ເຊຕວນໍ ສນ຺ຘາຍ ວທຕິ. ຕາວຕິໍສູປໂຄຕິ ຕາວຕິໍສເທວກາຍໍ, ຕາວຕິໍສຠວນໍ ວາ ອຸປ຺ປຊ຺ຊນວເສນ ອຸປຄໂຕ. ເສສໍ ວຸຕ຺ຕນຍເມວ.

ກຣຓີຍວິມານວຓ຺ຓນາ ນິຏ຺ຐິຕາ.