໔. ກກ຺ກຏກຣສທາຍກວິມານວຓ຺ຓນາ

ອຸຈ຺ຈມິທໍ ມຓິຖູຓໍ ວິມານນ຺ຕິ ກກ຺ກຏກຣສທາຍກວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ອຎ຺ຎຕໂຣ ຠິກ຺ຂຸ ອາຣທ຺ຘວິປສ຺ສໂກ ກຓ຺ຓສູເລນ ປີຬິໂຕ ອກລ຺ລສຣີຣຕາຍ ວິປສ຺ສນໍ ອຸສ຺ສຸກ຺ກາເປຕຸໍ ນາສກ຺ຂິ, ເວຊ຺ເຊຫິ ວຸຕ຺ຕວິຘິນາ ເຠສຊ຺ເຊ ກເຕປິ ໂຣໂຄ ນ ວູປສມິ. ໂສ ຠຄວໂຕ ເອຕມຕ຺ຖໍ ອາໂຣເຈສິ. ອຖສ຺ສ ຠຄວາ ‘‘ກກ຺ກຏກຣສໂຠຊນໍ ສປ຺ປາຍ’’ນ຺ຕິ ຎຕ຺ວາ ອາຫ ‘‘ຄຈ຺ຉ ຕ຺ວໍ ຠິກ຺ຂຸ ມຄຘເຂຕ຺ເຕ ປິຓ຺ຑາຍ ຈຣາຫີ’’ຕິ.

ໂສ ຠິກ຺ຂຸ ‘‘ທີຆທສ຺ສິນາ ອທ຺ຘາ ກິຎ຺ຈິ ທິຏ຺ຐໍ ຠວິສ຺ສຕີ’’ຕິ ຈິນ຺ເຕຕ຺ວາ ‘‘ສາຘຸ ຠນ຺ເຕ’’ຕິ ຠຄວໂຕ ປຏິສ຺ສຸຓິຕ຺ວາ ຠຄວນ຺ຕໍ ວນ຺ທິຕ຺ວາ ປຕ຺ຕຈີວຣມາທາຍ ມຄຘເຂຕ຺ຕໍ ຄນ຺ຕ຺ວາ ອຎ຺ຎຕຣສ຺ສ ເຂຕ຺ຕປາລສ຺ສ ກຸຏິຍາ ທ຺ວາເຣ ປິຓ຺ຑາຍ ອຏ຺ຐາສິ. ໂສ ຈ ເຂຕ຺ຕປາໂລ ກກ຺ກຏກຣສໍ ສມ຺ປາເທຕ຺ວາ ຠຕ຺ຕຎ຺ຈ ປຈິຕ຺ວາ ‘‘ໂຖກໍ ວິສ຺ສມິຕ຺ວາ ຠຸຎ຺ຊິສ຺ສາມີ’’ຕິ ນິສິນ຺ໂນ ເຖຣໍ ທິສ຺ວາ ປຕ຺ຕໍ ຄເຫຕ຺ວາ ກຸຏິກາຍໍ ນິສີທາເປຕ຺ວາ ກກ຺ກຏກຣສຠຕ຺ຕໍ ອທາສິ. ເຖຣສ຺ສ ຕໍ ຠຕ຺ຕໍ ໂຖກໍ ຠຸຕ຺ຕສ຺ສເຍວ ກຓ຺ຓສູລໍ ປຏິປ຺ປສ຺ສມ຺ຠິ, ຆຏສເຕນ ນ຺ຫາໂຕ ວິຍ ອໂຫສິ. ໂສ ສປ຺ປາຍາຫາຣວເສນ ຈິຕ຺ຕຜາສຸກໍ ລຠິຕ຺ວາ ວິປສ຺ສນາວເສນ ຈິຕ຺ຕໍ ອຠິນິນ຺ນາເມນ຺ໂຕ ອປຣິໂຍສິເຕເຍວ ໂຠຊເນ ອນວເສສໂຕ ອາສເວ ເຂເປຕ຺ວາ ອຣຫຕ຺ເຕ ປຕິຏ຺ຐາຍ ເຂຕ຺ຕປາລໍ ອາຫ ‘‘ອຸປາສກ, ຕວ ປິຓ຺ຑປາຕໂຠຊເນນ ມຍ຺ຫໍ ໂຣໂຄ ວູປສນ຺ໂຕ, ກາຍຈິຕ຺ຕໍ ກລ຺ລໍ ຊາຕໍ, ຕ຺ວມ຺ປິ ອິມສ຺ສ ປຸຎ຺ຎສ຺ສ ຜເລນ ວິຄຕກາຍຈິຕ຺ຕທຸກ຺ໂຂ ຠວິສ຺ສສີ’’ຕິ ວຕ຺ວາ ອນຸໂມທນໍ ກຕ຺ວາ ປກ຺ກາມິ.

ເຂຕ຺ຕປາໂລ ອປເຣນ ສມເຍນ ກາລໍ ກຕ຺ວາ ຕາວຕິໍສຠວເນ ທ຺ວາທສໂຍຊນິເກ ມຓິຖມ຺ເຠ ກນກວິມາເນ ສຕ຺ຕສຕກູຏາຄາຣປຏິມຓ຺ຑິເຕ ເວຬຸຣິຍມຍຄພ຺ເຠ ນິພ຺ພຕ຺ຕິ, ທ຺ວາເຣ ຈສ຺ສ ຍຖູປຈິຕກມ຺ມສໍສູຈໂກ ມຸຕ຺ຕາສິກ຺ກາຄໂຕ ສຸວຓ຺ຓກກ຺ກຏໂກ ໂອລມ຺ພມາໂນ ອຏ຺ຐາສິ. ອຖາຍສ຺ມາ ມຫາໂມຄ຺ຄລ຺ລາໂນ ປຸພ຺ເພ ວຸຕ຺ຕນເຍນ ຕຕ຺ຖ ຄໂຕ ຕໍ ທິສ຺ວາ ອິມາຫິ ຄາຖາຫິ ປຸຈ຺ຉິ –

໙໑໐. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໙໑໑. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ທິພ຺ພາ ຣສາ ກາມຄຸເຓຕ຺ຖ ປຎ຺ຈ, ນາຣິໂຍ ຈ ນຈ຺ຈນ຺ຕິ ສຸວຓ຺ຓຉນ຺ນາ.

໙໑໒. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໙໑໓. ‘‘ປຸຈ຺ຉາມິ ຕໍ ເທວ ມຫານຸຠາວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

ໂສປິສ຺ສ ພ຺ຍາກາສິ, ຕໍ ທສ຺ເສຕຸໍ –

໙໑໔. ‘‘ໂສ ເທວປຸຕ຺ໂຕ ອຕ຺ຕມໂນ, ໂມຄ຺ຄລ຺ລາເນນ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລ’’ນ຺ຕິ. – ວຸຕ຺ຕໍ;

໙໑໕. ‘‘ສຕິສມຸປ຺ປາທກໂຣ, ທ຺ວາເຣ ກກ຺ກຏໂກ ຐິໂຕ;

ນິຏ຺ຐິໂຕ ຊາຕຣູປສ຺ສ, ໂສຠຕິ ທສປາທໂກ.

໙໑໖. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໙໑໗. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູໂຕ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາໂວ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໙໑໐. ຕຕ຺ຖ ອຸຈ຺ຈນ຺ຕິ ອຈ຺ຈຸຄ຺ຄຕໍ. ມຓິຖູຓນ຺ຕິ ປທຸມຣາຄາທິມຓິມຍຖມ຺ຠໍ. ສມນ຺ຕໂຕຕິ ຈຕູສຸປິ ປສ຺ເສສຸ. ຣຸຈກຕ຺ຖຕາຕິ ຕສ຺ສໍ ຕສ຺ສໍ ຠູມິຍໍ ສຸວຓ຺ຓຜລເກຫິ ອຕ຺ຖຕາ.

໙໑໑. ປິວສິ ຂາທສິ ຈາຕິ ກາເລນ ກາລໍ ອຸປຍຸຊ຺ຊມານໍ ຄນ຺ຘປານໍ ສຸຘາໂຠຊນຎ຺ຈ ສນ຺ຘາຍ ວທຕິ. ປວທນ຺ຕີຕິ ປວຊ຺ຊນ຺ຕິ. ທິພ຺ພາ ຣສາ ກາມຄຸເຓຕ຺ຖ ປຎ຺ຈາຕິ ທິພ຺ພາ ຣສາ ອນປ຺ປກາ ປຎ຺ຈ ກາມຄຸຓາ ເອຕ຺ຖ ເອຕສ຺ມິໍ ຕວ ວິມາເນ ສໍວິຊ຺ຊນ຺ຕີຕິ ອຕ຺ໂຖ. ສຸວຓ຺ຓຉນ຺ນາຕິ ເຫມາຠຣຓວິຠູສິຕາ.

໙໑໕. ສຕິສມຸປ຺ປາທກໂຣຕິ ສຕຸປ຺ປາທກໂຣ, ເຍນ ປຸຎ຺ຎກມ຺ເມນ ອຍໍ ທິພ຺ພສມ຺ປຕ຺ຕິ ມຍາ ລທ຺ຘາ, ຕຕ຺ຖ ສຕຸປ຺ປາທສ຺ສ ກາຣໂກ, ‘‘ກກ຺ກຏກຣສທາເນນ ອຍໍ ຕຍາ ສມ຺ປຕ຺ຕິ ລທ຺ຘາ’’ຕິ ເອວໍ ສຕຸປ຺ປາທໍ ກໂຣນ຺ໂຕຕິ ອຕ຺ໂຖ. ນິຏ຺ຐິໂຕ ຊາຕຣູປສ຺ສາຕິ ຊາຕຣູເປນ ສິທ຺ໂຘ ຊາຕຣູປມໂຍ. ເອກເມກສ຺ມິໍ ປສ຺ເສ ປຎ຺ຈ ປຎ຺ຈ ກຕ຺ວາ ທສ ປາທາ ເອຕສ຺ສາຕິ ທສປາທໂກ ທ຺ວາເຣ ກກ຺ກຏໂກ ຐິໂຕ ໂສຠຕິ. ໂສ ເອວ ມມ ປຸຎ຺ຎກມ຺ມໍ ຕາທິສານໍ ມເຫສີນໍ ວິຠາເວຕິ, ນ ເອຕ຺ຖ ມຍາ ວຕ຺ຕພ຺ພໍ ອຕ຺ຖີຕິ ອຘິປ຺ປາໂຍ. ເຕນາຫ ‘‘ເຕນ ເມຕາທິໂສ ວຓ຺ໂຓ’’ຕິອາທິ. ເສສໍ ວຸຕ຺ຕນຍເມວ.

ກກ຺ກຏກຣສທາຍກວິມານວຓ຺ຓນາ ນິຏ຺ຐິຕາ.