໑໔. ມຫາຣຖວິມານວຓ຺ຓນາ

ສຫສ຺ສຍຸຕ຺ຕໍ ຫຍວາຫນໍ ສຸຠນ຺ຕິ ມຫາຣຖວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ຈ ສມເຍນ ອາຍສ຺ມາ ມຫາໂມຄ຺ຄລ຺ລາໂນ ເຫຏ຺ຐາ ວຸຕ຺ຕນເຍນ ເທວຈາຣິກໍ ຈຣນ຺ໂຕ ຕາວຕິໍສຠວເນ ໂຄປາລສ຺ສ ນາມ ເທວປຸຕ຺ຕສ຺ສ ອຕ຺ຕໂນ ວິມານໂຕ ນິກ຺ຂມິຕ຺ວາ ສຫສ຺ສຍຸຕ຺ຕໍ ມຫນ຺ຕໍ ທິພ຺ພຣຖໍ ອຠິຣຸຍ຺ຫ ມຫນ຺ເຕນ ປຣິວາເຣນ ມຫຕິຍາ ເທວິທ຺ຘິຍາ ອຸຍ຺ຍານກີຬນຕ຺ຖໍ ຄຈ຺ຉນ຺ຕສ຺ສ ອວິທູເຣ ປາຕຸຣໂຫສິ. ຕໍ ທິສ຺ວາ ເທວປຸຕ຺ໂຕ ສຎ຺ຊາຕຄາຣວພຫຸມາໂນ ສຫສາ ຣຖໂຕ ໂອຣຸຍ຺ຫ ອຸປສງ຺ກມິຕ຺ວາ ປຎ຺ຈປຕິຏ຺ຐິເຕນ ວນ຺ທິຕ຺ວາ ອຎ຺ຊລິໍ ສິຣສິ ປຄ຺ຄຍ຺ຫ ອຏ຺ຐາສິ.

ຕສ຺ສິທໍ ປຸພ຺ພກມ຺ມໍ – ໂສ ກິຣ ວິປສ຺ສິໍ ຠຄວນ຺ຕໍ ສຸວຓ຺ຓມາລາຍ ປູເຊຕ຺ວາ ‘‘ອິມສ຺ສ ປຸຎ຺ຎສ຺ສ ອານຸຠາເວນ ມຍ຺ຫໍ ຠເວ ຠເວ ໂສວຓ຺ຓມຍາ ອຸຣຈ຺ຉທມາລາ ນິພ຺ພຕ຺ຕຕູ’’ຕິ ກຕປຓິຘານາຍ ອເນກກປ຺ເປສຸ ສຸຄຕີສຸເຍວ ສໍສຣນ຺ຕິຍາ ກສ຺ສປສ຺ສ ຠຄວໂຕ ກາເລ ກິກິສ຺ສ ກາສິຣຎ຺ໂຎ ອຄ຺ຄມເຫສິຍາ ກຸຈ຺ຉິມ຺ຫິ ນິພ຺ພຕ຺ຕາຍ ຍຖາປຓິຘານໍ ສຸວຓ຺ຓມາລາລາເຠນ ‘‘ອຸຣຈ຺ຉທມາລາ’’ຕິ ລທ຺ຘນາມາຍ ເທວກຎ຺ຎາສທິສາຍ ຣາຊຘີຕາຍ ອາຈຣິໂຍ ໂຄປາໂລ ນາມ ພ຺ຣາຫ຺ມໂຓ ຫຸຕ຺ວາ ສສາວກສງ຺ຆສ຺ສ ກສ຺ສປສ຺ສ ຠຄວໂຕ ອສທິສທານາທີນິ ມຫາທານານິ ປວຕ຺ເຕຕ຺ວາ ອິນ຺ທ຺ຣິຍານໍ ອປຣິປກ຺ກຠາເວນ ອຕ຺ຕານໍ ຣາຊຘີຕຣຎ຺ຈ ອຸທ຺ທິສ຺ສ ສຕ຺ຖາຣາ ເທສິຕໍ ຘມ຺ມໍ ສຸຕ຺ວາປິ ວິເສສໍ ນິພ຺ພຕ຺ເຕຕຸໍ ອສກ຺ໂກນ຺ໂຕ ປຸຖຸຊ຺ຊນກາລກິຣິຍເມວ ກຕ຺ວາ ຍຖູປຈິຕປຸຎ຺ຎານຸຠາເວນ ຕາວຕິໍເສສຸ ໂຍຊນສຕິເກ ກນກວິມາເນ ນິພ຺ພຕ຺ຕິ, ອເນກໂກຏິອຈ຺ຉຣາປຣິວາໂຣ ອໂຫສິ, ສຕ຺ຕຣຕນມໂຍ ຈສ຺ສ ສຫສ຺ສຍຸຕ຺ໂຕ ສຸວິຠຕ຺ຕຠິຕ຺ຕິວິຈິຕ຺ໂຕ ສິນິທ຺ຘມຘຸຣນິຄ຺ໂຆໂສ ອຕ຺ຕໂນ ປຠາສມຸທເຍນ ອວຫສນ຺ໂຕ ວິຍ ທິວງ຺ກຣມຓ຺ຑລໍ ທິພ຺ໂພ ອາຊຎ຺ຎຣໂຖ ນິພ຺ພຕ຺ຕິ.

ໂສ ຕຕ຺ຖ ຍາວຕາຍຸກໍ ທິພ຺ພສມ຺ປຕ຺ຕິໍ ອນຸຠວິຕ຺ວາ ອປຣາປຣໍ ເທເວສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຕສ຺ເສວ ກມ຺ມສ຺ສ ວິປາກາວເສເສນ ຍຖາວຸຕ຺ຕສມ຺ປຕ຺ຕິວິຠໂວ ໂຄປາໂລ ເອວ ນາມ ເທວປຸຕ຺ໂຕ ຫຸຕ຺ວາ ຕາວຕິໍເສສຸເຍວ ນິພ຺ພຕ຺ຕິ. ຕໍ ສນ຺ຘາຍ ວຸຕ຺ຕໍ ‘‘ເຕນ ຈ ສມເຍນ ອາຍສ຺ມາ ມຫາໂມຄ຺ຄລ຺ລາໂນ…ເປ… ອຎ຺ຊລິໍ ສິຣສິ ປຄ຺ຄຍ຺ຫ ອຏ຺ຐາສີ’’ຕິ.

ເອວໍ ປນ ອຸປສງ຺ກມິຕ຺ວາ ຐິຕໍ ຕໍ ເທວປຸຕ຺ຕໍ ອາຍສ຺ມາ ມຫາໂມຄ຺ຄລ຺ລາໂນ ອິມາຫິ ຄາຖາຫິ ປຸຈ຺ຉິ –

໑໐໑໕. ‘‘ສຫສ຺ສຍຸຕ຺ຕໍ ຫຍວາຫນໍ ສຸຠໍ, ອາຣຸຍ຺ຫິມໍ ສນ຺ທນໍ ເນກຈິຕ຺ຕໍ;

ອຸຍ຺ຍານຠູມິໍ ອຠິໂຕ ອນຸກ຺ກມໍ, ປຸຣິນ຺ທໂທ ຠູຕປຕີວ ວາສໂວ.

໑໐໑໖. ‘‘ໂສວຓ຺ຓມຍາ ເຕ ຣຖກຸພ຺ພຣາ ອຸໂຠ, ຜເລຫິ ອໍເສຫິ ອຕີວ ສງ຺ຄຕາ;

ສຸຊາຕຄຸມ຺ພາ ນຣວີຣນິຏ຺ຐິຕາ, ວິໂຣຈຕິ ປນ຺ນຣເສວ ຈນ຺ໂທ.

໑໐໑໗. ‘‘ສຸວຓ຺ຓຊາລາວຕໂຕ ຣໂຖ ອຍໍ, ພຫູຫິ ນານາຣຕເນຫິ ຈິຕ຺ຕິໂຕ;

ສຸນນ຺ທິໂຆໂສ ຈ ສຸຠສ຺ສໂຣ ຈ, ວິໂຣຈຕີ ຈາມຣຫຕ຺ຖພາຫຸຠິ.

໑໐໑໘. ‘‘ອິມາ ຈ ນາຠ຺ໂຍ ມນສາຠິນິມ຺ມິຕາ, ຣຖສ຺ສ ປາທນ຺ຕຣມຊ຺ຌຠູສິຕາ;

ອິມາ ຈ ນາຠ຺ໂຍ ສຕຣາຊິຈິຕ຺ຕິຕາ, ສເຕຣຕາ ວິຊ຺ຊຸຣິວປ຺ປຠາສເຣ.

໑໐໑໙. ‘‘ອເນກຈິຕ຺ຕາວຕໂຕ ຣໂຖ ອຍໍ, ປຸຖູ ຈ ເນມີ ຈ ສຫສ຺ສຣໍສິໂກ;

ເຕສໍ ສໂຣ ສຸຍ຺ຍຕິ ວຄ຺ຄຸຣູໂປ, ປຎ຺ຈງ຺ຄິກໍ ຕູຣິຍມິວປ຺ປວາທິຕໍ.

໑໐໒໐. ‘‘ສິຣສ຺ມິໍ ຈິຕ຺ຕໍ ມຓິຈນ຺ທກປ຺ປິຕໍ, ສທາ ວິສຸທ຺ຘໍ ຣຸຈິຣໍ ປຠສ຺ສຣໍ;

ສຸວຓ຺ຓຣາຊີຫິ ອຕີວ ສງ຺ຄຕໍ, ເວຬຸຣິຍຣາຊີວ ອຕີວ ໂສຠຕິ.

໑໐໒໑. ‘‘ອິເມ ຈ ວາຬີ ມຓິຈນ຺ທກປ຺ປິຕາ, ອາໂຣຫກມ຺ພູ ສຸຊວາ ພ຺ຣຫູປມາ;

ພ຺ຣຫາ ມຫນ຺ຕາ ພລິໂນ ມຫາຊວາ, ມໂນ ຕວຎ຺ຎາຍ ຕເຖວ ສິໍສເຣ.

໑໐໒໒. ‘‘ອິເມ ຈ ສພ຺ເພ ສຫິຕາ ຈຕຸກ຺ກມາ, ມໂນ ຕວຎ຺ຎາຍ ຕເຖວ ສິໍສເຣ;

ສມໍ ວຫນ຺ຕີ ມຸທຸກາ ອນຸທ຺ຘຕາ, ອາໂມທມານາ ຕຸຣຄານມຸຕ຺ຕມາ.

໑໐໒໓. ‘‘ຘຸນນ຺ຕິ ວຄ຺ຄນ຺ຕິ ປຕນ຺ຕິ ຈມ຺ພເຣ, ອພ຺ຠຸທ຺ຘຸນນ຺ຕາ ສຸກເຕ ປິຬນ຺ຘເນ;

ເຕສໍ ສໂຣ ສຸຍ຺ຍຕິ ວຄ຺ຄຸຣູໂປ, ປຎ຺ຈງ຺ຄິກໍ ຕູຣິຍມິວປ຺ປວາທິຕໍ.

໑໐໒໔. ‘‘ຣຖສ຺ສ ໂຆໂສ ອປິຬນ຺ຘນານ ຈ, ຂຸຣສ຺ສ ນາໂທ ອຠິຫິໍສນາຍ ຈ;

ໂຆໂສ ສຸວຄ຺ຄູ ສມິຕສ຺ສ ສຸຍ຺ຍຕິ, ຄນ຺ຘພ຺ພຕູຣິຍານິ ວິຈິຕ຺ຣສໍວເນ.

໑໐໒໕. ‘‘ຣເຖ ຐິຕາຕາ ມິຄມນ຺ທໂລຈນາ, ອາຬາຣປມ຺ຫາ ຫສິຕາ ປິຍໍວທາ;

ເວຬຸຣິຍຊາລາວຕຕາ ຕນຸຈ຺ຉວາ, ສເທວ ຄນ຺ຘພ຺ພສູຣຄ຺ຄປູຊິຕາ.

໑໐໒໖. ‘‘ຕາ ຣຕ຺ຕຣຕ຺ຕມ຺ພຣປີຕວາສສາ, ວິສາລເນຕ຺ຕາ ອຠິຣຕ຺ຕໂລຈນາ;

ກຸເລ ສຸຊາຕາ ສຸຕນູ ສຸຈິມ຺ຫິຕາ, ຣເຖ ຐິຕາ ປຎ຺ຊລິກາ ອຸປຏ຺ຐິຕາ.

໑໐໒໗. ‘‘ຕາ ກມ຺ພຸເກຍູຣຘຣາ ສຸວາສສາ, ສຸມຊ຺ຌິມາ ອູຣຸຖນູປປນ຺ນາ;

ວຏ຺ຏງ຺ຄຸລິໂຍ ສຸມຸຂາ ສຸທສ຺ສນາ, ຣເຖ ຐິຕາ ປຎ຺ຊລິກາ ອຸປຏ຺ຐິຕາ.

໑໐໒໘. ‘‘ອຎ຺ຎາ ສຸເວຓີ ສຸສຸ ມິສ຺ສເກສິໂຍ, ສມໍ ວິຠຕ຺ຕາຫິ ປຠສ຺ສຣາຫິ ຈ;

ອນຸພ຺ພຕາ ຕາ ຕວ ມານເສ ຣຕາ, ຣເຖ ຐິຕາ ປຎ຺ຊລິກາ ອຸປຏ຺ຐິຕາ.

໑໐໒໙. ‘‘ອາເວຬິນິໂຍ ປທຸມຸປ຺ປລຈ຺ຉທາ, ອລງ຺ກຕາ ຈນ຺ທນສາຣວາສິຕາ;

ອນຸພ຺ພຕາ ຕາ ຕວ ມານເສ ຣຕາ, ຣເຖ ຐິຕາ ປຎ຺ຊລິກາ ອຸປຏ຺ຐິຕາ.

໑໐໓໐. ‘‘ຕາ ມາລິນິໂຍ ປທຸມຸປ຺ປລຈ຺ຉທາ, ອລງ຺ກຕາ ຈນ຺ທນສາຣວາສິຕາ;

ອນຸພ຺ພຕາ ຕາ ຕວ ມານເສ ຣຕາ, ຣເຖ ຐິຕາ ປຎ຺ຊລິກາ ອຸປຏ຺ຐິຕາ.

໑໐໓໑. ‘‘ກຓ຺ເຐສຸ ເຕ ຍານິ ປິຬນ຺ຘນານິ, ຫຕ຺ເຖສຸ ປາເທສຸ ຕເຖວ ສີເສ;

ໂອຠາສຍນ຺ຕີ ທສ ສພ຺ພໂສ ທິສາ, ອພ຺ຠຸທ຺ທຍໍ ສາຣທິໂກວ ຠາຓຸມາ.

໑໐໓໒. ‘‘ວາຕສ຺ສ ເວເຄນ ຈ ສມ຺ປກມ຺ປິຕາ, ຠຸເຊສຸ ມາລາ ອປິຬນ຺ຘນານິ ຈ;

ມຸຎ຺ຈນ຺ຕິ ໂຆສໍ ຣຸຈິຣໍ ສຸຈິໍ ສຸຠໍ, ສພ຺ເພຫິ ວິຎ຺ຎູຫິ ສຸຕພ຺ພຣູປໍ.

໑໐໓໓. ‘‘ອຸຍ຺ຍານຠູມ຺ຍາ ຈ ທຸວທ຺ຘໂຕ ຐິຕາ, ຣຖາ ຈ ນາຄາ ຕູຣິຍານິ ຈ ສໂຣ;

ຕເມວ ເທວິນ຺ທ ປໂມທຍນ຺ຕິ, ວີຓາ ຍຖາ ໂປກ຺ຂຣປຕ຺ຕພາຫຸຠິ.

໑໐໓໔. ‘‘ອິມາສຸ ວີຓາສຸ ພຫູສຸ ວຄ຺ຄູສຸ, ມນຸຎ຺ຎຣູປາສຸ ຫທເຍຣິຕໍ ປີຕິໍ;

ປວຊ຺ຊມານາສຸ ອຕີວ ອຈ຺ຉຣາ, ຠມນ຺ຕິ ກຎ຺ຎາ ປທຸເມສຸ ສິກ຺ຂິຕາ.

໑໐໓໕. ‘‘ຍທາ ຈ ຄີຕານິ ຈ ວາທິຕານິ ຈ, ນຈ຺ຈານິ ຈິມານິ ສເມນ຺ຕິ ເອກໂຕ;

ອເຖຕ຺ຖ ນຈ຺ຈນ຺ຕິ ອເຖຕ຺ຖ ອຈ຺ຉຣາ, ໂອຠາສຍນ຺ຕີ ອຸຠໂຕ ວຣິຕ຺ຖິໂຍ.

໑໐໓໖. ‘‘ໂສ ໂມທສິ ຕູຣິຍຄຓປ຺ປໂພຘໂນ, ມຫີຍມາໂນ ວຊິຣາວຸໂຘຣິວ;

ອິມາສຸ ວີຓາສຸ ພຫູສຸ ວຄ຺ຄູສຸ, ມນຸຎ຺ຎຣູປາສຸ ຫທເຍຣິຕໍ ປີຕິໍ.

໑໐໓໗. ‘‘ກິໍ ຕ຺ວໍ ປຸເຣ ກມ຺ມມກາສິ ອຕ຺ຕນາ, ມນຸສ຺ສຠູໂຕ ປຸຣິມາຍ ຊາຕິຍາ;

ອຸໂປສຖໍ ກໍ ວາ ຕຸວໍ ອຸປາວສິ, ກໍ ຘມ຺ມຈຣິຍໍ ວຕມາຠິໂຣຈຍິ.

໑໐໓໘. ‘‘ນຍີທມປ຺ປສ຺ສ ກຕສ຺ສ ກມ຺ມຸໂນ, ປຸພ຺ເພ ສຸຈິຓ຺ຓສ຺ສ ອຸໂປສຖສ຺ສ ວາ;

ອິທ຺ຘານຸຠາໂວ ວິປຸໂລ ອຍໍ ຕວ, ຍໍ ເທວສງ຺ຆໍ ອຠິໂຣຈເສ ຠຸສໍ.

໑໐໓໙. ‘‘ທານສ຺ສ ເຕ ອິທໍ ຜລໍ, ອໂຖ ສີລສ຺ສ ວາ ປນ;

ອໂຖ ອຎ຺ຊລິກມ຺ມສ຺ສ, ຕໍ ເມ ອກ຺ຂາຫິ ປຸຈ຺ຉິໂຕ’’ຕິ.

໑໐໑໕. ຕຕ຺ຖ ສຫສ຺ສຍຸຕ຺ຕນ຺ຕິ ສຫສ຺ເສນ ຍຸຕ຺ຕໍ, ສຫສ຺ສໍ ວາ ຍຸຕ຺ຕໍ ໂຍຊິຕໍ ເອຕສ຺ມິນ຺ຕິ ສຫສ຺ສຍຸຕ຺ຕໍ. ກສ຺ສ ປເນຕໍ ສຫສ຺ສນ຺ຕິ? ‘‘ຫຍວາຫນ’’ນ຺ຕິ ອນນ຺ຕຣໍ ວຸຈ຺ຈມານຕ຺ຕາ ຫຍານນ຺ຕິ ອຍມຕ຺ໂຖ ວິຎ຺ຎາຍເຕວ. ຫຍາ ວາຫນໍ ເອຕສ຺ສາຕິ ຫຍວາຫນໍ. ເກຈິ ປນ ‘‘ສຫສ຺ສຍຸຕ຺ຕຫຍວາຫນ’’ນ຺ຕິ ອນຸນາສິກໂລປໍ ເອກເມວ ສມາສປທໍ ກຕ຺ວາ ວຓ຺ເຓນ຺ຕິ, ເອຕສ຺ມິໍ ປກ຺ເຂ ຫຍວາຫນໍ ວິຍ ວາຫນນ຺ຕິ ອຕ຺ໂຖ ຍຸຊ຺ຊຕິ. ຫຍວາຫນສຫສ຺ສຍຸຕ຺ຕໍ ຍຸຕ຺ຕຫຍວາຫນສຫສ຺ສນ຺ຕິ ຫິ ອຕ຺ໂຖ. ອປເຣ ປນ ‘‘ສຫສ຺ສຍຸຕ຺ຕນ຺ຕິ ສຫສ຺ສທິພ຺ພາຊຎ຺ຎຍຸຕ຺ຕ’’ນ຺ຕິ ວທນ຺ຕິ. ສນ຺ທນນ຺ຕິ ຣຖໍ. ເນກຈິຕ຺ຕນ຺ຕິ ອເນກຈິຕ຺ຕໍ ນານາວິຘວິຈິຕ຺ຕວນ຺ຕໍ. ອຸຍ຺ຍານຠູມິໍ ອຠິໂຕຕິ ອຸຍ຺ຍານຠູມິຍາ ສມີເປ. ‘‘ອຠິໂຕ’’ຕິ ຫິ ປທໍ ອເປກ຺ຂິຕ຺ວາ ສາມິອຕ຺ເຖ ເອຕໍ ອຸປໂຍຄວຈນໍ. ເກຈິ ປນ ‘‘ອຸຍ຺ຍານຠູມ຺ຍາ’’ຕິປິ ປຐນ຺ຕິ, ເຕ ສທ຺ທນຍມ຺ປິ ອນຸປຘາເຣນ຺ຕາ ປຐນ຺ຕິ. ອນຸກ຺ກມນ຺ຕິ ຄຈ຺ຉນ຺ໂຕ ປຸຣິນ຺ທໂທ ຠູຕປຕີວ ວາສໂວ ວິໂຣຈສີຕິ ສມ຺ພນ຺ໂຘ.

໑໐໑໖. ໂສວຓ຺ຓມຍາຕິ ສຸວຓ຺ຓມຍາ. ເຕຕິ ຕວ. ຣຖກຸພ຺ພຣາ ອຸໂຠຕິ ຣຖສ຺ສ ອຸໂຠສຸ ປສ຺ເສສຸ ເວທິກາ. ໂຍ ຫິ ຣຖສ຺ສ ໂສຠນຕ຺ຖຎ຺ເຈວ ອຸປຣິ ຐິຕານໍ ຄຸຕ຺ຕຕ຺ຖຎ຺ຈ ອຸໂຠສຸ ປສ຺ເສສຸ ເວທິກາກາເຣນ ປຣິກ຺ເຂໂປ ກຣີຍຕິ, ຕສ຺ສ ປຸຣິມຠາເຄ ອຸໂຠສຸ ປສ຺ເສສຸ ຍາວ ຣຖີສາ, ຕາວ ຫຕ຺ເຖຫິ ຄຫຓໂຍຄ຺ໂຄ ຣຖສ຺ສ ອວຍວວິເສໂສ, ອິຘ ໂສ ເອວ ກຸພ຺ພໂຣຕິ ອຘິປ຺ເປໂຕ. ເຕເນວາຫ ‘‘ອຸໂຠ’’ຕິ. ອຎ຺ຎຕ຺ຖ ປນ ຣຖີສາ ກຸພ຺ພໂຣຕິ ວຸຈ຺ຈຕິ. ຜເລຫີຕິ ຣຖູປຕ຺ຖມ຺ຠສ຺ສ ທກ຺ຂິຓວາມເຠເທຫິ ທ຺ວີຫິ ຜເລຫິ, ປຣິຍນ຺ຕາເວຕ຺ຖ ຜລາຕິ ວຸຕ຺ຕາ. ອໍເສຫີຕິ ກຸພ຺ພຣຜເລ ປຕິຏ຺ຐິເຕຫິ ເຫຏ຺ຐິມອໍເສຫິ. ອຕີວ ສງ຺ຄຕາຕິ ອຕິວິຍ ສຸຏ຺ຐຸ ສງ຺ຄຕາ ສຸຜສ຺ສິຕາ ນິພ຺ພິວຣາ. ອິທຎ຺ຈ ສິປ຺ປິວິຣຈິເຕ ກິຕ຺ຕິມຣເຖ ລພ຺ຠມານວິເສສໍ ຕຕ຺ຖ ອາໂຣເປຕ຺ວາ ວຸຕ຺ຕໍ. ໂສ ປນ ອໂປຣິສຕາຍ ອກິຕ຺ຕິໂມ ສຍໍຊາໂຕ ເກນຈິ ອຆຏິໂຕເຍວ. ສຸຊາຕຄຸມ຺ພາຕິ ສຸສຓ຺ຐິຕຖມ຺ຠກສມຸທາຍາ. ເຍ ຫິ ເວທິກາຍ ນິຣນ຺ຕຣໍ ຐິຕາ ສຸສຓ຺ຐິຕຆຏກາທິອວຍວວິເສສວນ຺ໂຕ ຖມ຺ຠກສມຸທາຍາ, ເຕສໍ ວເສເນວໍ ວຸຕ຺ຕໍ ‘‘ສຸຊາຕຄຸມ຺ພາ’’ຕິ. ນຣວີຣນິຏ຺ຐິຕາຕິ ສິປ຺ປາຈຣິເຍຫິ ນິຏ຺ຐາປິຕສທິສາ. ສິປ຺ປາຈຣິຍາ ຫິ ອຕ຺ຕໂນ ສຣີຣເຂທໍ ອຈິນ຺ເຕຕ຺ວາ ວີຣິຍພເລນ ສິປ຺ປສ຺ສ ສຸຏ຺ຐຸ ວິຈາຣຓໂຕ ນເຣສຸ ວີຣິຍວນ຺ໂຕຕິ ອິຘ ‘‘ນຣວີຣາ’’ຕິ ວຸຕ຺ຕາ. ນຣວີຣາຕິ ວາ ເທວປຸຕ຺ຕສ຺ສ ອາລປນໍ. ນິຏ຺ຐິຕາຕິ ປຣິໂຍສິຕາ ປຣິປຸຓ຺ຓໂສຠາຕິສຍາ. ‘‘ນຣວີຣນິມ຺ມິຕາ’’ຕິ ວາ ປາໂຐ, ນເຣສຸ ຘິຕິສມ຺ປນ຺ເນຫິ ນິມ຺ມິຕສທິສາຕິ ອຕ຺ໂຖ. ເອວໍວິຘກຸພ຺ພຣຕາຍ ອຍໍ ຕວ ຣໂຖ ວິໂຣຈຕິ. ກິໍ ວິຍ? ປນ຺ນຣເສວ ຈນ຺ໂທ, ສຸກ຺ກປກ຺ເຂ ປນ຺ນຣສິຍໍ ປຣິປຸຓ຺ຓກາເລ ຈນ຺ທິມາ ວິຍ.

໑໐໑໗. ສຸວຓ຺ຓຊາລາວຕໂຕຕິ ສຸວຓ຺ຓຊາລເກຫິ ອວຕໂຕ ຉາທິໂຕ. ‘‘ສຸວຓ຺ຓຊາລາວິຕໂຕ’’ຕິປິ ປາໂຐ, ຄວຈ຺ຉິໂຕຕິ ອຕ຺ໂຖ. ພຫູຫີຕິ ອເນເກຫິ. ນານາຣຕເນຫີຕິ ປທຸມຣາຄຜຸສ຺ສຣາຄາທິນານາວິຘຣຕເນຫິ. ສຸນນ຺ທິໂຆໂສຕິ ສຸຏ຺ຐຸ ນນ຺ທິຕພ຺ພໂຆໂສ, ສວນີຍມຘຸຣນິນ຺ນາໂທຕິ ອຕ຺ໂຖ. ສຸນນ຺ທິໂຆໂສຕິ ວາ ສຸຏ຺ຐຸ ກຕນນ຺ທິໂຆໂສ, ນຈ຺ຈນາທີນໍ ທສ຺ສນາທີສຸ ປວຕ຺ຕິຕສາຘຸກາຣສທ຺ທາທິວເສນ ກຕປໂມທນິນ຺ນາໂທຕິ ອຕ຺ໂຖ, ‘‘ກາເລນ ກາລໍ ອາສີວາທນວເສນ ສຸຏ຺ຐຸ ປຍຸຕ຺ຕນນ຺ທິໂຆໂສ’’ຕິ ຈ ວທນ຺ຕິ. ສຸຠສ຺ສໂຣຕິ ສຸຏ຺ຐຸ ອຕິວິຍ ໂອຠາສນສຠາໂວ, ຕຕ຺ຖ ວາ ປວຕ຺ຕມານານໍ ເທວຕານໍ ໂສຠເນນ ຄີຕວາທິຕສ຺ສເຣນ ສຸຠສ຺ສໂຣ. ຈາມຣຫຕ຺ຖພາຫຸຠີຕິ ຈາມຣຫຕ຺ຖຍຸຕ຺ຕພາຫູຫິ ອິໂຕ ຈິໂຕ ຈ ພີຊຍມານ ຈາມຣກລາເປຫິ ເທວຕານໍ ຠຸເຊຫິ, ຕຖາຠູຕາຫິ ເທວຕາຫິ ວາ ວິໂຣຈຕິ.

໑໐໑໘. ນາຠ຺ໂຍຕິ ຣຖຈກ຺ການໍ ນາຠິໂຍ. ມນສາຠິນິມ຺ມິຕາຕິ ‘‘ອິເມ ອີທິສາ ໂຫນ຺ຕູ’’ຕິ ຈິຕ຺ເຕນ ນິມ຺ມິຕສທິສາ. ຣຖສ຺ສ ປາທນ຺ຕຣມຊ຺ຌຠູສິຕາຕິ ຣຖສ຺ສ ປາທານໍ ຣຖຈກ຺ການໍ ອນ຺ເຕນ ເນມິນາ ນານາຣຕນສມຸຊ຺ຊເລນ ອຣານໍ ເວມຊ຺ເຌນ ຈ ມຓ຺ຑິຕາ. ສຕຣາຊິຈິຕ຺ຕິຕາຕິ ອເນກວຓ຺ຓາຫິ ອເນກສຕາຫິ ຣາຊີຫິ ເລຂາຫິ ຈິຕ຺ຕິຕາ ວິຈິຕ຺ຕຠາວໍ ຄຕາ. ສເຕຣຕາ ວິຊ຺ຊຸຣິວາຕິ ສເຕຣຕສງ຺ຂາຕວິຊ຺ຊຸລຕາ ວິຍ ປຠາສເຣ ວິຊ຺ໂຊຕນ຺ຕິ.

໑໐໑໙. ອເນກຈິຕ຺ຕາວຕໂຕຕິ ອເນເກຫິ ມາລາກມ຺ມາທິຈິຕ຺ເຕຫິ ອວຕໂຕ ສໂມກິຓ຺ໂຓ. ‘‘ອເນກຈິຕ຺ຕາວິຕໂຕ’’ຕິປິ ປຐນ຺ຕິ, ໂສເຍວ ອຕ຺ໂຖ, ຄາຖາສຸຂຕ຺ຖໍ ປນ ທີຆກຣຓໍ. ປຸຖູ ຈ ເນມີ ຈາຕິ ປຸຖຸລເນມິ ຈ, ເອໂກ ຈ-ກາໂຣ ນິປາຕມຕ຺ຕໍ. ສຫສ຺ສຣໍສິໂກຕິ ອເນກສຫສ຺ສຣໍສິໂກ. ‘‘ສຫສ຺ສຣໍສິໂຍ’’ຕິປິ ປາຬິ. ອປເຣ ປນ ‘‘ນຕາ ຣໍສິໂຍ’’ຕິ ຈ ປຐນ຺ຕິ, ຕຕ຺ຖ ນຕາຕິ ອຊິຍຘນຸທຓ຺ຑໂກ ວິຍ ໂອຓຕາ ເນມິປ຺ປເທສາ. ສຫສ຺ສຣໍສິໂຍຕິ ສູຣິຍມຓ຺ຑລໍ ວິຍ ວິປ຺ຜຸຣນ຺ຕກິຣຓຊາລາ. ເຕສນ຺ຕິ ໂອລມ຺ພມານກິງ຺ກິຓິກຊາລານໍ ເນມິປ຺ປເທສານໍ.

໑໐໒໐. ສິຣສ຺ມິນ຺ຕິ ສີເສ, ຣຖສ຺ສ ສີເສຕິ ອຕ຺ໂຖ. ສິໂຣ ວາ ອສ຺ມິໍ ຣເຖ. ຈິຕ຺ຕນ຺ຕິ ວິຈິຕ຺ຕໍ. ມຓິຈນ຺ທກປ຺ປິຕນ຺ຕິ ມຓິມຍມຓ຺ຑລານຸວິທ຺ຘໍ ຈນ຺ທມຓ຺ຑລສທິເສນ ມຓິນາ ອນຸວິທ຺ຘໍ. ຣຸຈິຣໍ ປຠສ຺ສຣນ຺ຕິ ອິມິນາ ຕສ຺ສ ຈນ຺ທມຓ຺ຑລສທິສຕໍເຍວ ວິຠາເວຕິ, ສທາ ວິສຸທ຺ຘນ຺ຕິ ອິມິນາ ປນສ຺ສ ຈນ຺ທມຓ຺ຑລໂຕປິ ວິເສສໍ ທສ຺ເສຕິ. ສຸວຓ຺ຓຣາຊີຫີຕິ ອນ຺ຕຣນ຺ຕຣາ ວຏ຺ຏາກາເຣນ ສຓ຺ຐິຕາຫິ ສຸວຓ຺ຓເລຂາຫິ. ສງ຺ຄຕນ຺ຕິ ສຫິຕໍ. ເວຬຸຣິຍຣາຊີວາຕິ ອນ຺ຕຣນ຺ຕຣາ ສຸວຓ຺ຓຣາຊີຫິ ຂຈິຕມຓິມຓ຺ຑລຕ຺ຕາ ເວຬຸຣິຍຣາຊີຫິ ວິຍ ໂສຠຕິ. ‘‘ເວຬຸຣິຍຣາຊີຫີ’’ຕິ ຈ ປຐນ຺ຕິ.

໑໐໒໑. ວາຬີຕິ ວາຬວນ຺ໂຕ ສມ຺ປນ຺ນວາຬຘິໂນ, ອສ຺ເສ ສນ຺ຘາຍ ວທຕິ. ‘‘ວາຊີ’’ຕິ ວາ ປາໂຐ. ມຓິຈນ຺ທກປ຺ປິຕາຕິ ຈາມໂຣລມ຺ພນຏ຺ຐາເນສຸ ມຓິມຍຈນ຺ທການຸວິທ຺ຘາ. ອາໂຣຫກມ຺ພູຕິ ອຸຈ຺ຈາ ເຈວ ຕທນຸຣູປປຣິຓາຫາ ຈ, ອາໂຣຫປຣິຓາຫສມ຺ປນ຺ນາຕິ ອຕ຺ໂຖ. ສຸຊວາຕິ ສຸນ຺ທຣຊວາ ຊວວນ຺ໂຕ ມຫາຊວາ, ໂສຠນຄຕິກາຕິ ອຕ຺ໂຖ. ພ຺ຣຫູປມາຕິ ພ຺ຣຫາ ວິຍ ປມິນິຕພ຺ພາ, ອຕ຺ຕໂນ ປມາຓໂຕ ອຘິກາ ວິຍ ປຎ຺ຎາຍນ຺ຕາຕິ ອຕ຺ໂຖ. ພ຺ຣຫາຕິ ວຸຑ຺ຒາ ປວຑ຺ຒສພ຺ພງ຺ຄປຈ຺ຈງ຺ຄາ. ມຫນ຺ຕາຕິ ມຫານຸຠາວາ ມຫິທ຺ຘິກາ. ພລິໂນຕິ ສຣີຣພເລນ ຈ ອຸສ຺ສາຫພເລນ ຈ ພລວນ຺ໂຕ. ມຫາຊວາຕິ ສີຆເວຄາ. ມໂນ ຕວຎ຺ຎາຍາຕິ ຕວ ຈິຕ຺ຕໍ ຎຕ຺ວາ. ຕເຖວາຕິ ຈິຕ຺ຕານຸຣູປເມວ. ສິໍສເຣຕິ ສໍສປ຺ປເຣ, ປວຕ຺ຕເຣຕິ ອຕ຺ໂຖ.

໑໐໒໒. ອິເມຕິ ຍຖາວຸຕ຺ຕອສ຺ເສ ສນ຺ຘາຍາຫ. ສພ຺ເພຕິ ສຫສ຺ສມຕ຺ຕາປິ. ສຫິຕາຕິ ສມານຊວຕາຍ ສມານຄມນຕາຍ ຈ ຄຕິຍໍ ສຫິຕາ, ອຎ຺ຎມຎ຺ຎໍ ອນູນາຘິກຄມນາຕິ ອຕ຺ໂຖ. ຈຕູຫິ ປາເທຫິ ກມນ຺ຕິ ຄຈ຺ຉນ຺ຕີຕິ ຈຕຸກ຺ກມາ. ສມໍ ວຫນ຺ຕີຕິ ‘‘ສຫິຕາ’’ຕິ ປເທນ ວຸຕ຺ຕເມວຕ຺ຖໍ ປາກຏຕຣໍ ກໂຣຕິ. ມຸທຸກາຕິ ມຸທຸສຠາວາ, ຠທ຺ຣາ ອາຊານີຍາຕິ ອຕ຺ໂຖ. ເຕນາຫ ‘‘ອນຸທ຺ຘຕາ’’ຕິ, ອຸທ຺ຘຕຣຫິຕາ ໂຂຠໍ ອກໂຣນ຺ຕາຕິ ອຕ຺ໂຖ. ອາໂມທມານາຕິ ປໂມທມານາ, ອຂຬຸງ຺ກຕາຍ ອຎ຺ຎມຎ຺ຎໍ ຣຖິກາທີນຎ຺ຈ ຕຸຏ຺ຐິໍ ປເວທຍນ຺ຕາຕິ ອຕ຺ໂຖ.

໑໐໒໓. ຘຸນນ຺ຕີຕິ ຈາມຣຠາຣໍ ເກສຣຠາຣໍ ວາລຘິຎ຺ຈ ວິຘຸນນ຺ຕິ. ວຄ຺ຄນ຺ຕີຕິ ກທາຈິ ປເທ ປທໍ ນິກ຺ຂິປນ຺ຕາ ວຄ຺ຄເນນ ຄມເນນ ຄຈ຺ຉນ຺ຕິ. ປຕນ຺ຕີຕິ ກທາຈິ ປວຕ຺ຕນ຺ຕິ, ລງ຺ຆນ຺ຕີຕິ ອຕ຺ໂຖ. ‘‘ປ຺ລວນ຺ຕີ’’ຕິ ຈ ເກຈິ ປຐນ຺ຕິ, ໂສເຍວຕ຺ໂຖ. ອພ຺ຠຸທ຺ຘຸນນ຺ຕາຕິ ກມ຺ມສິປ຺ປິນາ ສຸກເຕ ສຸຏ຺ຐຸ ນິມ຺ມິເຕ ຂຸທ຺ທກຆຓ຺ຏາທິອສ຺ສາລງ຺ກາເຣ ອຠິອຸທ຺ຘຸນນ຺ຕາ ອຘິກໍ ອຸທ຺ຘຸນນ຺ຕາ. ເຕສນ຺ຕິ ເຕສໍ ປິຬນ຺ຘນານໍ.

໑໐໒໔. ຣຖສ຺ສ ໂຆໂສຕິ ຍຖາວຸຕ຺ໂຕ ຣຖນິຄ຺ໂຆໂສ. ອປິຬນ຺ຘນານ ຈາຕິ ອ-ກາໂຣ ນິປາຕມຕ຺ຕໍ. ປິຬນ຺ຘນານໍ ອາຠຣຓານໍ. ອປິຬນ຺ຘນນ຺ຕິ ຈ ອາຠຣຓປຣິຍາໂຍຕິ ວາ ວທນ຺ຕິ, ຣຖສ຺ສານໍ ອາຠຣຓານຎ຺ຈໂຆໂສຕິ ອຕ຺ໂຖ. ຂຸຣສ຺ສນາໂທຕິ ຕຸຣງ຺ຄານໍ ຂຸຣນິປາຕສທ຺ໂທ. ກິຎ຺ຈາປິ ອສ຺ສາ ອາກາເສນ ຄຈ຺ຉນ຺ຕິ, ມຘຸຣສ຺ສ ປນ ຂຸຣນິປາຕສທ຺ທສ຺ສ ອຸປລທ຺ຘິເຫຕຸຠູເຕນ ກມ຺ມຸນາ ເຕສໍ ຂຸຣນິກ຺ເຂເປ ຂຸຣນິກ຺ເຂເປ ປຏິຆາໂຕ ລພ຺ຠຕີຕິ ວທນ຺ຕິ. ອຠິຫິໍສນາຍ ຈາຕິ ອສ຺ສານໍ ອຘິກຫິໍສເນນ ຈ, ອນ຺ຕຣນ຺ຕຣາ ອສ຺ເສຫິ ປວຕ຺ຕິຕເຫສເນນ ຈາຕິ ອຕ຺ໂຖ. ‘‘ອຠິເຫສນາຍ ຈາ’’ຕິ ເກຈິ ປຐນ຺ຕິ. ສມິຕສ຺ສາຕິ ສມຸທິຕສ຺ສ ທິພ຺ພຊນສ຺ສ ໂຆໂສ ຈ ສຸວຄ຺ຄຸ ສຸມຘຸຣໍ ສຸຍ຺ຍຕິ. ກິໍ ວິຍາຕິ ອາຫ ‘‘ຄນ຺ຘພ຺ພຕູຣິຍານິ ວິຈິຕ຺ຣສໍວເນ’’ຕິ, ຈິຕ຺ຣລຕາວເນ ຄນ຺ຘພ຺ພເທວປຸຕ຺ຕານໍ ປຎ຺ຈງ຺ຄິກຕູຣິຍານິ ວິຍ. ຕູຣິຍສນ຺ນິສ຺ສິໂຕ ຫິ ສທ຺ໂທ ‘‘ຕູຣິຍານີ’’ຕິ ວຸຕ຺ໂຕ ນິສ຺ສຍໂວຫາເຣນ. ‘‘ຄນ຺ຘພ຺ພຕູຣິຍານ ຈ ວິຈິຕ຺ຣສໍວເນ’’ຕິ ຈ ປາໂຐ, ‘‘ຕູຣິຍານຎ຺ຈ’’ອິຕິ ອນຸນາສິກໍ ອາເນຕ຺ວາ ໂຍເຊຕພ຺ພໍ. ອປເຣ ‘‘ຄນ຺ຘພ຺ພຕູຣິຍານິ ວິຈິຕ຺ຣປວເນ’’ຕິ ປຐນ຺ຕິ.

໑໐໒໕. ຣເຖ ຐິຕາຕາຕິ ຣເຖ ຐິຕາ ເອຕາ. ມິຄມນ຺ທໂລຈນາຕິ ມິຄຈ຺ຉາປິການໍ ວິຍ ມຸທຸສິນິທ຺ຘທິຏ຺ຐິນິປາຕາ. ອາຬາຣປມ຺ຫາຕິ ພຫລສງ຺ຄຕປຂຸມາ, ໂຄປຂຸມາຕິ ອຕ຺ໂຖ. ຫສິຕາຕິ ປຫສິຕາ, ປຫໍສິຕມຸຂາຕິ ອຕ຺ໂຖ. ປິຍໍວທາຕິ ປິຍວາທິນິໂຍ. ເວຬຸຣິຍຊາລາວຕຕາຕິ ເວຬຸຣິຍມຓິມເຍນ ຊາເລນ ຉາທິຕສຣີຣາ. ຕນຸຈ຺ຉວາຕິ ສຸຂຸມຈ຺ຉວິໂຍ. ສເທວາຕິ ສທາ ເອວ ສພ຺ພກາລເມວ. ຄນ຺ຘພ຺ພສູຣຄ຺ຄປູຊິຕາຕິ ຄນ຺ຘພ຺ພເທວຕາຫິ ເຈວ ອປຣາຫິ ຈ ອຄ຺ຄເທວຕາຫິ ລທ຺ຘປູຊາ.

໑໐໒໖. ຕາ ຣຕ຺ຕຣຕ຺ຕມ຺ພຣປີຕວາສສາຕິ ຣຊນີຍຣູປາ ຈ ຣຕ຺ຕປີຕວຕ຺ຖາ ຈ. ອຠິຣຕ຺ຕໂລຈນາຕິ ວິເສສໂຕ ຣຕ຺ຕຣາຊີຫິ ອຸປໂສຠິຕນຍນາ. ກຸເລ ສຸຊາຕາຕິ ສິນ຺ຘວກຸເລ ສຸຊາຕາ ວິສິຏ຺ຐເທວນິກາເຍ ສມ຺ຠວາ. ສຸຕນູຕິ ສຸນ຺ທຣສຣີຣາ. ສຸຈິມ຺ຫິຕາຕິ ສຸທ຺ຘສິຕກຣຓາ.

໑໐໒໗. ຕາ ກມ຺ພຸເກຍູຣຘຣາຕິ ສຸວຓ຺ຓມຍເກຍູຣຘຣາ. ສຸມຊ຺ຌິມາຕິ ວິລຄ຺ຄມຊ຺ຌາ. ອູຣຸຖນູປປນ຺ນາຕິ ສມ຺ປນ຺ນອູຣຸຖນາ, ກທລິກ຺ຂນ຺ຘສທິສອູຣຸ ເຈວ ສມຸຄ຺ຄສທິສຖນາ ຈ. ວຏ຺ຏງ຺ຄຸລິໂຍຕິ ອນຸປຸພ຺ພໂຕ ວຏ຺ຏງ຺ຄຸລິໂຍ. ສຸມຸຂາຕິ ສຸນ຺ທຣມຸຂາ, ປມຸທິຕມຸຂາ ວາ. ສຸທສ຺ສນາຕິ ທສ຺ສນີຍາ.

໑໐໒໘. ອຎ຺ຎາຕິ ເອກຈ຺ຈາ. ສຸເວຓີຕິ ສຸນ຺ທຣເກສເວຓິໂຍ. ສຸສູຕິ ທຫຣາ. ມິສ຺ສເກສິໂຍຕິ ຣຕ຺ຕມາລາທີຫິ ມິສ຺ສິຕເກສວຏ຺ຏິໂຍ. ກຖໍ? ສມໍ ວິຠຕ຺ຕາຫິ ປຠສ຺ສຣາຫິ ຈາຕິ, ສມໍ ອຎ຺ຎມຎ຺ຎສທິສໍ ນານາວິຠຕ຺ຕິວເສນ ວິຠຕ຺ຕາຫິ ສຸວຓ຺ຓຈີຣາທິຂຈິຕາຫິ ອິນ຺ທນີລມຓິອາທໂຍ ວິຍ ປຠສ຺ສຣາຫິ ເກສວຏ຺ຏີຫິ ມິສ຺ສິຕເກສິໂຍຕິ ໂຍຊນາ. ອນຸພ຺ພຕາຕິ ອນຸກູລກິຣິຍາ. ຕາຕິ ອຈ຺ຉຣາໂຍ.

໑໐໒໙. ຈນ຺ທນສາຣໂວສິຕາຕິ ສາຣຠູເຕນ ທິພ຺ພຈນ຺ທເນນ ອຸລ຺ລິຕ຺ຕາ ວິຈ຺ຉຸຣິຕາ.

໑໐໓໑. ກຓ຺ເຐສູຕິອາທິນາ ຄີວູປຄຫຕ຺ຖູປຄປາທູປຄສີສູປຄາທິອາຠຣຓານິ ທສ຺ເສຕິ. ໂອຠາສຍນ຺ຕີຕິ ກຓ຺ເຐສຸ ຍານິ ປິຬນ຺ຘນານິ, ເຕຫິ ໂອຠາສຍນ຺ຕີຕິ ໂຍຊນາ. ເອວໍ ເສເສສຸປິ. ອພ຺ຠຸທ຺ທຍນ຺ຕິ ອຠິອຸຄ຺ຄຈ຺ຉນ຺ໂຕ, ‘‘ອພ຺ຠຸທ຺ທສ’’ນ຺ຕິປິ ປາໂຐ, ໂສເຍວຕ຺ໂຖ. ສາຣທິໂກຕິ ສຣທກາລິໂກ. ຠາຓຸມາຕິ ສູຣິໂຍ. ໂສ ຫິ ອພ຺ຠາທິໂທສວິຣເຫນ ທສປິ ທິສາ ສຸຏ຺ຐຸ ໂອຠາເສຕິ.

໑໐໓໒. ວາຕສ຺ສ ເວເຄນ ຈາຕິ ມນຸຎ຺ຎຄນ຺ຘູປຫາຣໍ ສທ຺ທູປຫາຣຎ຺ຈ ກໂຣນ຺ເຕນ ອຸປຫຣນ຺ເຕນ ວິຍ ວາຍນ຺ເຕນ ວາຕສ຺ສ ເວເຄນ ຣຖຕຸຣງ຺ຄເວເຄນ ຈ. ມຸຎ຺ຈນ຺ຕີຕິ ວິສ຺ສຊ຺ເຊນ຺ຕິ. ຣຸຈິຣນ຺ຕິ ປຎ຺ຈງ຺ຄິກຕູຣິຍານິ ວິຍ ອຸປຣູປຣິ ຣຸຈິທາຍກໍ. ສຸຈິນ຺ຕິ ສຸທ຺ຘໍ ອສໍສຏ຺ຐໍ. ສຸຠນ຺ຕິ ມນຸຎ຺ຎໍ. ສພ຺ເພຫິ ວິຎ຺ຎູຫິ ສຸຕພ຺ພຣູປນ຺ຕິ ສພ຺ເພຫິປິ ວິຎ຺ຎຸຊາຕິເກຫິ ຄນ຺ຘພ຺ພສມຍຎ຺ຎູຫິ ໂສຕພ຺ພໍ ສວນີຍໍ ອຸຕ຺ຕມສຠາວໍ ໂຆສໍ ມຸຎ຺ຈນ຺ຕີຕິ ໂຍຊນາ.

໑໐໓໓. ອຸຍ຺ຍານຠູມ຺ຍາຕິ ອຸຍ຺ຍານຠູມິຍໍ. ທຸວທ຺ຘໂຕຕິ ທ຺ວີຫິ ອທ຺ຘປສ຺ເສຫິ. ‘‘ທຸຠໂຕ ຈ ຐິຕາ’’ຕິປິ ປຐນ຺ຕິ, ໂສເຍວຕ຺ໂຖ. ຣຖາຕິ ຣເຖ. ນາຄາຕິ ນາເຄ. ອຸປໂຍຄຕ຺ເຖ ຫິ ເອຕໍ ປຈ຺ຈຕ຺ຕວຈນໍ. ສໂຣຕິ ຣຖນາຄຕູຣິຍານິ ປຏິຈ຺ຈ ນິພ຺ພຕ຺ໂຕ ສໂຣ. ເທວິນ຺ທາຕິ ເທວປຸຕ຺ຕໍ ອາລປຕິ. ວີຓາ ຍຖາ ໂປກ຺ຂຣປຕ຺ຕພາຫຸຠີຕິ ຍຖາ ວີຓາ ສມ຺ມເທວ ໂຍຊິເຕຫິ ໂທຓິປຕ຺ຕພາຫຸທຓ຺ເຑຫິ ຕໍຕໍມຸຈ຺ຉນານຸຣູປໍ ອວຏ຺ຐິເຕຫິ ວາທິຍມານາ ສຸຓນ຺ຕໍ ຊນໍ ປໂມເທຕິ, ເອວໍ ຕໍ ຣຖາທໂຍ ອຕ຺ຕໂນ ສເຣນ ປໂມທຍນ຺ຕິ. ສຸສິກ຺ຂິຕຠາເວນ ໂປກ຺ຂຣຠາວໍ ສຸນ຺ທຣຠາວໍ ປຕ຺ເຕຫິ ວີຓາວາທກສ຺ສ ຫຕ຺ເຖຫິ ປວາທິຕາ ວີຓາ ຍຖາ ມຫາຊນໍ ປໂມເທຕິ, ເອວໍ ຕໍ ຣຖາທໂຍ ອຕ຺ຕໂນ ສເຣນ ປໂມທຍນ຺ຕີຕິ.

໑໐໓໔. ອິມາສຸ ວີຓາສູຕິ ຄາຖາຍ ອຍໍ ສງ຺ເຂປຕ຺ໂຖ – ອິມາສຸ ອຸຊຸໂກຏິວງ຺ກພ຺ຣຫຕີນນ຺ທິນີຕິສຣອາທິເຠທາສຸ ພຫູສຸ ວີຓາສຸ ສິນິທ຺ຘມຘຸຣສ຺ສຣຕາຍ ວຄ຺ຄູສຸ ຕໂຕ ເອວ ມນຸຎ຺ຎຣູປາສຸ ຫທເຍຣິຕໍ ຫທຍງ຺ຄມໍ ຫທຍຫາຣິນິໍ ປີຕິໍ ປີຕິນິມິຕ຺ຕໍ ປວຊ຺ຊມານາສຸ ປວາທິຍມານາສຸ ອຈ຺ຉຣາ ເທວກຎ຺ຎາ ປີຕິເວຄຸກ຺ຂິຕ຺ຕຕາຍ ອຕ຺ຕໂນ ສຸສິກ຺ຂິຕຕາຍ ຈ ທິພ຺ພປທຸເມສຸ ຠມນ຺ຕິ ນຈ຺ຈໍ ທສ຺ເສນ຺ຕິໂຍ ສຎ຺ຈຣນ຺ຕິ.

໑໐໓໕. ອິມານີຕິ ອິທໍ ປຈ຺ເຈກໍ ໂຍເຊຕພ຺ພໍ ‘‘ອິມານິ ຄີຕານິ, ອິມານິ ວາທິຕານິ, ອິມານິ ນຈ຺ຈານິ ຈາ’’ຕິ. ສເມນ຺ຕິ ເອກໂຕຕິ ເອກຊ຺ຌໍ ສມຣສານິ ໂຫນ຺ຕິ. ອຖ ວາ ສເມນ຺ຕິ ເອກໂຕຕິ ເອກໂຕ ເອກຊ຺ຌໍ ສມານິ ສມຣສານິ ກໂຣນ຺ຕິ, ຕນ຺ຕິສ຺ສຣໍ ຄີຕສ຺ສເຣນ, ຄີຕສ຺ສຣຎ຺ຈ ຕນ຺ຕິສ຺ສເຣນ ສໍສນ຺ທນ຺ຕິໂຍ ນຈ຺ຈເນນ ຍຖາຘິຄເຕ ຫສ຺ສາທິຣເສ ອປຣິຫາເປນ຺ຕິໂຍ ສເມນ຺ຕິ ສມາເນນ຺ຕີຕິ ອຕ຺ໂຖ. ອຕ຺ເຖຕ຺ຖ ນຈ຺ຈນ຺ຕິ ອເຖຕ຺ຖ ອຈ຺ຉຣາ ໂອຠາສຍນ຺ຕີຕິ ເອວໍ ຄີຕາທີນິ ສມຣເສ ກໂຣນ຺ຕິໂຍ ອຖ ອຎ຺ຎາ ເອກຈ຺ຈາ ອຈ຺ຉຣາ ເອຕ຺ຖ ເອຕສ຺ມິໍ ຕວ ຣເຖ ນຈ຺ຈນ຺ຕິ, ອຖ ອຎ຺ຎາ ວຣິຕ຺ຖິໂຍ ອຸຕ຺ຕມິຕ຺ຖິໂຍ ນຈ຺ຈໍ ປສ຺ສນ຺ຕິໂຍ ອຕ຺ຕໂນ ສຣີໂຣຠາເສນ ເຈວ ວຕ຺ຖາຠຣຓໂອຠາເສນ ຈ ເອຕ຺ຖ ເອຕສ຺ມິໍ ປເທເສ ອຸຠໂຕ ທ຺ວີສຸ ປສ຺ເສສຸ ທສປິ ທິສາ ເກວລໍ ໂອຠາສຍນ຺ຕິ ວິຊ຺ໂຊຕຍນ຺ຕີຕິ ອຕ຺ໂຖ.

໑໐໓໖. ໂສຕິ ໂສ ຕ຺ວໍ ເອວໍຠູໂຕ. ຕູຣິຍຄຓປ຺ປໂພຘໂນຕິ ທິພ຺ພຕູຣິຍສມູເຫນ ກຕປີຕິປໂພຘໂນ. ມຫີຍມາໂນຕິ ປູຊີຍມາໂນ. ວຊິຣາວຸໂຘຣິວາຕິ ອິນ຺ໂທ ວິຍ.

໑໐໓໗. ອຸໂປສຖໍ ກໍ ວາ ຕຸວໍ ອຸປາວສີຕິ ອຎ຺ເຎຫິປິ ອຸໂປສໂຖ ອຸປວສີຍຕິ, ຕ຺ວໍ ກໍ ວາ ກີທິສໍ ນາມ ອຸໂປສຖໍ ອຸປວສີຕິ ປຸຈ຺ຉຕິ. ຘມ຺ມຈຣິຍນ຺ຕິ ທານາທິປຸຎ຺ຎປຏິປຕ຺ຕິໍ. ວຕນ຺ຕິ ວຕສມາທານໍ. ອຠິໂຣຈຍີຕິ ອຠິໂຣເຈສິ, ຣຸຈ຺ຈິຕ຺ວາ ປູເຣສີຕິ ອຕ຺ໂຖ. ‘‘ອຠິຣາຘຍີ’’ຕິປິ ປາໂຐ, ສາເຘສິ ນິປ຺ຜາເທສີຕິ ອຕ຺ໂຖ.

໑໐໓໘. ອິທນ຺ຕິ ນິປາຕມຕ຺ຕໍ, ອິທໍ ວາ ຜລນ຺ຕິ ອຘິປ຺ປາໂຍ. ອຠິໂຣຈເສຕິ ອຠິຠວິຕ຺ວາ ວິຊ຺ໂຊຕສິ.

ເອວໍ ມຫາເຖເຣນ ປຸຏ຺ໂຐ ເທວປຸຕ຺ໂຕ ຕມຕ຺ຖໍ ອາຈິກ຺ຂິ. ເຕນ ວຸຕ຺ຕໍ –

໑໐໔໐. ‘‘ໂສ ເທວປຸຕ຺ໂຕ ອຕ຺ຕມໂນ, ໂມຄ຺ຄລ຺ລາເນນ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລ’’ນ຺ຕິ.

໑໐໔໑. ‘‘ຊິຕິນ຺ທ຺ຣິຍໍ ພຸທ຺ຘມໂນມນິກ຺ກມໍ, ນຣຸຕ຺ຕມໍ ກສ຺ສປມຄ຺ຄປຸຄ຺ຄລໍ;

ອວາປຸຣນ຺ຕໍ ອມຕສ຺ສ ທ຺ວາຣໍ, ເທວາຕິເທວໍ ສຕປຸຎ຺ຎລກ຺ຂຓໍ.

໑໐໔໒. ‘‘ຕມທ຺ທສໍ ກຸຎ຺ຊຣໂມຆຕິຓ຺ຓໍ, ສຸວຓ຺ຓສິງ຺ຄີນທພິມ຺ພສາທິສໍ;

ທິສ຺ວານ ຕໍ ຂິປ຺ປມຫຸໍ ສຸຈີມໂນ, ຕເມວ ທິສ຺ວານ ສຸຠາສິຕທ຺ຘຊໍ.

໑໐໔໓. ‘‘ຕມນ຺ນປານໍ ອຖວາປິ ຈີວຣໍ, ສຸຈິໍ ປຓີຕໍ ຣສສາ ອຸເປຕໍ;

ປຸປ຺ຜາຠິກິຓ຺ຓມ຺ຫິ ສເກ ນິເວສເນ, ປຕິຏ຺ຐເປສິໍ ສ ອສງ຺ຄມານໂສ.

໑໐໔໔. ‘‘ຕມນ຺ນປາເນນ ຈ ຈີວເຣນ ຈ, ຂຊ຺ເຊນ ໂຠຊ຺ເຊນ ຈ ສາຍເນນ ຈ;

ສນ຺ຕປ຺ປຍິຕ຺ວາ ທ຺ວິປທານມຸຕ຺ຕມໍ, ໂສ ສຄ຺ຄໂສ ເທວປຸເຣ ຣມາມຫໍ.

໑໐໔໕. ‘‘ເອເຕນຸປາເຍນ ອິມໍ ນິຣຄ຺ຄຬໍ, ຍຎ຺ຎໍ ຍຊິຕ຺ວາ ຕິວິຘໍ ວິສຸທ຺ຘໍ;

ປຫາຍຫໍ ມານຸສກໍ ສມຸສ຺ສຍໍ, ອິນ຺ທູປໂມ ເທວປຸເຣ ຣມາມຫໍ.

໑໐໔໖. ‘‘ອາຍຸຎ຺ຈ ວຓ຺ຓຎ຺ຈ ສຸຂໍ ພລຎ຺ຈ, ປຓີຕຣູປໍ ອຕິກງ຺ຂຕາ ມຸນິ;

ອນ຺ນຎ຺ຈ ປານຎ຺ຈ ພຫຸໍ ສຸສງ຺ຂຕໍ, ປຕິຏ຺ຐເປຕພ຺ພມສງ຺ຄມານເສ.

໑໐໔໗. ‘‘ນຍິມສ຺ມິໍ ໂລເກ ປຣສ຺ມິໍ ວາ ປນ, ພຸທ຺ເຘນ ເສຏ຺ໂຐ ວ ສໂມ ວ ວິຊ຺ຊຕິ;

ອາຫຸເນຍ຺ຍານໍ ປຣມາຫຸຕິໍ ຄໂຕ, ປຸຎ຺ຎຕ຺ຖິການໍ ວິປຸລປ຺ຜເລສິນ’’ນ຺ຕິ.

໑໐໔໑. ຕຕ຺ຖ ຊິຕິນ຺ທ຺ຣິຍນ຺ຕິ ມນຈ຺ຉຏ຺ຐານໍ ອິນ຺ທ຺ຣິຍານໍ ໂພຘິມູເລເຍວ ອຄ຺ຄມຄ຺ເຄນ ຊິຕຕ຺ຕາ ນິພ຺ພິເສວນຠາວສ຺ສ ກຕຕ຺ຕາ ຊິຕິນ຺ທ຺ຣິຍໍ. ອຠິຎ຺ເຎຍ຺ຍາທີນໍ ອຠິຎ຺ເຎຍ຺ຍາທິຠາວໂຕ ອນວເສສໂຕ ອຠິສມ຺ພຸທ຺ຘຕ຺ຕາ ພຸທ຺ຘໍ. ປຸຣິປຸຓ຺ຓວີຣິຍຕາຍ ອໂນມນິກ຺ກມໍ ຈຕຸຣງ຺ຄສມນ຺ນາຄຕສ຺ສ ວີຣິຍສ຺ສ ຈຕຸພ຺ພິຘສມ຺ມປ຺ປຘານສ຺ສ ຈ ປາຣິປູຣິຍາຕິ ອຕ຺ໂຖ. ນຣຸຕ຺ຕມນ຺ຕິ ນຣານໍ ອຸຕ຺ຕມໍ ທ຺ວິປທຸຕ຺ຕມໍ. ກສ຺ສປນ຺ຕິ ຠຄວນ຺ຕໍ ໂຄຕ຺ເຕນ ວທຕິ. ອວາປຸຣນ຺ຕໍ ອມຕສ຺ສ ທ຺ວາຣນ຺ຕິ ໂກຓາຄມນສ຺ສ ຠຄວໂຕ ສາສນນ຺ຕຣຘານໂຕ ປຠຸຕິ ປິຫິຕໍ ນິພ຺ພານມຫານຄຣສ຺ສ ທ຺ວາຣໍ ອຣິຍມຄ຺ຄໍ ວິວຣນ຺ຕໍ. ເທວາຕິເທວນ຺ຕິ ສພ຺ເພສມ຺ປິ ເທວານໍ ອຕິເທວໍ. ສຕປຸຎ຺ຎລກ຺ຂຓນ຺ຕິ ອເນກສຕປຸຎ຺ຎວເສນ ນິພ຺ພຕ຺ຕມຫາປຸຣິສລກ຺ຂຓໍ.

໑໐໔໒. ກຸຎ຺ຊຣນ຺ຕິ ກິເລສປຏິສຕ຺ຕຸນິມ຺ມທ຺ທເນນ ກຸຎ຺ຊຣສທິສໍ, ມຫານາຄນ຺ຕິ ອຕ຺ໂຖ. ຈຕຸນ຺ນໍ ໂອຆານໍ ສໍສາຣມໂຫຆສ຺ສ ຕຣິຕຕ຺ຕາ ໂອຆຕິຓ຺ຓໍ. ສຸວຓ຺ຓສິງ຺ຄີນທພິມ຺ພສາທິສນ຺ຕິ ສິງ຺ຄີສຸວຓ຺ຓຊມ຺ພຸນທສຸວຓ຺ຓຣູປສທິສໍ, ກຎ຺ຈນສນ຺ນິຠຕ຺ຕຈນ຺ຕິ ອຕ຺ໂຖ. ທິສ຺ວານ ຕໍ ຂິປ຺ປມຫຸໍ ສຸຈີມໂນຕິ ຕໍ ກສ຺ສປສມ຺ມາສມ຺ພຸທ຺ຘໍ ທິສ຺ວາ ຂິປ຺ປໍ ຕາວເທວ ‘‘ສມ຺ມາສມ຺ພຸທ຺ໂຘ ຠຄວາ’’ຕິ ປສາທວເສນ ກິເລສມລາປຄມເນນ ສຸຈິມໂນ ວິສຸທ຺ຘມໂນ ອໂຫສິໍ, ຕຎ຺ຈ ໂຂ ຕເມວ ທິສ຺ວານ ຕໍ ທິສ຺ວາ ເອວ. ສຸຠາສິຕທ຺ຘຊນ຺ຕິ ຘມ຺ມທ຺ຘຊໍ.

໑໐໔໓. ຕມນ຺ນປານນ຺ຕິ ຕມ຺ຫິ ຠຄວຕິ ອນ຺ນຎ຺ຈ ປານຎ຺ຈ. ອຖວາປິ ຈີວຣນ຺ຕິ ອຖ ຈີວຣມ຺ປິ. ຣສສາ ອຸເປຕນ຺ຕິ ຣເສນ ອຸເປຕໍ ສາທຸຣສໍ, ອຸຬາຣນ຺ຕິ ອຕ຺ໂຖ. ປຸປ຺ຜາຠິກິຓ຺ຓມ຺ຫີຕິ ຄນ຺ຖິເຕຫິ ຈ ອຄນ຺ຖິເກຫິ ຈ ປຸປ຺ເຜຫິ ໂອລມ຺ພນວເສນ ສນ຺ຖຣຓວເສນ ຈ ອຠິກິຓ຺ເຓ. ປຕິຏ຺ຐເປສິນ຺ຕິ ປຏິປາເທສິໍ ອທາສິໍ. ອສງ຺ຄມານໂສຕິ ກຕ຺ຖຈິ ອລຄ຺ຄຈິຕ຺ໂຕ ໂສ ອຫນ຺ຕິ ໂຍຊນາ.

໑໐໔໔. ສຄ຺ຄໂສຕິ ອປຣາປຣູປປຕ຺ຕິວເສນ ສຄ຺ເຄ ສຄ຺ເຄ, ຕຕ຺ຖາປິ ຈ ເທວປຸເຣ ສຸທສ຺ສນມຫານຄເຣ. ຣມາມີຕິ ກີຬາມິ ໂມທາມິ.

໑໐໔໕. ເອເຕນຸປາເຍນາຕິ ໂຄປາລພ຺ຣາຫ຺ມຓກາເລ ສສາວກສງ຺ຆສ຺ສ ກສ຺ສປຠຄວໂຕ ຍຖາ ອສທິສທານໍ ອທາສິໍ, ເອເຕນ ອຸປາເຍນ. ອິມໍ ນິຣຄ຺ຄຬໍ ຍຎ຺ຎໍ ຍຊິຕ຺ວາ ຕິວິຘໍ ວິສຸທ຺ຘນ຺ຕິ ອນາວຏທ຺ວາຣຕາຍ ມຸຕ຺ຕຈາຄຕາຍ ຈ ນິຣຄ຺ຄຬໍ, ຕີສຸປິ ກາເລສຸ ຕີຫິ ທ຺ວາເຣຫິ ກຣຓກາຣາປນານຸສ຺ສຣຓວິຘີຫິ ສມ຺ປນ຺ນຕາຍ ຕິວິຘໍ, ຕຕ຺ຖ ສໍກິເລສາຠາເວນ ວິສຸທ຺ຘໍ ອປຣິມິຕຘນປຣິຈ຺ຈາຄຠາເວນ ມຫາຈາຄຕາຍ ຍຎ຺ຎໍ ຍຊິຕ຺ວາ, ມຫາທານໍ ທຕ຺ວາຕິ ອຕ຺ໂຖ. ຕໍ ປນ ທານໍ ຈິຣກຕມ຺ປິ ເຂຕ຺ຕວຕ຺ຖຸຈິຕ຺ຕານໍ ອຸຬາຣຕາຍ ອນ຺ຕຣນ຺ຕຣາ ອນຸສ຺ສຣເຓນ ອຕ຺ຕໂນ ປາກຏໍ ອາສນ຺ນໍ ປຈ຺ຈກ຺ຂໍ ວິຍ ອຸປຏ຺ຐິຕໍ ຄເຫຕ຺ວາ ອາຫ ‘‘ອິມ’’ນ຺ຕິ.

໑໐໔໖. ເອວໍ ເທວປຸຕ຺ໂຕ ອຕ຺ຕນາ ກຕກມ຺ມໍ ເຖຣສ຺ສ ກເຖຕ຺ວາ ອິທານິ ຕາທິສາຍ ສມ຺ປຕ຺ຕິຍາ ປເຣປິ ປຕິຏ຺ຐາເປຕຸກາມຕໍ ຕຖາຄເຕ ຈ ອຸຕ຺ຕມໍ ອຕ຺ຕໂນ ປສາທພຫຸມານໍ ປເວເທນ຺ໂຕ ‘‘ອາຍຸຎ຺ຈ ວຓ຺ຓຎ຺ຈາ’’ຕິອາທິນາ ຄາຖາທ຺ວຍມາຫ. ຕຕ຺ຖ ອຠິກງ຺ຂຕາຕິ ອິຈ຺ຉນ຺ເຕນ. ມຸນີຕິ ເຖຣໍ ອາລປຕິ.

໑໐໔໗. ນຍິມສ຺ມິໍ ໂລເກຕິ ເທວປຸຕ຺ໂຕ ອຕ຺ຕໂນ ປຈ຺ຈກ຺ຂຠູຕໍ ໂລກໍ ວທຕິ. ປຣສ຺ມິນ຺ຕິ ຕໂຕ ອຎ຺ຎສ຺ມິໍ. ເອເຕນ ສພ຺ເພປິ ສເທວເກ ໂລເກ ທສ຺ເສຕິ. ສໂມ ຈ ວິຊ຺ຊຕີຕິ ເສຏ຺ໂຐ ຕາວ ຕິຏ຺ຐຕຸ, ສໂມ ເອວ ນ ວິຊ຺ຊຕີຕິ ອຕ຺ໂຖ. ອາຫຸເນຍ຺ຍານໍ ປຣມາຫຸຕິໍ ຄໂຕຕິ ອິມສ຺ມິໍ ໂລເກ ຍຕ຺ຕກາ ອາຫຸເນຍ຺ຍາ ນາມ, ເຕສຸ ສພ຺ເພສຸ ປຣມາຫຸຕິໍ ປຣມໍ ອາຫຸເນຍ຺ຍຠາວໍ ຄໂຕ. ‘‘ທກ຺ຂິເຓຍ຺ຍານໍ ປຣມຄ຺ຄຕໍ ຄໂຕ’’ຕິ ວາ ປາໂຐ, ຕຕ຺ຖ ປຣມຄ຺ຄຕນ຺ຕິ ປຣມໍ ອຄ຺ຄຠາວໍ, ອຄ຺ຄທກ຺ຂິເຓຍ຺ຍຠາວນ຺ຕິ ອຕ຺ໂຖ. ເກສນ຺ຕິ ອາຫ ‘‘ປຸຎ຺ຎຕ຺ຖິການໍ ວິປຸລປ຺ຜເລສິນ’’ນ຺ຕິ, ປຸຎ຺ເຎນ ອຕ຺ຖິການໍ ວິປຸລໍ ມຫນ຺ຕໍ ປຸຎ຺ຎຜລໍ ອິຈ຺ຉນ຺ຕານໍ, ຕຖາຄໂຕ ເອວ ໂລກສ຺ສ ປຸຎ຺ຎກ຺ເຂຕ຺ຕນ຺ຕິ ທສ຺ເສຕິ. ເກຈິ ປນ ‘‘ອາຫຸເນຍ຺ຍານໍ ປຣມຄ຺ຄຕໍ ຄໂຕ’’ຕິ ປຐນ຺ຕິ, ໂສເຍວຕ຺ໂຖ.

ເອວໍ ກເຖນ຺ຕເມວ ຕໍ ເຖໂຣ ກລ຺ລຈິຕ຺ຕໍ ມຸທຸຈິຕ຺ຕໍ ວິນີວຣຓຈິຕ຺ຕໍ ອຸທຄ຺ຄຈິຕ຺ຕໍ ປສນ຺ນຈິຕ຺ຕຎ຺ຈ ຎຕ຺ວາ ສຈ຺ຈານິ ປກາເສສິ. ໂສ ສຈ຺ຈປຣິໂຍສາເນ ໂສຕາປຕ຺ຕິຜເລ ປຕິຏ຺ຐຫິ. ອຖ ເຖໂຣ ມນຸສ຺ສໂລກໍ ອາຄນ຺ຕ຺ວາ ຠຄວໂຕ ຕມຕ຺ຖໍ ອຕ຺ຕນາ ຈ ເທວປຸຕ຺ເຕນ ຈ ກຖິຕນິຍາເມເນວ ອາໂຣເຈສິ. ສຕ຺ຖາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິຍາຍ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ມຫາຣຖວິມານວຓ຺ຓນາ ນິຏ຺ຐິຕາ.

ອິຕິ ປຣມຕ຺ຖທີປນິຍາ ຂຸທ຺ທກຏ຺ຐກຖາຍ ວິມານວຕ຺ຖຸສ຺ມິໍ

ຈຸທ຺ທສວຕ຺ຖຸປຏິມຓ຺ຑິຕສ຺ສ ປຎ຺ຈມສ຺ສ ມຫາຣຖວຄ຺ຄສ຺ສ

ອຕ຺ຖວຓ຺ຓນາ ນິຏ຺ຐິຕາ.