໑໓. ຈູຬຣຖວິມານວຓ຺ຓນາ

ທຬ຺ຫຘມ຺ມາ ນິສາຣສ຺ສາຕິ ຈູຬຣຖວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ປຣິນິພ຺ພຸເຕ ຘາຕຸວິຠາຄໍ ກຕ຺ວາ ຕຕ຺ຖ ຕຕ຺ຖ ສຕ຺ຖຸ ຖູເປສຸ ປຕິຏ຺ຐາປິຍມາເນສຸ ມຫາກສ຺ສປຕ຺ເຖຣປ຺ປມຸເຂສຸ ຘມ຺ມໍ ສງ຺ຄາຍິຕຸໍ ອຸຈ຺ຈິນິຕ຺ວາ ຄຫິເຕສຸ ສາວເກສຸ ຍາວ ວສ຺ສູປຄມນາ ເວເນຍ຺ຍາເປກ຺ຂາຍ ອຕ຺ຕໂນ ອຕ຺ຕໂນ ປຣິສາຍ ສທ຺ຘິໍ ຕຕ຺ຖ ຕຕ຺ຖ ວສນ຺ເຕສຸ ອາຍສ຺ມາ ມຫາກຈ຺ຈາຍໂນ ປຈ຺ຈນ຺ຕເທເສ ອຎ຺ຎຕຣສ຺ມິໍ ອຣຎ຺ຎາຍຕເນ ວິຫຣຕິ. ເຕນ ສມເຍນ ອສ຺ສກຣຏ຺ເຐ ໂປຕລິນຄເຣ ອສ຺ສກຣາຊາ ຣຊ຺ຊໍ ກາເຣຕິ, ຕສ຺ສ ເຊຏ຺ຐາຍ ເທວິຍາ ປຸຕ຺ໂຕ ສຸຊາໂຕ ນາມ ກຸມາໂຣ ໂສຬສວສ຺ສຸທ຺ເທສິໂກ ກນິຏ຺ຐາຍ ເທວິຍາ ນິພນ຺ຘເນນ ປິຕຣາ ຣຏ຺ຐໂຕ ປພ຺ພາຊິໂຕ ອຣຎ຺ຎໍ ປວິສິຕ຺ວາ ວນຈຣເກ ນິສ຺ສາຍ ອຣຎ຺ເຎ ວສຕິ. ໂສ ກິຣ ກສ຺ສປສ຺ສ ຠຄວໂຕ ສາສເນ ປພ຺ພຊິຕ຺ວາ ສີລມຕ຺ເຕ ປຕິຏ຺ຐິໂຕ ປຸຖຸຊ຺ຊນກາລກິຣິຍໍ ກຕ຺ວາ ຕາວຕິໍເສສຸ ນິພ຺ພຕ຺ຕິຕ຺ວາ ຕຕ຺ຖ ຍາວຕາຍຸກໍ ຐຕ຺ວາ ອປຣາປຣໍ ສຸຄຕິຍໍເຍວ ປຣິພ຺ຠມນ຺ໂຕ ອິມສ຺ມິໍ ພຸທ຺ຘຸປ຺ປາເທ ຠຄວໂຕ ອຠິສມ຺ໂພຘິໂຕ ຕິໍສວສ຺ເສ ອສ຺ສກຣຏ຺ເຐ ອສ຺ສກຣຎ຺ໂຎ ອຄ຺ຄມເຫສິຍາ ກຸຈ຺ຉິສ຺ມິໍ ນິພ຺ພຕ຺ຕິ, ‘‘ສຸຊາໂຕ’’ຕິສ຺ສ ນາມໍ ອໂຫສິ. ໂສ ມຫນ຺ເຕນ ປຣິວາເຣນ ວຑ຺ຒຕິ.

ຕສ຺ສ ປນ ມາຕຣິ ກາລກຕາຍ ຣາຊາ ອຎ຺ຎໍ ຣາຊຘີຕຣໍ ອຄ຺ຄມເຫສິຏ຺ຐາເນ ຐເປສິ. ສາປິ ອປເຣນ ສມເຍນ ປຸຕ຺ຕໍ ວິຊາຍິ. ຕສ຺ສາ ຣາຊາ ປຸຕ຺ຕໍ ທິສ຺ວາ ປສນ຺ໂນ ‘‘ຠທ຺ເທ, ຕຍາ ອິຈ຺ຉິຕໍ ວຣໍ ຄຓ຺ຫາຫີ’’ຕິ ວຣໍ ອທາສິ. ສາ ຄຫິຕກໍ ກຕ຺ວາ ຐເປຕ຺ວາ ຍທາ ສຸຊາຕກຸມາໂຣ ໂສຬສວສ຺ສຸທ຺ເທສິໂກ ຊາໂຕ, ຕທາ ຣາຊານໍ ອາຫ ‘‘ເທວ, ຕຸມ຺ເຫຫິ ມມ ປຸຕ຺ຕໍ ທິສ຺ວາ ຕຸຏ຺ຐຈິຕ຺ເຕຫິ ວໂຣ ທິນ຺ໂນ, ຕໍ ອິທານິ ເທຖາ’’ຕິ. ‘‘ຄຓ຺ຫ, ເທວີ’’ຕິ. ‘‘ມຍ຺ຫໍ ປຸຕ຺ຕສ຺ສ ຣຊ຺ຊໍ ເທຖາ’’ຕິ. ‘‘ນສ຺ສ, ວສລິ, ມມ ເຊຏ຺ຐປຸຕ຺ເຕ ເທວກຸມາຣສທິເສ ສຸຊາຕກຸມາເຣ ຐິເຕ ກສ຺ມາ ເອວໍ ວທສີ’’ຕິ ປຏິກ຺ຂິປິ. ເທວີ ປຸນປ຺ປຸນໍ ນິພນ຺ຘນໍ ກໂຣນ຺ຕີ ມນໍ ອລຠິຕ຺ວາ ເອກທິວສໍ ອາຫ ‘‘ເທວ, ຍທິ ສຈ຺ເຈ ຕິຏ຺ຐສິ, ເທຫິ ເອວາ’’ຕິ. ຣາຊາ ‘‘ອນຸປຘາເຣຕ຺ວາ ມຍາ ອິມິສ຺ສາ ວໂຣ ທິນ຺ໂນ, ອຍຎ຺ຈ ເອວໍ ວທຕີ’’ຕິ ວິປ຺ປຏິສາຣີ ຫຸຕ຺ວາ ສຸຊາຕກຸມາຣໍ ປກ຺ໂກສິຕ຺ວາ ຕມຕ຺ຖໍ ອາໂຣເຈຕ຺ວາ ອສ຺ສູນິ ປວຕ຺ເຕສິ. ກຸມາໂຣ ປິຕຣໍ ໂສຈມານໍ ທິສ຺ວາ ໂທມນສ຺ສປ຺ປຕ຺ໂຕ ອສ຺ສູນິ ປວຕ຺ເຕຕ຺ວາ ‘‘ອນຸຊານາຫິ, ເທວ, ອຫໍ ອຎ຺ຎຕ຺ຖ ຄມິສ຺ສາມີ’’ຕິ ອາຫ. ຕໍ ສຸຕ຺ວາ ຣຎ຺ຎາ ‘‘ອຎ຺ຎໍ ເຕ ນຄຣໍ ມາເປສ຺ສາມິ, ຕຕ຺ຖ ວເສຍ຺ຍາສີ’’ຕິ ວຸຕ຺ເຕ ກຸມາໂຣ ນ ອິຈ຺ຉິ. ‘‘ມມ ສຫາຍານໍ ຣາຊູນໍ ສນ຺ຕິເກ ເປເສສ຺ສາມີ’’ຕິ ຈ ວຸຕ຺ເຕ ຕມ຺ປິ ນານຸຊານິ. ເກວລໍ ‘‘ເທວ, ອຣຎ຺ຎໍ ຄມິສ຺ສາມີ’’ຕິ ອາຫ. ຣາຊາ ປຸຕ຺ຕໍ ອາລິງ຺ຄິຕ຺ວາ ສີເສ ຈຸມ຺ພິຕ຺ວາ ‘‘ມມຈ຺ຈເຍນ ອິຘາຄນ຺ຕ຺ວາ ຣຊ຺ເຊ ປຕິຏ຺ຐຫາ’’ຕິ ວຕ຺ວາ ວິສ຺ສຊ຺ເຊສິ.

ໂສ ອຣຎ຺ຎໍ ປວິສິຕ຺ວາ ວນຈຣເກ ນິສ຺ສາຍ ວສນ຺ໂຕ ເອກທິວສໍ ມິຄວໍ ຄໂຕ. ຕສ຺ສ ສມຓກາເລ ສຫາຍວໂຣ ເອໂກ ເທວປຸຕ຺ໂຕ ຫິເຕສິຕາຍ ມິຄຣູເປນ ຕໍ ປໂລເຠນ຺ໂຕ ຘາວິຕ຺ວາ ອາຍສ຺ມໂຕ ມຫາກຈ຺ຈາຍນສ຺ສ ວສນຏ຺ຐານສມີປໍ ປຕ຺ວາ ອນ຺ຕຣຘາຍິ. ໂສ ‘‘ອິມໍ ມິຄໍ ອິທານິ ຄຓ຺ຫິສ຺ສາມີ’’ຕິ ອຸປຘາວນ຺ໂຕ ເຖຣສ຺ສ ວສນຏ຺ຐານໍ ປຕ຺ວາ ຕໍ ອປສ຺ສນ຺ໂຕ ພຫິ ປຓ຺ຓສາລາຍ ເຖຣໍ ນິສິນ຺ນໍ ທິສ຺ວາ ຕສ຺ສ ສມີເປ ຈາປໂກຏິໍ ໂອລຸພ຺ຠ ອຏ຺ຐາສິ. ເຖໂຣ ຕໍ ໂອໂລເກຕ຺ວາ ອາທິໂຕ ປຏ຺ຐາຍ ສພ຺ພໍ ຕສ຺ສ ປວຕ຺ຕິໍ ຎຕ຺ວາ ອນຸຄ຺ຄຓ຺ຫນ຺ໂຕ ອຊານນ຺ໂຕ ວິຍ ສງ຺ຄຫໍ ກໂຣນ຺ໂຕ –

໙໘໑. ‘‘ທຬ຺ຫຘມ຺ມາ ນິສາຣສ຺ສ, ຘນຸໍ ໂອລຸພ຺ຠ ຕິຏ຺ຐສິ;

ຂຕ຺ຕິໂຍ ນຸສິ ຣາຊຎ຺ໂຎ, ອທຸ ລຸທ຺ໂທ ວເນຈໂຣ’’ຕິ. –

ປຸຈ຺ຉິ. ຕຕ຺ຖ ທຬ຺ຫຘມ຺ມາຕິ ທຬ຺ຫຘນຸ. ທຬ຺ຫຘນຸ ນາມ ທ຺ວິສຫສ຺ສຖາມໍ ວຸຈ຺ຈຕິ. ທ຺ວິສຫສ຺ສຖາມນ຺ຕິ ຈ ຍສ຺ສ ອາໂຣປິຕສ຺ສ ຊິຍາຍ ພທ຺ໂຘ ໂລຫສີສາທີນໍ ຠາໂຣ ທຓ຺ເຑ ຄເຫຕ຺ວາ ຍາວ ກຓ຺ຑປ຺ປມາຓາ ອຸກ຺ຂິຕ຺ຕສ຺ສ ປຖວິໂຕ ມຸຈ຺ຈຕິ. ນິສາຣສ຺ສາຕິ ນິຣຕິສຍສາຣສ຺ສ ວິສິຏ຺ຐສາຣສ຺ສ ຣຸກ຺ຂສ຺ສ ຘນຸໍ, ສາຣຕຣຣຸກ຺ຂມຍໍ ຘນຸນ຺ຕິ ອຕ຺ໂຖ. ໂອລຸພ຺ຠາຕິ ສນ຺ນິຣຸມ຺ຠິຕ຺ວາ. ຣາຊຎ຺ໂຎຕິ ຣາຊກຸມາໂຣ. ວເນຈໂຣຕິ ວນຈໂຣ.

ອຖ ໂສ ອຕ຺ຕານໍ ອາວິກໂຣນ຺ໂຕ –

໙໘໒. ‘‘ອສ຺ສກາຘິປຕິສ຺ສາຫໍ, ຠນ຺ເຕ ປຸຕ຺ໂຕ ວເນຈໂຣ;

ນາມໍ ເມ ຠິກ຺ຂຸ ເຕ ພ຺ຣູມິ, ສຸຊາໂຕ ອິຕິ ມໍ ວິທູ.

໙໘໓. ‘‘ມິເຄ ຄເວສມາໂນຫໍ, ໂອຄາຫນ຺ໂຕ ພ຺ຣຫາວນໍ;

ມິຄໍ ຕຎ຺ເຈວ ນາທ຺ທກ຺ຂິໍ, ຕຎ຺ຈ ທິສ຺ວາ ຐິໂຕ ອຫ’’ນ຺ຕິ. –

ອາຫ. ຕຕ຺ຖ ອສ຺ສກາຘິປຕິສ຺ສາຕິ ອສ຺ສກຣຏ຺ຐາຘິປຕິໂນ ອສ຺ສກຣາຊສ຺ສ. ຠິກ຺ຂູຕິ ເຖຣໍ ອາລປຕິ. ມິເຄ ຄເວສມາໂນຕິ ມິຄສູກຣາທິເກ ຄເວສນ຺ໂຕ, ມິຄວໍ ຈຣນ຺ໂຕຕິ ອຕ຺ໂຖ.

ຕໍ ສຸຕ຺ວາ ເຖໂຣ ເຕນ ສທ຺ຘິໍ ປຏິສນ຺ຖາຣໍ ກໂຣນ຺ໂຕ –

໙໘໔. ‘‘ສ຺ວາຄຕໍ ເຕ ມຫາປຸຎ຺ຎ, ອໂຖ ເຕ ອທຸຣາຄຕໍ;

ເອຕ຺ໂຕ ອຸທກມາທາຍ, ປາເທ ປກ຺ຂາລຍສ຺ສຸ ເຕ.

໙໘໕. ‘‘ອິທມ຺ປິ ປານີຍໍ ສີຕໍ, ອາຠຕໍ ຄິຣິຄພ຺ຠຣາ;

ຣາຊປຸຕ຺ຕ ຕໂຕ ປິຕ຺ວາ, ສນ຺ຖຕສ຺ມິໍ ອຸປາວິສາ’’ຕິ. – ອາຫ;

໙໘໔. ຕຕ຺ຖ ອທຸຣາຄຕນ຺ຕິ ທຸຣາຄມນວຊ຺ຊິຕໍ, ມຫາປຸຎ຺ຎ, ເຕ ອິຘາຄມນໍ ສ຺ວາຄຕໍ, ນ ເຕ ອປ຺ປກມ຺ປິ ທຸຣາຄມນໍ ອຕ຺ຖິ ຕຸຍ຺ຫຎ຺ຈ ມຍ຺ຫຎ຺ຈ ປີຕິໂສມນສ຺ສຊນນໂຕຕິ ອຘິປ຺ປາໂຍ. ‘‘ອຘຸນາຄຕ’’ນ຺ຕິປິ ປາໂຐ, ອິທານິ ອາຄມນນ຺ຕິ ອຕ຺ໂຖ.

໙໘໕. ສນ຺ຖຕສ຺ມິໍ ອຸປາວິສາຕິ ອນນ຺ຕຣຫິຕາຍ ຠູມິຍາ ອນິສີທິຕ຺ວາ ອມຸກສ຺ມິໍ ຕິຓສນ຺ຖາຣເກ ນິສີທາຕິ.

ຕໂຕ ຣາຊກຸມາໂຣ ເຖຣສ຺ສ ປຏິສນ຺ຖາຣໍ ສມ຺ປຏິຈ຺ຉນ຺ໂຕ ອາຫ –

໙໘໖. ‘‘ກລ຺ຍາຓີ ວຕ ເຕ ວາຈາ, ສວນີຍາ ມຫາມຸນິ;

ເນລາ ອຕ຺ຖວຕີ ວຄ຺ຄຸ, ມນ຺ຕ຺ວາ ອຕ຺ຖຎ຺ຈ ຠາສສິ.

໙໘໗. ‘‘ກາ ເຕ ຣຕິ ວເນ ວິຫຣໂຕ, ອິສິນິສຠ ວເທຫິ ປຸຏ຺ໂຐ;

ຕວ ວຈນປຖໍ ນິສາມຍິຕ຺ວາ, ອຕ຺ຖຘມ຺ມປທໍ ສມາຈເຣມເສ’’ຕິ.

໙໘໖. ຕຕ຺ຖ ກລ຺ຍາຓີຕິ ສຸນ຺ທຣາ ໂສຠນາ. ສວນີຍາຕິ ໂສຕຸໍ ຍຸຕ຺ຕາ. ເນລາຕິ ນິທ຺ໂທສາ. ອຕ຺ຖວຕີຕິ ອຕ຺ຖຍຸຕ຺ຕາ ທິຏ຺ຐຘມ຺ມິກາທິນາ ຫິເຕນ ອຸເປຕາ. ວຄ຺ຄູຕິ ມຘຸຣາ. ມນ຺ຕ຺ວາຕິ ຊານິຕ຺ວາ ປຎ຺ຎາຍ ປຣິຈ຺ຉິນ຺ທິຕ຺ວາ. ອຕ຺ຖນ຺ຕິ ອຕ຺ຖໂຕ ອນເປຕໍ ເອກນ຺ຕຫິຕາວຫໍ.

໙໘໗. ອິສິນິສຠາຕິ ອິສີສຸ ນິສຠ ອາຊານີຍສທິສ. ວຈນປຖນ຺ຕິ ວຈນໍ. ວຈນເມວ ຫິ ອຕ຺ຖາຘິຄມສ຺ສ ອຸປາຍຠາວໂຕ ‘‘ວຈນປຖ’’ນ຺ຕິ ວຸຕ຺ຕໍ. ອຕ຺ຖຘມ຺ມປທໍ ສມາຈເຣມເສຕິ ອິຘ ເຈວ ສມ຺ປຣາເຍ ຈ ອຕ຺ຖາວຫໍ ສີລາທິຘມ຺ມໂກຏ຺ຐາສໍ ປຏິປຊ຺ຊາມເສ.

ອິທານິ ເຖໂຣ ອຕ຺ຕໂນ ສມ຺ມາປຏິປຕ຺ຕິໍ ຕສ຺ສ ອນຸຈ຺ຉວິກໍ ວທນ຺ໂຕ –

໙໘໘. ‘‘ອຫິໍສາ ສພ຺ພປາຓີນໍ, ກຸມາຣມ຺ຫາກ ຣຸຈ຺ຈຕິ;

ເຖຍ຺ຍາ ຈ ອຕິຈາຣາ ຈ, ມຊ຺ຊປານາ ຈ ອາຣຕິ.

໙໘໙. ‘‘ອາຣຕິ ສມຈຣິຍາ ຈ, ພາຫຸສຈ຺ຈໍ ກຕຎ຺ຎຸຕາ;

ທິຏ຺ເຐວ ຘມ຺ເມ ປາສໍສາ, ຘມ຺ມາ ເອເຕ ປສໍສິຍາ’’ຕິ. – ອາຫ;

໙໘໙. ຕຕ຺ຖ ອາຣຕິ ສມຈຣິຍາ ຈາຕິ ຍຖາວຸຕ຺ຕາ ຈ ປາປຘມ຺ມໂຕ ອາຣຕິ, ປຏິວິຣຕິ ກາຍສມຕາທິສມຈຣິຍາ ຈ. ພາຫຸສຈ຺ຈນ຺ຕິ ປຣິຍຕ຺ຕິພາຫຸສຈ຺ຈໍ. ກຕຎ຺ຎຸຕາຕິ ປເຣຫິ ອຕ຺ຕໂນ ກຕສ຺ສ ອຸປກາຣສ຺ສ ຊານນາ. ປາສໍສາຕິ ອຕ຺ຖກາເມຫິ ກຸລປຸຕ຺ເຕຫິ ປກາຣໂຕ ອາສໍສິຕພ຺ພາ. ຘມ຺ມາ ເອເຕຕິ ເອເຕ ຍຖາວຸຕ຺ຕາ ອຫິໍສາທິຘມ຺ມາ. ປສໍສິຍາຕິ ວິຎ຺ຎູຫິ ປສໍສິຕພ຺ພາ.

ເອວໍ ເຖໂຣ ຕສ຺ສ ອນຸຈ຺ຉວິກໍ ສມ຺ມາປຏິປຕ຺ຕິໍ ວຕ຺ວາ ອນາຄຕໍສຎາເຓນ ອາຍຸສງ຺ຂາເຣ ໂອໂລເກນ຺ໂຕ ‘‘ປຎ຺ຈມາສມຕ຺ຕເມວາ’’ຕິ ທິສ຺ວາ ຕໍ ສໍເວເຊຕ຺ວາ ທຬ຺ຫໍ ຕຕ຺ຖ ສມ຺ມາປຏິປຕ຺ຕິຍໍ ປຕິຏ຺ຐາເປຕຸໍ ອິມໍ ຄາຖມາຫ –

໙໙໐. ‘‘ສນ຺ຕິເກ ມຣຓໍ ຕຸຍ຺ຫໍ, ໂອຣໍ ມາເສຫິ ປຎ຺ຈຫິ;

ຣາຊປຸຕ຺ຕ ວິຊານາຫິ, ອຕ຺ຕານໍ ປຣິໂມຈຍາ’’ຕິ.

ຕຕ຺ຖ ອຕ຺ຕານໍ ປຣິໂມຈຍາຕິ ອຕ຺ຕານໍ ອປາຍທຸກ຺ຂໂຕ ໂມເຈຫິ.

ຕໂຕ ກຸມາໂຣ ອຕ຺ຕໂນ ມຸຕ຺ຕິຍາ ອຸປາຍໍ ປຸຈ຺ຉນ຺ໂຕ ອາຫ –

໙໙໑. ‘‘ກຕມໍ ສ຺ວາຫໍ ຊນປທໍ ຄນ຺ຕ຺ວາ, ກິໍ ກມ຺ມໍ ກິຎ຺ຈ ໂປຣິສໍ;

ກາຍ ວາ ປນ ວິຊ຺ຊາຍ, ຠເວຍ຺ຍໍ ອຊຣາມໂຣ’’ຕິ.

ຕຕ຺ຖ ກຕມໍ ສ຺ວາຫນ຺ຕິ ກຕມໍ ສຸ ອຫໍ, ກຕມໍ ນູຕິ ອຕ຺ໂຖ. ກິໍ ກມ຺ມໍ ກິຎ຺ຈ ໂປຣິສນ຺ຕິ ກຕ຺ວາຕິ ວຈນເສໂສ. ໂປຣິສນ຺ຕິ ປຸຣິສກິຈ຺ຈໍ.

ຕໂຕ ເຖໂຣ ຕສ຺ສ ຘມ຺ມໍ ເທເສຕຸໍ ອິມາ ຄາຖາໂຍ ອໂວຈ –

໙໙໒. ‘‘ນ ວິຊ຺ຊເຕ ໂສ ປເທໂສ, ກມ຺ມໍ ວິຊ຺ຊາ ຈ ໂປຣິສໍ;

ຍຕ຺ຖ ຄນ຺ຕ຺ວາ ຠເວ ມຈ຺ໂຈ, ຣາຊປຸຕ຺ຕາຊຣາມໂຣ.

໙໙໓. ‘‘ມຫທ຺ຘນາ ມຫາໂຠຄາ, ຣຏ຺ຐວນ຺ໂຕປິ ຂຕ຺ຕິຍາ;

ປຫູຕຘນຘຎ຺ຎາເສ, ເຕປິ ໂນ ອຊຣາມຣາ.

໙໙໔. ‘‘ຍທິ ເຕ ສຸຕາ ອນ຺ຘກເວຓ຺ຑຸປຸຕ຺ຕາ, ສູຣາ ວີຣາ ວິກ຺ກນ຺ຕປ຺ປຫາຣິໂນ;

ເຕປິ ອາຍຸກ຺ຂຍໍ ປຕ຺ຕາ, ວິທ຺ຘສ຺ຕາ ສສ຺ສຕີສມາ.

໙໙໕. ‘‘ຂຕ຺ຕິຍາ ພ຺ຣາຫ຺ມຓາ ເວສ຺ສາ, ສຸທ຺ທາ ຈຓ຺ຑາລປຸກ຺ກຸສາ;

ເອເຕ ຈຎ຺ເຎ ຈ ຊາຕິຍາ, ເຕປິ ໂນ ອຊຣາມຣາ.

໙໙໖. ‘‘ເຍ ມນ຺ຕໍ ປຣິວຕ຺ເຕນ຺ຕິ, ຉຬງ຺ຄໍ ພ຺ຣຫ຺ມຈິນ຺ຕິຕໍ;

ເອເຕ ຈຎ຺ເຎ ຈ ວິຊ຺ຊາຍ, ເຕປິ ໂນ ອຊຣາມຣາ.

໙໙໗. ‘‘ອິສໂຍ ຈາປິ ເຍ ສນ຺ຕາ, ສຎ຺ຎຕຕ຺ຕາ ຕປສ຺ສິໂນ;

ສຣີຣໍ ເຕປິ ກາເລນ, ວິຊຫນ຺ຕິ ຕປສ຺ສິໂນ.

໙໙໘. ‘‘ຠາວິຕຕ຺ຕາປິ ອຣຫນ຺ໂຕ, ກຕກິຈ຺ຈາ ອນາສວາ;

ນິກ຺ຂິປນ຺ຕິ ອິມໍ ເທຫໍ, ປຸຎ຺ຎປາປປຣິກ຺ຂຍາ’’ຕິ.

໙໙໒. ຕຕ຺ຖ ຍຕ຺ຖ ຄນ຺ຕ຺ວາຕິ ຍໍ ປເທສໍ ຄນ຺ຕ຺ວາ ກມ຺ມໍ ວິຊ຺ຊໍ ໂປຣິສຎ຺ຈ ກາຍປໂຍເຄນ ອິຕຣປໂຍເຄນ ຈ ອຸປຄນ຺ຕ຺ວາ ປາປຸຓິຕ຺ວາ ຠເວຍ຺ຍ ອຊຣາມໂຣຕິ ອຕ຺ໂຖ.

໙໙໓. ເຫຏ຺ຐິມໂກຏິຍາ ໂກຏິສຕາທິປຣິມາຓໍ ສໍຫຣິຕ຺ວາ ຐປິຕໍ ມຫນ຺ຕໍ ຘນໍ ເອເຕສນ຺ຕິ ມຫທ຺ຘນາ. ກຸມ຺ຠຕ຺ຕຍາທິກຫາປຓປຣິພ຺ພໂຍ ມຫນ຺ໂຕ ໂຠໂຄ ເອເຕສນ຺ຕິ ມຫາໂຠຄາ. ຣຏ຺ຐວນ຺ໂຕຕິ ຣຏ຺ຐສາມິກາ, ອເນກໂຍຊນປຣິມາຓໍ ຣຏ຺ຐໍ ປສາສນ຺ຕາຕິ ອຘິປ຺ປາໂຍ. ຂຕ຺ຕິຍາຕິ ຂຕ຺ຕິຍຊາຕິກາ. ປຫູຕຘນຘຎ຺ຎາເສຕິ ມຫາຘນຘຎ຺ຎສນ຺ນິຈຍາ, ອຕ຺ຕໂນ ປຣິສາຍ ຈ ສຕ຺ຕຏ຺ຐສໍວຈ຺ຉຣປໂຫນກຘນຘຎ຺ຎສນ຺ນິຈຍາ. ເຕປິ ໂນ ອຊຣາມຣາຕິ ຊຣາມຣຓຘມ຺ມາ ເອວ, ມຫທ຺ຘນຕາທີນິປິ ເຕສໍ ອຸປຣິ ນິປຕນ຺ຕໍ ຊຣາມຣຓໍ ນິວຕ຺ເຕຕຸໍ ນ ສກ຺ໂກນ຺ຕີຕິ ອຕ຺ໂຖ.

໙໙໔. ອນ຺ຘກເວຓ຺ຑຸປຸຕ຺ຕາຕິ ອນ຺ຘກເວຓ຺ຑຸສ຺ສ ປຸຕ຺ຕາຕິ ປຎ຺ຎາຕາ. ສູຣາຕິ ສຕ຺ຕິມນ຺ໂຕ. ວີຣາຕິ ວີຣິຍວນ຺ໂຕ. ວິກ຺ກນ຺ຕປ຺ປຫາຣິໂນຕິ ສູຣວີຣຠາເວເນວ ປຏິສຕ຺ຕຸພລໍ ວິກ຺ກມ຺ມ ປສຍ຺ຫ ປຫຣຓສີລາ. ວິທ຺ຘສ຺ຕາຕິ ວິນຏ຺ຐາ. ສສ຺ສຕີສມາຕິ ກຸລປຣມ຺ປຣາຍ ສສ຺ສຕີຫິ ຈນ຺ທສູຣິຍາທີຫິ ສມານາ, ເຕປິ ອຈິຣກາລປວຕ຺ຕກຸລນ຺ວຍາຕິ ອຕ຺ໂຖ.

໙໙໕. ຊາຕິຍາຕິ ອຕ຺ຕໂນ ຊາຕິຍາ, ວິສິຏ຺ຐຕຣາ ປນ ຊາຕິປິ ເນສໍ ຊຣາມຣຓໍ ນິວຕ຺ເຕຕຸໍ ນ ສກ຺ໂກຕີຕິ ອຕ຺ໂຖ.

໙໙໖. ມນ຺ຕນ຺ຕິ ເວທໍ. ຉຬງ຺ຄນ຺ຕິ ກປ຺ປພ຺ຍາກຣຓນິຣຸຕ຺ຕິສິກ຺ຂາຉນ຺ໂທວິຈິຕິໂຊຕິສຕ຺ຖສງ຺ຂາເຕຫິ ຉຫິ ອງ຺ເຄຫິ ຉຬງ຺ຄໍ. ພ຺ຣຫ຺ມຈິນ຺ຕິຕນ຺ຕິ ພ຺ຣຫ຺ເມຫິ ອຏ຺ຐກາທີຫິ ຈິນ຺ຕິຕໍ ປຎ຺ຎາຈກ຺ຂຸນາ ທິຏ຺ຐໍ.

໙໙໗. ສນ຺ຕາຕິ ອຸປສນ຺ຕກາຍວຈີກມ຺ມນ຺ຕາ. ສຎ຺ຎຕຕ຺ຕາຕິ ສຎ຺ຎຕຈິຕ຺ຕາ. ຕປສ຺ສິໂນຕິ ຕປນິສ຺ສິຕາ.

ອິທານິ ກຸມາໂຣ ອຕ຺ຕນາ ກຕ຺ຕພ຺ພໍ ວທນ຺ໂຕ –

໙໙໙. ‘‘ສຸຠາສິຕາ ອຕ຺ຖວຕີ, ຄາຖາໂຍ ເຕ ມຫາມຸນິ;

ນິຊ຺ຌຕ຺ໂຕມ຺ຫິ ສຸຠຏ຺ເຐນ, ຕ຺ວຎ຺ຈ ເມ ສຣຓໍ ຠວາ’’ຕິ. –

ອາຫ. ຕຕ຺ຖ ນິຊ຺ຌຕ຺ໂຕມ຺ຫີຕິ ນິຊ຺ຌາປິໂຕ ຘມ຺ໂມຊສຎ຺ຎາຍ ສຎ຺ຎຕ຺ຕິຄໂຕ ອມ຺ຫິ. ສຸຠຏ຺ເຐນາຕິ ສຸຏ຺ຐຸ ຠາສິເຕນ.

ຕໂຕ ເຖໂຣ ຕໍ ອນຸສາສນ຺ໂຕ ອິມໍ ຄາຖໍ ອຠາສິ –

໑໐໐໐. ‘‘ມາ ມໍ ຕ຺ວໍ ສຣຓໍ ຄຈ຺ຉ, ຕເມວ ສຣຓໍ ວຊ;

ສກ຺ຍປຸຕ຺ຕໍ ມຫາວີຣໍ, ຍມຫໍ ສຣຓໍ ຄໂຕ’’ຕິ.

ຕໂຕ ຣາຊກຸມາໂຣ ອາຫ –

໑໐໐໑. ‘‘ກຕຣສ຺ມິໍ ໂສ ຊນປເທ, ສຕ຺ຖາ ຕຸມ຺ຫາກ ມາຣິສ;

ອຫມ຺ປິ ທຏ຺ຐຸໍ ຄຈ຺ຉິສ຺ສໍ, ຊິນໍ ອປ຺ປຏິປຸຄ຺ຄລ’’ນ຺ຕິ.

ປຸນ ເຖໂຣ ອາຫ –

໑໐໐໒. ‘‘ປຸຣຕ຺ຖິມສ຺ມິໍ ຊນປເທ, ໂອກ຺ກາກກຸລສມ຺ຠໂວ;

ຕຕ຺ຖາສິ ປຸຣິສາຊຎ຺ໂຎ, ໂສ ຈ ໂຂ ປຣິນິພ຺ພຸໂຕ’’ຕິ.

ຕຕ຺ຖ ເຖເຣນ ນິສິນ຺ນປເທສໂຕ ມຊ຺ຌິມເທສສ຺ສ ປາຈີນທິສາຠາຄຕ຺ຕາ ວຸຕ຺ຕໍ ‘‘ປຸຣຕ຺ຖິມສ຺ມິໍ ຊນປເທ’’ຕິ.

ເອວໍ ໂສ ຣາຊປຸຕ຺ໂຕ ເຖຣສ຺ສ ຘມ຺ມເທສນໍ ສຸຕ຺ວາ ປສນ຺ນມານໂສ ສຣເຓສຸ ຈ ສີເລສຸ ຈ ປຕິຏ຺ຐຫິ. ເຕນ ວຸຕ຺ຕໍ –

໑໐໐໓. ‘‘ສເຈ ຫິ ພຸທ຺ໂຘ ຕິຏ຺ເຐຍ຺ຍ, ສຕ຺ຖາ ຕຸມ຺ຫາກ ມາຣິສ;

ໂຍຊນານິ ສຫສ຺ສານິ, ຄຈ຺ເຉຍ຺ຍໍ ປຍິຣຸປາສິຕຸໍ.

໑໐໐໔. ‘‘ຍໂຕ ຈ ໂຂ ປຣິນິພ຺ພຸໂຕ, ສຕ຺ຖາ ຕຸມ຺ຫາກ ມາຣິສ;

ນິພ຺ພຸຕມ຺ປິ ມຫາວີຣໍ, ຄຈ຺ຉາມິ ສຣຓໍ ອຫໍ.

໑໐໐໕. ‘‘ອຸເປມິ ສຣຓໍ ພຸທ຺ຘໍ, ຘມ຺ມຎ຺ຈາປິ ອນຸຕ຺ຕຣໍ;

ສງ຺ຆຎ຺ຈ ນຣເທວສ຺ສ, ຄຈ຺ຉາມິ ສຣຓໍ ອຫໍ.

໑໐໐໖. ‘‘ປາຓາຕິປາຕາ ວິຣມາມິ ຂິປ຺ປໍ, ໂລເກ ອທິນ຺ນໍ ປຣິວຊ຺ຊຍາມິ;

ອມຊ຺ຊໂປ ໂນ ຈ ມຸສາ ຠຓາມິ, ສເກນ ທາເຣນ ຈ ໂຫມິ ຕຸຏ຺ໂຐ’’ຕິ.

ເອວໍ ປນ ຕໍ ສຣເຓສຸ ຈ ສີເລສຸ ຈ ປຕິຏ຺ຐິຕໍ ເຖໂຣ ເອວມາຫ ‘‘ຣາຊກຸມາຣ, ຕຸຍ຺ຫໍ ອິຘ ອຣຎ຺ຎວາເສນ ອຕ຺ໂຖ ນຕ຺ຖິ, ນ ຈິຣໍ ຕວ ຊີວິຕໍ, ປຎ຺ຈມາສພ຺ຠນ຺ຕເຣ ເອວ ກາລໍ ກຣິສ຺ສສິ, ຕສ຺ມາ ຕວ ປິຕຸ ສນ຺ຕິກເມວ ຄນ຺ຕ຺ວາ ທານາທີນິ ປຸຎ຺ຎານິ ກຕ຺ວາ ສຄ຺ຄປຣາຍໂຓ ຠເວຍ຺ຍາສີ’’ຕິ ວຕ຺ວາ ອຕ຺ຕໂນ ສນ຺ຕິເກ ຘາຕຸໂຍ ທຕ຺ວາ ວິສ຺ສຊ຺ເຊສິ. ໂສ ຄຈ຺ຉນ຺ໂຕ ‘‘ອຫໍ, ຠນ຺ເຕ, ຕຸມ຺ຫາກໍ ວຈເນນ ອິໂຕ ຄມິສ຺ສາມິ, ຕຸມ຺ເຫຫິປິ ມຍ຺ຫໍ ອນຸກມ຺ປາຍ ຕຕ຺ຖ ອາຄນ຺ຕພ຺ພ’’ນ຺ຕິ ວຕ຺ວາ ເຖຣສ຺ສ ອຘິວາສນໍ ວິທິຕ຺ວາ ວນ຺ທິຕ຺ວາ ປທກ຺ຂິຓໍ ກຕ຺ວາ ປິຕຸ ນຄຣໍ ຄນ຺ຕ຺ວາ ອຸຍ຺ຍານໍ ປວິສິຕ຺ວາ ອຕ຺ຕໂນ ອາຄຕຠາວໍ ຣຎ຺ໂຎ ນິເວເທສິ.

ຕໍ ສຸຕ຺ວາ ຣາຊາ ສປຣິວາໂຣ ອຸຍ຺ຍານໍ ຄນ຺ຕ຺ວາ ກຸມາຣໍ ອາລິງ຺ຄິຕ຺ວາ ອນ຺ເຕປຸຣໍ ເນຕ຺ວາ ອຠິສິຎ຺ຈິຕຸກາໂມ ອໂຫສິ. ກຸມາໂຣ ‘‘ເທວ, ມຍ຺ຫໍ ອປ຺ປກໍ ອາຍຸ, ອິໂຕ ຈຕຸນ຺ນໍ ມາສານໍ ອຈ຺ຈເຍນ ມຣຓໍ ຠວິສ຺ສຕິ, ກິໍ ເມ ຣຊ຺ເຊນ, ຕຸມ຺ເຫ ນິສ຺ສາຍ ປຸຎ຺ຎເມວ ກຣິສ຺ສາມີ’’ຕິ ວຕ຺ວາ ເຖຣສ຺ສ ຄຸຓໍ ຣຕນຕ຺ຕຍສ຺ສ ຈ ອານຸຠາວໍ ປເວເທສິ. ຕໍ ສຸຕ຺ວາ ຣາຊາ ສໍເວຄປ຺ປຕ຺ໂຕ ຣຕນຕ຺ຕເຍ ຈ ເຖເຣ ຈ ປສນ຺ນມານໂສ ມຫນ຺ຕໍ ວິຫາຣໍ ກາເຣຕ຺ວາ ມຫາກຈ຺ຈາຍນຕ຺ເຖຣສ຺ສ ສນ຺ຕິເກ ທູຕໍ ປາເຫສິ. ເຖໂຣປິ ຣາຊານໍ ມຫາຊນຎ຺ຈ ອນຸຄ຺ຄຓ຺ຫນ຺ໂຕ ອາຄຈ຺ຉິ. ຣາຊາ ຈ ສປຣິວາໂຣ ທູຣໂຕວ ປຈ຺ຈຸຄ຺ຄມນໍ ກຕ຺ວາ ເຖຣໍ ວິຫາຣໍ ປເວເສຕ຺ວາ ຈຕູຫິ ປຈ຺ຈເຍຫິ ສກ຺ກຈ຺ຈໍ ອຸປຏ຺ຐຫນ຺ໂຕ ສຣເຓສຸ ຈ ສີເລສຸ ຈ ປຕິຏ຺ຐຫິ. ກຸມາໂຣ ຈ ສີລານິ ສມາທິຍິຕ຺ວາ ເຖຣໍ ຠິກ຺ຂູ ເຈວ ສກ຺ກຈ຺ຈໍ ອຸປຏ຺ຐຫນ຺ໂຕ ທານານິ ທທນ຺ໂຕ ຘມ຺ມໍ ສຸຓນ຺ໂຕ ຈຕຸນ຺ນໍ ມາສານໍ ອຈ຺ຈເຍນ ກາລໍ ກຕ຺ວາ ຕາວຕິໍສຠວເນ ນິພ຺ພຕ຺ຕິ. ຕສ຺ສ ປຸຎ຺ຎານຸຠາເວນ ສຕ຺ຕຣຕນປຏິມຓ຺ຑິໂຕ ສຕ຺ຕໂຍຊນປ຺ປມາໂຓ ຣໂຖ ອຸປ຺ປຊ຺ຊິ, ອເນການິ ຈສ຺ສ ອຈ຺ຉຣາສຫສ຺ສານິ ປຣິວາໂຣ ອໂຫສິ.

ຣາຊາ ກຸມາຣສ຺ສ ສຣີຣສກ຺ກາຣໍ ກຕ຺ວາ ຠິກ຺ຂຸສງ຺ຆສ຺ສ ຈ ມຫາທານໍ ປວຕ຺ເຕຕ຺ວາ ເຈຕິຍສ຺ສ ປູຊໍ ອກາສິ, ຕຕ຺ຖ ມຫາຊໂນ ສນ຺ນິປຕິ, ເຖໂຣປິ ສປຣິວາໂຣ ຕໍ ປເທສໍ ອຸປຄຎ຺ຉິ. ອຖ ເທວປຸຕ຺ໂຕ ອຕ຺ຕນາ ກຕກຸສລກມ຺ມໍ ໂອໂລເກຕ຺ວາ ກຕຎ຺ຎຸຕາຍ ‘‘ຄນ຺ຕ຺ວາ ເຖຣໍ ວນ຺ທິສ຺ສາມິ, ສາສນຄຸເຓ ຈ ປາກເຏ ກຣິສ຺ສາມີ’’ຕິ ຈິນ຺ເຕຕ຺ວາ ທິພ຺ພຣຖໍ ອາຣຸຍ຺ຫ ມຫຕາ ປຣິວາເຣນ ທິສ຺ສມານຣູໂປ ອາຄນ຺ຕ຺ວາ ຣຖາ ໂອຣຸຍ຺ຫ ເຖຣສ຺ສ ປາເທ ວນ຺ທິຕ຺ວາ ປິຕຣາ ສທ຺ຘິໍ ປຏິສນ຺ຖາຣໍ ກຕ຺ວາ ເຖຣໍ ປຍິຣຸປາສມາໂນ ອຎ຺ຊລິໍ ປຄ຺ຄຍ຺ຫ ອຏ຺ຐາສິ. ຕໍ ເຖໂຣ ອິມາຫິ ຄາຖາຫິ ປຸຈ຺ຉິ –

໑໐໐໗. ‘‘ສຫສ຺ສຣໍສີວ ຍຖາມຫປ຺ປໂຠ, ທິສໍ ຍຖາ ຠາຕິ ນເຠ ອນຸກ຺ກມໍ;

ຕຖາປກາໂຣ ຕວາຍໍ ມຫາຣໂຖ, ສມນ຺ຕໂຕ ໂຍຊນສຕ຺ຕມາຍໂຕ.

໑໐໐໘. ‘‘ສຸວຓ຺ຓປຏ຺ເຏຫິ ສມນ຺ຕໂມຕ຺ຖໂຏ, ອຸຣສ຺ສ ມຸຕ຺ຕາຫິ ມຓີຫິ ຈິຕ຺ຕິໂຕ;

ເລຂາ ສຸວຓ຺ຓສ຺ສ ຈ ຣູປິຍສ຺ສ ຈ, ໂສເຠນ຺ຕິ ເວຬຸຣິຍມຍາ ສຸນິມ຺ມິຕາ.

໑໐໐໙. ‘‘ສີສຎ຺ຈິທໍ ເວຬຸຣິຍສ຺ສ ນິມ຺ມິຕໍ, ຍຸຄຎ຺ຈິທໍ ໂລຫິຕກາຍ ຈິຕ຺ຕິຕໍ;

ຍຸຕ຺ຕາ ສຸວຓ຺ຓສ຺ສ ຈ ຣູປິຍສ຺ສ ຈ, ໂສຠນ຺ຕິ ອສ຺ສາ ຈ ອິເມ ມໂນຊວາ.

໑໐໑໐. ‘‘ໂສ ຕິຏ຺ຐສິ ເຫມຣເຖ ອຘິຏ຺ຐິໂຕ, ເທວານມິນ຺ໂທວ ສຫສ຺ສວາຫໂນ;

ປຸຈ຺ຉາມິ ຕາຫໍ ຍສວນ຺ຕ ໂກວິທໍ, ກຖໍ ຕຍາ ລທ຺ໂຘ ອຍໍ ອຸຬາໂຣ’’ຕິ.

໑໐໐໗. ຕຕ຺ຖ ສຫສ຺ສຣໍສີຕິ ສູຣິໂຍ. ໂສ ຫິ ອເນກສຫສ຺ສຣໍສິມນ຺ຕຕາຍ ‘‘ສຫສ຺ສຣໍສີ’’ຕິ ວຸຈ຺ຈຕິ. ຍຖາມຫປ຺ປໂຠຕິ ອຕ຺ຕໂນ ມຫຕ຺ຕສ຺ສ ອນຸຣູປປ຺ປໂຠ. ຍຖາ ຫິ ມຫຕ຺ເຕນ ສູຣິຍມຓ຺ຑເລນ ສທິສໍ ໂຊຕິມຓ຺ຑລໍ ນຕ຺ຖິ, ເອວໍ ປຠາຍປິ. ຕຖາ ຫິ ຕໍ ເອກສ຺ມິໍ ຂເຓ ຕີສຸ ມຫາທີເປສຸ ອາໂລກໍ ຜຣນ຺ຕໍ ຕິຏ຺ຐຕິ. ທິສໍ ຍຖາ ຠາຕິ ນເຠ ອນຸກ຺ກມນ຺ຕິ ນເຠ ອາກາເສ ຍເຖວ ທິສໍ ອນຸກ຺ກມນ຺ໂຕ ຄຈ຺ຉນ຺ໂຕ ຍຖາ ເຍນ ປກາເຣນ ຠາຕິ ທິພ຺ພຕິ ໂຊຕຕິ. ຕຖາປກາໂຣຕິ ຕາທິສາກາໂຣ. ຕວາຍນ຺ຕິ ຕວ ອຍໍ.

໑໐໐໘. ສຸວຓ຺ຓປຏ຺ເຏຫີຕິ ສຸວຓ຺ຓມເຍຫິ ປຏ຺ເຏຫິ. ສມນ຺ຕໂມຕ຺ຖໂຏ ສມນ຺ຕໂຕ ຉາທິໂຕ. ອຸຣສ຺ສາຕິ ອຸໂຣ ອສ຺ສ, ຣຖສ຺ສ ອຸໂຣຕິ ຈ ອີສາມູລໍ ວທຕິ. ເລຂາຕິ ເວຬຸຣິຍມຍາ ມາລາກມ຺ມລຕາກມ຺ມາທິເລຂາ. ຕາສໍ ສຸວຓ຺ຓປຏ຺ເຏສຸ ຈ ຣຊຕປຏ຺ເຏສຸ ຈ ທິສ຺ສມານຕ຺ຕາ ວຸຕ຺ຕໍ ‘‘ສຸວຓ຺ຓສ຺ສ ຈ ຣູປິຍສ຺ສ ຈາ’’ຕິ. ໂສເຠນ຺ຕີຕິ ຣຖໍ ໂສຠຍນ຺ຕິ.

໑໐໐໙. ສີສນ຺ຕິ ຣຖກຸພ຺ພຣສີສໍ. ເວຬຸຣິຍສ຺ສ ນິມ຺ມິຕນ຺ຕິ ເວຬຸຣິເຍນ ນິມ຺ມິຕໍ, ເວຬຸຣິຍມຓິມຍນ຺ຕິ ອຕ຺ໂຖ. ໂລຫິຕກາຍາຕິ ໂລຫິຕກມຓິນາ, ເຍນ ເກນຈິ ຣຕ຺ຕມຓິນາ ວາ. ຍຸຕ຺ຕາຕິ ໂຍຊິຕາ, ອຖ ວາ ໂຍຕ຺ຕາ ສຸວຓ຺ຓສ຺ສ ຈ ຣູປິຍສ຺ສ ຈາຕິ ສຸວຓ຺ຓມຍາ ຈ ຣູປິຍມຍາ ຈ ໂຍຕ຺ຕາ, ສງ຺ຂລິກາຕິ ອຕ຺ໂຖ.

໑໐໑໐. ອຘິຏ຺ຐິໂຕຕິ ອຕ຺ຕໂນ ເທວິທ຺ຘິຍາ ສກລມິທໍ ຐານໍ ອຠິຠວິຕ຺ວາ ຐິໂຕ. ສຫສ຺ສວາຫໂນຕິ ສຫສ຺ສຍຸຕ຺ຕວາຫໂນ, ສຫສ຺ສອາຊານີຍຍຸຕ຺ຕຣໂຖ ເທວານມິນ຺ໂທ ຍຖາຕິ ອຘິປ຺ປາໂຍ. ຍສວນ຺ຕາຕິ ອາລປນໍ, ຍສສ຺ສີຕິ ອຕ຺ໂຖ. ໂກວິທນ຺ຕິ ກຸສລຎາຓວນ຺ຕໍ, ຣຖາໂຣຫເນ ວາ ເຉກໍ. ອຍໍ ອຸຬາໂຣຕິ ອຍໍ ອຸຬາໂຣ ມຫນ຺ໂຕ ຍໂສຕິ ອຘິປ຺ປາໂຍ.

ເອວໍ ເຖເຣນ ປຸຏ຺ໂຐ ເທວປຸຕ຺ໂຕ ອິມາຫິ ຄາຖາຫິ ພ຺ຍາກາສິ –

໑໐໑໑. ‘‘ສຸຊາໂຕ ນາມຫໍ ຠນ຺ເຕ, ຣາຊປຸຕ຺ໂຕ ປຸເຣ ອຫຸໍ;

ຕ຺ວຎ຺ຈ ມໍ ອນຸກມ຺ປາຍ, ສຎ຺ຎມສ຺ມິໍ ນິເວສຍິ.

໑໐໑໒. ‘‘ຂີຓາຍຸກຎ຺ຈ ມໍ ຎຕ຺ວາ, ສຣີຣໍ ປາທາສິ ສຕ຺ຖຸໂນ;

ອິມໍ ສຸຊາຕ ປູເຊຫິ, ຕໍ ເຕ ອຕ຺ຖາຍ ເຫຫິຕິ.

໑໐໑໓. ‘‘ຕາຫໍ ຄນ຺ເຘຫິ ມາເລຫິ, ປູຊຍິຕ຺ວາ ສມຸຍ຺ຍຸໂຕ;

ປຫາຍ ມານຸສໍ ເທຫໍ, ອຸປປນ຺ໂນມ຺ຫິ ນນ຺ທນໍ.

໑໐໑໔. ‘‘ນນ຺ທເນ ຈ ວເນ ຣມ຺ເມ, ນານາທິຊຄຓາຍຸເຕ;

ຣມາມິ ນຈ຺ຈຄີເຕຫິ, ອຈ຺ຉຣາຫິ ປຸຣກ຺ຂໂຕ’’ຕິ.

໑໐໑໒-໓. ຕຕ຺ຖ ສຣີຣນ຺ຕີ ສຣີຣຘາຕຸໍ. ເຫຫິຕີຕິ ຠວິສ຺ສຕິ. ສມຸຍ຺ຍຸໂຕຕິ ສມ຺ມາ ອຸຍ຺ຍຸຕ຺ໂຕ, ຍຸຕ຺ຕປ຺ປຍຸຕ຺ໂຕຕິ ອຕ຺ໂຖ.

ເອວໍ ເທວປຸຕ຺ໂຕ ເຖເຣນ ປຸຈ຺ຉິຕມຕ຺ຖໍ ກເຖຕ຺ວາ ເຖຣໍ ວນ຺ທິຕ຺ວາ ປທກ຺ຂິຓໍ ກຕ຺ວາ ປິຕຣໍ ອາປຸຈ຺ຉິຕ຺ວາ ຣຖໍ ອາຣຸຍ຺ຫ ເທວໂລກເມວ ຄໂຕ. ເຖໂຣປິ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ວິຕ຺ຖາເຣນ ຘມ຺ມກຖໍ ກເຖສິ. ສາ ຘມ຺ມກຖາ ມຫາຊນສ຺ສ ສາຕ຺ຖິກາ ອໂຫສິ. ອຖ ເຖໂຣ ຕໍ ສພ຺ພໍ ອຕ຺ຕນາ ຈ ເຕນ ຈ ກຖິຕນິຍາເມເນວ ສງ຺ຄີຕິກາເລ ຘມ຺ມສງ຺ຄາຫການໍ ອາໂຣເຈສິ, ເຕ ຈ ຕໍ ຕຖາ ສງ຺ຄຫໍ ອາໂຣເປສຸນ຺ຕິ.

ຈູຬຣຖວິມານວຓ຺ຓນາ ນິຏ຺ຐິຕາ.