໑໒. ຕຕິຍນາຄວິມານວຓ຺ຓນາ

ໂກ ນຸ ທິພ຺ເພນ ຍາເນນາຕິ ຕຕິຍນາຄວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ ກລນ຺ທກນິວາເປ. ເຕນ ສມເຍນ ຕໂຍ ຂີຓາສວຕ຺ເຖຣາ ຄາມກາວາເສ ວສ຺ສໍ ອຸປຄຈ຺ຉິໍສຸ. ເຕ ວຸຕ຺ຖວສ຺ສາ ປວາເຣຕ຺ວາ ‘‘ຠຄວນ຺ຕໍ ວນ຺ທິສ຺ສາມາ’’ຕິ ຣາຊຄຫໍ ອຸທ຺ທິສ຺ສ ຄຈ຺ຉນ຺ຕາ ອນ຺ຕຣາມຄ຺ເຄ ສາຍໍ ອຎ຺ຎຕຣສ຺ມິໍ ຄາມເກ ມິຈ຺ຉາທິຏ຺ຐິກພ຺ຣາຫ຺ມຓສ຺ສ ອຸຈ຺ຉຸເຂຕ຺ຕສມີປໍ ຄນ຺ຕ຺ວາ ອຸຈ຺ຉຸປາລໍ ປຸຈ຺ຉິໍສຸ ‘‘ອາວຸໂສ, ສກ຺ກາ ອຊ຺ຊ ຣາຊຄຫໍ ປາປຸຓິຕຸ’’ນ຺ຕິ. ‘‘ນ ສກ຺ກາ, ຠນ຺ເຕ, ອິໂຕ ອຑ຺ຒໂຍຊເນ ຣາຊຄຫໍ, ອິເຘວ ວສິຕ຺ວາ ສ຺ເວ ຄຈ຺ຉຖາ’’ຕິ ອາຫ. ‘‘ອຕ຺ເຖຕ຺ຖ ໂກຈິ ວສນໂຍຄ຺ໂຄ ອາວາໂສ’’ຕິ? ‘‘ນຕ຺ຖິ, ຠນ຺ເຕ, ອຫໍ ປນ ໂວ ວສນຏ຺ຐານໍ ຊານິສ຺ສາມີ’’ຕິ. ເຖຣາ ອຘິວາເສສຸໍ.

ໂສ ອຸຈ຺ຉູສຸເຍວ ຍຖາຐິເຕສຸ ສາຂາມຓ຺ຑປາກາເຣນ ທຓ຺ຑການິ ພນ຺ຘິຕ຺ວາ ອຸຈ຺ຉຸປຓ຺ເຓຫິ ຉາເທຕ຺ວາ ເຫຏ຺ຐາ ປລາລໍ ອຕ຺ຖຣິຕ຺ວາ ເອກສ຺ສ ເຖຣສ຺ສ ອທາສິ, ທຸຕິຍສ຺ສ ເຖຣສ຺ສ ຕີຫິ ອຸຈ຺ຉູຫິ ທຓ຺ຑກສງ຺ເຂເປນ ພນ຺ຘິຕ຺ວາ ຕິເຓນ ຉາເທຕ຺ວາ ເຫຏ຺ຐາ ຈ ຕິຓສນ຺ຖຣໍ ກຕ຺ວາ ອທາສິ, ອິຕຣສ຺ສ ອຕ຺ຕໂນ ກຸຏິຍໍ ທ຺ເວ ຕໂຍ ທຓ຺ຑເກ ສາຂາໂຍ ຈ ນີຫຣິຕ຺ວາ ຈີວເຣນ ປຏິຈ຺ຉາເທນ຺ໂຕ ຈີວຣກຸຏິໍ ກຕ຺ວາ ອທາສິ. ເຕ ຕຕ຺ຖ ວສິໍສຸ. ອຖ ວິຠາຕາຍ ຣຕ຺ຕິຍາ ກາລສ຺ເສວ ຠຕ຺ຕໍ ປຈິຕ຺ວາ ທນ຺ຕກຏ຺ຐຎ຺ຈ ມຸໂຂທກຎ຺ຈ ທຕ຺ວາ ສຫ ອຸຈ຺ຉຸຣເສນ ຠຕ຺ຕໍ ອທາສິ. ເຕສໍ ຠຸຎ຺ຊິຕ຺ວາ ອນຸໂມທນໍ ກຕ຺ວາ ຄຈ຺ຉນ຺ຕານໍ ເອເກກໍ ອຸຈ຺ຉຸໍ ອທາສິ ‘‘ມຍ຺ຫໍ ຠາໂຄ ຠວິສ຺ສຕີ’’ຕິ. ໂສ ໂຖກໍ ມຄ຺ຄໍ ເຖເຣ ອນຸຄນ຺ຕ຺ວາ ນິວຕ຺ຕນ຺ໂຕ ອຕ຺ຕໂນ ເວຍ຺ຍາວຈ຺ຈຎ຺ຈ ທານຎ຺ຈ ອາຣພ຺ຠ ອຸຬາຣໍ ປີຕິໂສມນສ຺ສໍ ປຏິສໍເວເທນ຺ໂຕ ນິວຕ຺ຕິ.

ເຂຕ຺ຕສາມິໂກ ປນ ຄຈ຺ຉນ຺ຕານໍ ຠິກ຺ຂູນໍ ປຏິປເຖນ ອາຄຈ຺ຉນ຺ໂຕ ຠິກ຺ຂູ ປຸຈ຺ຉິ ‘‘ກຸໂຕ ໂວ ອຸຈ຺ຉຸ ລທ຺ຘາ’’ຕິ? ‘‘ອຸຈ຺ຉຸປາລເກນ ທິນ຺ນາ’’ຕິ. ຕໍ ສຸຕ຺ວາ ພ຺ຣາຫ຺ມໂຓ ກຸປິໂຕ ອນຕ຺ຕມໂນ ຕຏຕຏາຍມາໂນ ໂກຘາຠິຠູໂຕ ຕສ຺ສ ປິຏ຺ຐິໂຕ ອຸປຘາວິຕ຺ວາ ມຸຄ຺ຄເຣນ ຕໍ ປຫຣນ຺ໂຕ ເອກປ຺ປຫາເຣເນວ ຊີວິຕາ ໂວໂຣເປສິ. ໂສ ອຕ຺ຕນາ ກຕປຸຎ຺ຎກມ຺ມເມວ ອນຸສ຺ສຣນ຺ໂຕ ກາລໍ ກຕ຺ວາ ສຸຘມ຺ມາເທວສຠາຍໍ ນິພ຺ພຕ຺ຕິ. ຕສ຺ສ ປຸຎ຺ຎານຸຠາເວນ ສພ຺ພເສໂຕ ມຫນ຺ໂຕ ທິພ຺ພວຣວາຣໂຓ ນິພ຺ພຕ຺ຕິ.

ອຸຈ຺ຉຸປາລກສ຺ສ ມຣຓໍ ສຸຕ຺ວາ ຕສ຺ສ ມາຕາປິຕໂຣ ເຈວ ຎາຕິມິຕ຺ຕາ ຈ ອສ຺ສຸມຸຂາ ໂຣທມານາ ຕໍ ຐານໍ ອຄມໍສຸ, ສພ຺ເພ ຈ ຄາມວາສິໂນ ສນ຺ນິປຕິໍສຸ. ຕຕ຺ຣສ຺ສ ມາຕາປິຕໂຣ ສຣີຣກິຈ຺ຈໍ ກາຕຸໍ ອາຣຠິໍສຸ. ຕສ຺ມິໍ ຂເຓ ໂສ ເທວປຸຕ຺ໂຕ ຕໍ ທິພ຺ພຫຕ຺ຖິໍ ອຠິຣຸຫິຕ຺ວາ ສພ຺ພຕາຬາວຈຣປຣິວຸໂຕ ປຎ຺ຈງ຺ຄິເກນ ຕູຣິເຍນ ປວຊ຺ຊມາເນນ ມຫນ຺ເຕນ ປຣິວາເຣນ ມຫຕິຍາ ເທວິທ຺ຘິຍາ ເທວໂລກໂຕ ອາຄນ຺ຕ຺ວາ ຕາຍ ປຣິສາຍ ທິສ຺ສມານຣູໂປ ອາກາເສ ອຏ຺ຐາສິ. ອຖ ນໍ ຕຕ຺ຖ ປຓ຺ຑິຕຊາຕິໂກ ປຸຣິໂສ ອິມາຫິ ຄາຖາຫິ ເຕນ ກຕປຸຎ຺ຎກມ຺ມໍ ປຸຈ຺ຉິ –

໙໗໖. ‘‘ໂກ ນຸ ທິພ຺ເພນ ຍາເນນ, ສພ຺ພເສເຕນ ຫຕ຺ຖິນາ;

ຕູຣິຍຕາຬິຕນິຄ຺ໂຆໂສ, ອນ຺ຕລິກ຺ເຂ ມຫີຍຕິ.

໙໗໗. ‘‘ເທວຕາ ນຸສິ ຄນ຺ຘພ຺ໂພ, ອທຸ ສກ຺ໂກ ປຸຣິນ຺ທໂທ;

ອຊານນ຺ຕາ ຕໍ ປຸຈ຺ຉາມ, ກຖໍ ຊາເນມຸ ຕໍ ມຍ’’ນ຺ຕິ.

ໂສປິສ຺ສ ອິມາຫິ ຄາຖາຫິ ເອຕມຕ຺ຖໍ ພ຺ຍາກາສິ –

໙໗໘. ‘‘ນາມ຺ຫິ ເທໂວ ນ ຄນ຺ຘພ຺ໂພ, ນາປິ ສກ຺ໂກ ປຸຣິນ຺ທໂທ;

ສຸຘມ຺ມາ ນາມ ເຍ ເທວາ, ເຕສໍ ອຎ຺ຎຕໂຣ ອຫ’’ນ຺ຕິ.

໙໗໙. ‘‘ປຸຈ຺ຉາມ ເທວໍ ສຸຘມ຺ມໍ, ປຸຖຸໍ ກຕ຺ວານ ອຎ຺ຊລິໍ;

ກິໍ ກຕ຺ວາ ມານຸເສ ກມ຺ມໍ, ສຸຘມ຺ມໍ ອຸປປຊ຺ຊຕີ’’ຕິ – ປຸນປິ ປຸຈ຺ຉິ;

໙໘໐. ‘‘ອຸຈ຺ຉາຄາຣໍ ຕິຓາຄາຣໍ, ວຕ຺ຖາຄາຣຎ຺ຈ ໂຍ ທເທ;

ຕິຓ຺ຓໍ ອຎ຺ຎຕຣໍ ທຕ຺ວາ, ສຸຘມ຺ມໍ ອຸປປຊ຺ຊຕີ’’ຕິ. – ປຸນປິ ພ຺ຍາກາສິ;

໙໗໖. ຕຕ຺ຖ ຕູຣິຍຕາຬິຕນິຄ຺ໂຆໂສຕິ ຕາຬິຕປຎ຺ຈງ຺ຄິຕທິພ຺ພຕູຣິຍນິຄ຺ໂຆໂສ ອຕ຺ຕານໍ ອຸທ຺ທິສ຺ສ ປວຊ຺ຊມານທິພ຺ພຕູຣິຍສທ຺ໂທ. ອນ຺ຕລິກ຺ເຂ ມຫີຍຕີຕິ ອາກາເສ ຐຕ຺ວາ ອາກາສຏ຺ເຐເນວ ມຫຕາ ປຣິວາເຣນ ປູຊີຍຕິ.

໙໗໗. ເທວຕາ ນຸສີຕິ ເທວຕາ ນຸ ອສິ, ກິໍ ນຸ ຕ຺ວໍ ເທໂວສີຕິ ອຕ຺ໂຖ. ຄນ຺ຘພ຺ໂພຕິ ຄນ຺ຘພ຺ພກາຍິກເທໂວ ອສີຕິ ອຕ຺ໂຖ. ອທຸ ສກ຺ໂກ ປຸຣິນ຺ທໂທຕິ ອຸທາຫຸ ປຸເຣ ທທາຕີຕິ ‘‘ປຸຣິນ຺ທໂທ’’ຕິ ວິສ຺ສຸໂຕ ສກ຺ໂກ ນຸສິ, ອຖ ສກ຺ໂກ ເທວຣາຊາ ອສີຕິ ອຕ຺ໂຖ. ເອຕ຺ຖ ຈ ສຕິປິ ສກ຺ກຄນ຺ຘພ຺ພານໍ ເທວຠາເວ ເຕສໍ ວິສຸໍ ຄຫິຕຕ຺ຕາ ໂຄພລິພທ຺ຘຎາເຍນ ຕທຎ຺ຎເທວວາຈໂກ ເທວສທ຺ໂທ ທຏ຺ຐພ຺ໂພ.

໙໗໘. ອຖ ເທວປຸຕ຺ໂຕ ‘‘ວິສ຺ສຊ຺ຊນໍ ນາມ ປຸຈ຺ຉາສຠາເຄນ ໂຫຕີ’’ຕິ ເຕຫິ ປຸຈ຺ຉິຕໍ ເທວຄນ຺ຘພ຺ພສກ຺ກຠາວໍ ປຏິກ຺ຂິປິຕ຺ວາ ອຕ຺ຕານໍ ອາຈິກ຺ຂນ຺ໂຕ ‘‘ນມ຺ຫິ ເທໂວ ນ ຄນ຺ຘພ຺ໂພ’’ຕິອາທິມາຫ. ຕຕ຺ຖ ນມ຺ຫິ ເທໂວຕິ ຕຍາ ອາສງ຺ກິໂຕ ໂຍ ໂກຈິ ເທໂວ ນ ໂຫມິ ນ ຄນ຺ຘພ຺ໂພ ນ ສກ຺ໂກ, ອປິຈ ໂຂ ສຸຘມ຺ມາ ນາມ ເຍ ເທວາ, ເຕສໍ ອຎ຺ຎຕໂຣ ອຫໍ, ສຸຘມ຺ມາ ເທວຕາ ນາມ ຕາວຕິໍສເທວນິກາຍສ຺ເສວ ອຎ຺ຎຕຣເທວນິກາໂຍ. ໂສ ກິຣ ອຸຈ຺ຉຸປາໂລ ເຕສໍ ເທວານໍ ສມ຺ປຕ຺ຕິໍ ສຸຕ຺ວາ ປເຄວ ຕຕ຺ຖ ຈິຕ຺ຕໍ ປຓິຘາຍ ຐິໂຕຕິ ເກຈິ ວທນ຺ຕິ.

໙໗໙. ປຸຖຸນ຺ຕິ ມຫນ຺ຕໍ, ປຣິປຸຓ຺ຓໍ ກຕ຺ວາຕິ ອຕ຺ໂຖ. ສກ຺ກຈ຺ຈກິຣິຍາທີປນຕ຺ຖຎ຺ເຫຕໍ ວຸຕ຺ຕໍ.

໙໘໐. ສຸຘມ຺ມາເທວຍານໍ ປຸຏ຺ໂຐ ເທວປຸຕ຺ໂຕ ກກຓ຺ຏກນິມິຕ຺ຕໍ ວທນ຺ໂຕ ວິຍ ທິຏ຺ຐມຕ຺ຕເມວ ຄເຫຕ຺ວາ ອຕ຺ຕນາ ກຕປຸຎ຺ຎໍ ອາຈິກ຺ຂນ຺ໂຕ ‘‘ອຸຈ຺ຉາຄາຣ’’ນ຺ຕິ ຄາຖມາຫ. ຕຕ຺ຖ ຕິຓ຺ຓໍ ອຎ຺ຎຕຣໍ ທຕ຺ວາຕິ ຍທິປິ ມຍາ ຕີຓິ ອຄາຣານິ ທິນ຺ນານິ, ຕີສຸ ປນ ອຎ຺ຎຕເຣນາຕິ ອຍມຕ຺ໂຖປິ ສິຊ຺ຌຕີຕິ ນຍຄ຺ຄາເຫນ ເທວປຸຕ຺ໂຕ ເອວມາຫ. ເສສໍ ສຸວິຎ຺ເຎຍ຺ຍເມວ.

ເອວໍ ໂສ ເຕນ ປຸຈ຺ຉິ ຕມຕ຺ຖໍ ວິສ຺ສຊ຺ເຊຕ຺ວາ ຣຕນຕ຺ຕຍຄຸຓໍ ປກາເສນ຺ໂຕ ມາຕາປິຕູຫິ ສທ຺ຘິໍ ສມ຺ໂມທນໍ ກຕ຺ວາ ເທວໂລກເມວ ຄໂຕ. ມນຸສ຺ສາ ເທວປຸຕ຺ຕສ຺ສ ວຈນໍ ສຸຕ຺ວາ ຠຄວຕິ ຠິກ຺ຂຸສງ຺ເຆ ຈ ສຎ຺ຊາຕປສາທພຫຸມານາ ພຫຸໍ ທານູປກຣຓໍ ສຊ຺ເຊຕ຺ວາ ສກຏານໍ ປູເຣຕ຺ວາ ເວຬຸວນໍ ຄນ຺ຕ຺ວາ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ມຫາທານໍ ທຕ຺ວາ ສຕ຺ຖຸ ຕໍ ປວຕ຺ຕິໍ ອາໂຣຈຍິໍສຸ. ສຕ຺ຖາ ຕໍ ປຸຈ຺ຉາວິສ຺ສຊ຺ຊນໍ ຕເຖວ ວຕ຺ວາ ຕເມວ ອຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ວິຕ຺ຖາເຣນ ຘມ຺ມໍ ເທເສຕ຺ວາ ເຕ ສຣເຓສຸ ຈ ສີເລສຸ ຈ ປຕິຏ຺ຐາເປສິ. ເຕ ຈ ປຕິຏ຺ຐິຕສທ຺ຘາ ຠຄວນ຺ຕໍ ວນ຺ທິຕ຺ວາ ອຕ຺ຕໂນ ຄາມໍ ອຸປຄນ຺ຕ຺ວາ ອຸຈ຺ຉຸປາລສ຺ສ ມຕຏ຺ຐາເນ ວິຫາຣໍ ກາຣຍິໍສູຕິ.

ຕຕິຍນາຄວິມານວຓ຺ຓນາ ນິຏ຺ຐິຕາ.