໑໑. ທຸຕິຍນາຄວິມານວຓ຺ຓນາ

ມຫນ຺ຕໍ ນາຄໍ ອຠິຣຸຍ຺ຫາຕິ ທຸຕິຍນາຄວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ຣາຊຄເຫ ອຎ຺ຎຕໂຣ ອຸປາສໂກ ສທ຺ໂຘ ປສນ຺ໂນ ປຎ຺ຈສຸ ສີເລສຸ ປຕິຏ຺ຐິໂຕ ອຸໂປສຖທິວເສສຸ ອຸໂປສຖສີລໍ ສມາທິຍິຕ຺ວາ ປຸເຣຠຕ຺ຕໍ ອຕ຺ຕໂນ ວິຠວານຸຣູປໍ ຠິກ຺ຂູນໍ ທານານິ ທຕ຺ວາ ສຍໍ ຠຸຎ຺ຊິຕ຺ວາ ສຸທ຺ຘວຕ຺ຖນິວຕ຺ໂຖ ສຸທ຺ຘຸຕ຺ຕຣາສງ຺ໂຄ ປຈ຺ຉາຠຕ຺ຕໍ ເຍຠຸຍ຺ເຍນ ອຏ຺ຐ ປານານິ ຄາຫາເປຕ຺ວາ ວິຫາຣໍ ຄນ຺ຕ຺ວາ ຠິກ຺ຂຸສງ຺ຆສ຺ສ ນິຍ຺ຍາເທຕ຺ວາ ຠຄວນ຺ຕໍ ອຸປສງ຺ກມິຕ຺ວາ ຘມ຺ມໍ ສຸຓາຕິ. ເອວໍ ໂສ ສກ຺ກຈ຺ຈໍ ທານມຍໍ ສີລມຍຎ຺ຈ ພຫຸໍ ສຸຈຣິຕໍ ອຸປຈິນິຕ຺ວາ ອິໂຕ ຈຸໂຕ ຕາວຕິໍເສສຸ ອຸປ຺ປຊ຺ຊິ. ຕສ຺ສ ປຸຎ຺ຎານຸຠາເວນ ສພ຺ພເສໂຕ ມຫນ຺ໂຕ ທິພ຺ໂພ ຫຕ຺ຖິນາໂຄ ປາຕຸຣໂຫສິ. ໂສ ຕໍ ອຠິຣຸຍ຺ຫ ມຫນ຺ເຕນ ປຣິວາເຣນ ມຫນ຺ເຕນ ທິພ຺ພານຸຠາເວນ ກາເລນ ກາລໍ ອຸຍ຺ຍານກີຬໍ ຄຈ຺ຉຕິ.

ອເຖກທິວສໍ ກຕຎ຺ຎຸຕາຍ ໂຈທິຍມາໂນ ອຑ຺ຒຣຕ຺ຕິສມເຍ ຕໍ ທິພ຺ພນາຄໍ ອຠິຣຸຍ຺ຫ ມຫຕາ ປຣິວາເຣນ ‘‘ຠຄວນ຺ຕໍ ວນ຺ທິສ຺ສາມີ’’ຕິ ເທວໂລກໂຕ ອາຄນ຺ຕ຺ວາ ເກວລກປ຺ປໍ ເວຬຸວນໍ ໂອຠາເສຕ຺ວາ ຫຕ຺ຖິກ຺ຂນ຺ຘໂຕ ໂອຣຸຍ຺ຫ ຠຄວນ຺ຕໍ ອຸປສງ຺ກມິຕ຺ວາ ອຠິວາເທຕ຺ວາ ອຎ຺ຊລິໍ ປຄ຺ຄຍ຺ຫ ເອກມນ຺ຕໍ ອຏ຺ຐາສິ. ຕໍ ຠຄວໂຕ ສມີເປ ຐິໂຕ ອາຍສ຺ມາ ວງ຺ຄີໂສ ຠຄວໂຕ ອນຸຎ຺ຎາຍ ອິມາຫິ ຄາຖາຫິ ປຸຈ຺ຉິ –

໙໖໘. ‘‘ມຫນ຺ຕໍ ນາຄໍ ອຠິຣຸຍ຺ຫ, ສພ຺ພເສຕໍ ຄຊຸຕ຺ຕມໍ;

ວນາ ວນໍ ອນຸປຣິຍາສິ, ນາຣີຄຓປຸຣກ຺ຂໂຕ;

ໂອຠາເສນ຺ໂຕ ທິສາ ສພ຺ພາ, ໂອສຘີ ວິຍ ຕາຣກາ.

໙໖໙. ‘‘ເກນ ເຕຕາທິໂສ ວຓ຺ໂຓ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

ຕຕ຺ຖາ ປຸຈ຺ຉິໂຕ ໂສປິ ຕສ຺ສ ຄາຖາຫິ ເອວ ພ຺ຍາກາສິ.

໙໗໑. ‘‘ໂສ ເທວປຸຕ຺ໂຕ ອຕ຺ຕມໂນ, ວງ຺ຄີເສເນວ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລໍ’’.

໙໗໒. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ອຸປາສໂກ ຈກ຺ຂຸມໂຕ ອໂຫສິໍ;

ປາຓາຕິປາຕາ ວິຣໂຕ ອໂຫສິໍ, ໂລເກ ອທິນ຺ນໍ ປຣິວຊ຺ຊຍິສ຺ສໍ.

໙໗໓. ‘‘ອມຊ຺ຊໂປ ໂນ ຈ ມຸສາ ອຠາຓິໍ, ສເກນ ທາເຣນ ຈ ຕຸຏ຺ໂຐ ອໂຫສິໍ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໙໗໔. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ຕຕ຺ຖ ອປຸພ຺ພໍ ນຕ຺ຖິ, ເສສໍ ເຫຏ຺ຐາ ວຸຕ຺ຕນຍເມວ.

ທຸຕິຍນາຄວິມານວຓ຺ຓນາ ນິຏ຺ຐິຕາ.