໑. ມຓ຺ຑູກເທວປຸຕ຺ຕວິມານວຓ຺ຓນາ

ມຫາຣຖວຄ຺ເຄ ໂກ ເມ ວນ຺ທຕິ ປາທານີຕິ ມຓ຺ຑູກເທວປຸຕ຺ຕວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຈມ຺ປາຍໍ ວິຫຣຕິ ຄຄ຺ຄຣາຍ ໂປກ຺ຂຣຓິຍາ ຕີເຣ. ໂສ ປຈ຺ຈູສເວລາຍໍ ພຸທ຺ຘາຈິຓ຺ຓໍ ມຫາກຣຸຓາສມາປຕ຺ຕິໍ ສມາປຊ຺ຊິຕ຺ວາ ຕໂຕ ວຸຏ຺ຐາຍ ເວເນຍ຺ຍພນ຺ຘເວ ສຕ຺ເຕ ໂວໂລເກນ຺ໂຕ ອທ຺ທສ ‘‘ອຊ຺ຊ ມຍິ ສາຍນ຺ຫສມເຍ ຘມ຺ມໍ ເທເສນ຺ເຕ ເອໂກ ມຓ຺ຑູໂກ ມມ ສເຣ ນິມິຕ຺ຕໍ ຄຓ຺ຫນ຺ໂຕ ປຣູປກ຺ກເມນ ມຣິຕ຺ວາ ເທວໂລເກ ນິພ຺ພຕ຺ຕິຕ຺ວາ ມຫຕາ ເທວປຣິວາເຣນ ມຫາຊນສ຺ສ ປສ຺ສນ຺ຕສ຺ເສວ ອາຄມິສ຺ສຕິ, ຕຕ຺ຖ ພຫູນໍ ຘມ຺ມາຠິສມໂຍ ຠວິສ຺ສຕີ’’ຕິ ທິສ຺ວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ມຫຕາ ຠິກ຺ຂຸສງ຺ເຆນ ສທ຺ຘິໍ ຈມ຺ປານຄຣໍ ປິຓ຺ຑາຍ ປວິສິຕ຺ວາ, ຠິກ຺ຂູນໍ ສຸລຠປິຓ຺ຑປາຕໍ ກຕ຺ວາ ກຕຠຕ຺ຕກິຈ຺ໂຈ ວິຫາຣໍ ປວິສິຕ຺ວາ ຠິກ຺ຂູສຸ ວຕ຺ຕໍ ທສ຺ເສຕ຺ວາ, ອຕ຺ຕໂນ ອຕ຺ຕໂນ ທິວາຏ຺ຐານໍ ຄເຕສຸ ຄນ຺ຘກຸຏິໍ ປວິສິຕ຺ວາ ຜລສມາປຕ຺ຕິສຸເຂນ ທິວສຠາຄໍ ເຂເປຕ຺ວາ, ສາຍນ຺ຫສມເຍ ຈຕູສຸ ປຣິສາສຸ ສນ຺ນິປຕິຕາສຸ ສຸຣຠິຄນ຺ຘກຸຏິໂຕ ນິກ຺ຂມິຕ຺ວາ ຕງ຺ຂຓານຸຣູເປນ ປາຏິຫາຣິເຍນ ໂປກ຺ຂຣຓິຕີເຣ ຘມ຺ມສຠາມຓ຺ຑປໍ ປວິສິຕ຺ວາ ອລງ຺ກຕວຣພຸທ຺ຘາສເນ ນິສິນ຺ໂນ ມໂນສິລາຕເລ ສີຫນາທໍ ນທນ຺ໂຕ ອຉມ຺ຠີຕເກສຣສີໂຫ ວິຍ ອຏ຺ຐງ຺ຄສມນ຺ນາຄຕໍ ພ຺ຣຫ຺ມສ຺ສຣໍ ນິຈ຺ຉາເຣນ຺ໂຕ ອຈິນ຺ເຕຍ຺ເຍນ ພຸທ຺ຘານຸຠາເວນ ອນຸປມາຍ ພຸທ຺ຘລີລາຍ ຘມ຺ມໍ ເທເສຕຸໍ ອາຣຠິ.

ຕສ຺ມິຎ຺ຈ ຂເຓ ເອໂກ ມຓ຺ຑູໂກ ໂປກ຺ຂຣຓິໂຕ ອາຄນ຺ຕ຺ວາ ‘‘ຘມ຺ໂມ ເອໂສ ວຸຈ຺ຈຕີ’’ຕິ ຘມ຺ມສຎ຺ຎາຍ ສເຣ ນິມິຕ຺ຕໍ ຄຓ຺ຫນ຺ໂຕ ປຣິສປຣິຍນ຺ເຕ ນິປຊ຺ຊິ. ອເຖໂກ ວຈ຺ຉປາໂລ ຕໍ ປເທສໍ ອາຄໂຕ ສຕ຺ຖາຣໍ ຘມ຺ມໍ ເທເສນ຺ຕໍ ປຣິສຎ຺ຈ ປຣເມນ ອຸປສເມນ ຘມ຺ມໍ ສຸຓນ຺ຕໍ ທິສ຺ວາ ຕຄ຺ຄຕມານໂສ ທຓ຺ຑໂມລຸພ຺ຠ ຕິຏ຺ຐນ຺ໂຕ ມຓ຺ຑູກໍ ອໂນໂລເກຕ຺ວາ ຕສ຺ສ ສີເສ ສນ຺ນິຣຸມ຺ຠິຕ຺ວາ ອຏ຺ຐາສິ. ໂສ ຘມ຺ມສຎ຺ຎາຍ ປສນ຺ນຈິຕ຺ໂຕ ຕາວເທວ ກາລໍ ກຕ຺ວາ ຕາວຕິໍສຠວເນ ທ຺ວາທສໂຍຊນິເກ ກນກວິມາເນ ນິພ຺ພຕ຺ຕິຕ຺ວາ ສຸຕ຺ຕປ຺ປພຸທ຺ໂຘ ວິຍ ຕຕ຺ຖ ອຈ຺ຉຣາສງ຺ຆປຣິວຸຕໍ ອຕ຺ຕານໍ ທິສ຺ວາ ‘‘ກຸໂຕ ນຸ ໂຂ ອິຘ ອຫໍ ນິພ຺ພຕ຺ໂຕ’’ຕິ ອາວຊ຺ເຊນ຺ໂຕ ປຸຣິມຊາຕິໍ ທິສ຺ວາ ‘‘ອຫມ຺ປິ ນາມ ອິຘ ອຸປ຺ປຊ຺ຊິໍ, ອີທິສຎ຺ຈ ສມ຺ປຕ຺ຕິໍ ປຏິລຠິໍ, ກິໍ ນຸ ໂຂ ກມ຺ມໍ ອກາສິ’’ນ຺ຕິ ອຸປຘາເຣນ຺ໂຕ ອຎ຺ຎໍ ນ ອທ຺ທສ ອຎ຺ຎຕ຺ຣ ຠຄວໂຕ ສເຣ ນິມິຕ຺ຕຄ຺ຄາຫາ. ໂສ ຕາວເທວ ສຫ ວິມາເນນ ອາຄນ຺ຕ຺ວາ ວິມານໂຕ ໂອຕຣິຕ຺ວາ, ມຫາຊນສ຺ສ ປສ຺ສນ຺ຕສ຺ເສວ ມຫຕາ ປຣິວາເຣນ ມຫນ຺ເຕນ ທິພ຺ພານຸຠາເວນ ອຸປສງ຺ກມິຕ຺ວາ, ຠຄວໂຕ ປາເທ ສິຣສາ ວນ຺ທິຕ຺ວາ ອຎ຺ຊລິໍ ປຄ຺ຄຍ຺ຫ ນມສ຺ສມາໂນ ອຏ຺ຐາສິ. ອຖ ນໍ ຠຄວາ ຊານນ຺ໂຕວ ມຫາຊນສ຺ສ ກມ຺ມຜລໍ ພຸທ຺ຘານຸຠາວຎ຺ຈ ປຈ຺ຈກ຺ຂໍ ກາຕຸໍ –

໘໕໗. ‘‘ໂກ ເມ ວນ຺ທຕິ ປາທານິ, ອິທ຺ຘິຍາ ຍສສາ ຊລໍ;

ອຠິກ຺ກນ຺ເຕນ ວຓ຺ເຓນ, ສພ຺ພາ ໂອຠາສຍໍ ທິສາ’’ຕິ. –

ປຸຈ຺ຉິ. ຕຕ຺ຖ ໂກຕິ ເທວນາຄຍກ຺ຂມນຸສ຺ສາທີສຸ ໂກ, ກຕໂມຕິ ອຕ຺ໂຖ. ເມຕິ ມມ. ປາທານີຕິ ປາເທ. ອິທ຺ຘິຍາຕິ ອິມາຍ ອີທິສາຍ ເທວິທ຺ຘິຍາ. ຍສສາຕິ ອິມິນາ ອີທິເສນ ປຣິວາເຣນ ປຣິຈ຺ເຉເທນ ຈ. ຊລນ຺ຕິ ວິຊ຺ໂຊຕມາໂນ. ອຠິກ຺ກນ຺ເຕນາຕິ ອຕິວິຍ ກນ຺ເຕນ ກມນີເຍນ ສຸນ຺ທເຣນ. ວຓ຺ເຓນາຕິ ຉວິວຓ຺ເຓນ, ສຣີຣວຓ຺ຓນິຠາຍາຕິ ອຕ຺ໂຖ.

ອຖ ເທວປຸຕ຺ໂຕ ອຕ຺ຕໂນ ປຸຣິມຊາຕິອາທິໍ ອາວິ ກໂຣນ຺ໂຕ ອິມາຫິ ຄາຖາຫິ ພ຺ຍາກາສິ –

໘໕໘. ‘‘ມຓ຺ຑູໂກຫໍ ປຸເຣ ອາສິໍ, ອຸທເກ ວາຣິໂຄຈໂຣ;

ຕວ ຘມ຺ມໍ ສຸຓນ຺ຕສ຺ສ, ອວຘີ ວຈ຺ຉປາລໂກ.

໘໕໙. ‘‘ມຸຫຸຕ຺ຕໍ ຈິຕ຺ຕປສາທສ຺ສ, ອິທ຺ຘິໍ ປສ຺ສ ຍສຎ຺ຈ ເມ;

ອານຸຠາວຎ຺ຈ ເມ ປສ຺ສ, ວຓ຺ຓໍ ປສ຺ສ ຊຸຕິຎ຺ຈ ເມ.

໘໖໐. ‘‘ເຍ ຈ ເຕ ທີຆມທ຺ຘານໍ, ຘມ຺ມໍ ອສ຺ໂສສຸໍ ໂຄຕມ;

ປຕ຺ຕາ ເຕ ອຈລຏ຺ຐານໍ, ຍຕ຺ຖ ຄນ຺ຕ຺ວາ ນ ໂສຈເຣ’’ຕິ.

໘໕໘. ຕຕ຺ຖ ປຸເຣຕິ ປຸຣິມຊາຕິຍໍ. ອຸທເກຕິ ອິທໍ ຕທາ ອຕ຺ຕໂນ ອຸປ຺ປຕ຺ຕິຏ຺ຐານທສ຺ສນໍ. ອຸທເກ ມຓ຺ຑູໂກຕິ ເອເຕນ ອຸທ຺ຘຸມາຍິກາທິກສ຺ສ ຖເລ ມຓ຺ຑູກສ຺ສ ນິວຕ຺ຕນໍ ກຕໍ ໂຫຕິ. ຄາໂວ ຈຣນ຺ຕິ ເອຕ຺ຖາຕິ ໂຄຈໂຣ, ໂຄຈໂຣ ວິຍາຕິ ໂຄຈໂຣ, ຆາເສສນຏ຺ຐານໍ. ວາຣິ ອຸທກໍ ໂຄຈໂຣ ເອຕສ຺ສາຕິ ວາຣິໂຄຈໂຣ. ອຸທກຈາຣີປິ ຫິ ໂກຈິ ກຈ຺ຉປາທິ ອວາຣິໂຄຈໂຣປິ ໂຫຕີຕິ ‘‘ວາຣິໂຄຈໂຣ’’ຕິ ວິເສເສຕ຺ວາ ວຸຕ຺ຕໍ. ຕວ ຘມ຺ມໍ ສຸຓນ຺ຕສ຺ສາຕິ ພ຺ຣຫ຺ມສ຺ສເຣນ ກຣວີກຣຸຕມຎ຺ຊຸນາ ເທເສນ຺ຕສ຺ສ ຕວ ຘມ຺ມໍ ‘‘ຘມ຺ໂມ ເອໂສ ວຸຈ຺ຈຕີ’’ຕິ ສເຣ ນິມິຕ຺ຕຄ຺ຄາຫວເສນ ສຸຓນ຺ຕສ຺ສ, ອນາທເຣ ເຈຕໍ ສາມິວຈນໍ ເວທິຕພ຺ພໍ. ອວຘີ ວຈ຺ຉປາລໂກຕິ ວຈ຺ເຉ ຣກ຺ຂນ຺ໂຕ ໂຄປາລທາຣໂກ ມມ ສມີປໍ ອາຄນ຺ຕ຺ວາ ທຓ຺ຑໂມລຸພ຺ຠິຕ຺ວາ ຕິຏ຺ຐນ຺ໂຕ ມມ ສີເສ ທຓ຺ຑໍ ສນ຺ນິຣຸມ຺ຠິຕ຺ວາ ມໍ ມາເຣສິ.

໘໕໙. ມຸຫຸຕ຺ຕໍ ຈິຕ຺ຕປສາທສ຺ສາຕິ ຕວ ຘມ຺ເມ ມຸຫຸຕ຺ຕມຕ຺ຕໍ ອຸປ຺ປນ຺ນສ຺ສ ຈິຕ຺ຕປສາທສ຺ສ ເຫຕຸຠູຕສ຺ສ ອິທ຺ຘິນ຺ຕິ ສມິທ຺ຘິໍ, ທິພ຺ພວິຠູຕິນ຺ຕິ ອຕ຺ໂຖ. ຍສນ຺ຕິ ປຣິວາຣໍ. ອານຸຠາວນ຺ຕິ ກາມວຓ຺ຓິຕາທິທິພ຺ພານຸຠາວໍ. ວຓ຺ຓນ຺ຕິ ສຣີຣວຓ຺ຓສມ຺ປຕ຺ຕິໍ. ຊຸຕິນ຺ຕິ ທ຺ວາທສໂຍຊນານິ ຜຣຓສມຕ຺ຖໍ ປຠາວິເສສໍ.

໘໖໐. ເຍຕິ ເຍ ສຕ຺ຕາ. ຈ-ສທ຺ໂທ ພ຺ຍຕິເຣເກ. ເຕຕິ ຕວ. ທີຆມທ຺ຘານນ຺ຕິ ພຫຸເວລໍ. ອສ຺ໂສສຸນ຺ຕິ ສຸຓິໍສຸ. ໂຄຕມາຕິ ຠຄວນ຺ຕໍ ໂຄຕ຺ເຕນ ອາລປຕິ. ອຈລຏ຺ຐານນ຺ຕິ ນິພ຺ພານໍ. ອຍຎ຺ເຫຕ຺ຖ ອຕ຺ໂຖ – ໂຄຕມ ຠຄວາ ອຫໍ ວິຍ ອິຕ຺ຕຣເມວ ກາລໍ ອສຸຓິຕ຺ວາ ເຍ ປນ ກຕປຸຎ຺ຎາ ຈິຣໍ ກາລໍ ຕວ ຘມ຺ມໍ ອສ຺ໂສສຸໍ ໂສຕຸໍ ລຠິໍສຸ, ເຕ ທີຆຣຕ຺ຕໍ ສໍສາຣພ຺ຍສນາຠິຠູຕາ ອິເມ ສຕ຺ຕາ ຍຕ຺ຖ ຄນ຺ຕ຺ວາ ນ ໂສເຈຍ຺ຍຸໍ, ຕໍ ອໂສກໍ ສສ຺ສຕຠາເວນ ອຈລໍ ສນ຺ຕິປທໍ ປຕ຺ຕາ ເອວ, ນ ເຕສໍ ຕສ຺ສ ປຕ຺ຕິຍາ ອນ຺ຕຣາໂຍຕິ.

ອຖສ຺ສ ຠຄວາ ສມ຺ປຕ຺ຕປຣິສາຍ ຈ ອຸປນິສ຺ສຍສມ຺ປຕ຺ຕິໍ ໂອໂລເກຕ຺ວາ ວິຕ຺ຖາເຣນ ຘມ຺ມໍ ເທເສສິ. ເທສນາປຣິໂຍສາເນ ໂສ ເທວປຸຕ຺ໂຕ ໂສຕາປຕ຺ຕິຜເລ ປຕິຏ຺ຐຫິ, ຈຕຸຣາສີຕິຍາ ປາຓສຫສ຺ສານໍ ຘມ຺ມາຠິສມໂຍ ອໂຫສິ. ເທວປຸຕ຺ໂຕ ຠຄວນ຺ຕໍ ວນ຺ທິຕ຺ວາ ຕິກ຺ຂຕ຺ຕຸໍ ປທກ຺ຂິຓໍ ກຕ຺ວາ ຠິກ຺ຂຸສງ຺ຆສ຺ສ ຈ ອຎ຺ຊລິໍ ກຕ຺ວາ ສຫ ປຣິວາເຣນ ເທວໂລກເມວ ຄໂຕຕິ.

ມຓ຺ຑູກເທວປຸຕ຺ຕວິມານວຓ຺ຓນາ ນິຏ຺ຐິຕາ.