໗.ອຸໂປສຖາວິມານວຓ຺ຓນາ

ອຠິກ຺ກນ຺ເຕນ ວຓ຺ເຓນາຕິ ອຸໂປສຖາວິມານໍ. ອິຘ ອຏ຺ຐຸປ຺ປຕ຺ຕິຍໍ ສາເກເຕ ອຸໂປສຖາ ນາມ ເອກາ ອຸປາສິກາຕິ ອຍເມວ ວິເສໂສ, ເສສໍ ອນນ຺ຕຣວິມານສທິສໍ. ເຕນ ວຸຕ຺ຕໍ –

໒໒໙-໒໓໑. ‘‘ອຠິກ຺ກນ຺ເຕນ ວຓ຺ເຓນ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໒໓໒. ‘‘ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ’’.

໒໓໓-໒໓໘. ‘‘ອຸໂປສຖາຕິ ມໍ ອຎ຺ຎໍສຸ, ສາເກຕາຍໍ ອຸປາສິກາ…ເປ…

ອຸປາສິກາ ຈກ຺ຂຸມໂຕ, ໂຄຕມສ຺ສ ຍສສ຺ສິໂນ.

໒໓໙. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ເທວຕາ ພ຺ຍາກາສິ. ປຸນ ອຕ຺ຕໂນ ເອກໍ ໂທສໍ ທສ຺ເສນ຺ຕີ –

໒໔໑. ‘‘ອຠິກ຺ຂຓໍ ນນ຺ທນໍ ສຸຕ຺ວາ, ຉນ຺ໂທ ເມ ອຸທປຊ຺ຊຖ;

ຕຕ຺ຖ ຈິຕ຺ຕໍ ປຓິຘາຍ, ອຸປປນ຺ນາມ຺ຫິ ນນ຺ທນໍ.

໒໔໒. ‘‘ນາກາສິໍ ສຕ຺ຖຸ ວຈນໍ, ພຸທ຺ຘສ຺ສາທິຈ຺ຈພນ຺ຘຸໂນ;

ຫີເນ ຈິຕ຺ຕໍ ປຓິຘາຍ, ສາມ຺ຫິ ປຈ຺ຉານຸຕາປິນີ’’ຕິ. – ທ຺ເວ ຄາຖາ ອຠາສິ;

໒໓໓. ຕຕ຺ຖ ອຸໂປສຖາຕິ ມໍ ອຎ຺ຎໍສູຕິ ‘‘ອຸໂປສຖາ’’ຕິ ອິມິນາ ນາເມນ ມໍ ມນຸສ຺ສາ ຊານິໍສຸ. ສາເກຕາຍນ຺ຕິ ສາເກຕນຄເຣ.

໒໔໑. ອຠິກ຺ຂຓນ຺ຕິ ອຠິຓ຺ຫໍ. ນນ຺ທນໍ ສຸຕ຺ວາຕິ ‘‘ຕາວຕິໍສຠວເນ ນນ຺ທນວນໍ ນາມ ເອທິສຎ຺ຈ ເອທິສຎ຺ຈາ’’ຕິ ຕຕ຺ຖ ນານາວິຘໍ ທິພ຺ພສມ຺ປຕ຺ຕິໍ ສຸຕ຺ວາ. ຉນ຺ໂທຕິ ຕນ຺ນິພ຺ພຕ຺ຕກປຸຎ຺ຎກມ຺ມສ຺ສ ກາຣຓຠູໂຕ ກຸສລຈ຺ຉນ຺ໂທ, ຕຕ຺ຣູປປຕ຺ຕິຍາ ປຕ຺ຖນາຠູໂຕ ຕຓ຺ຫາຉນ຺ໂທ ວາ. ອຸທປຊ຺ຊຖາຕິ ອຸປ຺ປຊ຺ຊິຕ຺ຖ. ຕຕ຺ຖາຕິ ຕາວຕິໍສຠວເນ, ນນ຺ທນາປເທເສນປິ ຫິ ຕໍ ເທວໂລກໍ ວທຕິ. ອຸປປນ຺ນາມ຺ຫີຕິ ອຸປ຺ປນ຺ນາ ນິພ຺ພຕ຺ຕາ ອມ຺ຫິ.

໒໔໒. ນາກາສິໍ ສຕ຺ຖຸ ວຈນນ຺ຕິ ‘‘ນາຫໍ, ຠິກ຺ຂເວ, ອປ຺ປມຕ຺ຕກມ຺ປິ ຠວໍ ວຓ຺ເຓມີ’’ຕິອາທິນາ (ອ. ນິ. ໑.໓໒໐-໓໒໑) ສຕ຺ຖາຣາ ວຸຕ຺ຕວຈນໍ ນ ກຣິໍ, ຠເວສຸ ຉນ຺ທຣາຄໍ ນ ປຊຫິນ຺ຕິ ອຕ຺ໂຖ. ອາທິຈ຺ໂຈ ໂຄຕມໂຄຕ຺ໂຕ, ຠຄວາປິ ໂຄຕມໂຄຕ຺ໂຕຕິ ສໂຄຕ຺ຕຕາຍ ວຸຕ຺ຕໍ ‘‘ພຸທ຺ຘສ຺ສາທິຈ຺ຈພນ຺ຘຸໂນ’’ຕິ. ອຖ ວາ ອາທິຈ຺ຈສ຺ສ ພນ຺ຘຸ ອາທິຈ຺ຈພນ຺ຘຸ, ຠຄວາ. ຕໍ ປຏິຈ຺ຈ ຕສ຺ສ ອຣິຍາຍ ຊາຕິຍາ ຊາຕຕ຺ຕາ ອາທິຈ຺ໂຈ ວາ ພນ຺ຘຸ ເອຕສ຺ສ ໂອຣສປຸຕ຺ຕຠາວໂຕຕິ ອາທິຈ຺ຈພນ຺ຘຸ, ຠຄວາ. ຕຖາ ຫິ ວຸຕ຺ຕໍ –

‘‘ໂຍ ອນ຺ຘກາເຣ ຕມສີ ປຠງ຺ກໂຣ, ເວໂຣຈໂນ ມຓ຺ຑລີ ອຸຄ຺ຄເຕໂຊ;

ມາ ຣາຫຸ ຄິລີ ຈຣມນ຺ຕລິກ຺ເຂ, ປຊໍ ມມໍ ຣາຫຸ ປມຸຎ຺ຈ ສູຣິຍ’’ນ຺ຕິ. (ສໍ. ນິ. ໑.໙໑);

ຫີເນຕິ ລາມເກ. ອຕ຺ຕໂນ ຠວາຠິຣຕິໍ ສນ຺ຘາຍ ວທຕິ. ສາມ຺ຫີຕິ ສາ ອມ຺ຫິ.

ເອວໍ ຕາຍ ເທວຕາຍ ຠວາຠິຣຕິນິມິຕ຺ເຕ ອຸປ຺ປນ຺ນວິປ຺ປຏິສາເຣ ປເວທິເຕ ເຖໂຣ ຠວສ຺ສ ປຣິຈ຺ຉິນ຺ນາຍຸຠາວວິຠາວນມຸເຂນ ອາຍຕິໍ ມນຸສ຺ສຕ຺ຕຠາເວ ຐຕ຺ວາ ວຏ຺ຏທຸກ຺ຂສ຺ສ ສມຕິກ຺ກໂມ ກາຕຸໍ ສຸກໂຣ, ສພ຺ພໂສ ຂີຓາສວຠາໂວ ນາມ ມຫານິສໍໂສຕິ ຈ ສມສ຺ສາເສຕຸໍ –

໒໔໓. ‘‘ກີວ ຈິຣໍ ວິມານມ຺ຫິ, ອິຘ ວຈ຺ຉສຸໂປສເຖ;

ເທວເຕ ປຸຈ຺ຉິຕາຈິກ຺ຂ, ຍທິ ຊານາສິ ອາຍຸໂນ’’ຕິ. –

ຄາຖມາຫ. ປຸນ ສາ –

໒໔໔. ‘‘ສຏ຺ຐິ ວສ຺ສສຫສ຺ສານິ, ຕິສ຺ໂສ ຈ ວສ຺ສໂກຏິໂຍ;

ອິຘ ຐຕ຺ວາ ມຫາມຸນິ, ອິໂຕ ຈຸຕາ ຄມິສ຺ສາມິ;

ມນຸສ຺ສານໍ ສຫພ຺ຍຕ’’ນ຺ຕິ. – ອາຫ;

ປຸນ ເຖໂຣ –

໒໔໕. ‘‘ມາ ຕ຺ວໍ ອຸໂປສເຖ ຠາຍິ, ສມ຺ພຸທ຺ເຘນາສິ ພ຺ຍາກຕາ;

ໂສຕາປນ຺ນາ ວິເສສຍິ, ປຫີນາ ຕວ ທຸຄ຺ຄຕີ’’ຕິ. –

ອິມາຍ ຄາຖາຍ ສມຸຕ຺ເຕເຊສິ.

໒໔໓-໔. ຕຕ຺ຖ ກີວ ຈິຣນ຺ຕິ ກິຕ຺ຕກໍ ອທ຺ຘານໍ. ອິຘາຕິ ອິມສ຺ມິໍ ເທວໂລເກ, ອິຘ ວາ ວິມານສ຺ມິໍ. ອາຍຸ ໂນຕິ ອາຍຸ, ໂນຕິ ນິປາຕມຕ຺ຕໍ. ອາຍຸໂນ ວາ ຈິຣາຈິຣຠາວໍ, ອຖ ວາ ຍທິ ຊານາສິ ອາຍຸໂນຕິ ອຕ຺ໂຖ. ມຫາມຸນີຕິ ເຖຣໍ ອາລປຕິ.

໒໔໕. ມາ ຕ຺ວໍ ອຸໂປສເຖ ຠາຍີຕິ ຠທ຺ເທ ອຸໂປສເຖ ຕ຺ວໍ ມາ ຠາຍິ. ກສ຺ມາ? ຍສ຺ມາ ສມ຺ພຸທ຺ເຘນາສິ ພ຺ຍາກຕາ. ກິນ຺ຕິ? ໂສຕາປນ຺ນາ ວິເສສຍີຕິ. ມຄ຺ຄຜລສຎ຺ຎິຕໍ ວິເສສໍ ຍາຕາ ອຘິຄຕາ, ຕສ຺ມາ ປຫີນາ ຕວ ສພ຺ພາປິ ທຸຄ຺ຄຕີຕິ ອິມມ຺ປິ ວິເສສໍ ຍາຕາຕິ ວິເສສຍິ. ເສສໍ ວຸຕ຺ຕນຍເມວ.

ອຸໂປສຖາວິມານວຓ຺ຓນາ ນິຏ຺ຐິຕາ.