໗. ທຸຕິຍນາວາວິມານວຓ຺ຓນາ

ສຸວຓ຺ຓຈ຺ຉທນໍ ນາວນ຺ຕິ ທຸຕິຍນາວາວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ສາວຕ຺ຖິຍໍ ວິຫຣນ຺ເຕ ອຎ຺ຎຕໂຣ ຂີຓາສວຕ຺ເຖໂຣ ອຸປກຏ຺ຐາຍ ວສ຺ສູປນາຍິກາຍ ຄາມກາວາເສ ວສ຺ສໍ ອຸປຄນ຺ຕຸກາໂມ ສາວຕ຺ຖິໂຕ ຕໍ ຄາມໍ ອຸທ຺ທິສ຺ສ ປຈ຺ຉາຠຕ຺ຕໍ ອທ຺ຘານມຄ຺ຄປຏິປນ຺ໂນ, ມຄ຺ຄປຣິສ຺ສເມນ ກິລນ຺ໂຕ ຕສິໂຕ ອນ຺ຕຣາມຄ຺ເຄ ອຎ຺ຎຕຣໍ ຄາມໍ ສມ຺ປຕ຺ໂຕ, ພຫິຄາເມ ຕາທິສໍ ຉາຍູທກສມ຺ປນ຺ນຏ຺ຐານໍ ອປສ຺ສນ຺ໂຕ ປຣິສ຺ສເມນ ຈ ອຠິຠຸຍ຺ຍມາໂນ ຈີວຣໍ ປາຣຸປິຕ຺ວາ ຄາມໍ ປວິສິຕ຺ວາ ຘຸຣເຄຫສ຺ເສວ ທ຺ວາເຣ ອຏ຺ຐາສິ. ຕຕ຺ຖ ອຎ຺ຎຕຣາ ອິຕ຺ຖີ ເຖຣໍ ປສ຺ສິຕ຺ວາ ‘‘ກຸໂຕ, ຠນ຺ເຕ, ອາຄຕຕ຺ຖາ’’ຕິ ປຸຈ຺ຉິຕ຺ວາ ມຄ຺ຄປຣິສ຺ສມໍ ປິປາສິຕຠາວຎ຺ຈ ຎຕ຺ວາ ‘‘ເອຖ, ຠນ຺ເຕ’’ຕິ ເຄຫໍ ປເວເສຕ຺ວາ ‘‘ອິຘ ນິສີທຖາ’’ຕິ ອາສນໍ ປຎ຺ຎາເປຕ຺ວາ ອທາສິ. ຕຕ຺ຖ ນິສິນ຺ເນ ປາໂທທກໍ ປາທພ຺ຠຎ຺ຊນເຕລຎ຺ຈ ທຕ຺ວາ ຕາລວຓ຺ຏໍ ຄເຫຕ຺ວາ ພີຊິ. ປຣິຬາເຫ ວູປສນ຺ເຕ ມຘຸຣໍ ສີຕລໍ ສຸຄນ຺ຘໍ ປານກໍ ໂຍເຊຕ຺ວາ ອທາສິ. ເຖໂຣ ຕໍ ປິວິຕ຺ວາ ປຏິປ຺ປສ຺ສທ຺ຘກິລມໂຖ ອນຸໂມທນໍ ກຕ຺ວາ ປກ຺ກາມິ. ສາ ອປຣຠາເຄ ກາລໍ ກຕ຺ວາ ຕາວຕິໍສຠວເນ ນິພ຺ພຕ຺ຕີຕິ ສພ຺ພໍ ອນນ຺ຕຣວິມານສທິສນ຺ຕິ ເວທິຕພ຺ພໍ. ຄາຖາສຸປິ ອປຸພ຺ພໍ ນຕ຺ຖິ. ເຕນ ວຸຕ຺ຕໍ –

໕໓. ‘‘ສຸວຓ຺ຓຈ຺ຉທນໍ ນາວໍ, ນາຣິ ອາຣຸຍ຺ຫ ຕິຏ຺ຐສິ;

ໂອຄາຫສິ ໂປກ຺ຂຣຓິໍ, ປທ຺ມໍ ຉິນ຺ທສິ ປາຓິນາ.

໕໔. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໕໕. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໕໖. ‘‘ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ’’.

໕໗. ‘‘ອຫໍ ມນຸສ຺ເສສຸ ມນຸສ຺ສຠູຕາ, ປຸຣິມາຍ ຊາຕິຍາ ມນຸສ຺ສໂລເກ;

ທິສ຺ວານ ຠິກ຺ຂຸໍ ຕສິຕໍ ກິລນ຺ຕໍ, ອຸຏ຺ຐາຍ ປາຕຸໍ ອຸທກໍ ອທາສິໍ.

໕໘. ‘‘ໂຍ ເວ ກິລນ຺ຕສ຺ສ ປິປາສິຕສ຺ສ, ຏ຺ຐາຍ ປາຕຸໍ ອຸທກໍ ທທາຕິ;

ສີໂຕທກາ ຕສ຺ສ ຠວນ຺ຕິ ນຊ຺ໂຊ, ປຫູຕມລ຺ຍາ ພຫຸປຸຓ຺ຑຣີກາ.

໕໙. ‘‘ຕໍ ອາປຄາ ອນຸປຣິຍນ຺ຕິ ສພ຺ພທາ, ສີໂຕທກາ ວາລຸກສນ຺ຖຕາ ນທີ;

ອມ຺ພາ ຈ ສາລາ ຕິລກາ ຈ ຊມ຺ພຸໂຍ, ອຸທ຺ທາລກາ ປາຏລິໂຍ ຈ ຜຸລ຺ລາ.

໖໐. ‘‘ຕໍຠູມິຠາເຄຫິ ອຸເປຕຣູປໍ, ວິມານເສຏ຺ຐໍ ຠຸສ ໂສຠມານໍ;

ຕສ຺ສີຘ ກມ຺ມສ຺ສ ອຍໍ ວິປາໂກ, ເອຕາທິສໍ ປຸຎ຺ຎກຕາ ລຠນ຺ຕິ.

໖໑. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໖໒. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ອຕ຺ຖວຓ຺ຓນາສຸປິ ອິຘ ເອໂກວ ເຖໂຣຕິ ອປຸພ຺ພໍ ນຕ຺ຖິ.

ທຸຕິຍນາວາວິມານວຓ຺ຓນາ ນິຏ຺ຐິຕາ.