໖. ປຐມນາວາວິມານວຓ຺ຓນາ

ສຸວຓ຺ຓຈ຺ຉທນໍ ນາວນ຺ຕິ ນາວາວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ສາວຕ຺ຖິຍໍ ວິຫຣນ຺ເຕ ໂສຬສມຕ຺ຕາ ຠິກ຺ຂູ ອຎ຺ຎຕຣສ຺ມິໍ ຄາມກາວາເສ ວສິຕ຺ວາ ວຸຕ຺ຖວສ຺ສາ ‘‘ຠຄວນ຺ຕໍ ປສ຺ສິສ຺ສາມ, ຘມ຺ມຎ຺ຈ ສຸຓິສ຺ສາມາ’’ຕິ ສາວຕ຺ຖິໍ ອຸທ຺ທິສ຺ສ ຄິມ຺ຫສມເຍ ອທ຺ຘານມຄ຺ຄໍ ປຏິປນ຺ນາ, ອນ຺ຕຣາມຄ຺ເຄ ຈ ນິຣຸທໂກ ກນ຺ຕາໂຣ, ເຕ ຈ ຕຕ຺ຖ ຆມ຺ມາຠິຕຕ຺ຕາ ກິລນ຺ຕາ ຕສິຕາ ປານີຍໍ ອລຠມານາ ອຎ຺ຎຕຣສ຺ສ ຄາມສ຺ສ ອວິທູເຣນ ຄຈ຺ຉນ຺ຕິ. ຕຕ຺ຖ ອຎ຺ຎຕຣາ ອິຕ຺ຖີ ອຸທກຠາຊນໍ ຄເຫຕ຺ວາ ອຸທກຕ຺ຖາຍ ອຸທປານາຠິມຸຂີ ຄຈ຺ຉຕິ. ອຖ ເຕ ຠິກ຺ຂູ ຕໍ ທິສ຺ວາ ‘‘ຍຕ຺ຖາຍໍ ອິຕ຺ຖີ ຄຈ຺ຉຕິ, ຕຕ຺ຖ ຄເຕ ປານີຍໍ ລທ຺ຘຸໍ ສກ຺ກາ’’ຕິ ປິປາສາປເຣຕາ ຕໍທິສາຠິມຸຂາ ຄນ຺ຕ຺ວາ ອຸທປານໍ ທິສ຺ວາ ຕສ຺ສາ ອວິທູເຣ ອຏ຺ຐໍສຸ. ສາ ອິຕ຺ຖີ ຕໂຕ ອຸທກໍ ຄເຫຕ຺ວາ ນິວຕ຺ຕິຕຸກາມາ ເຕ ຠິກ຺ຂູ ທິສ຺ວາ ‘‘ອິເມ ອຍ຺ຍາ ອຸທເກນ ອຕ຺ຖິກາ ປິປາສິຕາ’’ຕິ ຎຕ຺ວາ ຄຣຸຈິຕ຺ຕີກາຣໍ ອຸປຏ຺ຐເປຕ຺ວາ ອຸທເກນ ນິມນ຺ເຕສິ. ເຕ ປຕ຺ຕຖວິກໂຕ ປຣິສ຺ສາວນໍ ນີຫຣິຕ຺ວາ ປຣິສ຺ສາເວຕ຺ວາ ຍາວທຕ຺ຖໍ ປານີຍໍ ປິວິຕ຺ວາ ຫຕ຺ຖປາເທ ສີຕເລ ກຕ຺ວາ ຕສ຺ສາ ອິຕ຺ຖິຍາ ປານີຍທາເນ ອນຸໂມທນໍ ວຕ຺ວາ ອຄມໍສຸ.

ສາ ຕໍ ປຸຎ຺ຎໍ ຫທເຍ ຐເປຕ຺ວາ ອນ຺ຕຣນ຺ຕຣາ ອນຸສ຺ສຣນ຺ຕີ ອປຣຠາເຄ ກາລໍ ກຕ຺ວາ ຕາວຕິໍສຠວເນ ນິພ຺ພຕ຺ຕິ. ຕສ຺ສາ ປຸຎ຺ຎານຸຠາເວນ ກປ຺ປຣຸກ຺ໂຂປໂສຠິຕໍ ມຫນ຺ຕໍ ວິມານໍ ອຸປ຺ປຊ຺ຊິ. ຕໍ ວິມານໍ ປຣິກ຺ຂິປິຕ຺ວາ ມຸຕ຺ຕຊາລຣຊຕວິຠູສິຕາ ວິຍ ສິກຕາວກິຓ຺ຓປຓ຺ຑຣປຸລິນຕຏາ ມຓິກ຺ຂນ຺ຘນິມ຺ມລສລິລວາຫິນີ ສຣິຕາ. ຕສ຺ສາ ອຸໂຠສຸ ຕີເຣສຸ ອຸຍ຺ຍານວິມານທ຺ວາເຣ ຈ ມຫຕີ ໂປກ຺ຂຣຓີ ປຎ຺ຈວຓ຺ຓປທຸມສຓ຺ຑມຓ຺ຑິຕາ ສຫ ສຸວຓ຺ຓນາວາຍ ນິພ຺ພຕ຺ຕິ. ສາ ຕຕ຺ຖ ທິພ຺ພສມ຺ປຕ຺ຕິໍ ອນຸຠວນ຺ຕີ ນາວາຍ ກີຬນ຺ຕີ ລຬນ຺ຕີ ວິຈຣຕິ. ອເຖກທິວສໍ ອາຍສ຺ມາ ມຫາໂມຄ຺ຄລ຺ລາໂນ ເທວຈາຣິກໍ ຈຣນ຺ໂຕ ຕໍ ເທວຘີຕຣໍ ນາວາຍ ກີຬນ຺ຕິໍ ທິສ຺ວາ ຕາຍ ກຕປຸຎ຺ຎກມ຺ມໍ ປຸຈ຺ຉນ຺ໂຕ –

໔໓. ‘‘ສຸວຓ຺ຓຈ຺ຉທນໍ ນາວໍ, ນາຣິ ອາຣຸຍ຺ຫ ຕິຏ຺ຐສິ;

ໂອຄາຫສິ ໂປກ຺ຂຣຓິໍ, ປທ຺ມໍ ຉິນ຺ທສິ ປາຓິນາ.

໔໔. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໔໕. ‘‘ປຸຈ຺ຉາມິ ຕໍ ເທວິ ມຫານຸຠາເວ,

ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ,

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. – ອາຫ;

ຕໂຕ ເຖເຣນ ປຸຏ຺ຐາຍ ເທວຕາຍ ວິສ຺ສຊ຺ຊິຕາກາຣໍ ທສ຺ເສຕຸໍ ສງ຺ຄີຕິກາເຣຫິ –

໔໖. ‘‘ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລ’’ນ຺ຕິ. –

ອຍໍ ຄາຖາ ວຸຕ຺ຕາ.

໔໗. ‘‘ອຫໍ ມນຸສ຺ເສສຸ ມນຸສ຺ສຠູຕາ, ປຸຣິມາຍ ຊາຕິຍາ ມນຸສ຺ສໂລເກ;

ທິສ຺ວານ ຠິກ຺ຂູ ຕສິເຕ ກິລນ຺ເຕ, ອຸຏ຺ຐາຍ ປາຕຸໍ ອຸທກໍ ອທາສິໍ.

໔໘. ‘‘ໂຍ ເວ ກິລນ຺ຕານ ປິປາສິຕານໍ, ອຸຏ຺ຐາຍ ປາຕຸໍ ອຸທກໍ ທທາຕິ;

ສີໂຕທກາ ຕສ຺ສ ຠວນ຺ຕິ ນຊ຺ໂຊ, ປຫູຕມລ຺ຍາ ພຫຸປຸຓ຺ຑຣີກາ.

໔໙. ‘‘ຕໍ ອາປຄາ ອນຸປຣິຍນ຺ຕິ ສພ຺ພທາ, ສີໂຕທກາ ວາລຸກສນ຺ຖຕາ ນທີ;

ອມ຺ພາ ຈ ສາລາ ຕິລກາ ຈ ຊມ຺ພຸໂຍ, ອຸທ຺ທາລກາ ປາຏລິໂຍ ຈ ຜຸລ຺ລາ.

໕໐. ‘‘ຕໍຠູມິຠາເຄຫິ ອຸເປຕຣູປໍ, ວິມານເສຏ຺ຐໍ ຠຸສ ໂສຠມານໍ;

ຕສ຺ສີຘ ກມ຺ມສ຺ສ ອຍໍ ວິປາໂກ, ເອຕາທິສໍ ປຸຎ຺ຎກຕາ ລຠນ຺ຕິ.

໕໑. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໕໒. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ອຍໍ ເທວຕາຍ ວິສ຺ສຊ຺ຊິຕາກາໂຣ.

໔໓. ຕຕ຺ຖ ສຸວຓ຺ຓຈ຺ຉທນນ຺ຕິ ວິຈິຕ຺ຕຠິຕ຺ຕິວິຣຈເນຫິ ຣຕ຺ຕສຸວຓ຺ຓມເຍຫິ ອຸໂຠຫິ ປສ຺ເສຫິ ປຏິຈ຺ຉາທິຕພ຺ຠນ຺ຕຣຕາຍ ເຈວ ນານາຣຕນສມຸຊ຺ຊລິເຕນ ກນກມຍາລງ຺ກາເຣນ ອຸປຣິ ຉາທິຕຕາຍ ຈ ສຸວຓ຺ຓຈ຺ຉທນໍ. ນາວນ຺ຕິ ໂປຕໍ. ໂສ ຫິ ໂອຣໂຕ ປາຣໍ ປວຕິ ຄຈ຺ຉຕີຕິ ໂປໂຕ, ສຕ຺ເຕ ເນຕີຕິ ນາວາຕິ ຈ ວຸຈ຺ຈຕິ. ນາຣີຕິ ຕສ຺ສາ ເທວຘີຕາຍ ອາລປນໍ. ນຣຕິ ເນຕີຕິ ນໂຣ, ປຸຣິໂສ. ຍຖາ ຫິ ປຐມປກຕິຠູໂຕ ສຕ຺ໂຕ ອິຕຣາຍ ປກຕິຍາ ເສຏ຺ຐຕ຺ເຖນ ປຸຣິ ເສຕີຕິ ‘‘ປຸຣິໂສ’’ຕິ ວຸຈ຺ຈຕິ, ເອວໍ ນຍນຏ຺ເຐນ ‘‘ນໂຣ’’ຕິ. ປຸຕ຺ຕຠາຕຸຠູໂຕປິ ຫິ ປຸຄ຺ຄໂລ ມາຕຸເຊຏ຺ຐຠຄິນີນໍ ປິຕຸຏ຺ຐາເນ ຕິຏ຺ຐຕິ, ປເຄວ ຠຕ຺ຕຸຠູໂຕ. ນຣສ຺ສ ເອສາຕິ ນາຣີ, ອຍຎ຺ຈ ສມຎ຺ຎາ ມນຸສ຺ສິຕ຺ຖີສຸ ປວຕ຺ຕາ ຣຸຬ຺ຫິວເສນ ອິຕຣາສຸປິ ຕຖາ ວຸຈ຺ຈຕິ. ໂອຄາຫສິ ໂປກ຺ຂຣຓິນ຺ຕິ ສຕິປິ ຣຕ຺ຕຸປ຺ປລນີລຸປ຺ປລາທິເກ ພຫຸວິເຘ ຣຕນມເຍ ຊລຊກຸສຸເມ ໂປກ຺ຂຣສງ຺ຂາຕານໍ ທິພ຺ພປທຸມານໍ ຕຕ຺ຖ ເຍຠຸຍ຺ເຍນ ອຕ຺ຖິຕາຍ ‘‘ໂປກ຺ຂຣຓີ’’ຕິ ລທ຺ຘນາມໍ ທິພ຺ພສຣໍ ຊລວິຫາຣຣຕິຍາ ອນຸປວິສສິ. ປທ຺ມໍ ຉິນ຺ທສິ ປາຓິນາຕິ ຣຊຕມຍນາຬໍ ປທຸມຣາຄຣຕນມຍປຕ຺ຕສງ຺ຆາຕໍ ກນກມຍກຓ຺ຓິກາກິຎ຺ຊກ຺ຂເກສຣໍ ທິພ຺ພກມລໍ ລີລາຣວິນ຺ທໍ ກຕ຺ຕຸກາມຕາຍ ຕວ ຫຕ຺ເຖນ ຠຎ຺ຊສິ.

໔໗. ຕສິເຕຕິ ປິປາສິເຕ. ກິລນ຺ເຕຕິ ຕາຍ ປິປາສາຍ ອທ຺ຘານປຣິສ຺ສເມນ ຈ ກິລນ຺ຕກາເຍ. ອຸຏ຺ຐາຍາຕິ ອຸຏ຺ຐານວີຣິຍໍ ກຕ຺ວາ, ອາລສິຍໍ ອນາປຊ຺ຊິຕ຺ວາຕິ ອຕ຺ໂຖ.

໔໘. ໂຍ ເວຕິອາທິນາ ຍຖາ ອຫໍ, ເອວໍ ອຎ຺ເຎປິ ອາຍຕນຄເຕນ ອຸທກທານປຸຎ຺ເຎນ ເອຕາທິສໍ ຜລໍ ປຏິລຠນ຺ຕີຕິ ທິຏ຺ເຐນ ອທິຏ຺ຐສ຺ສ ອນຸມານວິຘິໍ ທສ຺ເສນ຺ຕີ ເຖເຣນ ປຸຏ຺ຐມຕ຺ຖໍ ສາຘາຣຓໂຕ ວິສ຺ສຊ຺ເຊຕິ. ຕຕ຺ຖ ຕສ຺ສາຕິ ຕນ຺ຕິ ຈ ຍຖາວຸຕ຺ຕປຸຎ຺ຎກາຣິນໍ ປຈ຺ຈາມສຕິ.

໔໙. ອນຸປຣິຍນ຺ຕີຕິ ອນຸຣູປວເສນ ປຣິກ຺ຂິປນ຺ຕິ. ຕສ຺ສ ວສນຏ຺ຐານປຣິກ຺ຂິປເນນ ໂສປິ ປຣິກ຺ຂິຕ຺ໂຕ ນາມ ໂຫຕິ. ຕິລກາຕິ ພນ຺ຘຸຊີວກປຸປ຺ຜສທິສປຸປ຺ຜາ ເອກາ ຣຸກ຺ຂຊາຕິ. ອຸທ຺ທາລກາຕິ ວາຕຆາຕກາ, ເຍ ‘‘ຣາຊຣຸກ຺ຂາ’’ຕິປິ ວຸຈ຺ຈນ຺ຕິ.

໕໐. ຕໍຠູມິຠາເຄຫີຕິ ຕາທິເສຫິ ຠູມິຠາເຄຫິ, ຍຖາວຸຕ຺ຕໂປກ຺ຂຣຓີນທີອຸຍ຺ຍານວນ຺ເຕຫິ ຠູມິປເທເສຫີຕິ ອຕ຺ໂຖ. ອຸເປຕຣູປນ຺ຕິ ປາສໍສິຍຠາເວນ ອຸເປຕໍ, ເຕສໍ ໂປກ຺ຂຣຓີອາທີນໍ ວເສນ ຣມຓີຍສນ຺ນິເວສນ຺ຕິ ວຸຕ຺ຕໍ ໂຫຕິ. ຠຸສ ໂສຠມານນ຺ຕິ ຠຸສໍ ອຕິວິຍ ວິໂຣຈມານໍ ວິມານເສຏ຺ຐໍ ລຠນ຺ຕີຕິ ໂຍຊນາ. ເສສໍ ວຸຕ຺ຕນຍເມວາຕິ.

ປຐມນາວາວິມານວຓ຺ຓນາ ນິຏ຺ຐິຕາ.