໑໒. ທຸຕິຍປຕິພ຺ພຕາວິມານວຓ຺ຓນາ

ເວຬຸຣິຍຖມ຺ຠນ຺ຕິ ທຸຕິຍປຕິພ຺ພຕາວິມານໍ. ຕສ຺ສ ກາ ອຸປ຺ປຕ຺ຕິ? ສາວຕ຺ຖິຍໍ ກິຣ ອຎ຺ຎຕຣາ ອຸປາສິກາ ປຕິພ຺ພຕາ ຫຸຕ຺ວາ ສທ຺ຘາ ປສນ຺ນາ ປຎ຺ຈ ສີລານິ ສຸວິສຸທ຺ຘານິ ກຕ຺ວາ ຣກ຺ຂິ, ຍຖາວິຠວຎ຺ຈ ທານານິ ອທາສິ, ສາ ກາລໍ ກຕ຺ວາ ຕາວຕິໍສຠວເນ ອຸປ຺ປຊ຺ຊິ. ເສສໍ ເຫຏ຺ຐາ ວຸຕ຺ຕນຍເມວ.

໑໐໑. ‘‘ເວຬຸຣິຍຖມ຺ຠໍ ຣຸຈິຣໍ ປຠສ຺ສຣໍ, ວິມານມາຣຸຍ຺ຫ ອເນກຈິຕ຺ຕໍ;

ຕຕ຺ຖຈ຺ຉສິ ເທວິ ມຫານຸຠາເວ, ອຸຈ຺ຈາວຈາ ອິທ຺ຘິ ວິກຸພ຺ພມານາ;

ອິມາ ຈ ເຕ ອຈ຺ຉຣາໂຍ ສມນ຺ຕໂຕ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ ຈ.

໑໐໒. ‘‘ເທວິທ຺ຘິປຕ຺ຕາສິ ມຫານຸຠາເວ,

ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ,

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. – ປຸຈ຺ຉິ;

໑໐໓. ‘‘ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ’’.

໑໐໔. ‘‘ອຫໍ ມນຸສ຺ເສສຸ ມນຸສ຺ສຠູຕາ, ອຸປາສິກາ ຈກ຺ຂຸມໂຕ ອໂຫສິໍ;

ປາຓາຕິປາຕາ ວິຣຕາ ອໂຫສິໍ, ໂລເກ ອທິນ຺ນໍ ປຣິວຊ຺ຊຍິສ຺ສໍ.

໑໐໕. ‘‘ອມຊ຺ຊປາ ໂນ ຈ ມຸສາ ອຠາຓິໍ, ສເກນ ສາມິນາ ອໂຫສິໍ ຕຸຏ຺ຐາ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ຕາ, ສກ຺ກຈ຺ຈ ທານໍ ວິປຸລໍ ອທາສິໍ.

໑໐໖. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໑໐໗. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ,

ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ,

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. – ວິສ຺ສຊ຺ເຊສິ;

໑໐໑. ຕຕ຺ຖ ເວຬຸຣິຍຖມ຺ຠນ຺ຕິ ເວຬຸຣິຍມຓິມຍຖມ຺ຠໍ. ຣຸຈິຣນ຺ຕິ ຣມຓີຍໍ. ປຠສ຺ສຣນ຺ຕິ ອຕິວິຍ ຠາສຸຣໍ. ອຸຈ຺ຈາວຈາຕິ ອຸຈ຺ຈາ ຈ ອວຈາ ຈ, ວິວິຘາຕິ ອຕ຺ໂຖ.

໑໐໔-໕. ອຸປາສິກາຕິ ສຣຓຄມເນນ ອຸປາສິກາລກ຺ຂເຓ ຐິຕາ. ວຸຕ຺ຕຎ຺ຫິ –

‘‘ຍໂຕ ໂຂ, ມຫານາມ, ອຣິຍສາວໂກ ພຸທ຺ຘໍ ສຣຓໍ ຄໂຕ ໂຫຕິ, ຘມ຺ມໍ ສຣຓໍ ຄໂຕ ໂຫຕິ, ສງ຺ຆໍ ສຣຓໍ ຄໂຕ ໂຫຕິ, ເອຕ຺ຕາວຕາ ໂຂ, ມຫານາມ, ອຣິຍສາວໂກ ອຸປາສໂກ ໂຫຕີ’’ຕິ (ສໍ. ນິ. ໕.໑໐໓໓).

ຈກ຺ຂຸມໂຕຕິ ປຎ຺ຈຫິ ຈກ຺ຂູຫິ ຈກ຺ຂຸມໂຕ ພຸທ຺ຘສ຺ສ ຠຄວໂຕ. ເອວໍ ອຸປາສິກາຠາວກິຕ຺ຕເນນ ອາສຍສຸທ຺ຘິໍ ທສ຺ເສຕ຺ວາ ປໂຍຄສຸທ຺ຘິໍ ທສ຺ເສຕຸໍ ‘‘ປາຓາຕິປາຕາ ວິຣຕາ’’ຕິອາທິ ວຸຕ຺ຕໍ. ຕຕ຺ຖ ສເກນ ສາມິນາ ອໂຫສິໍ ຕຸຏ຺ຐາຕິ ມິຈ຺ຉາຈາຣາເວຣມຓິມາຫ. ເສສໍ ເຫຏ຺ຐາ ວຸຕ຺ຕສທິສເມວ.

ທຸຕິຍປຕິພ຺ພຕາວິມານວຓ຺ຓນາ ນິຏ຺ຐິຕາ.