໑໓. ປຐມສຸຓິສາວິມານວຓ຺ຓນາ

ອຠິກ຺ກນ຺ເຕນ ວຓ຺ເຓນາຕິ ສຸຓິສາວິມານໍ. ຕສ຺ສ ກາ ອຸປ຺ປຕ຺ຕິ? ສາວຕ຺ຖິຍໍ ອຎ຺ຎຕຣສ຺ມິໍ ເຄເຫ ເອກາ ກຸລສຸຓ຺ຫາ ເຄຫໍ ປິຓ຺ຑາຍ ປວິຏ຺ຐໍ ຂີຓາສວຕ຺ເຖຣໍ ທິສ຺ວາ ສຎ຺ຊາຕປີຕິໂສມນສ຺ສາ ‘‘ອິທໍ ມຍ຺ຫໍ ອຸຕ຺ຕມໍ ປຸຎ຺ຎກ຺ເຂຕ຺ຕໍ ອຸປຏ຺ຐິຕ’’ນ຺ຕິ ອຕ຺ຕນາ ລທ຺ຘໍ ປູວຠາຄໍ ອາທາຍ ອາທເຣນ ເຖຣສ຺ສ ອຸປເນສິ, ເຖໂຣ ຕໍ ປຏິຄ຺ຄເຫຕ຺ວາ ອນຸໂມທນໍ ກຕ຺ວາ ຄໂຕ. ສາ ອປຣຠາເຄ ກາລໍ ກຕ຺ວາ ຕາວຕິໍສຠວເນ ອຸປ຺ປຊ຺ຊິ. ເສສໍ ສພ຺ພໍ ເຫຏ຺ຐາ ວຸຕ຺ຕສທິສເມວ. ເຕນ ວຸຕ຺ຕໍ –

໑໐໘. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໑໐໙. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໑໐. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑໑. ‘‘ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ’’.

໑໑໒. ‘‘ອຫໍ ມນຸສ຺ເສສຸ ມນຸສ຺ສຠູຕາ, ສຸຓິສາ ອໂຫສິໍ ສສຸຣສ຺ສ ເຄເຫ.

໑໑໓. ‘‘ອທ຺ທສໍ ວິຣຊໍ ຠິກ຺ຂຸໍ, ວິປ຺ປສນ຺ນມນາວິລໍ;

ຕສ຺ສ ອທາສຫໍ ປູວໍ, ປສນ຺ນາ ເສຫິ ປາຓິຠິ;

ຠາຄຑ຺ຒຠາຄໍ ທຕ຺ວານ, ໂມທາມິ ນນ຺ທເນ ວເນ.

໑໑໔. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໑໑໕. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໑໑໒. ຕຕ຺ຖ ສຸຓິສາຕິ ປຸຕ຺ຕສ຺ສ ຠຣິຍາ. ອິຕ຺ຖິຍາ ຫິ ສາມິກສ຺ສ ປິຕາ ‘‘ສສຸໂຣ’’ຕິ ວຸຈ຺ຈຕິ, ຕສ຺ສ ຈ ສາ ‘‘ສຸຓິສາ’’ຕິ. ຕໍ ສນ຺ຘາຍ ‘‘ສຸຓິສາ ອໂຫສິໍ ສສຸຣສ຺ສ ເຄເຫ’’ຕິ.

໑໑໓. ຠາຄຑ຺ຒຠາຄນ຺ຕິ ອຕ຺ຕນາ ລທ຺ຘປຏິວີສໂຕ ອຸປຑ຺ຒຠາຄໍ. ໂມທາມິ ນນ຺ທເນ ວເນຕິ ເຖເຣນ ນນ຺ທນວເນ ທິຏ຺ຐຕາຍ ອາຫ. ເສສໍ ວຸຕ຺ຕນຍເມວ.

ສຸຓິສາວິມານວຓ຺ຓນາ ນິຏ຺ຐິຕາ.