໑໑. ປຐມປຕິພ຺ພຕາວິມານວຓ຺ຓນາ

ໂກຎ຺ຈາ ມຍູຣາ ທິວິຍາ ຈ ຫໍສາຕິ ປຕິພ຺ພຕາວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ຕຕ຺ຖ ອຎ຺ຎຕຣາ ອິຕ຺ຖີ ປຕິພ຺ພຕາ ອໂຫສິ ຠຕ຺ຕຸ ອນຸກູລວຕ຺ຕິນີ ຂມາ ປທກ຺ຂິຓຄ຺ຄາຫິນີ, ນ ກຸທ຺ຘາປິ ປຏິປ຺ຜຣຕິ, ອຜຣຸສວາຈາ ສຈ຺ຈວາທິນີ ສທ຺ຘາ ປສນ຺ນາ ຍຖາວິຠວໍ ທານານິ ຈ ອທາສິ. ສາ ເກນຈິເທວ ໂຣເຄນ ຜຸຏ຺ຐາ ກາລໍ ກຕ຺ວາ ຕາວຕິໍສຠວເນ ນິພ຺ພຕ຺ຕິ. ອຖາຍສ຺ມາ ມຫາໂມຄ຺ຄລ຺ລາໂນ ປຸຣິມນເຍເນວ ເທວຈາຣິກໍ ຈຣນ຺ໂຕ ຕໍ ເທວຘີຕຣໍ ມຫຕິໍ ສມ຺ປຕ຺ຕິໍ ອນຸຠວນ຺ຕິໍ ທິສ຺ວາ ຕສ຺ສາ ສມີປມຸປຄໂຕ. ສາ ອຈ຺ຉຣາສຫສ຺ສປຣິວຸຕາ ສຏ຺ຐິສກຏຠາຣາລງ຺ກາຣປຏິມຓ຺ຑິຕຕ຺ຕຠາວາ ເຖຣສ຺ສ ປາເທສຸ ສິຣສາ ວນ຺ທິຕ຺ວາ ເອກມນ຺ຕໍ ອຏ຺ຐາສິ. ເຖໂຣປິ ຕາຍ ກຕປຸຎ຺ຎກມ຺ມໍ ປຸຈ຺ຉນ຺ໂຕ –

໙໓. ‘‘ໂກຎ຺ຈາ ມຍູຣາ ທິວິຍາ ຈ ຫໍສາ, ວຄ຺ຄຸສ຺ສຣາ ໂກກິລາ ສມ຺ປຕນ຺ຕິ;

ປຸປ຺ຜາຠິກິຓ຺ຓໍ ຣມ຺ມມິທໍ ວິມານໍ, ອເນກຈິຕ຺ຕໍ ນຣນາຣິເສວິຕໍ.

໙໔. ‘‘ຕຕ຺ຖຈ຺ຉສິ ເທວິ ມຫານຸຠາເວ, ອິທ຺ຘີ ວິກຸພ຺ພນ຺ຕິ ອເນກຣູປາ;

ອິມາ ຈ ເຕ ອຈ຺ຉຣາໂຍ ສມນ຺ຕໂຕ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ ຈ.

໙໕. ‘‘ເທວິທ຺ຘິປຕ຺ຕາສິ ມຫານຸຠາເວ,

ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ,

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. – ອາຫ;

໙໖. ‘‘ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ’’.

໙໗. ‘‘ອຫໍ ມນຸສ຺ເສສຸ ມນຸສ຺ສຠູຕາ, ປຕິພ຺ພຕານຎ຺ຎມນາ ອໂຫສິໍ;

ມາຕາວ ປຸຕ຺ຕໍ ອນຸຣກ຺ຂມານາ, ກຸທ຺ຘາປິຫໍ ນປ຺ຜຣຸສໍ ອໂວຈໍ.

໙໘. ‘‘ສຈ຺ເຈ ຐິຕາ ໂມສວຊ຺ຊໍ ປຫາຍ, ທາເນ ຣຕາ ສງ຺ຄຫິຕຕ຺ຕຠາວາ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ຕາ, ສກ຺ກຈ຺ຈ ທານໍ ວິປຸລໍ ອທາສິໍ.

໙໙. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໑໐໐. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ສາ ເທວຕາ ວິສ຺ສຊ຺ເຊສິ.

໙໓. ຕຕ຺ຖ ໂກຎ຺ຈາຕິ ໂກຎ຺ຈສກຸຓາ, ເຍ ‘‘ສາຣສາ’’ຕິປິ ວຸຈ຺ຈນ຺ຕິ. ມຍູຣາຕິ ໂມຣາ. ທິວິຍາຕິ ທິພ຺ພານຸຠາວາ. ອິທຎ຺ຫິ ປທໍ ‘‘ທິວິຍາ ໂກຎ຺ຈາ, ທິວິຍາ ມຍູຣາ’’ຕິອາທິນາ ຈຕູຫິປິ ປເທຫິ ໂຍເຊຕພ຺ພໍ. ຫໍສາຕິ ສຸວຓ຺ຓຫໍສາທິຫໍສາ. ວຄ຺ຄຸສ຺ສຣາຕິ ມຘຸຣສ຺ສຣາ. ໂກກິລາຕິ ກາຬໂກກິລາ ເຈວ ສຸກ຺ກໂກກິລາ ຈ. ສມ຺ປຕນ຺ຕີຕິ ເທວຕາຍ ອຠິຣມຓຕ຺ຖໍ ກີຬນ຺ຕາ ລຬນ຺ຕາ ສມນ຺ຕໂຕ ປຕນ຺ຕິ ວິຈຣນ຺ຕິ. ໂກຎ຺ຈາທິຣູເປນ ຫິ ເທວຕາຍ ຣຕິຊນນຕ຺ຖໍ ປຣິວາຣຠູຕາ ເທວຕາ ກີຬນ຺ຕາ ລຬນ຺ຕາ ‘‘ໂກຎ຺ຈາ’’ຕິອາທິນາ ວຸຕ຺ຕາ. ປຸປ຺ຜາຠິກິຓ຺ຓນ຺ຕິ ຄນ຺ຖິຕາຄນ຺ຖິເຕຫິ ນານາວິຘຣຕນກຸສຸເມຫິ ໂອກິຓ຺ຓໍ. ຣມ຺ມນ຺ຕິ ຣມຓີຍໍ, ມໂນຣມນ຺ຕິ ອຕ຺ໂຖ. ອເນກຈິຕ຺ຕນ຺ຕິ ອເນເກຫິ ອຸຍ຺ຍານກປ຺ປຣຸກ຺ຂໂປກ຺ຂຣຓິອາທີຫິ ວິມາເນສຸ ຈ ອເນເກຫິ ຠິຕ຺ຕິວິເສສາທີຫິ ຈິຕ຺ຕໍ. ນຣນາຣິເສວິຕນ຺ຕິ ປຣິວາຣຠູເຕຫິ ເທວປຸຕ຺ເຕຫິ ເທວຘີຕາຫິ ຈ ອຸປເສວິຕໍ.

໙໔. ອິທ຺ຘີ ວິກຸພ຺ພນ຺ຕິ ອເນກຣູປາຕິ ນານາຣູປານໍ ວິທໍສເນນ ອເນກຣູປາ ກມ຺ມານຸຠາວສິທ຺ຘາ ອິທ຺ຘີ ວິກຸພ຺ພນ຺ຕີ ວິກຸພ຺ພນິທ຺ຘິໂຍ ວລຎ຺ເຊນ຺ຕີ ອຈ຺ຉສີຕິ ໂຍຊນາ.

໙໗. ອນຎ຺ຎມນາຕິ ປຕິພ຺ພຕາ, ປຕິໂຕ ອຎ຺ຎສ຺ມິໍ ມໂນ ເອຕິສ຺ສາຕິ ອຎ຺ຎມນາ, ນ ອຎ຺ຎມນາຕິ ອນຎ຺ຎມນາ, ມຍ຺ຫໍ ສາມິກໂຕ ອຎ຺ຎສ຺ມິໍ ປຸຣິເສ ປາປກໍ ຈິຕ຺ຕໍ ນ ອຸປ຺ປາເທສິນ຺ຕິ ອຕ຺ໂຖ. ມາຕາວ ປຸຕ຺ຕໍ ອນຸຣກ຺ຂມານາຕິ ຍຖາ ມາຕາ ປຸຕ຺ຕໍ, ເອວໍ ມຍ຺ຫໍ ສາມິກໍ, ສພ຺ເພປິ ວາ ສຕ຺ເຕ ຫິເຕສິຕາຍ ອຫິຕາປນຍນກາມຕາຍ ຈ ອນຸທ຺ທຍມານາ. ກຸທ຺ຘາປິຫໍ ນປ຺ຜຣຸສໍ ອໂວຈນ຺ຕິ ປເຣນ ກຕໍ ອຜາສຸກໍ ປຏິຈ຺ຈ ກຸທ຺ຘາປິ ສມານາ ອຫໍ ຜຣຸສວຈນໍ ນ ກເຖສິໍ, ອຎ຺ຎທຕ຺ຖຸ ປິຍວຈນເມວ ອຠາສິນ຺ຕິ ອຘິປ຺ປາໂຍ.

໙໘. ສຈ຺ເຈ ຐິຕາຕິ ສຈ຺ເຈ ປຕິຏ຺ຐິຕາ. ຍສ຺ມາ ມຸສາວາທາ ເວຣມຓິຍາ ສຈ຺ເຈ ປຕິຏ຺ຐິຕາ ນາມ ໂຫຕິ, ນ ກທາຈິ ສຈ຺ຈວຈນມຕ຺ເຕນາຕິ ອາຫ – ໂມສວຊ຺ຊໍ ປຫາຍາຕິ ມຸສາວາທໍ ປຫາຍ. ທາເນ ຣຕາຕິ ທາເນ ອຠິຣຕາ, ຍຸຕ຺ຕປ຺ປຍຸຕ຺ຕາຕິ ອຕ຺ໂຖ. ສງ຺ຄຫິຕຕ຺ຕຠາວາຕິ ສງ຺ຄຫວຕ຺ຖູຫິ ອຕ຺ຕານໍ ວິຍ ສຠາເວເນວ ປເຣສໍ ສງ຺ຄຓ຺ຫນສີລາ ອນ຺ນຎ຺ຈ ປານຎ຺ຈ ກມ຺ມຜລສທ຺ຘາຍ ປສນ຺ນຈິຕ຺ຕາ ສກ຺ກຈ຺ຈໍ ຈິຕ຺ຕີກາເຣນ ອທາສິໍ, ອຎ຺ຎຎ຺ຈ ວຕ຺ຖາທິທານໍ ວິປຸລໍ ອຸຬາຣໍ ອທາສິນ຺ຕິ ໂຍຊນາ. ເສສໍ ວຸຕ຺ຕນຍເມວ.

ປຕິພ຺ພຕາວິມານວຓ຺ຓນາ ນິຏ຺ຐິຕາ.