໗. ທ຺ວິຘາປຖສຸຕ຺ຕວຓ຺ຓນາ

໗໗. ສຕ຺ຕເມ ອທ຺ຘານມຄ຺ຄປຏິປນ຺ໂນຕິ ອທ຺ຘານສງ຺ຂາຕໍ ທີຆມຄ຺ຄໍ ປຏິປນ຺ໂນ ຄຈ຺ຉນ຺ໂຕ ໂຫຕິ. ນາຄສມາເລນາຕິ ເອວໍນາມເກນ ເຖເຣນ. ປຈ຺ຉາສມເຓນາຕິ ອຍໍ ຕທາ ຠຄວໂຕ ອຸປຏ຺ຐາໂກ ອໂຫສິ. ເຕນ ນໍ ປຈ຺ຉາສມຓໍ ກຕ຺ວາ ມຄ຺ຄໍ ປຏິປຊ຺ຊິ. ຠຄວໂຕ ຫິ ປຐມໂພຘິຍໍ ວີສຕິວສ຺ສານິ ອນິພທ຺ຘາ ອຸປຏ຺ຐາກາ ອເຫສຸໍ, ຕໂຕ ປຣໍ ຍາວ ປຣິນິພ຺ພານາ ປຎ຺ຈວີສຕິວສ຺ສານິ ອາຍສ຺ມາ ອານນ຺ໂທ ຉາຍາວ ອຸປຏ຺ຐາສິ. ອຍໍ ປນ ອນິພທ຺ຘຸປຏ຺ຐາກກາໂລ. ເຕນ ວຸຕ຺ຕໍ – ‘‘ອາຍສ຺ມຕາ ນາຄສມາເລນ ປຈ຺ຉາສມເຓນາ’’ຕິ. ທ຺ວິຘາປຖນ຺ຕິ ທ຺ວິຘາຠູຕໍ ມຄ຺ຄໍ. ‘‘ທ຺ເວຘາປຖ’’ນ຺ຕິປິ ປຐນ຺ຕິ ອາຍສ຺ມາ ນາຄສມາໂລ ອຕ຺ຕນາ ປຸພ຺ເພ ຕຕ຺ຖ ກຕປຣິຈຍຕ຺ຕາ ອຸຊຸຠາວຎ຺ຈສ຺ສ ສນ຺ຘາຍ ວທຕິ ‘‘ອຍໍ, ຠນ຺ເຕ ຠຄວາ, ປນ຺ໂຖ’’ຕິ.

ຠຄວາ ປນ ຕທາ ຕສ຺ສ ສປຣິສ຺ສຍຠາວໍ ຎຕ຺ວາ ຕໂຕ ອຎ຺ຎໍ ມຄ຺ຄໍ ຄນ຺ຕຸກາໂມ ‘‘ອຍໍ, ນາຄສມາລ, ປນ຺ໂຖ’’ຕິ ອາຫ. ‘‘ສປຣິສ຺ສໂຍ’’ຕິ ຈ ວຸຕ຺ເຕ ອສທ຺ທຫິຕ຺ວາ ‘‘ຠຄວາ ນ ຕຕ຺ຖ ປຣິສ຺ສໂຍ’’ຕິ ວເທຍ຺ຍ, ຕທສ຺ສ ທີຆຣຕ຺ຕໍ ອຫິຕາຍ ທຸກ຺ຂາຍາຕິ ‘‘ສປຣິສ຺ສໂຍ’’ຕິ ນ ກເຖສິ. ຕິກ຺ຂຕ຺ຕຸໍ ‘‘ອຍໍ ປນ຺ໂຖ, ອິມິນາ ຄຈ຺ຉາມາ’’ຕິ ວຕ຺ວາ ຈຕຸຕ຺ຖວາເຣ ‘‘ນ ຠຄວາ ອິມິນາ ມຄ຺ເຄນ ຄນ຺ຕຸໍ ອິຈ຺ຉຕິ, ອຍເມວ ຈ ອຸຊຸມຄ຺ໂຄ, ຫນ຺ທາຫໍ ຠຄວໂຕ ປຕ຺ຕຈີວຣໍ ທຕ຺ວາ ອິມິນາ ມຄ຺ເຄນ ຄມິສ຺ສາມີ’’ຕິ ຈິນ຺ເຕຕ຺ວາ ສຕ຺ຖຸ ປຕ຺ຕຈີວຣໍ ທາຕຸໍ ອສກ຺ໂກນ຺ໂຕ ຠູມິຍໍ ຐເປຕ຺ວາ ປຈ຺ຈຸປຏ຺ຐິເຕນ ທຸກ຺ຂສໍວຕ຺ຕນິເກນ ກມ຺ມຸນາ ໂຈທິຍມາໂນ ຠຄວໂຕ ວຈນໍ ອນາທິຍິຕ຺ວາວ ປກ຺ກາມິ. ເຕນ ວຸຕ຺ຕໍ – ‘‘ອຖ ໂຂ ອາຍສ຺ມາ ນາຄສມາໂລ ຠຄວໂຕ ປຕ຺ຕຈີວຣໍ ຕຕ຺ເຖວ ຉມາຍໍ ນິກ຺ຂິປິຕ຺ວາ ປກ຺ກາມີ’’ຕິ. ຕຕ຺ຖ ຠຄວໂຕ ປຕ຺ຕຈີວຣນ຺ຕິ ອຕ຺ຕໂນ ຫຕ຺ຖຄຕໍ ຠຄວໂຕ ປຕ຺ຕຈີວຣໍ. ຕຕ຺ເຖວາຕິ ຕສ຺ມິໍເຍວ ມຄ຺ເຄ ຉມາຍໍ ປຖວິຍໍ ນິກ຺ຂິປິຕ຺ວາ ປກ຺ກາມິ. ອິທໍ ໂວ ຠຄວາ ປຕ຺ຕຈີວຣໍ, ສເຈ ອິຈ຺ຉຖ, ຄຓ຺ຫຖ, ຍທິ ອຕ຺ຕນາ ອິຈ຺ຉິຕມຄ຺ຄໍເຍວ ຄນ຺ຕຸກາມຕ຺ຖາຕິ ອຘິປ຺ປາໂຍ. ຠຄວາປິ ອຕ຺ຕໂນ ປຕ຺ຕຈີວຣໍ ສຍເມວ ຄເຫຕ຺ວາ ຍຖາຘິປ຺ເປຕໍ ມຄ຺ຄໍ ປຏິປຊ຺ຊິ.

ອນ຺ຕຣາມຄ຺ເຄ ໂຈຣາ ນິກ຺ຂມິຕ຺ວາຕິ ຕທາ ກິຣ ປຎ຺ຈສຕາ ປຸຣິສາ ລຸທ຺ທາ ໂລຫິຕປາຓິໂນ ຣາຊາປຣາຘິໂນ ຫຸຕ຺ວາ ອຣຎ຺ຎໍ ປວິສິຕ຺ວາ ໂຈຣິກາຍ ຊີວິກໍ ກປ຺ເປນ຺ຕາ ‘‘ປາຣິປນ຺ຖິກຠາເວນ ຣຎ຺ໂຎ ອາຍປຖໍ ປຈ຺ຉິນ຺ທິສ຺ສາມາ’’ຕິ ມຄ຺ຄສມີເປ ອຣຎ຺ເຎ ຕິຏ຺ຐນ຺ຕິ. ເຕ ເຖຣໍ ເຕນ ມຄ຺ເຄນ ຄຈ຺ຉນ຺ຕໍ ທິສ຺ວາ ‘‘ອຍໍ ສມໂຓ ອິມິນາ ມຄ຺ເຄນ ອາຄຈ຺ຉຕິ, ອວຬຎ຺ຊິຕພ຺ພໍ ມຄ຺ຄໍ ວຬຎ຺ເຊຕິ, ອມ຺ຫາກໍ ອຕ຺ຖິຠາວໍ ນ ຊານາຕິ, ຫນ຺ທ ນໍ ຊານາເປສ຺ສາມາ’’ຕິ ກຸຊ຺ຌິຕ຺ວາ ຄຫນຏ຺ຐານໂຕ ເວເຄນ ນິກ຺ຂມິຕ຺ວາ ສຫສາ ເຖຣໍ ຠູມິຍໍ ປາເຕຕ຺ວາ ຫຕ຺ຖປາເທຫິ ໂກຏ຺ເຏຕ຺ວາ ມຕ຺ຕິກາປຕ຺ຕຎ຺ຈສ຺ສ ຠິນ຺ທິຕ຺ວາ ຈີວຣໍ ຂຓ຺ຑາຂຓ຺ຑິກໍ ຉິນ຺ທິຕ຺ວາ ປພ຺ພຊິຕຕ຺ຕາ ‘‘ຕໍ ນ ຫນາມ, ອິໂຕ ປຏ຺ຐາຍ ອິມສ຺ສ ມຄ຺ຄສ຺ສ ປຣິສ຺ສຍຠາວໍ ຊານາຫີ’’ຕິ ວິສ຺ສຊ຺ເຊສຸໍ. ເຕນ ວຸຕ຺ຕໍ – ‘‘ອຖ ໂຂ ອາຍສ຺ມໂຕ…ເປ… ວິປ຺ຜາເລສຸ’’ນ຺ຕິ.

ຠຄວາປິ ‘‘ອຍໍ ເຕນ ມຄ຺ເຄນ ຄໂຕ ໂຈເຣຫິ ພາຘິໂຕ ມໍ ປຣິເຍສິຕ຺ວາ ອິທາເນວ ອາຄມິສ຺ສຕີ’’ຕິ ຎຕ຺ວາ ໂຖກໍ ຄນ຺ຕ຺ວາ ມຄ຺ຄາ ໂອກ຺ກມ຺ມ ອຎ຺ຎຕຣສ຺ມິໍ ຣຸກ຺ຂມູເລ ນິສີທິ. ອາຍສ຺ມາປິ ໂຂ ນາຄສມາໂລ ປຈ຺ຈາຄນ຺ຕ຺ວາ ສຕ຺ຖາຣາ ຄຕມຄ຺ຄເມວ ຄເຫຕ຺ວາ ຄຈ຺ຉນ຺ໂຕ ຕສ຺ມິໍ ຣຸກ຺ຂມູເລ ຠຄວນ຺ຕໍ ປສ຺ສິຕ຺ວາ ອຸປສງ຺ກມິຕ຺ວາ ວນ຺ທິຕ຺ວາ ຕໍ ປວຕ຺ຕິໍ ສພ຺ພໍ ອາໂຣເຈສິ. ເຕນ ວຸຕ຺ຕໍ – ‘‘ອຖ ໂຂ ອາຍສ຺ມາ ນາຄສມາໂລ…ເປ… ສງ຺ຆາຏິຎ຺ຈ ວິປ຺ຜາເລສຸ’’ນ຺ຕິ.

ເອຕມຕ຺ຖໍ ວິທິຕ຺ວາຕິ ເອຕໍ ອາຍສ຺ມໂຕ ນາຄສມາລສ຺ສ ອຕ຺ຕໂນ ວຈນໍ ອນາທິຍິຕ຺ວາ ອເຂມນ຺ຕມຄ຺ຄຄມນໍ, ອຕ຺ຕໂນ ຈ ເຂມນ຺ຕມຄ຺ຄຄມນໍ ວິທິຕ຺ວາ ຕທຕ຺ຖທີປນໍ ອິມໍ ອຸທານໍ ອຸທາເນສິ.

ຕຕ຺ຖ ສທ຺ຘິໍ ຈຣນ຺ຕິ ສຫ ຈຣນ຺ໂຕ. ເອກໂຕ ວສນ຺ຕິ ອິທໍ ຕສ຺ເສວ ເວວຈນໍ, ສຫ ວສນ຺ໂຕຕິ ອຕ຺ໂຖ. ມິສ຺ໂສ ອຎ຺ຎຊເນນ ເວທຄູຕິ ເວທິຕພ຺ພຏ຺ເຐນ ເວທສງ຺ຂາເຕນ ຈຕຸສຈ຺ຈອຣິຍມຄ຺ຄຎາເຓນ ຄຕຕ຺ຕາ ອຘິຄຕຕ຺ຕາ, ເວທສ຺ສ ວາ ສກລສ຺ສ ເຎຍ຺ຍສ຺ສ ປາຣໍ ຄຕຕ຺ຕາ ເວທຄູ. ອຕ຺ຕໂນ ຫິຕາຫິຕໍ ນ ຊານາຕີຕິ ອຎ຺ໂຎ, ອວິທ຺ວາ ພາໂລຕິ ອຕ຺ໂຖ. ເຕນ ອຎ຺ເຎນ ຊເນນ ມິສ຺ໂສ ສຫຈຣຓມຕ຺ເຕນ ມິສ຺ໂສ. ວິທ຺ວາ ປຊຫາຕິ ປາປກນ຺ຕິ ເຕນ ເວທຄູຠາເວນ ວິທ຺ວາ ຊານນ຺ໂຕ ປາປກໍ ອຠທ຺ທກໍ ອຕ຺ຕໂນ ທຸກ຺ຂາວຫໍ ປຊຫາຕິ, ປາປກໍ ວາ ອກລ຺ຍາຓປຸຄ຺ຄລໍ ປຊຫາຕິ. ຍຖາ ກິໍ? ໂກຎ຺ໂຈ ຂີຣປໂກວ ນິນ຺ນຄນ຺ຕິ ຍຖາ ໂກຎ຺ຈສກຸໂຓ ອຸທກມິສ຺ສິເຕ ຂີເຣ ອຸປນີເຕ ວິນາ ໂຕຍໍ ຂີຣມຕ຺ຕສ຺ເສວ ປິວນໂຕ ຂີຣປໂກ ນິນ຺ນຏ຺ຐານຄມເນນ ນິນ຺ນຄສງ຺ຂາຕໍ ອຸທກໍ ປຊຫາຕິ ວຊ຺ເຊຕິ, ເອວໍ ປຓ຺ຑິໂຕ ກິຣ ທຸປ຺ປຎ຺ຎປຸຄ຺ຄເລຫິ ຐານນິສຊ຺ຊາທີສຸ ສຫຠູໂຕປິ ອາຈາເຣນ ເຕ ປຊຫາຕິ, ນ ກທາຈິປິ ສມ຺ມິສ຺ໂສ ໂຫຕິ.

ສຕ຺ຕມສຸຕ຺ຕວຓ຺ຓນາ ນິຏ຺ຐິຕາ.