໔. ຈຕຸຕ຺ຖນິພ຺ພານປຏິສໍຍຸຕ຺ຕສຸຕ຺ຕວຓ຺ຓນາ

໗໔. ຈຕຸຕ຺ເຖ ອຖ ໂຂ ຠຄວາ ເອຕມຕ຺ຖໍ ວິທິຕ຺ວາຕິ ຕທາ ກິຣ ຠຄວຕາ ອເນກປຣິຍາເຍນ ສນ຺ທສ຺ສນາທິວເສນ ນິພ຺ພານປຏິສໍຍຸຕ຺ຕາຍ ຘມ຺ມເທສນາຍ ກຕາຍ ເຕສໍ ຠິກ຺ຂູນໍ ເອຕທໂຫສິ – ‘‘ອຍໍ ຕາວ ຠຄວຕາ ອມຕມຫານິພ຺ພານຘາຕຸຍາ ອເນກາກາຣໂວກາຣໍ ອານິສໍສໍ ທສ຺ເສນ຺ເຕນ ອນຎ຺ຎສາຘາຣໂຓ ອານຸຠາໂວ ປກາສິໂຕ, ອຘິຄມູປາໂຍ ປນສ຺ສາ ນ ຠາສິໂຕ, ກຖໍ ນຸ ໂຂ ປຏິປຊ຺ຊນ຺ເຕຫິ ອມ຺ເຫຫິ ອຍໍ ອຘິຄນ຺ຕພ຺ພາ’’ຕິ. ອຖ ຠຄວາ ເຕສໍ ຠິກ຺ຂູນໍ ເອຕໍ ຍຖາວຸຕ຺ຕປຣິວິຕກ຺ກສງ຺ຂາຕໍ ອຕ຺ຖໍ ສພ຺ພາກາຣໂຕ ວິທິຕ຺ວາ. ອິມໍ ອຸທານນ຺ຕິ ຕຓ຺ຫາວເສນ ກຕ຺ຖຈິ ອນິສ຺ສິຕສ຺ສ ປສ຺ສທ຺ຘກາຍຈິຕ຺ຕສ຺ສ ວີຖິປຏິປນ຺ນວິປສ຺ສນສ຺ສ ອຣິຍມຄ຺ເຄນ ອນວເສສໂຕ ຕຓ຺ຫາປຫາເນນ ນິພ຺ພານາຘິຄມວິຠາວນໍ ອິມໍ ອຸທານໍ ອຸທາເນສິ.

ຕຕ຺ຖ ນິສ຺ສິຕສ຺ສ ຈລິຕນ຺ຕິ ຣູປາທິສງ຺ຂາເຣ ຕຓ຺ຫາທິຏ຺ຐີຫິ ນິສ຺ສິຕສ຺ສ ຈລິຕໍ ‘‘ເອຕໍ ມມ, ເອໂສ ເມ ອຕ຺ຕາ’’ຕິ ຕຓ຺ຫາທິຏ຺ຐິວິປ຺ຜນ຺ທິຕໍ ໂຫຕິ. ອປ຺ປຫີນຕຓ຺ຫາທິຏ຺ຐິກສ຺ສ ຫິ ປຸຄ຺ຄລສ຺ສ ສຸຂາທີສຸ ອຸປ຺ປນ຺ເນສຸ ຕານິ ອຠິຠຸຍ຺ຍ ວິຫຣິຕຸໍ ອສກ຺ໂກນ຺ຕສ຺ສ ‘‘ມມ ເວທນາ, ອຫໍ ເວທິຍາມີ’’ຕິອາທິນາ ຕຓ຺ຫາທິຏ຺ຐິຄາຫວເສນ ກຸສລປ຺ປວຕ຺ຕິໂຕ ຈິຕ຺ຕສນ຺ຕານສ຺ສ ຈລນໍ ກມ຺ປນໍ, ອວກ຺ຂລິຕໍ ວາ ໂຫຕີຕິ ອຕ຺ໂຖ. ອນິສ຺ສິຕສ຺ສ ຈລິຕໍ ນຕ຺ຖີຕິ ໂຍ ປນ ວິສຸທ຺ຘິປຏິປທໍ ປຏິປຊ຺ຊນ຺ໂຕ ສມຖວິປສ຺ສນາຫິ ຕຓ຺ຫາທິຏ຺ຐິໂຍ ວິກ຺ຂມ຺ເຠຕ຺ວາ ອນິຈ຺ຈາທິວເສນ ສງ຺ຂາເຣ ສມ຺ມສນ຺ໂຕ ວິຫຣຕິ, ຕສ຺ສ ຕໍ ອນິສ຺ສິຕສ຺ສ ຍຖາວຸຕ຺ຕໍ ຈລິຕໍ ອວກ຺ຂລິຕໍ, ວິປ຺ຜນ຺ທິຕໍ ວາ ນຕ຺ຖິ ກາຣຓສ຺ສ ສຸວິກ຺ຂມ຺ຠິຕຕ຺ຕາ.

ຈລິເຕ ອສຕີຕິ ຍຖາວຸຕ຺ເຕ ຈລິເຕ ອສຕິ ຍຖາ ຕຓ຺ຫາທິຏ຺ຐິຄາຫາ ນປ຺ປວຕ຺ຕນ຺ຕິ, ຕຖາ ວີຖິປຏິປນ຺ນາຍ ວິປສ຺ສນາຍ ຕໍ ອຸສ຺ສຸກ຺ກນ຺ຕສ຺ສ. ປສ຺ສທ຺ຘີຕິ ວິປສ຺ສນາຈິຕ຺ຕສຫຊາຕານໍ ກາຍຈິຕ຺ຕານໍ ສາຣມ຺ຠກຣກິເລສວູປສມິນີ ທຸວິຘາປິ ປສ຺ສທ຺ຘິ ໂຫຕິ. ປສ຺ສທ຺ຘິຍາ ສຕິ ນຕິ ນ ໂຫຕີຕິ ປຸພ຺ເພນາປຣໍ ວິເສສຍຸຕ຺ຕາຍ ປສ຺ສທ຺ຘິຍາ ສຕິ ອນວຊ຺ຊສຸຂາຘິຏ຺ຐານໍ ສມາຘິໍ ວຑ຺ເຒຕ຺ວາ ຕໍ ປຎ຺ຎາຍ ສມວາຍກຣເຓນ ສມຖວິປສ຺ສນໍ ຍຸຄນທ຺ຘໍ ໂຍເຊຕ຺ວາ ມຄ຺ຄປຣມ຺ປຣາຍ ກິເລເສ ເຂເປນ຺ຕສ຺ສ ກາມຠວາທີສຸ ນມນໂຕ ‘‘ນຕີ’’ຕິ ລທ຺ຘນາມາ ຕຓ຺ຫາ ອຣຫຕ຺ຕມຄ຺ຄກ຺ຂເຓ ອນວເສສໂຕ ນ ໂຫຕິ, ອນຸປ຺ປຕ຺ຕິຘມ຺ມຕໍ ອາປາທິຕຕ຺ຕາ ນ ອຸປ຺ປຊ຺ຊຕີຕິ ອຕ຺ໂຖ.

ນຕິຍາ ອສຕີຕິ ອຣຫຕ຺ຕມຄ຺ເຄນ ຕຓ຺ຫາຍ ສຸປ຺ປຫີນຕ຺ຕາ ຠວາທິອຕ຺ຖາຍ ອາລຍນິກນ຺ຕິ ປຣິຍຸຏ຺ຐາເນ ອສຕິ. ອາຄຕິຄຕິ ນ ໂຫຕີຕິ ປຏິສນ຺ຘິວເສນ ອິຘ ອາຄຕິ ອາຄມນໍ ຈຸຕິວເສນ ຄຕິ ອິໂຕ ປຣໂລກຄມນໍ ເປຈ຺ຈຠາໂວ ນ ໂຫຕິ ນ ປວຕ຺ຕຕິ. ອາຄຕິຄຕິຍາ ອສຕີຕິ ວຸຕ຺ຕນເຍນ ອາຄຕິຍາ ຈ ຄຕິຍາ ຈ ອສຕິ. ຈຸຕູປປາໂຕ ນ ໂຫຕີຕິ ອປຣາປຣໍ ຈວນຸປປຊ຺ຊນໍ ນ ໂຫຕິ ນ ປວຕ຺ຕຕິ. ອສຕິ ຫິ ກິເລສວຏ຺ເຏ ກມ຺ມວຏ຺ຏໍ ປຈ຺ຉິນ຺ນເມວ, ປຈ຺ຉິນ຺ເນ ຈ ຕສ຺ມິໍ ກຸໂຕ ວິປາກວຏ຺ຏສ຺ສ ສມ຺ຠໂວ. ເຕນາຫ – ‘‘ຈຸຕູປປາເຕ ອສຕິ ເນວິຘ ນ ຫຸຣ’’ນ຺ຕິອາທິ. ຕຕ຺ຖ ຍໍ ວຕ຺ຕພ຺ພໍ, ຕໍ ເຫຏ຺ຐາ ພາຫິຍສຸຕ຺ເຕ ວິຕ຺ຖາຣໂຕ ວຸຕ຺ຕເມວ. ຕສ຺ມາ ຕຕ຺ຖ ວຸຕ຺ຕນເຍເນວ ອຕ຺ໂຖ ເວທິຕພ຺ໂພ.

ອິຕິ ຠຄວາ ອິຘາປິ ເຕສໍ ຠິກ຺ຂູນໍ ອນວເສສໂຕ ວຏ຺ຏທຸກ຺ຂວູປສມເຫຕຸຠູຕໍ ອມຕມຫານິພ຺ພານສ຺ສ ອານຸຠາວໍ ສມ຺ມາປຏິປຕ຺ຕິຍາ ປກາເສຕິ.

ຈຕຸຕ຺ຖສຸຕ຺ຕວຓ຺ຓນາ ນິຏ຺ຐິຕາ.