໘. ກຈ຺ຈານສຸຕ຺ຕວຓ຺ຓນາ

໖໘. ອຏ຺ຐເມ ອຊ຺ຌຕ຺ຕນ຺ຕິ ເອຕ຺ຖ ອຍໍ ອຊ຺ຌຕ຺ຕສທ຺ໂທ ‘‘ຉ ອຊ຺ຌຕ຺ຕິການິ ອາຍຕນານີ’’ຕິອາທີສຸ (ມ. ນິ. ໓.໓໐໔) ອຊ຺ຌຕ຺ຕຊ຺ຌຕ຺ເຕ ອາຄໂຕ. ‘‘ອຊ຺ຌຕ຺ຕາ ຘມ຺ມາ (ຘ. ສ. ຕິກມາຕິກາ ໒໐), ອຊ຺ຌຕ຺ຕໍ ວາ ກາເຍ ກາຍານຸປສ຺ສີ’’ຕິອາທີສຸ (ທີ. ນິ. ໒.໓໗໓-໓໗໔) ນິຍກຊ຺ຌຕ຺ເຕ. ‘‘ສພ຺ພນິມິຕ຺ຕານໍ ອມນສິກາຣາ ອຊ຺ຌຕ຺ຕໍ ສຸຎ຺ຎຕໍ ອຸປສມ຺ປຊ຺ຊ ວິຫຣຕີ’’ຕິອາທີສຸ (ມ. ນິ. ໓.໑໘໗) ວິສຍຊ຺ຌຕ຺ເຕ, ອິສ຺ສຣິຍຏ຺ຐາເນຕິ ອຕ຺ໂຖ. ຜລສມາປຕ຺ຕິ ຫິ ພຸທ຺ຘານໍ ອິສ຺ສຣິຍຏ຺ຐານໍ ນາມ. ‘‘ເຕນານນ຺ທ, ຠິກ຺ຂຸນາ ຕສ຺ມິໍເຍວ ປຸຣິມສ຺ມິໍ ສມາຘິນິມິຕ຺ເຕ ອຊ຺ຌຕ຺ຕເມວ ຈິຕ຺ຕໍ ສຓ຺ຐເປຕພ຺ພ’’ນ຺ຕິອາທີສຸ (ມ. ນິ. ໓.໑໘໘) ໂຄຈຣຊ຺ຌຕ຺ເຕ. ອິຘາປິ ໂຄຈຣຊ຺ຌຕ຺ເຕເຍວ ທຏ຺ຐພ຺ໂພ. ຕສ຺ມາ ອຊ຺ຌຕ຺ຕນ຺ຕິ ໂຄຈຣຊ຺ຌຕ຺ຕຠູເຕ ກມ຺ມຏ຺ຐານາຣມ຺ມເຓຕິ ວຸຕ຺ຕໍ ໂຫຕິ. ປຣິມຸຂນ຺ຕິ ອຠິມຸຂໍ. ສູປຏ຺ຐິຕາຍາຕິ ສຸຏ຺ຐຸ ອຸປຏ຺ຐິຕາຍ ກາຍຄຕາຍ ສຕິຍາ. ສຕິສີເສນ ເຈຕ຺ຖ ຌານໍ ວຸຕ຺ຕໍ. ອິທໍ ວຸຕ຺ຕໍ ໂຫຕິ ‘‘ອຊ຺ຌຕ຺ຕໍ ກາຍານຸປສ຺ສນາສຕິປຏ຺ຐານວເສນ ປຏິລທ຺ຘໍ ອຸຬາຣໍ ຌານໍ ສມາປຊ຺ຊິຕ຺ວາ’’ຕິ.

ອຍຎ຺ຫິ ເຖໂຣ ຠຄວຕິ ສາວຕ຺ຖິຍໍ ວິຫຣນ຺ເຕ ເອກທິວສໍ ສາວຕ຺ຖິຍໍ ປິຓ຺ຑາຍ ຈຣິຕ຺ວາ ປຈ຺ຉາຠຕ຺ຕໍ ປິຓ຺ຑປາຕປ຺ປຏິກ຺ກນ຺ໂຕ ວິຫາຣໍ ປວິສິຕ຺ວາ ຠຄວໂຕ ວຕ຺ຕໍ ທສ຺ເສຕ຺ວາ ທິວາຏ຺ຐາເນ ທິວາວິຫາຣໍ ນິສິນ຺ໂນ ນານາສມາປຕ຺ຕີຫິ ທິວສຠາຄໍ ວີຕິນາເມຕ຺ວາ ສາຍນ຺ຫສມຍໍ ວິຫາຣມຊ຺ຌໍ ໂອຕຣິຕ຺ວາ ຠຄວຕິ ຄນ຺ຘກຸຏິຍໍ ນິສິນ຺ເນ ‘‘ອກາໂລ ຕາວ ຠຄວນ຺ຕໍ ອຸປສງ຺ກມິຕຸ’’ນ຺ຕິ ຄນ຺ຘກຸຏິຍາ ອວິທູເຣ, ອຎ຺ຎຕຣສ຺ມິໍ ຣຸກ຺ຂມູເລ ກາລປຣິຈ຺ເຉທໍ ກຕ຺ວາ ຍຖາວຸຕ຺ຕໍ ສມາປຕ຺ຕິໍ ສມາປຊ຺ຊິຕ຺ວາ ນິສີທິ. ສຕ຺ຖາ ຕໍ ຕຖານິສິນ຺ນໍ ຄນ຺ຘກຸຏິຍໍ ນິສິນ຺ໂນເຍວ ປສ຺ສິ. ເຕນ ວຸຕ຺ຕໍ – ‘‘ເຕນ ໂຂ ປນ ສມເຍນ ອາຍສ຺ມາ ມຫາກຈ຺ຈາໂນ…ເປ… ສູປຏ຺ຐິຕາຍາ’’ຕິ.

ເອຕມຕ຺ຖໍ ວິທິຕ຺ວາຕິ ເອຕໍ ອາຍສ຺ມໂຕ ມຫາກຈ຺ຈານຕ຺ເຖຣສ຺ສ ສຕິປຏ຺ຐານຠາວນາວເສນ ອຘິຄຕໍ ຌານໍ ປາທກໍ ກຕ຺ວາ ສມາປຊ຺ຊນໍ ສພ຺ພາກາຣໂຕ ວິທິຕ຺ວາ ຕທຕ຺ຖທີປນໍ ອິມໍ ອຸທານໍ ອຸທາເນສິ.

ຕຕ຺ຖ ຍສ຺ສ ສິຍາ ສພ຺ພທາ ສຕິ, ສຕຕໍ ກາຍຄຕາ ອຸປຏ຺ຐິຕາຕິ ຍສ຺ສ ອາຣທ຺ຘວິປສ຺ສກສ຺ສ ເອກທິວສໍ ຉ ໂກຏ຺ຐາເສ ກຕ຺ວາ ສພ຺ພສ຺ມິມ຺ປິ ກາເລ ນາມຣູປເຠເທນ ທຸວິເຘປິ ກາເຍ ຄຕາ ກາຍາຣມ຺ມຓາ ປຎ຺ຈນ຺ນໍ ອຸປາທານກ຺ຂນ຺ຘານໍ ອນິຈ຺ຈາທິສມ຺ມສນວເສນ ສຕຕໍ ນິຣນ຺ຕຣໍ ສາຕຈ຺ຈາຠິໂຍຄວເສນ ສຕິ ອຸປຏ຺ຐິຕາ ສິຍາ.

ອຍໍ ກິຣາຍສ຺ມາ ປຐມໍ ກາຍຄຕາສຕິກມ຺ມຏ຺ຐານວເສນ ຌານໍ ນິພ຺ພຕ຺ເຕຕ຺ວາ ຕໍ ປາທກໍ ກຕ຺ວາ ກາຍານຸປສ຺ສນາສຕິປຏ຺ຐານມຸເຂນ ວິປສ຺ສນໍ ປຏ຺ຐເປຕ຺ວາ ອຣຫຕ຺ຕໍ ປຕ຺ໂຕ. ໂສ ອປຣຠາເຄປິ ເຍຠຸຍ຺ເຍນ ຕເມວ ຌານໍ ສມາປຊ຺ຊິຕ຺ວາ ວຸຏ຺ຐາຍ ຕເຖວ ຈ ວິປສ຺ສິຕ຺ວາ ຜລສມາປຕ຺ຕິໍ ສມາປຊ຺ຊຕິ. ສ຺ວາຍໍ ເຍນ ວິຘິນາ ອຣຫຕ຺ຕໍ ປຕ຺ໂຕ, ຕໍ ວິຘິໍ ທສ຺ເສນ຺ໂຕ ສຕ຺ຖາ ‘‘ຍສ຺ສ ສິຍາ ສພ຺ພທາ ສຕິ, ສຕຕໍ ກາຍຄຕາ ອຸປຏ຺ຐິຕາ’’ຕິ ວຕ຺ວາ ຕສ຺ສາ ອຸປຏ຺ຐານາກາຣໍ ວິຠາເວຕຸໍ ‘‘ໂນ ຈສ຺ສ ໂນ ຈ ເມ ສິຍາ, ນ ຠວິສ຺ສຕິ ນ ຈ ເມ ຠວິສ຺ສຕີ’’ຕິ ອາຫ.

ຕສ຺ສຕ຺ໂຖ ທ຺ວິຘາ ເວທິຕພ຺ໂພ ສມ຺ມສນໂຕ ປຸພ຺ພຠາຄວເສນ ສມ຺ມສນກາລວເສນ ຈາຕິ. ເຕສຸ ປຸພ຺ພຠາຄວເສນ ຕາວ ໂນ ຈສ຺ສ ໂນ ຈ ເມ ສິຍາຕິ ອຕີຕກາເລ ມມ ກິເລສກມ຺ມໍ ໂນ ຈສ຺ສ ນ ຠເວຍ຺ຍ ເຈ, ອິມສ຺ມິໍ ປຈ຺ຈຸປ຺ປນ຺ນກາເລ ອຍໍ ອຕ຺ຕຠາໂວ ໂນ ຈ ເມ ສິຍາ ນ ເມ ອຸປ຺ປຊ຺ເຊຍ຺ຍ. ຍສ຺ມາ ປນ ເມ ອຕີເຕ ກມ຺ມກິເລສາ ອເຫສຸໍ, ຕສ຺ມາ ຕໍນິມິຕ຺ໂຕ ເອຕຣຫິ ອຍໍ ເມ ອຕ຺ຕຠາໂວ ປວຕ຺ຕຕິ. ນ ຠວິສ຺ສຕິ ນ ຈ ເມ ຠວິສ຺ສຕີຕິ ອິມສ຺ມິໍ ອຕ຺ຕຠາເວ ປຏິປກ຺ຂາຘິຄເມນ ກິເລສກມ຺ມໍ ນ ຠວິສ຺ສຕິ ນ ອຸປ຺ປຊ຺ຊິສ຺ສຕິ ເມ, ອາຍຕິໍ ວິປາກວຏ຺ຏໍ ນ ຈ ເມ ຠວິສ຺ສຕິ ນ ເມ ປວຕ຺ຕິສ຺ສຕີຕິ. ເອວໍ ກາລຕ຺ຕເຍ ກມ຺ມກິເລສເຫຕຸກໍ ອິທໍ ມຍ຺ຫໍ ອຕ຺ຕຠາວສງ຺ຂາຕໍ ຂນ຺ຘປຎ຺ຈກໍ, ນ ອິສ຺ສຣາທິເຫຕຸກໍ, ຍຖາ ຈ ມຍ຺ຫໍ, ເອວໍ ສພ຺ພສຕ຺ຕານນ຺ຕິ ສປ຺ປຈ຺ຈຍນາມຣູປທສ຺ສນໍ ປກາສິຕໍ ໂຫຕິ.

ສມ຺ມສນກາລວເສນ ປນ ໂນ ຈສ຺ສ ໂນ ຈ ເມ ສິຍາຕິ ຍສ຺ມາ ອິທໍ ຂນ຺ຘປຎ຺ຈກໍ ຫຸຕ຺ວາ ອຠາວຏ຺ເຐນ ອນິຈ຺ຈໍ, ອຠິຓ຺ຫປຏິປີຬນຏ຺ເຐນ ທຸກ຺ຂໍ, ອວສວຕ຺ຕນຏ຺ເຐນ ອນຕ຺ຕາ, ເອວໍ ຍທິ ອຍໍ ອຕ຺ຕາ ນາມ ນາປິ ຂນ຺ຘປຎ຺ຈກວິນິມຸຕ຺ໂຕ ໂກຈິ ໂນ ຈສ຺ສ ໂນ ຈ ສິຍາ ນ ຠເວຍ຺ຍ, ເອວໍ, ຠນ຺ເຕ, ໂນ ຈ ເມ ສິຍາ ມມ ສນ຺ຕກໍ ນາມ ກິຎ຺ຈິ ນ ຠເວຍ຺ຍ. ນ ຠວິສ຺ສຕີຕິ ອຕ຺ຕນິ ອຕ຺ຕນິເຍ ຠວິຕພ຺ພໍ ຍຖາ ຈິທໍ ນາມຣູປໍ ເອຕຣຫິ ຈ ອຕີເຕ ຈ ອຕ຺ຕຕ຺ຕນິຍໍ ສຸຎ຺ຎໍ, ເອວໍ ນ ຠວິສ຺ສຕິ ນ ເມ ຠວິສ຺ສຕິ, ອນາຄເຕປິ ຂນ຺ຘວິນິມຸຕ຺ໂຕ ອຕ຺ຕາ ນາມ ນ ໂກຈິ ນ ເມ ຠວິສ຺ສຕິ ນ ປວຕ຺ຕິສ຺ສຕິ, ຕໂຕ ເອວ ກິຎ຺ຈິ ປລິໂພຘຏ຺ຐານິຍໍ ນ ເມ ຠວິສ຺ສຕິ ອາຍຕິມ຺ປິ ອຕ຺ຕນິຍໍ ນາມ ນ ເມ ກິຎ຺ຈິ ຠວິສ຺ສຕີຕິ. ອິມິນາ ຕີສຸ ກາເລສຸ ‘‘ອຫ’’ນ຺ຕິ ຄເຫຕພ຺ພສ຺ສ ອຠາວໂຕ ‘‘ມມ’’ນ຺ຕິ ຄເຫຕພ຺ພສ຺ສ ຈ ອຠາວໍ ທສ຺ເສຕິ. ເຕນ ຈຕຸກ຺ໂກຏິກາ ສຸຎ຺ຎຕາ ປກາສິຕາ ໂຫຕິ.

ອນຸປຸພ຺ພວິຫາຣິ ຕຕ຺ຖ ໂສຕິ ເອວໍ ຕີສຸປິ ກາເລສຸ ອຕ຺ຕຕ຺ຕນິຍໍ ສຸຎ຺ຎຕໍ ຕຕ຺ຖ ສງ຺ຂາຣຄເຕ ອນຸປສ຺ສນ຺ໂຕ ອນຸກ຺ກເມນ ອຸທຍພ຺ພຍຎາຓາທິວິປສ຺ສນາຎາເຓສຸ ອຸປ຺ປຊ຺ຊມາເນສຸ ອນຸປຸພ຺ພວິປສ຺ສນາວິຫາຣວເສນ ອນຸປຸພ຺ພວິຫາຣີ ສມາໂນ. ກາເລເນວ ຕເຣ ວິສຕ຺ຕິກນ຺ຕິ ໂສ ເອວໍ ວິປສ຺ສນໍ ມຕ຺ຖກໍ ປາເປຕ຺ວາ ຐິໂຕ ໂຍຄາວຈໂຣ ອິນ຺ທ຺ຣິຍານໍ ປຣິປາກຄຕກາເລນ ວຸຏ຺ຐານຄາມິນິຍາ ວິປສ຺ສນາຍ ມຄ຺ເຄນ ຆຏິຕກາເລນ ອຣິຍມຄ຺ຄສ຺ສ ອຸປ຺ປຕ຺ຕິກາເລນ ສກລສ຺ສ ຠວຕ຺ຕຍສ຺ສ ສໍຕນນໂຕ ວິສຕ຺ຕິກາສງ຺ຂາຕໍ ຕຓ຺ຫໍ ຕເຣຍ຺ຍ, ວິຕຣິຕ຺ວາ ຕສ຺ສາ ປຣຕີເຣ ຕິຏ຺ເຐຍ຺ຍາຕິ ອຘິປ຺ປາໂຍ.

ອິຕິ ຠຄວາ ອຎ຺ຎາປເທເສນ ອາຍສ຺ມໂຕ ມຫາກຈ຺ຈານສ຺ສ ອຣຫຕ຺ຕຸປ຺ປຕ຺ຕິທີປນໍ ອຸທານໍ ອຸທາເນສິ.

ອຏ຺ຐມສຸຕ຺ຕວຓ຺ຓນາ ນິຏ຺ຐິຕາ.